Xana Mfumo Wa Xikwembu I Yini?—Ndlela Yo Kombisa Leswaku Ha Wu Lava

XANA wa xi tiva xikhongelo lexi Yesu a xi dyondziseke valandzeri va yena?— Loko u nga xi tivi hi nga xi hlaya swin’we eBibeleni, eka Matewu 6:9-13. Xikhongelo xexo, lexi vo tala va xi vitanaka Xikhongelo xa Hosi, xi katsa marito lama nge: “Mfumo wa wena a wu te.” Xana wa swi tiva leswaku Mfumo wa Xikwembu i yini?—

I nge ndzi ku hlamusela. Hosi i mufumi wa tiko kumbe xifundzha. Naswona vulawuri bya yona byi vuriwa mfumo. Ematikweni man’wana munhu la rhangelaka mfumo u vitaniwa muungameri. Xana Mufumi wa Mfumo wa Xikwembu u vitaniwa yini?— U vitaniwa Hosi. Hi yona mhaka leyi vulawuri bya Xikwembu byi vitaniwaka Mfumo.

Xana wa n’wi tiva loyi Yehovha Xikwembu a n’wi hlawuleke leswaku a va Hosi ya mfumo wa Yena?— I N’wana wa yena, Yesu Kreste. Ha yini a antswa ku tlula mufumi un’wana ni un’wana loyi vanhu va nga ha n’wi hlawulaka?— Hileswi Yesu a n’wi rhandzaka hakunene Tata wakwe, Yehovha. Kutani u endla leswinene minkarhi hinkwayo.

Khale swinene loko Yesu a nga si velekiwa eBetlehema, Bibele yi vulavule hi ta ku velekiwa ka yena kutani yi boxa leswaku u ta va Mufumi loyi a hlawuriweke hi Xikwembu. A hi hlaye mhaka leyi eka Esaya 9:6, 7. Yi ri: ‘Hi velekeriwe n’wana, hi nyikiwe n’wana wa jaha; naswona ku fuma ku ta va ekatleni ra yena. Kutani vito ra yena u ta thyiwa Hosana ya Ku Rhula. Ku tala ka ku fuma kakwe ni ku rhula a swi nge vi na makumu.’

Xana wa swi tiva leswaku ha yini Mufumi wa Mfumo wa Xikwembu loyi ku vulavuriwaka ha yena laha a vuriwa “Hosana”?— Phela, hosana leyi i n’wana wa hosi. Naswona Yesu i N’wana wa Hosi Leyikulu, Yehovha. Kambe Yehovha u tlhela a endla Yesu a va Hosi ya mfumo wa Yena, lowu nga ta fuma misava ku ringana gidi ra malembe. (Nhlavutelo 20:6) Endzhaku ka loko Yesu a khuvuriwile, u sungule “ku chumayela a ku: ‘Hundzukani, hikuva mfumo wa matilo wu tshinele.’”—Matewu 4:17.

Xana u anakanya leswaku ha yini Yesu a vule leswaku Mfumo se a wu tshinerile?— Hikuva Hosi, leyi enkarhini lowu taka a yi ta fuma yi ri etilweni, a yi ri exikarhi ka vona! Hi yona mhaka leyi Yesu a byeleke vanhu a ku: “Mfumo wa Xikwembu wu le xikarhi ka n’wina.” (Luka 17:21) Xana a wu nga ta swi tsakela leswaku Hosi leyi hlawuriweke hi Yehovha yi va ekusuhi na wena lerova u kota ku yi khumba?—

Kutani ndzi byele, hi wihi ntirho wa nkoka lowu Yesu a a tele ku ta wu endla emisaveni?— Yesu u hlamule xivutiso xexo, a ku: “Ni le ka miti yin’wana ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.” (Luka 4:43) Yesu a a swi tiva leswaku a a nga ta endla ntirho wo chumayela a ri yexe. Kutani, u ehleketa leswaku u endle yini?—

Yesu u fambe ni vanhu vo karhi kutani a va komba ndlela leyi ntirho wo chumayela wu endliwaka ha yona. Vo sungula lava a va leteleke a ku ri lava 12, lava a va hlawuleke tanihi vaapostola. (Matewu 10:5, 7) Kambe, xana Yesu u letele vaapostola va yena ntsena leswaku va endla ntirho lowu? Doo, Bibele yi vula leswaku Yesu u letele ni van’wana vo tala leswaku va chumayela. Hi ku famba ka nkarhi u rhume vadyondzisiwa van’wana va 70 hi vambirhi-mbirhi leswaku va n’wi rhangela entirhweni wo chumayela. A va va dyondzisa yini vanhu?— Yesu u te: ‘Fambani mi ya va byela leswaku ‘Mfumo wa Xikwembu wu tshinele eka n’wina.’’’ (Luka 10:9) Hi ndlela yoleyo vanhu a va dyondza hi ta mfumo wa Xikwembu.

Khale ka khaleni le Israyele, tihosi leta ha ku vekiwaka a ti nghena emutini ti khandziye ximbhongolwana leswaku vanhu va ta ti vona. Kutani, Yesu u endle tano na yena loko a endzela eYerusalema ro hetelela. Phela, Yesu u ta va Mufumi eMfun’weni wa Xikwembu. Xana vanhu a va swi tsakela leswaku a va Hosi ya vona?—

Phela, loko a ri karhi a famba, van’wana entshungwini va sungule ku vekela swiambalo swa vona endleleni leyi a fambaka eka yona. Van’wana va tseme marhavi ya mirhi kutani va ma vekela endleleni. Hi ku endla tano a va kombisa leswaku va lava Yesu a va Hosi ya vona. Va huwelerile va ku: “U katekile Loyi a taka a ri Hosi hi vito ra Yehovha!” Kambe van’wana a va nga tsakanga. Entiyisweni, varhangeri van’wana va vukhongeri va byele Yesu va ku, ‘Byela vadyondzisiwa va wena va miyela.’—Luka 19:28-40.

Endzhaku ka ntlhanu wa masiku Yesu u khomiwile kutani a yisiwa endlwini ya ndhuna-nkulu, Pontiyo Pilato. Valala va Yesu va vule leswaku Yesu u tiendla hosi naswona u lwisana ni mfumo wa Rhoma. Hiloko Pilato a vutisa Yesu hi mhaka leyi. Yesu u vule leswaku a a nga ringeti ku teka mfumo. U byele Pilato a ku: “Mfumo wa mina a hi xiphemu xa misava leyi.”—Yohane 18:36.

Hiloko Pilato a humela ehandle kutani a byela vanhu leswaku a nga n’wi voni nandzu Yesu. Kambe vanhu a va nga swi lavi leswaku Yesu a va Hosi ya vona. A va nga swi lavi leswaku a ntshunxiwa. (Yohane 18:37-40) Endzhaku ko vulavula na Yesu nakambe, Pilato u khorwile leswaku a a nga endlanga nchumu wo biha. Kutani eku heteleleni, endzhaku ka loko a humesele Yesu ehandle ro hetelela, Pilato u te: “Vonani! Hosi ya n’wina!” Kambe, vanhu va huwelele va ku: “N’wi suse! N’wi suse! N’wi belele!”

Pilato u vutisile: “Ndzi belela hosi ya n’wina ke?” Vaprista lavakulu va hlamurile, va ku: “A hi na hosi yin’wana handle ka Khezari.” Xana wa swi vona leswi va swi endleke? Vaprista volavo vo homboloka va kote ku kucetela vanhu leswaku va fularhela Yesu!—Yohane 19:1-16.

Ninamuntlha xiyimo xa ha fana ni xa le nkarhini lowu hundzeke. Vanhu vo tala a va swi lavi kahle leswaku Yesu a va Hosi ya vona. Swi nga ha endleka va vula leswaku va pfumela eka Xikwembu, kambe a va swi lavi leswaku Xikwembu kumbe Kreste a va byela leswi va faneleke va swi endla. Va lava mimfumo ya vona vini leyi yi va lawulaka laha misaveni.

Ku vuriwa yini hi hina? Loko hi dyondza hi Mfumo wa Xikwembu ni hi swilo hinkwaswo leswinene leswi wu nga ta hi endlela swona, xana sweswo swi endla leswaku hi titwisa ku yini hi Xikwembu?— Ha xi rhandza, a swi tano ke?— Kutani, hi nga swi kombisa njhani leswaku hakunene ha xi rhandza Xikwembu nileswaku hi lava ku fumiwa hi Mfumo wa xona?—

Hi nga kombisa Xikwembu ndlela leyi hi titwaka ha yona hi ku landzela xikombiso xa Yesu. Xana Yesu u swi kombise hi ndlela yihi leswaku wa n’wi rhandza Yehovha?— Yesu u te: “Nkarhi hinkwawo ndzi endla swilo leswi n’wi tsakisaka.” (Yohane 8:29) Ina, Yesu u te laha misaveni leswaku a ta ‘endla ku rhandza ka Xikwembu’ ni ku “heta ntirho [wa xona].” (Vaheveru 10:7; Yohane 4:34) Xiya leswi Yesu a swi endleke loko a nga si sungula ntirho wa yena wo chumayela.

Yesu u ye eka Yohane Mukhuvuri eNambyeni wa Yordani. Endzhaku ka loko va nghene ematini, Yohane u nyuperise Yesu ematini kutani a n’wi humesa. Xana wa swi tiva leswaku ha yini Yohane a khuvule Yesu?—

Yesu u kombele Yohane leswaku a n’wi khuvula. Kambe, xana hi swi tivisa ku yini leswaku Xikwembu a xi lava leswaku Yesu a khuvuriwa?— Hi swi tiva hileswi Yesu a tweke rito ra Xikwembu ri huma etilweni, loko a huma ematini ri ku: “U N’wana wa mina, la rhandzekaka; ndzi ku amukerile.” Xikwembu xi kale xi rhumela ni moya wa xona wo kwetsima ehenhla ka Yesu, wu ri hi xivumbeko xa tuva. Xisweswo, loko Yesu a khuvuriwa a a kombisa leswaku u lava ku tirhela Yehovha evuton’wini bya yena hinkwabyo, ina, hilaha ku nga heriki.—Marka 1:9-11.

Wena wa ha kula. Kambe, xana u ta endla yini loko se u kurile?— Xana na wena u ta tekelela xikombiso xa Yesu u khuvuriwa?— U fanele u n’wi tekelela, hikuva Bibele yi vula leswaku u ku siyele ‘ntila leswaku u landzelerisisa mikondzo yakwe.’ (1 Petro 2:21) Loko na wena u khuvuriwa, u ta va u kombisa leswaku wa swi lava hakunene ku fumiwa hi Mfumo wa Xikwembu. Kambe a swi heleli hi ku khuvuriwa ntsena.

Hi fanele hi yingisa swilo hinkwaswo leswi Yesu a swi dyondziseke. Yesu u vule leswaku a hi fanelanga hi va “xiphemu xa misava.” Xana hi ta va hi n’wi yingisa loko hi hlanganyela eka mikhuva ya misava? Yesu ni vaapostola vakwe a va nga hlanganyeli eka mikhuva ya misava. (Yohane 17:14) I yini lexi va xi endleke ematshwan’weni yo hlanganyela eka mikhuva ya misava?— Va byele van’wana hi Mfumo wa Xikwembu. Ntirho wolowo a wu ri wa nkoka evuton’wini bya vona. Xana na hina hi nga endla ntirho lowu fanaka?— Ina, hi nga wu endla, naswona hi ta wu endla loko swi huma embilwini leswi hi swi vulaka loko hi khongelela leswaku Mfumo wa Xikwembu wu ta.