Xikombiso Lexinene—Noni Leyi Nga Xisiwana

Yesu a a langute vanhu lava fuweke va ri karhi va nyikela etempeleni. Hiloko a vona noni leyi nga xisiwana yi nyikela hi “swimalana swimbirhi swa nsimbi swa ntikelo wa le hansi swinene.” (Luka 21:2) Yesu u yi bumabumerile hi munyikelo wa yona. Ha yini? Hikuva lavan’wana va hoxe “leswi va swi pambuleke eka leswi swi va taleleke, kambe yona, hambileswi yi pfumalaka, yi hoxe hinkwaswo leswi a yi ri na swona, swo tihanyisa swa yona hinkwaswo.”—Marka 12:44.

Xana na wena u titwa hi ndlela leyi fanaka ni noni leyi? Xana u tiyimisele ku tirhisa nkarhi ni mali ya wena leswaku u tirhela Xikwembu? Ku fana ni noni na wena u nga nyikela leswaku ku ta khathaleriwa tindhawu ta vugandzeri. U nga ha tirhisa nkarhi ni mali ya wena ku pfuna van’wana leswaku va dyondza hi Yehovha Xikwembu. Yehovha u wu vonile munyikelo lowutsongo lowu noni yi wu humeseke leswaku yi seketela ntirho wa yena naswona u wu tsakerile. Yehovha u ta tsaka a tlhela a ku pfuna loko ku endla rhandza ka yena ku ri nchumu wa nkoka evuton’wini bya wena.—Matewu 6:33.