Xikombiso Lexinene—Rhuti

Noni leyi vuriwaka Rhuti i xikombiso lexinene xa ku tshembeka. U hlawule ku tshama na Nawomi, n’wingi wa yena la dyuhaleke, ematshan’weni ya leswaku a tlhelela emutini wa rikwavo laha a ta hanya vutomi bya le ka byandlana. Hambileswi xiboho xa Rhuti a xi ta endla leswaku swi nga olovi leswaku a tlhela a tekiwa, a a nga anakanyi hi yena ntsena. Ndlela leyi a a rhandza Nawomi ha yona ni ku navela ka yena ku va ni vanhu va Yehovha a swi ri swa nkoka swinene eka yena ku tlula ku hatlisela ku enerisa ku navela ka yena ko nghenela vukati.—Rhuti 1:8-17.

Xana u ehleketa ku nghenela vukati? Kutani tekelela Rhuti. U nga languti ndlela leyi u titwaka ha yona ntsena naswona tivutise leswaku hi tihi timfanelo letinene leti u nga vaka na tona loko se u nghenele vukati. Hi xikombiso, xana wa tshembeka naswona u rhangisa swilaveko swa van’wana? Xana u hanya hi ku landzela milawu ya Xikwembu, hambiloko ku nga hetiseki ku ku susumetela ku endla swilo leswi hoxeke? Rhuti a a nga lavi munghana wa vukati hi mahlo-ngati. Hambiswiritano, hi ku famba ka nkarhi, u kume wanuna loyi a a wupfile loyi a a ri ni timfanelo leti fanaka ni ta yena—xa nkoka swinene, a a rhandza Xikwembu. Na wena u nga kuma vuyelo lebyi fanaka.