Xiyenge 9
Ku Dyondza Eka Mesiya Lowa Murhangeri
XIKWEMBU xi profete leswaku xi ta hlawula Mesiya leswaku a va Murhangeri wa vanhu hinkwavo. Xa swi tiva leswaku hi lava murhangeri wa njhani, kutani xi hlawule Murhangeri la fanelekaka kahle. Mesiya u tikombise a ri Murhangeri wa njhani? Xana a a ri ndhuna ya matimba? N’watipolitiki la tlhariheke? Kumbe mutivi wa filosofi? Hi ku ya hi Matsalwa yo Kwetsima, a a ri muprofeta wo hlawuleka—Yesu Kreste.—Matewu 23:10.
Xikwembu xi tiyisekise leswaku Yesu a tswariwa a hetisekile naswona a kwetsima. Ku tlula kwalaho, Yesu a nga pfumelanga ku hambukisiwa hi Sathana. Hi marito ni hi swiendlo, Yesu u kombise hilaha ku hetisekeke ndlela leyi Xikwembu xi ma tirhisaka ha yona matimba ya xona, vululami, vutlhari ni rirhandzu. Xiya leswi hi nga swi dyondzaka eka xikombiso xa Yesu.
U tirhise matimba lawa a a nyikiwe hi Xikwembu leswaku a pfuna van’wana. Yesu a a khathala hi vanhu naswona u tirhise matimba yakwe leswaku a va pfuna. U te: “Ntshungu lowu ndzi wu twela vusiwana, hikuva . . . a wu na swakudya.” (Marka 8:2) Kutani hi singita u phamele ntshungu lowukulu lowu a wu tile ku ta twa loko a dyondzisa.
Nakambe Yesu a a famba a dyondzisa ni ku “herisa swifo swa mixaka hinkwayo ni vulema bya mixaka hinkwayo evanhwini.” (Matewu 4:23) Hikokwalaho, a swi hlamarisi leswi vo tala a va n’wi landzelela naswona “ntshungu hinkwawo a wu lava ku n’wi khumba, hikuva matimba a ma huma eka yena, ma va horisa hinkwavo.” (Luka 6:19) Hakunene, Yesu ‘a a nga telanga ku tirheriwa, kambe a a tele ku tirhela ni ku nyikela moya-xiviri wakwe wu va nkutsulo wa lavo tala.’ (Matewu 20:28)a I varhangeri vangani lava titsonaka swo karhi leswaku va pfuna van’wana ku fana na Yesu?
U kombise vululami bya Xikwembu. Yesu a a tirhisa milawu ya Xikwembu a tlhela a hanya hi ku pfumelelana na yona. Hilaha Matsalwa ma profeteke hakona, a swi ta fana ni loko a vule marito lawa: “Oho Xikwembu xanga, ndzi tsakisiwe hi ku endla ku rhandza ka wena, ni nawu wa wena wu le ndzeni ka swirho swa mina swa le ndzeni.” (Pisalema 40:8) Yesu u khome vanhu hinkwavo hi xichavo a tlhela a nga hlawuli ndluwa a siya hove hilaha Xikwembu xi endlaka hakona, ku nga khathariseki leswaku munhu wa kona a a ri xigwili kumbe xisiwana, waxinuna kumbe waxisati, lontsongo kumbe lonkulu. Siku rin’wana vadyondzisiwa va Yesu va holovele vatswari lava a va n’wi tisela vana. Kambe Yesu u te: “Tshikani vana lavatsongo va ta eka mina; mi nga ringeti ku va sivela, hikuva mfumo wa Xikwembu i wa lavo tano.”—Marka 10:14.
U kombise vutlhari bya Xikwembu. Yesu a a va twisisa swinene vanhu. “Yena hi byakwe a a swi tiva leswi nga emunhwini.” (Yohane 2:25) Loko valala vakwe va rhume vavanuna leswaku va ya n’wi khoma, vavanuna volavo va kale va ku: “Ku hava munhu un’wana la tshameke a vulavula hi ndlela leyi.” A a byi kuma kwihi vutlhari? U te: “Leswi ndzi swi dyondzisaka a hi swa mina, kambe i swa loyi a ndzi rhumeke.”—Yohane 7:16, 46.
U kombise rirhandzu ra Xikwembu. Yesu a a ri ni ntwela-vusiwana lowukulu eka vanhu. Wanuna un’wana loyi a a ‘tele nhlokonho’ u n’wi kombele a ku: “Hosi, loko u swi lava, u nga ndzi basisa.” Hikwalaho ka ntwela-vusiwana Yesu u ‘tshambulute voko rakwe, a n’wi khumba, a ku: “Ndza swi lava. Basisiwa.” Kutani hi ku hatlisa nhlokonho yi nyamalala eka yena.’ (Luka 5:12, 13; Marka 1:41, 42) Yesu a a swi lava ku tshungula wanuna yoloye.
Xana Yesu u ni mhaka na wena? Yesu hi byakwe u ri: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa. Tlhandlekani joko ra mina ehenhla ka n’wina mi tlhela mi dyondza eka mina, hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya.”—Matewu 11:28, 29.
Yesu i Murhangeri la fanelekaka swinene ku tlula hinkwavo. Hi yona mhaka a hi khutazaka a ku: ‘Dyondzani eka mina.’ Xana u ta xi amukela xirhambo xexo xo tsakisa? Loko u endla tano, u ta va ni ntsako evuton’wini.
[Nhlamuselo ya le hansi]
a Leswaku u kuma nhlamuselo ya nkutsulo, vona ndzima 5 ya buku leyi nge Xana Bibele Yi Dyondzisa Yini Hakunene?
U Nga Hlamula Njhani?
• Yesu u nyikiwe xikhundlha xihi hi Xikwembu?
• Yesu u kombise timfanelo tihi? Hi tihi leti ku tsakisaka ngopfu?
• Xana Yesu u hi rhamba leswaku hi endla yini?
[Xifaniso lexi nga eka tluka 23]
Yesu u pfune vanhu hi ku swi rhandza
[Xifaniso lexi nga eka tluka 23]
Yesu a a va rhandza vana
[Xifaniso lexi nga eka tluka 23]
Ntwela-vusiwana wu endle leswaku Yesu a tshungula lava a va vabya