Xana Vutomi Bya Wena Byi Kongome Kwihi?

• Vanhu vo tala va khomekile swinene hi timhaka ta vona ta siku ni siku lerova a va na wona nkarhi wo anakanya hi lomu vutomi bya vona byi kongomeke kona.

• Bibele yi hi byela hi swiendlakalo swo tsakisa leswi taka. Yi tlhela yi hi lemukisa hi ku cinca ka swiyimo swa misava loku nga ta va kona. Kutani ke, leswaku hi vuyeriwa naswona hi papalata khombo, ku laveka leswaku hi endla xiboho xa vutlhari hi xihatla.

• Ku ni vanhu van’wana lava tivaka leswi vuriwaka hi Bibele naswona va ringetaka ku tirhisa leswi yi swi vulaka kambe va pfumelela ku karhateka hi vutomi lebyi ku va hambukisa.

• Xana u enerisekile hi ndlela leyi u hanyaka ha yona? Loko u kunguhata ku endla mintirho ya wena, xana wa anakanya leswaku yi ta byi khumba ku fikela kwihi vutomi bya wena?

[Bokisi/Swifaniso leswi nga eka tluka 9]

I Yini Leswi Nga Swa Nkoka Ngopfu Eka Wena?

I yini leswi u swi rhangisaka evuton’wini bya wena eka swilo leswi landzelaka? Swi longoloxe.

Swo tala swa swona swi endliwa hi nkarhi wa swona, kambe loko u fanele u hlawula, u ta rhangisa yini? ivi ku landzela yini?

․․․ Vuhungasi

․․․ Ntirho wa mina

․․․ Rihanyo ra mina

․․․ Ntsako wa mina

․․․ Loyi ndzi tekaneke na yena

․․․ Vatswari va mina

․․․ Vana vanga

․․․ Yindlu ya kahle, swiambalo leswinene

․․․ Ku va nghwazi eka xihi ni xihi lexi ndzi xi endlaka

․․․ Ku gandzela Xikwembu

[Bokisi leri nga eka tluka 10, 11]

Xana Swiboho Swa Wena Swi Fambisana Ni Swikongomelo Swa Wena?

TIVUTISE SWIVUTISO LESWI LANDZELAKA

VUHUNGASI: Xana vuhungasi lebyi ndzi byi hlawulaka bya ndzi phyuphyisa? Xana i vuhungasi lebyi hundzeletiweke lebyi nga ndzi vavisaka kumbe byi ndzi siya ndzi lamarile vutomi bya mina hinkwabyo? Kumbe, i “vuhungasi” lebyi nga ta ndzi tsakisa swa xinkarhana kambe byi ndzi siya ndzi dya mbitsi nkarhi wo leha? Hambiloko vuhungasi lebyi ndzi byi hlawulaka byi ri byinene, xana ndzi heta nkarhi wo leha ngopfu eka byona lerova ndzi nga wu kumi ni nkarhi wo endla swilo swa nkoka ngopfu?

NTIRHO WA MINA: Xana wu ndzi pfuna ku tihanyisa, kumbe ndzo hanyela wona ntsena? Xana wu lava ndzi tirha hi matimba lerova ndzi sala ndzi vabya? Xana ndzi nga hlawula ku sala ndzi tirha loko ku chayisiwile entirhweni kumbe ndzi nga hlawula ku heta nkarhi swin’we ni loyi ndzi tekaneke na yena kumbe ni vana vanga? Loko muthori wa mina a lava leswaku ndzi endla leswi lwisanaka ni ripfalo ra mina kumbe ku endla leswi hakanyingi swi kavanyetaka timhaka ta swa moya, xana ndzi ta wu endla ntirho wolowo hikwalaho ko chava ku heleriwa hi ntirho?

RIHANYO RA MINA: Xana a ndzi khathali ha rona, kumbe ndza ri khathalela nkarhi hinkwawo? Xana ndzi tshamela ku vulavula ha rona? Xana ndlela leyi ndzi ri khathalelaka ha yona, yi kombisa leswaku ndza khathala hi ndyangu wa mina?

NTSAKO WA MINA: Xana ndzi rhangisa ku titsakisa? Xana ntsako wa mina hi wona wu nga wa nkoka ku tlula wa loyi ndzi tekaneke na yena kumbe wa ndyangu wa mina? Xana ndlela leyi ndzi hisekelaka ku titsakisa ha yona ya fana ni leyi ndzi hisekelaka vugandzeri bya Xikwembu xa ntiyiso ha yona?

LOYI NDZI TEKANEKE NA YENA: Xana loyi ndzi tekaneke na yena ndzi n’wi teka tanihi munghana wa mina minkarhi yin’wana ntsena loko ndzi swi tsakela? Xana ndzi hanyisana na yena hi xichavo, ndzi n’wi teka a ri loyi a faneriwaka hi ku xiximiwa? Xana ripfumelo ra mina eka Xikwembu, ri hoxa xandla eka ndlela leyi ndzi n’wi langutaka ha yona munghana wa mina wa vukati?

VATSWARI VA MINA: Loko ku ri leswaku ndza ha ri ntsongo, xana ndza va yingisa vatswari va mina—ndzi va hlamula hi xichavo, ndzi endla mintirho leyi va ndzi nyikeke yona, ndzi vuya ekaya hi nkarhi wihi na wihi lowu va ndzi vekeleke wona, ndzi papalata vanghana ni mintlango leyi va ndzi lemukiseke ha yona? Loko ku ri leswaku se ndzi kurile, xana ndzi yingisa vatswari va mina hi xichavo, ndzi va pfuna loko swi laveka? Xana ndzi hanyisana na vona hi ku ya hileswi ndzi swi lavisaka xiswona kumbe ndzi kongomisiwa hi ndzayo ya Rito ra Xikwembu?

VANA VANGA: Xana ndzi titwa ndzi ri ni vutihlamuleri byo dyondzisa vana va mina milawu leyinene ya mahanyelo, kumbe ndzi langutele leswaku xikolo ku va xona xi va dyondzisaka? Xana ndzi heta nkarhi swin’we ni vana vanga, kumbe ndzi langutele leswaku switlangiso, thelevhixini, kumbe khompyuta ku va swona swi va hungasaka? Xana nkarhi hinkwawo ndza va tshinya vana vanga loko va honisa milawu ya Xikwembu, kumbe ndzi va tshinya loko va ndzi nyangatsile ntsena?

YINDLU YA KAHLE, SWIAMBALO LESWINENE: Xana hi xihi xikongomelo xa ku khathala hi ndlela leyi ndzi langutekaka ha yona ni hi rifuwo ra mina—xana ndzi lava ku tibombisa ha swona eka van’wana? xana ndzi lava leswaku ndyangu wa mina wu va lowu hlayisekeke? xana ndzi lava ku kandziyisa mhaka ya leswaku ndzi mugandzeri wa Xikwembu?

KU VA NGHWAZI EKA XIHI NI XIHI LEXI NDZI XI ENDLAKA: Xana ndzi swi vona swi ri swa nkoka ku endla swilo hi ndlela leyinene? Xana ndzi lwela ku va nghwazi? Xana ndza karhateka loko un’wana a ndzi tlula?

KU GANDZELA XIKWEMBU: Xana ku rhandziwa hi Xikwembu i swa nkoka ngopfu eka mina ku tlula ku rhandziwa hi munghana wa mina wa vukati, vana vanga, vatswari vanga, kumbe muthori wa mina? Xana ndzi ta rhangisa ku hanya vutomi byo nandziha ku ri ni ku rhangisa ntirho wa Xikwembu leswaku ndzi ta tiphina evuton’wini?

YI KAMBISISE KAHLE NDZAYO YA BIBELE

Xana ku gandzela Xikwembu i swa nkoka wo tanihi kwihi evuton’wini bya wena?

Eklesiasta 12:13: “Chava Xikwembu xa ntiyiso u hlayisa swileriso swa xona. Hikuva leyi hi yona mfanelo hinkwayo ya munhu.”

TIVUTISE: Xana vutomi bya mina byi kombisa leswaku ndzi endla swilo hi ndlela yo chava Xikwembu? Xana ndlela leyi ndzi byi tamelaka ha yona vutihlamuleri bya mina ekaya, entirhweni, kumbe exikolweni yi kombisa leswaku ndza swi yingisa swileriso swa Xikwembu? Kumbe, xana ndzi rhangisa timhaka letin’wana kumbe swiphiqo swin’wana swa vutomi ivi nkarhi lowu salaka ndzi wu tirhisela ku endla mintirho ya Xikwembu?

Byi njhani vuxaka bya wena ni Xikwembu?

Swivuriso 3:5, 6: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.”

Matewu 4:10: “U fanele ku gandzela Yehovha Xikwembu xa wena, naswona u fanele ku endlela yena ntsena ntirho wo kwetsima.”

TIVUTISE: Xana ndzi titwisa xisweswo hi Xikwembu? Xana mintirho ya mina ya siku ni siku, kun’we ni ndlela leyi ndzi tamelaka swiphiqo ha yona, yi kombisa leswaku ndza xi tshemba naswona ndzi tinyiketele eka xona?

Xana ku dyondza ni ku hlaya Bibele i swa nkoka ku fikela kwihi eka wena?

Yohane 17:3: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”

TIVUTISE: Xana ndlela leyi ndzi ri hlayaka ha yona Rito ra Xikwembu ni ku anakanyisisa ha rona yi kombisa leswaku ndza swi tshemba sweswo?

Xana ku va kona eminhlanganweni ya vandlha ra Vukreste i swa nkoka ku fikela kwihi eka wena?

Vaheveru 10:24, 25: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, . . . naswona hi endla tano hilaha ku engetelekeke ngopfu tanihi leswi mi vonaka siku ri tshinela.”

Pisalema 122:1: “Ndzi tsakile loko va ku eka mina: ‘A hi ye endlwini ya Yehovha.’”

TIVUTISE: Xana ndlela leyi ndzi hanyaka ha yona yi kombisa leswaku ndza wu tlangela nkongomiso lowu kumekaka eRitweni ra Xikwembu? Eka n’hweti leyi nga hundza, xana ku ni minhlangano ya Vukreste leyi ndzi xweke eka yona hikwalaho ka leswi a ndzi tikhomelele hi swo karhi?

Xana wa swi hisekela ku vulavula ni van’wana hi Xikwembu ni hi xikongomelo xa xona?

Matewu 24:14: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni . . . , kutani hi kona makumu ma nga ta fika.”

Matewu 28:19, 20: “Hikokwalaho fambani mi ya endla vanhu va matiko hinkwawo va va vadyondzisiwa . . . mi va dyondzisa ku hlayisa swilo hinkwaswo leswi ndzi mi leriseke swona.”

Pisalema 96:2: “Yimbelelelani Yehovha, dzunisani vito rakwe. Siku ni siku vulani mahungu lamanene ya ku ponisiwa ha yena.”

TIVUTISE: Xana ntirho lowu ndzi wu teka wu ri wa nkoka swinene lerova ndzi tinyika nkarhi wo wu endla? Xana matshalatshala ya mina yo endla ntirho lowu ma kombisa leswaku ndza tshemba leswaku hi hanya eminkarhini yo nonon’hwa?