Xiphemu 8
Fularhela Vukhongeri Bya Mavunwa; Fambisana Ni Vukhongeri Bya Ntiyiso
1. Malunghana ni vugandzeri, hi wihi nhlawulo lowu vanhu va langutaneke na wona namuntlha?
YESU u te: “Loyi a nga riki etlhelweni ra mina u lwa na mina.” (Matewu 12:30) Un’wana ni un’wana wa hina loko a nga yimi na Yehovha u yima na Sathana. Vanhu vo tala va anakanya leswaku va tirhela Xikwembu hi ndlela leyinene, kambe Bibele yi vula leswaku Sathana u “[xisa] misava hinkwayo leyi akiweke.” (Nhlavutelo 12:9) Vanhu va timiliyoni va kholwa leswaku va gandzela Xikwembu, kambe entiyisweni va tirhela Sathana Diyavulosi! Vanhu namuntlha va langutane ni nhlawulo: Va fanele ku tirhela Yehovha, “Xikwembu xa ntiyiso,” kumbe Sathana, “tata wa mavunwa.”—Pisalema 31:5; Yohane 8:44.
Tshika Vukhongeri Bya Mavunwa
2. Hi yihi ndlela yin’wana leyi Sathana a yi tirhisaka leswaku a sivela vanhu ku gandzela Yehovha?
2 Ku hlawula ku tirhela Yehovha i mhaka ya vutlhari, ku nga nhlawulo lowu nga ta endla leswaku u amukeriwa hi Xikwembu. Kambe Sathana a nga tsakisiwi hi munhu un’wana ni un’wana loyi a tirhelaka Xikwembu; lava va endlaka tano wa va tshikilela. Ndlela yin’wana leyi a va tshikilelaka ha yona i ku endla leswaku va hlekuriwa kumbe va kanetiwa hi vanhu van’wana, hambi ku ri hi vanghana ni hi swirho swa ndyangu. Yesu u tsundzuxile: “Hakunene, valala va munhu ku ta va vanhu va ndyangu wa yena.”—Matewu 10:36.
3. Loko vandyangu wa ka n’wina kumbe vanghana va ku kaneta loko u gandzela Xikwembu, xana u ta endla yini?
3 Loko sweswo swo humelela eka wena, xana u ta endla yini? Vanhu vo tala va swi tiva leswaku ndlela leyi va gandzelaka ha yona yi hoxile, kambe va kanakana ku yi tshika. Va anakanya leswaku sweswo swi ta vula leswaku a va tshembekanga eka mindyangu ya vona. Xana sweswo swa twala? Loko a wo tiva leswaku swirho swa ndyangu wa ka n’wina swi tirhisa swidzidzirisi, xana a wu nga ta swi tsundzuxa leswaku swidzidzirisi swi ta swi vavisa? A wu nge hlanganyeli na swona eku tirhiseni ka swidzidzirisi, a swi tano ke?
4. I yini leswi Yoxuwa a swi byeleke Vaisrayele malunghana ni vugandzeri esikwini ra yena?
4 Yoxuwa u khutaze Vaisrayele leswaku va tshika vugandzeri bya mavunwa ni mindhavuko leyi hoxeke ya vakokwa wa vona. U te: “Sweswi chavani Yehovha mi n’wi tirhela hi ndlela leyi pfumalaka xihoxo ni ntiyiso, susani swikwembu leswi vatata wa n’wina va swi tirheleke etlhelo lerin’wana ra Nambu ni le Egipta, mi tirhela Yehovha.” (Yoxuwa 24:14) Yoxuwa a a tshembekile eka Xikwembu, naswona Yehovha u n’wi katekisile. Loko hi tshembeka eka Yehovha, na hina u ta hi katekisa.—2 Samuwele 22:26.
Cukumeta Swilo Leswi A Wu Swi Tirhisa eVukhongerini Bya Mavunwa
5. Ha yini hi fanele hi cukumeta swilo swa vungoma?
5 Ku tshika vukhongeri bya mavunwa swi tlhela swi vula leswaku hi fanele ku cukumeta swilo hinkwaswo swa vungoma leswi hi nga vaka hi ri na swona, swo tanihi switshungulo, timhamba, swingwavila ni masindza ya vungoma ni swilo swin’wana leswi fanaka na swona. Leswi i swa nkoka hikuva hi ta va hi kombisa leswaku hi tshemba Yehovha hi ku helela.
6. I yini leswi Vakreste vo sungula va swi endleke hi tibuku ta vona ta masalamusi?
6 Xiya leswi Vakreste van’wana vo sungula va swi endleke loko va fikelele xiboho xa ku hanya hi ku pfumelelana ni vukhongeri bya ntiyiso. Bibele yi ri: “Vo hlaya swinene lava a va hanya hi masalamusi va hlengeleta tibuku ta vona kutani va ti hisa emahlweni ka vanhu hinkwavo.”—Mintirho 19:19.
7. Xana hi nga endla yini loko hi karhatiwa hi madimona?
7 Van’wana lava sunguleke ku tirhela Yehovha lava a va ri valoyi, vangoma kumbe vaendli va masalamusi va nga ha karhatiwa hi madimona. Loko sweswo swi endleka eka wena, kombela mpfuno wa Yehovha hi xikhongelo, u ri karhi u n’wi vitana hi vito. U ta ku pfuna.—Swivuriso 18:10; Yakobo 4:7.
8. Xana Vakreste va swi languta njhani swifaniso swa hava ni swinepe leswi tirhisiwaka evukhongerini bya mavunwa?
8 Lava navelaka ku tirhela Yehovha a va fanelanga va hlayisa xifaniso xa hava kumbe xinepe xin’wana ni xin’wana lexi fambisanaka ni vugandzeri bya mavunwa. Vakreste va ntiyiso va “famba hi ripfumelo, ku nga ri hi ku vona.” (2 Vakorinto 5:7) Va xixima nawu wa Xikwembu lowu sivelaka ku tirhisa xifaniso xin’wana ni xin’wana evugandzerini bya vona.—Eksoda 20:4, 5.
Tihlanganise Ni Vanhu Va Yehovha
9. Bibele yi hi tsundzuxa leswaku hi nga swi kotisa ku yini ku va vanhu lava tlhariheke?
9 Bibele yi ri: “Loyi a fambaka ni vanhu vo tlhariha u ta tlhariha.” (Swivuriso 13:20) Loko hi lava ku va lava tlhariheke, hi fanele ku famba ni Timbhoni ta Yehovha kumbe hi tihlanganisa na tona. I vanhu lava fambaka hi gondzo leri yisaka evuton’wini.—Matewu 7:14.
10. Xana Timbhoni ta Yehovha ti nga ku pfuna njhani leswaku u tirhela Xikwembu?
10 Hakunene Timbhoni ta va khathalela vanhu van’wana. Ntirho wa tona i wa ku pfuna vanhu va timbilu letinene leswaku va twisisa ntiyiso wa Bibele lowu yisaka evuton’wini lebyi nga heriki. Ti nga ku pfuna hi ku dyondza Bibele na wena mahala. Ti ta hlamula swivutiso swa wena ti tlhela ti ku komba ndlela leyi u nga byi tirhisaka ha yona vutivi bya Bibele evuton’wini bya wena.—Yohane 17:3.
11. Xana minhlangano ya Vukreste yi ta ku pfuna njhani?
11 Loko u ya eminhlanganweni ya tona leyi hi ntolovelo ti yi khomelaka eHolweni ya Mfumo, u ta dyondza leswi engetelekeke hi tindlela ta Yehovha. Ku navela ka wena leswaku u hanya hi ku pfumelelana ni vukhongeri bya ntiyiso ku ta kula. U ta tlhela u leteriwa tindlela leti u nga pfunaka van’wana ha tona leswaku va dyondza ntiyiso wa Bibele.—Vaheveru 10:24, 25.
12. Xana xikhongelo xi nga ku pfuna njhani leswaku u tirhela Xikwembu?
12 Loko u ri karhi u dyondza leswi engetelekeke malunghana ni leswi Yehovha a swi rhandzaka ni xikongomelo xa yena, u ta ti tlangela swinene tindlela ta yena ta rirhandzu. Nakambe u ta kurisa ku navela ka wena ka ku endla leswi n’wi tsakisaka u tlhela u papalata ku endla leswi a swi vengaka. Tsundzuka leswaku u nga tshinela eka Yehovha hi xikhongelo u kombela mpfuno wa leswaku u endla swilo leswinene ni ku papalata ku endla leswo biha.—1 Vakorinto 6:9, 10; Vafilipiya 4:6.
13. Xana u nga yi tsakisa njhani mbilu ya Yehovha?
13 Hi ku famba ka nkarhi, loko u ya u kula hi tlhelo ra moya, handle ko kanakana u ta vona xilaveko xa leswaku u va Mbhoni ya Yehovha leyi tinyiketeleke ni leyi khuvuriweke. Loko u va un’wana wa vanhu va Yehovha, u ta tsakisa mbilu ya Yehovha. (Swivuriso 27:11) U ta va exikarhi ka vanhu lava tsakeke lava Xikwembu xi vulavulaka ha vona xi ku: “Ndzi ta tshama exikarhi ka vona ndzi tlhela ndzi famba exikarhi ka vona, naswona ndzi ta va Xikwembu xa vona kutani vona va ta va vanhu va mina.”—2 Vakorinto 6:16.
Tidyondzo Ta Vukhongeri—Ta Ntiyiso Ni Ta Mavunwa
● Vunharhu-un’we: Vukhongeri byo tala byi dyondzisa leswaku Xikwembu i Vunharhu-un’we. Byi vula leswaku “Tatana i Xikwembu, N’wana [Yesu] i Xikwembu, swin’we ni Moya lowo Kwetsima i Xikwembu, kambe sweswo a swi endli Swikwembu swinharhu, swi endla Xikwembu xin’we ntsena.”
Bibele a yi ri boxi nikatsongo rito leri nge “Vunharhu-un’we,” kumbe ku dyondzisa leswaku Yehovha i vanhu vanharhu eka munhu un’we. Yehovha a ri swakwe hi yena Xikwembu. Vakorinto vo Sungula 8:6 yi ri: “Kahle-kahle eka hina ku ni Xikwembu xin’we, ku nga Tatana.” Yehovha hi La Tlakukeke. Yesu a hi Xikwembu, kambe “i N’wana wa Xikwembu.” (1 Yohane 4:15) Hilaha ku fanaka, moya lowo kwetsima a hi Xikwembu. Nakambe, moya lowo kwetsima a hi munhu. I matimba ya Xikwembu lama tirhaka.—Mintirho 1:8; Vaefesa 5:18.
● Moya-xiviri: Vukhongeri byo tala byi dyondzisa leswaku moya-xiviri i nchumu lowu nga endzeni ka munhu, lowu nga fiki. Bibele yi dyondzisa leswaku moya-xiviri i munhu, naswona munhu wa fa.—Genesa 2:7; Ezekiyele 18:4.
● Ndzilo Wa Tihele: Vukhongeri bya mavunwa byi dyondzisa leswaku moya-xiviri wa lavo homboloka wu xanisiwa etiheleni hilaha ku nga heriki. Bibele yi vula leswaku lava feke “a va tivi nchumu nikatsongo.” (Eklesiasta 9:5) Bibele yi tlhela yi dyondzisa leswaku “Xikwembu i rirhandzu.” (1 Yohane 4:8) Yehovha, la nga Xikwembu xa rirhandzu a nge xanisi munhu hi ndzilo.
[Xivutiso Xa Dyondzo]
Bokisi: Bibele yi dyondzisa yini malunghana ni Vunharhu-un’we, moya-xiviri ni ndzilo wa tihele?
Ndzi Hambane Ni Madimona
Siku rin’wana loko hi etlele, ndzi twe rito ri ndzi huwelela kanharhu. Hiloko ndzi vona silingi yi handzuka hi le xikarhi, kutani nchumu wo fana ni kala ra ndzilo leri pfurhaka wu wela ekhwirini ra mina. Ina, nuna wa mina a nga swi vonanga swilo leswi. Hambiswiritano, ndzi twe ku hisa loku heteke tin’hweti to hlayanyana.
Endzhaku ka tin’hweti ta tsevu, ndzi tlhele ndzi vitaniwa hi rito. Hi ku copeta ka tihlo, yindlu hinkwayo a yi vonaka onge yi le ndzeni ka mati. Nhlarhu leyikulu yi hume ematini kutani yi ndzi tsondzela voko. Ndzi ringete hi matimba leswaku ndzi yi dzudza. A ndzi chuhe ngopfu. Kutani mati ni nhlarhu liyani swi nyamalarile, hiloko ndzi tlatlalatiwa ehansi hi matimba. Ndzi hete tiawara to hlayanyana ndza ha titivarile. Kutani rito rero ri ndzi byele leswaku ndzi tlhelela eximutanini ndzi ya hanyisiwa hi mimoya etempeleni. Loko ndzi vutisa moya wolowo vito ra wona, wu ndzi nyike vito leri vulaka leswaku i “xigwili lexi nga riki na n’wana.” Wu ndzi tshembise leswaku wu ta ndzi fuwisa hi ku tirhisa matimba lama hanyisaka.
Vanhu lava vabyaka va te eka mina va huma etindhawini ta le kule ni ta le kusuhi. Loko va nga si fika endlwini ya mina, a ndzi rhanga ndzi va vona exivonini xa mina xo hlawuleka. Kutani loko munhu a fika, a ndzi phamasa xandla xa yena, naswona muxaka wa vuvabyi byakwe kumbe xiphiqo xa yena swin’we ni murhi lowu a nga ta tshunguriwa hi wona a swi paluxeka hi xihatla. Moya a wu tlhela wu ndzi byela ntsengo wa mali leyi munhu a faneleke ku yi hakela.
Mali ni tinyiko a swo na kunene hileswi a ndzi kota ku hanyisa vanhu. Ndzi ve “xigwili” kambe ndzi tlhele ndzi tiva leswaku ‘ku pfumala n’wana’ swi vula yini. Nkarhi wun’wana ni wun’wana loko ndzi kuma n’wana a ku fa lonkulu wa kona. Leswi a swi ndzi khomisa gome lerikulu. Ndzi fele hi vana va tsevu eka malembe ya 12 lawa ndzi ma heteke ndzi tirhela moya lowu.
Ndzi sungule ku kombela mpfuno eka Xikwembu hi xikhongelo. Ndzi khongele swi huma embilwini. Siku rin’wana Timbhoni ta Yehovha ti gongondze endlwini ya mina. Hambileswi a ndzi hamba ndzi ti hlongola, siku rero ndzi vone leswaku swa antswa ndzi ti yingisela. Eka bulo leri hi veke na rona, ndzi kume leswaku a ndzi tirhela dimona! Ndzi endle xiboho xa ku tshika vungoma.
Loko ndzi tivisa moya lowu hi ta xiboho xa mina, wu ndzi byele leswaku ndzi ta va ndzi tlanga hi ndzilo. Hambiswiritano, ndzi te: “Vuxaka bya hina byi hela kwala.”
Ndzi hise swilo hinkwaswo swa swikwembu, leswi a ndzi swi tirhisa. Ndzi dyondze Bibele ni Timbhoni, ndzi va nandza wa Yehovha, kutani ndzi khuvuriwa hi 1973. Sweswi ndzi ni ntlhanu wa vana lava hanyeke kahle. Nuna wa mina na yena u ve Mbhoni leyi khuvuriweke.—Hi ku vula ka Josephine Ikezu.
[Xivutiso Xa Dyondzo]
Bokisi: Xana wansati un’wana u hambane njhani ni madimona?
[Swifaniso leswi nga eka tluka 26]
Xana u nga hanya njhani hi ku pfumelelana ni vugandzeri bya ntiyiso?