Yesu U Tisa Paradeyisi Ni Ku Hetisisa Xiavelo Xakwe

Endzhaku ka loko a khuvuriwile, Yesu u lwisane ni nala loyi a a tiyimisele ku n’wi tshikisa ku endla ntirho wakwe wo chumayela hambileswi a nga si wu sungula. Entiyisweni, Diyavulosi u ringete hi tindlela to tala ku ringa Yesu. Hi ku famba ka nkarhi, Yesu u vule leswi hi lowo homboloka: “Mufumi wa misava wa ta kambe a nge ndzi endli nchumu.”—Yohane 14:30.

Muapostola Yohane u ve ni xivono xa leswi nga ta humelela eka ‘dragona leyikulu, ku nga nyoka ya khale, leyi vuriwaka Diyavulosi na Sathana.’ Nala loyi wo homboloka a a ta hlongoriwa etilweni “a hlundzukile swinene, hi ku tiva leswaku u ni nkarhi wo koma.” (Nhlavutelo 12:9, 12) Vakreste va ni xivangelo lexi twalaka xo tshemba leswaku va hanya ‘enkarhini wolowo wo koma’ naswona ku nga ri khale, ‘dragona leyikulu ku nga nyoka ya khale,’ yi ta lahleriwa ekheleni ro enta kutani a yi nge he vi kona ku ringana malembe ya 1 000 loko Yesu a ri karhi a fuma eMfun’weni wa Xikwembu.—Nhlavutelo 20:1, 2.

Hi nkarhi wolowo, ku ta endleka yini hi misava leyi ku nga kaya ra hina? I vamani lava nga ta hanya eka yona naswona va fanele va endla yini leswaku va hanya eka yona? Yesu u hi nyika nhlamulo ya xivutiso lexi. Eka xifaniso xakwe xa tinyimpfu ni timbuti, u hlamusele vumundzuku lebyi nga ta kumiwa hi vanhu vo lulama lava fanaka ni tinyimpfu naswona va tirhisanaka na yena kahle ni ku endlela vamakwavo leswinene. U tlhele a hlamusela leswi nga ta endlekela vanhu lava endlaka swilo swo biha, lava fanaka ni timbuti. Yesu u te: “Kutani lava [va timbuti] va ta loviseriwa makumu, kambe lavo lulama [va tinyimpfu] va ta kuma vutomi lebyi nga heriki.”—Matewu 25:46.

Leswi swi hi endla hi twisisa marito lawa Yesu a ma byeleke xigevenga lexi a xi ri etlhelo kakwe emhandzini. Yesu a nga tshembisanga wanuna yoloye xitshembiso lexi fanaka ni lexi a xi tshembiseke vaapostola vakwe, xa ku fuma na yena eMfun’weni wa le tilweni. Ku ri na sweswo, Yesu u tshembise xigevenga xolexo a ku: “Ndza ku tshembisa namuntlha, u ta va na mina eParadeyisini.” (Luka 23:43) Wanuna yoloye u kume nkateko wa ku hanya eParadeyisini, leyi ku nga ndhawu leyi fanaka ni ntanga. Hilaha ku fanaka, lava namuntlha va fanaka ni tinyimpfu va ta kuma “vutomi lebyi nga heriki” eParadeyisini yoleyo.

Leswi swi fambisana kahle ni swiyimo leswi hlamuseriweke hi muapostola Yohane, leswi nga ta endleka laha misaveni. U te: “Tabernakela ya Xikwembu yi le xikarhi ka vanhu, xi ta tshama na vona, va ta va vanhu va xona. Xikwembu hi xoxe xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri nkosi, ku rila ni switlhavi a swi nge he vi kona. Swilo swo sungula swi hundzile.”—Nhlavutelo 21:3, 4.

Leswaku xigevenga xexo xi tiphina hi vutomi eParadeyisini, xi fanele xi rhanga xi pfuxiwa eka lava feke. Kambe a xi nge pfuxiwi xi ri xoxe. Yesu u swi hlamusele kahle sweswo loko a ku: “Nkarhi wa ta lowu hinkwavo lava nga emasirheni va nga ta twa rito ra yena kutani va huma, lava endleke leswinene va ta kuma vutomi, kambe lava a va endla leswo biha va ta pfukela ku avanyisiwa.”—Yohane 5:28, 29.

Kambe ku ta endleka yini hi vaapostola vo tshembeka ni hi nhlayo yitsongo ya lava nga ta fuma na Yesu etilweni? Bibele yi ri: “Va ta va vaprista va Xikwembu ni va Kreste naswona va ta va tihosi na yena ku ringana malembe ya 1 000.” (Nhlavutelo 20:6) Vanhu lava nga ta fuma na Kreste etilweni, i vavasati ni vavanuna lava a va hanya laha misaveni. Hikwalaho, va ta va vafumi va le tilweni lava nga ni ntwelavusiwana ni lava twisisaka, lava nga ta fuma vanhu va laha misaveni.—Nhlavutelo 5:10.

Yesu u ta tirhisa gandzelo rakwe ra nkutsulo leswaku a vuyerisa vanhu va laha misaveni ni ku herisa ndzhukano wa xidyoho lexi va xi kumeke. Yena ni vafumi vakwe va ta endla leswaku vanhu vo tshembeka va nga ha vi na xidyoho. Entiyisweni, vanhu va ta tiphina hi vutomi hilaha Xikwembu a xi lave hakona eku sunguleni loko xi byela Adamu na Evha leswaku va tswalana va andza va tata misava. Hambi ku ri rifu leri vangiweke hi xidyoho xa Adamu a ri nge he vi kona!

Hikwalaho, Yesu u ta hetisisa hinkwaswo leswi Yehovha a n’wi kombeleke swona. Eku heleni ka Mfumo wa Gidi ra Malembe, Yesu u ta tlherisela Mfumo eka Tata wakwe naswona wu ta va ni vanhu lava nga riki na xidyoho. Loko muapostola Pawulo a tsala hi ku titsongahata loku ka Yesu, u te: “Loko swilo hinkwaswo swi ta va swi vekiwe ehansi ka yena, kutani N’wana na yena u ta tiveka ehansi ka Loyi a vekeke swilo hinkwaswo ehansi ka yena, leswaku Xikwembu xi va swilo hinkwaswo eka vanhu hinkwavo.”—1 Vakorinto 15:28.

Swi lo tlangandlaa leswaku Yesu u endla ntirho wa nkoka eku hetisiseni ka xikongomelo xa Xikwembu. Loko xikongomelo xexo xi ya emahlweni xi endleka emisaveni hinkwayo, Yesu u ta hanya hi ku pfumelelana ni xithopo lexi a tinyikeke xona lexi nge: “Hi mina ndlela ni ntiyiso ni vutomi.”—Yohane 14:6.