Xikwembu Xi Tsundzuka N’wana Wa Xona

YESU u ririle loko munghana wa yena Lazaro a fa. Xana u ehleketa leswaku Yehovha u twe ku vava loko Yesu a xanisiwa niloko a fa?— Bibele yi vula leswaku Xikwembu xa ku ‘twa ku vava’ hi swilo leswi humelelaka.—Pisalema 78:40, 41; Yohane 11:35.

Anakanya ku vava loku Yehovha a ku tweke loko a ri karhi a vona N’wana wa yena la rhandzekaka a fa?— Yesu a a tiyisekile leswaku Xikwembu xi nge n’wi rivali. Hi yona mhaka leyi loko se a fa a vuleke a ku: ‘Tatana, vutomi bya mina ndzi byi veka emavokweni ya wena.’—Luka 23:46.

Yesu a a tiyisekile leswaku u ta pfuxiwa, a a nga ta tshikiwa “eHayidesi” kumbe esirheni. Loko Yesu se a pfuxiwile, muapostola Petro u tshahe leswi tsariweke eBibeleni ha Yesu, a ku: “A nga tshikiwanga eHayidesi naswona nyama yakwe a yi ku vonanga ku onhaka.” (Mintirho 2:31; Pisalema 16:10) Ina, miri wa Yesu a wu kalanga wu onhaka leswi vulaka leswaku a wu bolanga kumbe ku nun’hwa.

Loko Yesu a ha ri emisaveni, u byele vadyondzisiwa va yena leswaku a nge heti nkarhi wo leha a file. U va hlamusele leswaku u ta “dlayiwa, kutani a pfuxiwa hi siku ra vunharhu.” (Luka 9:22) Xisweswo vadyondzisiwa a va nga fanelanga va hlamala loko Yesu a pfuxiwa. Kambe, xana swi ve tano?— A hi vone.

A ku ri Ravuntlhanu nindzhenga hi awara ya nharhu loko Mudyondzisi Lonkulu a fa a ri emhandzini ya nxaniso. Yosefa loyi a a ri xirho lexi fuweke xa Sanedri a a nga tikombisi leswaku wa pfumela eka Yesu. Loko a twa leswaku Yesu u file, u ye eka Pilato, ndhuna-nkulu ya le Rhoma. U kombele ku hawula ntsumbu wa Yesu emhandzini a ya wu lahla. Endzhaku ka sweswo, Yosefa u rhwale ntsumbu wa Yesu a wu yisa entangeni lowu nga ni sirha-bako, ku nga ndhawu leyi mintsumbu a yi lahliwa kona.

Endzhaku ka loko ntsumbu wu hoxiwe endzeni ka sirha-bako, ku khunguluxeriwe ribye lerikulu enyangweni wa rona. Hi yona ndlela leyi sirha-bako a ri pfariwa ha yona. Ku kale ku va siku ra vunharhu, ku nga Sonto. Dyambu a ri nga si huma, a ka ha phumerile. A ku ri ni vavanuna lava va rindzeke sirha-bako. A va rhumiwe hi vaprista lavakulu. Xana wa swi tiva leswaku hikwalaho ka yini?—

Phela vaprista na vona a va swi twile leswaku Yesu u vule leswaku u ta pfuxiwa. Kutani vaprista va veke varindzi leswaku vadyondzisiwa va yena va nga ti va ta yiva ntsumbu wa yena ivi va vula leswaku Yesu u pfuxiwile. Hiloko hi xitshuketa misava yi sungula ku tsekatseka. Emunyameni a ku ri ni ku vonakala loku vangamaka. A ku ri ntsumi ya Yehovha! Masocha a ma chave lerova a ma nga swi koti ni ku tshukatshuka. Ntsumi yi ye eka sirha-bako kutani yi fika yi susa ribye. Hiloko ku sala ku nga ha ri na nchumu endzeni ka sirha-bako!

Ina, swi ve hilaha muapostola Petro a vuleke hakona endzhaku, a ku: “Yesu yoloye Xikwembu xi n’wi pfuxile.” (Mintirho 2:32) Xikwembu xi pfuxe Yesu hi miri lowu fanaka ni lowu Yesu a a ri na wona a nga si ta emisaveni. U pfuxiwe a ri ni miri wa moya, lowu fanaka ni wa tintsumi. (1 Petro 3:18) Leswaku vanhu va kota ku n’wi vona, Yesu a a fanele a hundzula miri wa yena wu va wa nyama. Xana u endle tano?— A hi vone.

Dyambu se a ri humile. Masocha na wona a ma fambile. Mariya wa Magadala ni vavasati van’wana lava a va ri vadyondzisiwa va Yesu a va khome ndlela va ya eka sirha-bako. A va ri karhi va vutisana va ku: ‘I mani la nga ta hi khunguluxela ribye leri tikaka a ri susa?’ (Marka 16:3) Kambe loko va fika eka sirha-bako, ribye ana se a ri khunguluxiwile. Kutani a ku nga ha ri na nchumu endzeni ka sirha-bako! Ntsumbu wa Yesu a wu nga ha ri kona! Hiloko hi ku hatlisa, Mariya wa Magadala a tsutsuma a ya lava van’wana va vaapostola va Yesu.

Vavasati lavan’wana va sale eka sirha-bako. Va vutisile va ku: ‘Xana ntsumbu wa Yesu wu nga va wu ri kwihi?’ Hiloko hi xitshuketa, ku humelela vavanuna vambirhi va ambale tinguvu leti vangamaka. A ku ri tintsumi! Va vutise vavasati volavo va ku: ‘Ha yini mi ta lava Yesu laha? U pfuxiwile. Hatlisani mi famba mi ya byela vadyondzisiwa va yena.’ Anakanya rivilo leri vavasati lava a va tsutsuma ha rona! Va hlangane ni wanuna un’wana endleleni. Xana wa swi tiva leswaku i mani?—

I Yesu, naswona u hundzule miri wa yena wu va wa nyama! Na yena u byele vavasati volavo, a ku: ‘Fambani mi ya byela vadyondzisiwa va mina.’ Vavasati volavo a va tsakile. Va fike va kuma vadyondzisiwa kutani va va byela va ku: ‘Yesu wa hanya! Hi n’wi vonile!’ Mariya ana se a a byele Petro na Yohane hi ta sirha-bako leri a ri nga ha ri na nchumu. Hiloko va ya laha ri nga kona, hilaha u swi vonaka hakona exifanisweni lexi. Va langute tinguvu ta ntsembyana leti Yesu a a tsondzeriwe ha tona kambe a va nga swi tivi leswaku va ku yini. A va lava ku tshemba leswaku Yesu wa hanya nakambe, kambe a swi tika ku swi pfumela.

Endzhaku ka nkarhi hi Sonto yoleyo, Yesu u humelele eka vadyondzisiwa va yena vambirhi lava a va khome ndlela yo ya eximutanini xa Emawusi. Hiloko Yesu a famba a ri karhi a vulavula na vona kambe a va nga n’wi tivi hikuva miri wa yena wa nyama a wu nga ha fani ni lowu a a ri na wona eku sunguleni. Va tive Yesu endzhaku ka loko a khongerile niloko a ri karhi a dya na vona. Vadyondzisiwa a va tsake ngopfu lerova va fambe tikhilomitara to tala va hatlisela ku tlhelela eYerusalema! Kumbexana a ku ri endzhakunyana ka ku hambana ni vadyondzisiwa lava loko Yesu a tikombisa eka Petro a n’wi komba leswaku Wa hanya.

Kutani endzhaku ka nkarhi hi yona Sonto yoleyo nimadyambu, vadyondzisiwa vo tala a va hlengeletanile ekamareni. Minyangwa a yi lotleriwile. Hi xitshuketa Yesu a a ri na vona kwalaho ekamareni! Hi nkarhi wolowo se a va swi tiva leswaku hakunene Mudyondzisi Lonkulu wa hanya nakambe. Anakanya ndlela leyi a va tsake ha yona!—Matewu 28:1-15; Luka 24:1-49; Yohane 19:38–20:21.

Ku hundze masiku ya 40 Yesu a ri karhi a tikombisa eka vadyondzisiwa va yena leswaku wa hanya naswona u tikombise a ri eka swivumbeko swo hambana-hambana swa miri wa nyama. Hiloko a suka emisaveni a tlhelela etilweni eka Tata wakwe. (Mintirho 1:9-11) Ku nga ri khale vadyondzisiwa va sungule ku byela vanhu hinkwavo leswaku Xikwembu xi pfuxe Yesu evafini. Hambileswi vaprista va beke ni ku dlaya van’wana va vona, va hambete va chumayela. A va swi tiva leswaku hambiloko vo fa Xikwembu xi ta va tsundzuka ku fana nileswi xi tsundzukeke N’wana wa xona.

Mawaku ndlela leyi valandzeri volavo va le ku sunguleni va Yesu a va hambane ha yona ni vanhu vo tala namuntlha! Hi nkarhi wa lembe lowu Yesu a pfuxiweke ha wona, vanhu lava va anakanya ntsena hi mimpfundla ya Paseka ni mandza ya mivalavala ya Paseka. Kambe Bibele a yi vuli nchumu hi mimpfundla ni mandza ya Paseka. Yi vulavula hi ku tirhela Xikwembu.

Hi nga fana ni vadyondzisiwa va Yesu hi ku byela vanhu leswaku Xikwembu xi endle nchumu wo hlamarisa loko xi pfuxa N’wana wa xona. Hi nga tshuki hi chava hambiloko vanhu va vula leswaku va ta hi dlaya. Loko ho fa, Yehovha u ta hi tsundzuka kutani a hi pfuxa hilaha a endleke hakona ha Yesu.

Xana a swi hi tsakisi ku tiva leswaku Xikwembu xa va tsundzuka lava va xi tirhelaka nileswaku xi ta va pfuxa eku feni?— Ku tiva timhaka leti ku fanele ku endla leswaku hi lava ku tiva ndlela leyi hi nga tsakisaka Xikwembu ha yona. Xana a wu swi tiva leswaku hi nga swi kota ku xi tsakisa?— A hi bule hi mhaka leyi eka ndzima leyi landzelaka.