Yesu A Hlawula Vaapostola Va 12

Se a ku hundze kwalomu ka lembe ni hafu Yohane Mukhuvuri a vule leswaku Yesu i Xinyimpfana xa Xikwembu. Loko Yesu a sungula ntirho wakwe, vavanuna vo hlayanyana lavanene va ve vadyondzisiwa va yena, tanihi Andriya, Simoni Petro, Yohane, kumbexana Yakobo (makwavo wa Yohane), Filipi na Batolomi (loyi nakambe a vuriwaka Nathaniyele). Hi ku famba ka nkarhi ku tlhele ku joyina van’wana va landzela Kreste.—Yohane 1:45-47.

Sweswi Yesu se a a swi lunghekerile ku hlawula vaapostola vakwe. Lava a ku ta va vanghana vakwe lavakulu lava a va ta leteriwa hi ndlela yo hlawuleka. Kambe loko Yesu a nga si va hlawula, u ye entshaveni kumbexana leyi nga ekusuhi ni Lwandle ra Galeliya, laha a ku nga ri kule ni le Kapernawume. U hete vusiku hinkwabyo a ri karhi a khongela, kumbexana a a kombela vutlhari ni leswaku Xikwembu xi n’wi katekisa. Hi siku leri landzelaka u vitane vadyondzisiwa vakwe kutani a hlawula 12 ya vaapostola.

U hlawule lava ku vulavuriweke hi vona eku sunguleni, ku katsa na Matewu loyi Yesu a n’wi vitaneke a ri ehofisini ya xibalo. Lavan’wana va ntlhanu i Yudasi (loyi nakambe a vuriwaka Tadiya ni “nwana wa Yakobo”), Simoni lowa Mukanana, Tomasi, Yakobo n’wana wa Alfiya na Yudasi Iskariyota.—Matewu 10:2-4; Luka 6:16.

Sweswi vaapostola lava 12 a va famba na Yesu naswona se a a va tiva kahle. Vo hlayanyana a va ri maxaka ya yena. Swi le rivaleni leswaku vamakwavo Yakobo na Yohane i va muzala vo sungula va Yesu. Naswona loko ku ri leswaku Alfiya a a ri buti wa Yosefa, tata wa Yesu hilaha van’wana va vulaka hakona, swi vula leswaku n’wana wa Alfiya, Yakobo a a ri muzala wa Yesu.

Yesu a ma nga n’wi karhati mavito ya vaapostola. Kambe xana wa ma tsundzuka? Ndlela yin’wana leyi nga ku pfunaka u va tsundzuka hi leswaku vambirhi a a va vitaniwa Simoni, vambirhi a a va vitaniwa Yakobo naswona vambirhi a a va vitaniwa Yudasi.Makwavo wa Simoni (Petro) a ku ri Andriya naswona Yakobo (n’wana wa Zebediya) makwavo a ku ri Yohane. Yoleyo hi yona ndlela yo tsundzuka mavito ya vaapostola va nhungu. Lavan’wana va mune va katsa muhakerisi wa xibalo (Matewu), (Tomasi) loyi hi ku famba ka nkarhi a a kanakana, (Nathaniyele) loyi a vitaniweke ehansi ka nsinya na (Filipi) munghana wa Nathaniyele.

Vaapostola va 11 a va huma laha Yesu a a huma kona, eGaleliya. Nathaniyela a a ri wa le Kana. Filipi, Petro na Andriya a va huma eBetsayida. Hi ku famba ka nkarhi Petro na Andriya va rhurhele eKapernawume laha swi nga endlekaka Matewu a a tshama kona. Yakobo na Yohane na vona a a va tshama ekusuhi ni le Kapernawume naswona a a va endla ntirho wo phasa tihlampfi kwala kusuhi. Swi vonaka Yudasi Iskariyota a a ku ri yena ntsena muapostola loyi a a huma eYudiya.