Lazaro A Pfuxiwa Eku Feni

Yesu u ya esirheni ra Lazaro a ri na Marta na Mariya endzhaku ko hlangana na vona ekusuhi ni muti wa Betaniya. Sirha ra kona i bako leri nyangwa wa rona ri pfariweke hi ribye. Hiloko Yesu a va lerisa a ku: “Susani ribye.” Marta wa vilela hikuva a nga swi twisisi leswi Yesu a lavaka ku swi endla. U byela Yesu a ku: “Hosi, u fanele se a nun’hwa hikuva se swi endla masiku ya mune a file.” Kambe Yesu u ri eka yena: “Xana a ndzi ku byelanga leswaku loko u ri ni ripfumelo u ta vona matimba ya Xikwembu?”—Yohane 11:39, 40.

Hiloko va susa ribye. Kutani Yesu u languta etilweni ivi a khongela a ku: “Tatana, ndza khensa hikuva u ndzi yingisile. I ntiyiso, ndza swi tiva leswaku wa ndzi yingisela nkarhi hinkwawo; kambe ndzi vulavula hikwalaho ka ntshungu lowu yimeke laha leswaku wu ta tshemba leswaku u ndzi rhumile.” Ku khongela ka Yesu emahlweni ka vanhu swi ta va kombisa leswaku leswi a lavaka ku swi endla u ta swi endla hi matimba lama humaka eka Xikwembu. Endzhaku ka sweswo, Yesu u huwelela hi rito leri tlakukeke a ku: “Lazaro, huma!” Hiloko Lazaro a humela ehandle a tsondzeriwe mavoko, milenge ni xikandza hi malapi. Yesu a ku: “N’wi tshunxeni, mi n’wi tshika a famba.”—Yohane 11:41-44.

Vayuda vo tala lava teke ku ta chavelela Mariya na Marta va vona singita leri kutani va va ni ripfumelo eka Yesu. Kambe van’wana va famba va ya byela Vafarisi leswi Yesu a swi endleke. Hiloko Vafarisi ni vaprista lavakulu va khoma nhlengeletano ni Sanedri, ku nga khotonkulu ya Vayuda. Eka huvo yoleyo a ku ri na muprista lonkulu Kayafasi. Van’wana va vona va rila va ku: “Hi ta endla yini, hikuva munhu loyi u endla masingita yo tala? Loko hi n’wi tshika a ya emahlweni, hinkwavo va ta pfumela eka yena naswona Varhoma va ta fika va teka ndhawu ni tiko ra hina.” (Yohane 11:47, 48) Hambileswi va swi tweke eka timbhoni leti swi voneke hi mahlo leswaku Yesu “u endla masingita yo tala,” vavanuna lava a va tsaki hileswi Xikwembu xi swi endlaka hi ku tirhisa yena. Lexi va karhataka ngopfu i ku va ni xikhundlha ni vulawuri.

Ku pfuxiwa ka Lazaro eku feni a ku ri ku hluriwa ka Vasaduki, lava nga pfumeriki eka ku pfuxiwa ka vafi. Sweswi Kayafasi lowa Musaduki u ri: “N’wina a mi tivi nchumu, naswona a mi swi voni leswaku swi pfuna n’wina loko munhu un’we a fela vanhu, ematshan’weni ya leswaku tiko hinkwaro ri lovisiwa.”—Yohane 11:49, 50; Mitirho 5:17; 23:8.

Leswi Kayafasi a swi vuleke “a ku nga ri mavonelo yakwe” kambe i Xikwembu lexi n’wi tirhiseke ku vula marito wolawo hileswi a ri ni xikhundlha xo hlawuleka. Kayafasi u vula leswaku Yesu u fanele a dlayiwa leswaku a nga yi emahlweni a langutela vulawuri ehansi ni nkucetelo lowu varhangeri va vukhongeri va Vayuda va nga na wona. Hambiswiritano, vuprofeta bya Kayafasi byi kombisa leswaku rifu ra Yesu ri ta tisa nkutsulo, ku nga ri eka Vayuda ntsena kambe ni le ka “vana va Xikwembu lava hangalakeke.”—Yohane 11:51, 52.

Kayafasi u swi kotile ku kucetela Sanedri leswaku yi luka marhengu yo dlaya Yesu. Xana Nikodema xirho xa huvo ya Sanedri loyi a nga munghana wa Yesu u ta n’wi byela leswi va kunguhataka ku swi endla? Hambiswiritano, Yesu xikan’wekan’we u suka eYerusalema kutani a papalata ku dlayiwa ku nga si fika nkarhi lowu vekiweke hi Xikwembu.