Tshembeka Eka Nkataku

Yehovha u lava leswaku hi tshembeka. (Mikiya 6:8) Leswi i swa nkoka swinene evukatini bya wena, hikuva ku tshembeka i ka nkoka. Naswona leswaku mi rhandzana mi fanele mi tshembana.

Namuntlha, vanhu a va ha tshembeki evukatini. Leswaku u sirhelela vukati bya wena, u fanele u tiyimisela ku endla swilo swimbirhi.

1 TEKA VUKATI BYA WENA BYI RI BYA NKOKA

LESWI BIBELE YI SWI VULAKA: “Tiyiseka hi swilo swa nkoka swinene.” (Vafilipiya 1:10) Vukati bya wena i xin’wana xa swilo swa nkoka swinene evuton’wini bya wena. U fanele u byi teka byi ri bya nkoka.

Yehovha u lava leswaku mi rhandzana naswona mi ‘tiphina hi vutomi’ swin’we. (Eklesiasta 9:9) U swi veka erivaleni leswaku a wu fanelanga u honisa nkataku, kambe mi fanele mi lava tindlela leti mi nga tsakisanaka ha tona. (1 Vakorinto 10:24) Endla nkataku a titwa a rhandziwa ni ku tekiwa a ri wa nkoka.

LESWI U NGA SWI ENDLAKA:

• Tiyiseka leswaku u heta nkarhi u ri ni nkataku naswona u n’wi seketela swinene

• U nga ha tianakanyeli kambe anakanyela ni nkataku

2 HLAYISA MBILU YA WENA

LESWI BIBELE YI SWI VULAKA: “Un’wana ni un’wana la tshamelaka ku languta wansati lerova a n’wi navela, ana se u endle vuoswi na yena embilwini yakwe.” (Matewu 5:28) Loko munhu a tshamela ku anakanya hi timhaka ta masangu ni munhu wo karhi, kahle-kahle, u va a nga tshembekanga eka nkataku.

Yehovha u vula leswaku u fanele u “hlayisa mbilu ya wena.” (Swivuriso 4:23; Yeremiya 17:9) Leswaku u endla leswi, u fanele u rindza mahlo ya wena. (Matewu 5:29, 30) Landzela xikombiso xa mupatriyaka Yobo, loyi a endleke ntwanano ni mahlo ya yena leswaku a nge n’wi languti wansati lerova a n’wi navela. (Yobo 31:1) Tiyimisele ku ka u nga swi hlaleli swifaniso swo navetisa rimbewu. Naswona tiyimisele ku papalata ku rhandzana ni munhu un’wana handle ka nkataku.

LESWI U NGA SWI ENDLAKA:

• Swi veke erivaleni eka van’wana leswaku u tshembeke hi ku helela eka nkataku

• Xiya ndlela leyi munghana wa wena wa vukati a titwaka ha yona naswona u namba u herisa vuxaka byihi na byihi lebyi nga ta endla nkataku a titwa a nga ntshunxekang