Ndzima Ya Vukhume-mbirhi
Leswi Nkhuvulo Wa Wena Wu Vulaka Swona
1. Ha yini nkhuvulo wa mati wu fanele wu tsakisa un’wana ni un’wana wa hina?
HI LEMBE ra 29 C.E., Yesu u khuvuriwile, a nyuperisiwa ematini hi Yohane lowo Khuvula eNambyeni wa Yordani. Yehovha hi byakwe a a hlalerile naswona u kombise leswaku wa n’wi amukela. (Matewu 3:16, 17) Xisweswo, Yesu u veke xikombiso lexi vadyondzisiwa vakwe hinkwavo va faneleke va xi landzela. Endzhaku ka malembe manharhu ni hafu, Yesu u lerise vadyondzisiwa vakwe a ku: “Ndzi nyikiwe vulawuri hinkwabyo etilweni ni le misaveni. Hikokwalaho fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima.” (Matewu 28:18, 19) Xana wena u khuvuriwile, hi ku landza nkongomiso lowu Yesu a wu nyikeleke laha? Loko swi nga ri tano, xana u tilunghiselela ku endla tano?
2. Hi swihi swivutiso leswi faneleke swi hlamuriwa malunghana ni nkhuvulo?
2 Hambi u khuvuriwile kumbe wa ha tilunghiselela ku khuvuriwa, i swa nkoka leswaku un’wana ni un’wana loyi a lavaka ku tirhela Yehovha ni ku hanya emisaveni yakwe leyintshwa ya ku lulama, a yi twisisa kahle mhaka ya nkhuvulo. Hi leswi swivutiso swin’wana leswi lavaka tinhlamulo: Xana nkhuvulo wa Vakreste namuntlha wa fana ni nkhuvulo wa Yesu? Xana swi vula yini ku khuvuriwa “hi vito ra Tatana ni ra N’wana ni ra moya lowo kwetsima”? Xana swi vula yini ku hanya hi ku landza leswi nkhuvulo wa mati wa Vakreste wu yimelaka swona?
Nkhuvulo Lowu Endliweke Hi Yohane
3. Xana nkhuvulo wa Yohane a wu ri wa vamani?
3 Loko ka ha sele tin’hweti ta kwalomu ka tsevu leswaku Yesu a khuvuriwa, Yohane lowo Khuvula u fambe a dyondzisa emananga ya Yudiya, a ku: “Hundzukani, hikuva mfumo wa matilo wu tshinele.” (Matewu 3:1, 2) Vanhu va swi twile leswi Yohane a swi vuleke kutani va endla leswi a va byeleke swona. Va tivule swidyoho swa vona erivaleni, va hundzuka, kutani va ta eka Yohane leswaku a va khuvula eNambyeni wa Yordani. Nkhuvulo wolowo a wu ri wa Vayuda ntsena.—Luka 1:13-16; Mintirho 13:23, 24.
4. Ha yini Vayuda a va fanele va hundzuka hi ku hatlisa hi lembe-xidzana ro sungula?
4 Vayuda volavo a va fanele va hundzuka hi ku hatlisa. Le Ntshaveni ya Sinayi hi lembe ra 1513 B.C.E., vakokwa wa vona va endle ntwanano na Yehovha Xikwembu—ku nga ntwanano wo hlawuleka lowu endliweke ximfumo. Kambe hikwalaho ka swidyoho swa vona leswikulu, a va swi kotanga ku byarha vutihlamuleri lebyi a va ri na byona eka ntwanano wolowo, kutani ntwanano wolowo wu va avanyisile. Loko Yesu a fika emisaveni, xiyimo xa vona se a xi bihe ngopfu. “Siku lerikulu ni leri chavisaka ra Yehovha” leri Malakiya a vulavuleke ha rona a ri ri ekusuhi. Hi 70 C.E., “siku” rero ri fikile loko mavuthu ya Rhoma ma lovise muti wa Yerusalema, tempele ya wona ni Vayuda lava tlulaka miliyoni. Yohane lowo Khuvula, loyi a a byi hisekela vugandzeri bya ntiyiso, u rhumiwile ndzoviso wolowo wu nga si fika, “leswaku a lunghiselela Yehovha vanhu lava lunghekeke.” A va fanele va hundzuka eswidyohweni swa vona leswi va swi endleke hi ku tlula ntwanano wa Nawu wa Muxe kutani va lunghekela ku amukela N’wana wa Xikwembu, ku nga Yesu, loyi Yehovha a a n’wi rhuma eka vona.—Malakiya 4:4-6; Luka 1:17; Mintirho 19:4.
5. (a) Loko Yesu a ta leswaku a ta khuvuriwa, ha yini Yohane a a nga swi lavi ku n’wi khuvula? (b) Xana nkhuvulo wa Yesu a wu fanekisela yini?
5 Yesu a a ri un’wana wa lava va teke eka Yohane leswaku a ta va khuvula. Ha yini? Hi ku tiva leswaku ku hava xidyoho lexi Yesu a a fanele a xi phofula, Yohane u te: “Hi mina ndzi fanelaka ku khuvuriwa hi wena, ha yini wena u ta eka mina?” Kambe nkhuvulo wa Yesu a wu fanekisela swin’wana. Kutani Yesu u hlamule a ku: “Ndzi khuvule sweswi, hikuva hi ndlela yoleyo swa hi fanela ku hetisisa hinkwaswo leswi lulameke.” (Matewu 3:13-15) Nkhuvulo wa Yesu a wu nga fanekiseli ku hundzuka eswidyohweni, hikuva a a nga ri na xidyoho; naswona a ku nga laveki leswaku a tinyiketela eka Xikwembu, tanihi leswi a a ri wa rixaka leri ana se ri tinyiketeleke eka Yehovha. Ematshan’weni ya sweswo, ku khuvuriwa ka yena loko a ri ni malembe ya 30 a ku hlawulekile, naswona a ku kombisa leswaku u tiyimiserile ku endla ku rhandza ka Tata Wakwe wa le tilweni.
6. Xana Yesu a a tiyimisele ku fikela kwihi emhakeni ya ku endla ku rhandza ka Xikwembu?
6 Ku rhandza ka Xikwembu malunghana na Kreste Yesu a ku khumba mhaka ya Mfumo. (Luka 8:1) Nakambe a ku katsa ku endla gandzelo hi vutomi byakwe lebyi hetisekeke leswaku byi va nkutsulo naswona byi va xisekelo xa ntwanano lowuntshwa. (Matewu 20:28; 26:26-28; Vaheveru 10:5-10) Yesu a a swi teka swi ri swa nkoka swinene leswi ku khuvuriwa ka yena hi mati a swi fanekisela swona. A nga pfumelanga ku kavanyetiwa hi swin’wana. A a hanyela ku endla ku rhandza ka Xikwembu ku fikela emakumu ka vutomi byakwe bya laha misaveni naswona ntirho wakwe lowukulu a ku ri ku chumayela hi Mfumo wa Xikwembu.—Yohane 4:34.
Nkhuvulo Wa Mati Wa Vadyondzisiwa Lava Nga Vakreste
7. Ku sukela hi Pentekosta ya 33 C.E., xana Vakreste va byeriwe ku endla yini malunghana ni nkhuvulo?
7 Vadyondzisiwa va Yesu vo sungula va khuvuriwe ematini hi Yohane kutani va kongomisiwa eka Yesu tanihi lava va nga ta va swirho swa Mfumo wa le tilweni. (Yohane 3:25-30) Ehansi ka nkongomiso wa Yesu, vadyondzisiwa lava na vona va khuvule van’wana, naswona nkhuvulo wa kona a wu fana ni nkhuvulo wa Yohane. (Yohane 4:1, 2) Hambiswiritano, ku sukela hi Pentekosta ya 33 C.E., va sungule ku hetisisa xileriso xa ku khuvula vanhu “hi vito ra Tatana ni ra N’wana ni ra moya lowo kwetsima.” (Matewu 28:19) Nkambisiso wa leswi sweswo swi vulaka swona, wu ta ku vuyerisa swinene.
8. Xana swi vula yini ku khuvuriwa “hi vito ra Tatana”?
8 Xana swi vula yini ku khuvuriwa “hi vito ra Tatana”? Swi vula ku amukela vito rakwe, xikhundla xakwe, vulawuri byakwe, xikongomelo xakwe ni milawu yakwe. Xiya leswaku leswi swi katsa yini. (1) Malunghana ni vito rakwe, Pisalema 83:18 yi ri: “Wena loyi vito ra wena u nga Yehovha, wena u ri wexe u La nge Henhla-henhla emisaveni hinkwayo.” (2) Malunghana ni xikhundla xakwe, 2 Tihosi 19:15 yi ri: “Oho Yehovha . . . , hi wena ntsena Xikwembu xa ntiyiso.” (3) Malunghana ni vulawuri byakwe, Nhlavutelo 4:11 yi hi byela leswi: “Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo, naswona hikwalaho ka ku rhandza ka wena swi ve kona, swi tumbuluxiwile.” (4) Nakambe hi fanele hi pfumela leswaku Yehovha i Munyiki wa Vutomi, loyi a nga ni xikongomelo xa ku hi ponisa exidyohweni ni le ku feni: “Ku ponisa i ka Yehovha.” (Pisalema 3:8; 36:9) (5)Hi fanele hi pfumela leswaku Yehovha i Munyiki Lonkulu wa Nawu: “Yehovha i Muavanyisi wa hina, Yehovha i Munyiki wa nawu wa hina, Yehovha i Hosi ya hina.” (Esaya 33:22) Hikwalaho ka leswi a nga swilo leswi hinkwaswo, ha khutaziwa: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.”—Matewu 22:37.
9. Xana swi vula yini ku khuvuriwa “hi vito . . . ra N’wana”?
9 Xana ku khuvuriwa “hi vito . . . ra N’wana” swi vula yini? Swi vula ku xiya vito, xikhundla ni vulawuri bya Yesu Kreste. Vito rakwe leri nge Yesu, ri vula leswaku “Yehovha I Ku Ponisa.” U kuma xikhundla lexi hi leswi a nga N’wana wa Xikwembu la tswariweke a ri swakwe, mativula ya ntumbuluko wa Xikwembu. (Matewu 16:16; Vakolosa 1:15, 16) Malunghana ni N’wana loyi, Yohane 3:16 yi ri: “Xikwembu xi rhandze misava [ya vanhu lava kutsulekaka] swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” Hikwalaho ka leswi Yesu a feke a tshembekile, Xikwembu xi n’wi pfuxe eku feni kutani xi n’wi nyika vulawuri lebyintshwa. Hi ku ya hi muapostola Pawulo, Xikwembu xi “tlakusele [Yesu] exiyin’weni lexi tlakukeke” evuakweni hinkwabyo, i Yehovha ntsena a nga ehenhla ka yena. Hi yona mhaka leyi “matsolo hinkwawo . . . ma nkhinsama hi vito ra Yesu, naswona ririmi rin’wana ni rin’wana ri fanele ku twarisa erivaleni leswaku Yesu Kreste i Hosi leswaku ku vangamisiwa Xikwembu Tatana.” (Vafilipiya 2:9-11) Leswi swi vula ku yingisa swileriso swa Yesu, leswi humaka eka Yehovha hi byakwe.—Yohane 15:10.
10. Xana swi vula yini ku khuvuriwa “hi vito . . . ra moya lowo kwetsima”?
10 Xana swi vula yini ku khuvuriwa “hi vito . . . ra moya lowo kwetsima”? Swi vula ku amukela ntirho lowu endliwaka hi moya lowo kwetsima. Moya lowo kwetsima i yini? I matimba ya Yehovha lama tirhaka, lawa a hetisisaka swikongomelo swakwe ha wona. Yesu u byele valandzeri vakwe a ku: “Ndzi ta kombela Tatana kutani u ta mi nyika mupfuni un’wana leswaku a va na n’wina hi masiku, moya wa ntiyiso.” (Yohane 14:16, 17) Xana moya lowu wu ta va pfuna leswaku va endla yini? Yesu u ye emahlweni a ku eka vona: “Mi ta amukela matimba loko moya lowo kwetsima wu fika ehenhla ka n’wina, naswona mi ta va timbhoni ta mina eYerusalema swin’we ni le tikweni hinkwaro ra Yudiya ni le Samariya ni ku ya fika endhawini ya le kule swinene ya misava.” (Mintirho 1:8) Yehovha u tlhele a tirhisa moya lowo kwetsima ku huhutela vanhu leswaku va tsala Bibele: “Vuprofeta a byi si tisiwa hi ku rhandza ka munhu hambi ku ri rini, kambe vanhu a va vulavula leswi humaka eka Xikwembu va ri karhi va susumetiwa hi moya lowo kwetsima.” (2 Petro 1:21) Hikwalaho, loko hi dyondza Bibele, hi kombisa leswaku ha wu amukela ntirho wa moya lowo kwetsima. Ndlela yin’wana yo kombisa leswaku ha wu amukela moya lowo kwetsima i ku kombela Yehovha leswaku a hi pfuna hi kombisa “mihandzu ya moya,” ku nga “rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova, ku tikhoma.”—Vagalatiya 5:22, 23.
11. (a) I yini lexi nkhuvulo wu vulaka xona namuntlha? (b) Xana nkhuvulo wu fana njhani ni ku fa ni ku pfuxiwa?
11 Vanhu vo sungula lava khuvuriweke hi ku landza swiletelo swa Yesu a ku ri Vayuda swin’we ni vanhu lava hundzukeleke eka Vuyuda, ku sukela hi 33 C.E. Endzhakunyana ka kwalaho, lunghelo ra ku va mudyondzisiwa la nga Mukreste ri hundziseriwe ni le ka Vasamariya. Kutani, hi 36 C.E., xirhambo xi hundzele ni le ka Vamatiko lava nga yimbangiki. Loko va nga si khuvuriwa, Vasamariya ni Vamatiko a va fanele va tinyiketela eka Yehovha leswaku va ta n’wi tirhela tanihi vadyondzisiwa va N’wana wakwe. Nkhuvulo wa mati wa Vakreste wa ha vula sweswo ni namuntlha. Swi fanerile leswaku munhu a nyuperisiwa hi ku helela ematini leswaku ku va xikombiso xa yena xa ku tinyiketela, tanihi leswi nkhuvulo wu fanekiselaka ku yimberiwa. Ku nghena ka wena u nyupela endzeni ka mati loko u khuvuriwa, swi fanekisela ku fa ka wena endleleni leyi a wu hanya ha yona khale. Ku humesiwa ka wena ematini swi fanekisela ku pfuxiwa ka wena leswaku u hanyela ku endla ku rhandza ka Xikwembu. ‘Nkhuvulo lowu wun’we’ wu tirha eka hinkwavo lava hundzukeke Vakreste va ntiyiso. Loko va khuvuriwa, va va Timbhoni ta Yehovha leti nga Vakreste, vatirheli va Xikwembu lava vekiweke ximfumo.—Vaefesa 4:5; 2 Vakorinto 6:3, 4.
12. Xana nkhuvulo wa Vakreste wa mati wu fana na yini, naswona njhani?
12 Nkhuvulo wo tano i wa nkoka swinene eka Xikwembu. Hi xikombiso, endzhaku ka loko a vulavule hi Nowa loko a aka ngalava, leyi yena ni ndyangu wakwe a va ri eka yona hi nkarhi wa Ndhambi, muapostola Petro u tsarile a ku: “Leswi yelanaka ni leswi na swona swa mi ponisa sweswi, ku nga nkhuvulo, (hayi ku susa thyaka ra nyama, kambe ku kombela ripfalo lerinene eka Xikwembu,) hi ku pfuxiwa ka Yesu Kreste eka lava feke.” (1 Petro 3:21) Ngalava a ku ri vumbhoni lebyi tiyeke bya leswaku Nowa u wu endle hi vutshembeki ntirho lowu Xikwembu xi n’wi nyikeke wona. Endzhaku ka loko ntirho wa le ngalaveni wu hetiwile, “misava ya nkarhi wolowo yi lovisiwile . . . loko mati ma yi khubumeta.” (2 Petro 3:6) Kambe Nowa ni ndyangu wakwe, ku nga “mimoya-xiviri ya nhungu, va ponisiweke . . . ematini.”—1 Petro 3:20.
13. Xana Mukreste u ponisiwa eka yini hi ku khuvuriwa ematini?
13 Namuntlha, vanhu lava va tinyiketelaka eka Yehovha hikwalaho ka ripfumelo leri va nga na rona eka Kreste la pfuxiweke, va khuvuriwa leswaku va kombisa ku tinyiketela ka vona. Va hambeta va endla ku rhandza ka Xikwembu ka le nkarhini wa hina naswona va ponisiwa emisaveni ya sweswi yo homboloka. (Vagalatiya 1:3, 4) A va ha ri endleleni leyi yisaka endzovisweni, leyi fambiselo ra sweswi ra swilo ri nga eka yona. Va ponisiwa endzovisweni lowu naswona va va ni ripfalo leri tengeke emahlweni ka Xikwembu. Muapostola Yohane u tiyisekisa malandza ya Xikwembu a ku: “Misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.”—1 Yohane 2:17.
Ku Hanya Hi Ku Pfumelelana Ni Vutihlamuleri Bya Hina
14. Ha yini nkhuvulo wu ri woxe wu nga ri xitiyisekiso xa leswaku munhu u ta pona?
14 Ku ta va ku ri xihoxo ku ehleketa leswaku nkhuvulo wu ri woxe i xitiyisekiso xa leswaku munhu u ta pona. I wa risima ntsena loko munhu a tinyiketele hakunene eka Yehovha ha Yesu Kreste naswona endzhaku ka swona a endla ku rhandza ka Xikwembu, a tshembeka ku fikela emakumu. “Loyi a tiyiseleke ku fika emakumu hi yena la nga ta ponisiwa.”—Matewu 24:13.
15. (a) Hi kwihi ku rhandza ka Xikwembu namuntlha eka Vakreste lava khuvuriweke? (b) Xana ku va mudyondzisiwa la nga Mukreste swi fanele swi va swa nkoka ku fikela kwihi evuton’wini bya hina?
15 Xin’wana xa leswi Xikwembu a xi swi langutile eka Yesu a a ku ri ndlela leyi a a byi tirhisaka ha yona vutomi bya yena tanihi munhu wa nyama. A a fanele a dlayiwa leswaku vutomi byakwe byi va gandzelo. Hina, hi fanele hi teka mimiri ya hina hi yi nyika Xikwembu, naswona hi fanele hi nga rhangisi swilaveko swa hina kambe hi hanyela ku endla ku rhandza ka Xikwembu. (Varhoma 12:1, 2) Kunene hi ta va hi nga endli ku rhandza ka Xikwembu loko hi vomu hi tshuka hi tikhoma hi ndlela leyi vanhu lava va hi rhendzeleke va hanyaka ha yona kumbe loko hi hanyela ku hlongorisa swilo leswi vonakaka, kambe ntirho wa Xikwembu hi wu endlela ku hetisa nawu ntsena. (1 Petro 4:1-3; 1 Yohane 2:15, 16) Loko Muyuda un’wana a vutisa leswaku u fanele ku endla yini leswaku a kuma vutomi lebyi nga heriki, Yesu u kandziyise ntikelo wa ku tikhoma kahle. Kambe u tlhele a kombetela eka nchumu wun’wana lowu nga wa nkoka swinene: ku nga xilaveko xa ku va mudyondzisiwa la nga Mukreste, mulandzeri wa Yesu. Lowu i nchumu lowu hi faneleke hi wu rhangisa evuton’wini bya hina. A hi fanelanga hi rhangisa swilo leswi vonakalaka, wona hi wu veka endzhaku.—Matewu 19:16-21.
16. (a) Xana Vakreste hinkwavo va ni vutihlamuleri byihi malunghana ni Mfumo? (b) Hilaha swi kombisiweke hakona eka matluka 116 na 117, hi tihi tindlela tin’wana leti tirhaka leti hi nga endlaka ntirho wa Mfumo ha tona? (c) Ku hlanganyela ka hina hi timbilu hinkwato entirhweni wa ku chumayela ku kombisa yini?
16 Nakambe swi fanele swi kandziyisiwa leswaku nchumu wun’wana lowu Xikwembu a xi wu languterile eka Yesu a ku ri leswaku a endla ntirho wa nkoka lowu fambisanaka ni Mfumo wa Xikwembu. Yesu hi byakwe a a totiwile leswaku a ta va Hosi. Kambe loko a ri emisaveni, u tlhele a hisekela ku nyikela vumbhoni malunghana ni Mfumo. Hi ni ntirho lowu fanaka wa ku nyikela vumbhoni, naswona hi ni swivangelo leswi twalaka swa ku wu endla hi timbilu ta hina hinkwato. Hi ku endla tano, hi kombisa ndlela leyi hi byi tlangelaka ha yona vuhosi bya Yehovha swin’we ni ndlela leyi hi va rhandzaka ha yona vanhu-kulorhi. (Matewu 22:36-40) Nakambe, hi kombisa leswaku hi ni vun’we ni vagandzeri-kulorhi emisaveni hinkwayo, lava hinkwavo ka vona va nga vahuweleri va Mfumo. Emisaveni hinkwayo, hinkwerhu hi chivirikela ku kuma vutomi lebyi nga heriki emisaveni, ehansi ka Mfumo wolowo.
Mpfuxeto
• Hi kwihi ku fana ni ku hambana loku nga kona exikarhi ka nkhuvulo wa Yesu ni nkhuvulo wa mati wa namuntlha?
• Xana swi vula yini ku khuvuriwa “hi vito ra Tatana ni ra N’wana ni ra moya lowo kwetsima”?
• Xana ku hanya hi ku pfumelelana ni leswi nkhuvulo wa mati wa Vakreste wu vulaka swona, swi katsa yini?
[Swifaniso leswi nga eka tluka 116, 117]
TINDLELA TIN’WANA TO HUWELELA MFUMO
Hi yindlu ni yindlu
Eka maxaka
Eka lava hi tirhaka na vona
Eka lava hi nghenaka na vona xikolo
Etindleleni
Hi ku endla maendzo yo vuyela eka lava kombiseke ku tsakela
Hi ku fambisa tidyondzo ta Bibele ta le kaya