Samuwele U Hambete A Endla Leswi Nga Swinene

Ku sukela loko Samuwele a ha ri ntsongo swinene, a a tshama ni ku tirha etabernakeleni, ku nga ndhawu leyi vanhu a va ta leswaku va ta gandzela Yehovha. Xana wa swi tiva leswaku swi tise ku yini leswaku Samuwele a tshama etabernakeleni? A hi rhange hi dyondza hi mana wa Samuwele, ku nga Hana.

Hana u hete nkarhi wo leha a nga kumi n’wana hambileswi a a n’wi lava. Kutani u khongele eka Yehovha a kombela leswaku a n’wi pfuna. U tshembise leswaku loko o kuma n’wana wa jaha, a a ta n’wi yisa etabernakeleni leswaku a ya tshama ni ku tirha kona. Yehovha u hlamule xikhongelo xakwe hiloko a kuma n’wana. U n’wi thye vito leri nge Samuwele. Hilaha Hana a tshembiseke hakona, loko Samuwele a ri ni malembe manharhu kumbe mune, u n’wi yise etabernakeleni leswaku a ya tirhela Xikwembu kwale.

Eli a a ri muprista lonkulu etabernakeleni. Vana vakwe vambirhi va majaha na vona a va tirha kona. Tsundzuka, tabernakela a ku ri yindlu ya Xikwembu ya vugandzeri naswona vanhu a va fanele va endla leswinene eka yona. Kambe vana va Eli a va endla swilo swo biha. Samuwele a a swi vona leswi a va swi endla. Xana Samuwele u endle swilo swo biha hilaha vana va Eli va endleke hakona?— Doo, u hambete a endla leswi nga swinene, hilaha vatswari vakwe va n’wi dyondziseke hakona.

Xana u ehleketa leswaku Eli a a fanele a endle yini hi vana vakwe vambirhi?— A fanele a va xupurile. A fanele a nga va pfumelelanga leswaku va hambeta va tirha endlwini ya Xikwembu. Kambe Eli a nga swi endlanga sweswo, kutani Yehovha u n’wi hlundzukerile yena ni vana vakwe. Yehovha u endle xiboho xo va xupula.

Siku rin’wana nivusiku loko Samuwele a etlele, u twe un’wana a ri karhi a n’wi vitana a ku: ‘Samuwele!’ Kutani u tsutsumele eka Eli, kambe Eli u te: ‘A ndzi ku vitananga.’ Leswi swi endleke minkarhi leyi tlulaka kambirhi. Endzhaku ka loko swi endleke kanharhu, Eli u byele Samuwele leswaku loko a tlhela a twa rito, u fanele a ku: ‘Ndzi kombela u vulavula Yehovha; ndzi yingisile.’ Kutani Samuwele u endle tano. Xisweswo Yehovha u byele Samuwele a ku: ‘Byela Eli leswaku ndzi ta xupula ndyangu wakwe hikwalaho ka swilo swo biha leswi wu swi endleke.’ Xana u ehleketa leswaku a swi nga n’wi tikeli Samuwele ku byela Eli rungula leri?— Doo, a swi n’wi tikela. Kambe hambileswi Samuwele a a chava, u endle leswi Yehovha a n’wi byeleke swona. Leswi Yehovha a swi vuleke swi hetisekile. Eli swin’we ni vana vakwe vambirhi va majaha va dlayiwile.

Samuwele i xikombiso lexinene eka hina. U endle leswi nga swinene hambileswi a voneke vanhu van’wana va endla swilo swo biha. Ku vuriwa yini hi wena? Xana u ta fana na Samuwele u hambeta u endla leswi nga swinene? Loko u endla tano, u ta endla leswaku Yehovha ni vatswari va wena va tsaka.