Murhi Wa Nkuwa Wu Tirhiseriwa Ku Dyondzisa Dyondzo Ya Ku Va Ni Ripfumelo

Loko a suka eYerusalema hi Musumbhunuku nindzhenga, Yesu u tlhelela eBetaniya hi le vuxeni bya Ntshava ya Mitlhwari. A swi kanakanisi leswaku u etlela ekaya ra vanghana vakwe ku nga Lazaro, Mariya na Marta.

Sweswi i Nisani 11 nimixo. Yesu ni vadyondzisiwa vakwe va le ndleleni naswona va tlhelela eYerusalema laha a nga ta ya etempeleni ro hetelela. Nakambe i siku rakwe ro hetelela a ri karhi a chumayela vanhu loko a nga si tlangela Paseka ni ku simeka Xitsundzuxo xa rifu rakwe ivi endzhaku a tengisiwa a tlhela a dlayiwa.

Loko va ri endleleni naswona va ri karhi va huma eBetaniya ivi va famba hi le Ntshaveni ya Mitlhwari va kongoma eYerusalema, Petro u vona murhi lowu Yesu a wu rhukaneke tolo nimixo. “Rabi, languta, nkuwa lowu u nga wu rhukana wu omile.”—Marka 11:21.

Hikwalahokayini Yesu a endle leswaku nkuwa lowu wu oma matluka? U paluxa xivangelo xa kona loko a hlamula a ku: “Ndzi tiyisile ndzi ri eka n’wina, loko mi ri ni ripfumelo naswona mi nga kanakani, a mi nge endli leswi ndzi swi endleke eka nkuwa lowu ntsena, kambe mi nga byela ni ntshava leyi mi ku, ‘Suka u ya tihoxa elwandle,’ kutani swi ta endleka. Naswona swilo hinkwaswo leswi mi swi kombelaka hi xikhongelo mi ri ni ripfumelo, mi ta swi kuma.” (Matewu 21:21, 22) Xisweswo u phindha yinhla leyi a yi vuleke eku sunguleni ya leswaku ripfumelo ra swi kota ku susa ntshava.—Matewu 17:20.

Hikwalaho, loko Yesu a endla leswaku murhi wu oma matluka u dyondzisa dyondzo ya xilaveko xa ku va ni ripfumelo eka Xikwembu. U ri: “Hi yona mhaka leyi ndzi nge, swilo hinkwaswo leswi mi swi khongelelaka ni ku swi kombela, vanani ni ripfumelo ra leswaku se mi swi kumile, kutani mi ta nyikiwa swona.” (Marka 11:24) Mayana dyondzo ya nkoka swonghasi eka valandzeri va Yesu hinkwavo! Dyondzo leyi i ya nkoka eka vaapostola va Yesu hileswi va nga ta langutana ni miringo yo tika ku nga ri khale. Ku ni ku yelana exikarhi ka ku oma ka murhi wa nkuwa ni ntikelo wa ripfumelo.

Ku fana ni murhi lowu wa nkuwa, tiko ra Israyele ri ni xivumbeko lexi kanganyisaka. Vanhu va tiko leri va ni ntwanano wa vuxaka ni Xikwembu naswona ehandle va nga ha vonaka onge va yingisa Nawu wa xona. Hambiswiritano, tiko hinkwaro ri tikombe ri ri hava ripfumelo naswona ri nga tswali mihandzu leyinene. A va pfumeli ni le ka N’wana wa Xikwembu! Kambe, hi ku endla leswaku murhi lowu nga tswariki mihandzu wu oma matluka, Yesu u kombisa leswi nga ta endleka eka tiko leri nga tswariki mihandzu naswona ri nga riki na ripfumelo.

Swi nga si ya kwihi, Yesu ni vadyondzisiwa vakwe va nghena eYerusalema. Yesu u ya etempeleni kutani a sungula ku dyondzisa hilaha a a tolovele ku endla hakona. Swi nga endleka vaprista lavakulu ni vakulukumba va swi tsundzuka leswi Yesu a swi endleke tolo eka vacincisi va mali kutani va n’wi tlhontlha va ku: “U swi endla hi matimba ya mani swilo leswi? Kumbe i mani loyi a ku nyikeke matimba lawa?”—Marka 11:28.

Yesu u va hlamula a ku: “Na mina ndzi ta mi vutisa xivutiso xin’we. Loko mo ndzi hlamula, ndzi ta mi byela leswaku ndzi endla swilo leswi hi matimba ya mani. Xana nkhuvulo wa Yohane a wu huma etilweni kumbe a wu huma eka vanhu? Ndzi hlamuleni.” Sweswi vakaneti vakwe hi vona va tlhontlhiwaka. Hiloko va sungula ku vulavula va ri voxe, va ku: “Loko hi ku, ‘A wu huma etilweni,’ u ta ku, ‘Kutani, hikwalaho ka yini mi nga n’wi tshembanga?’ Kambe xana hi nga ku, ‘A wu huma eka vanhu’?” A va chava ntshungu, hikuva ntshungu hinkwawo “a wu tshemba leswaku Yohane a a ri muprofeta.”—Marka 11:29-32.

Vakaneti vakwe a va swi koti ku kuma nhlamulo leyi faneleke. Hikwalaho va hlamula va ku: “A hi swi tivi.” Yesu a ku eka vona: “Na mina a ndzi nge mi byeli leswaku ndzi endla swilo leswi hi matimba ya mani.”—Marka 11:33.