Xikombiso Lexinene—Yosefa

Yosefa u tshame a langutana ni xiyimo xo tika swinene. Nsati wa loyi a n’wi tirhelaka a a tshamela ku n’wi karhata a vula leswaku u lava ku etlela na yena. Wansati loyi u phikelerile! Kambe Yosefa u yime a tiyile. Entiyisweni u n’wi hlamule a nga kanakani, a ku: “Ndzi nga byi endlisa ku yini vubihi lebyi lebyikulu ndzi dyohela Xikwembu hakunene?” Loko nsati loyi a vona leswaku a nga pfumeli, u ringete ku n’wi khoma hiloko Yosefa a baleka. Kahle-kahle u tsutsume a huma endlwini! Yosefa u swi veke erivaleni leswaku u ni mahanyelo lamanene.—Genesa 39:7-12.

Na wena u nga ha langutana ni xiyimo lexi fanaka ni xa Yosefa. Ku hlula xiyimo lexi a swi yi hileswi u kotaka ku tikhoma. Ku sungula hi ku lava ku tsakisa Muvumbi wa wena, Yehovha Xikwembu. Phela, Yosefa na yena a a swi navela ku etlela ni munhu ku fana na wena. Kambe a a nga lavi ku enerisa ku navela koloko hi ndlela leyi a yi ta hlundzukisa Muvumbi wa yena. Na wena, u fanele u khorwiseka leswaku ku tikhoma ko biha ku hlundzukisa Xikwembu, naswona ku ta ku vangela gome. Hikwalaho, lwela ku hlakulela ni ku tshama u ri ni mahanyelo lamanene hilaha Yosefa a endleke hakona.