“Tsundzukani Lava Rhangelaka Exikarhi Ka N’wina”

MARITO lawa ya muapostola Pawulo, lama tsariweke eka Vaheveru 13:7, ma nga ha tlhela ma hundzuluxeriwa ma ku: “Tsundzukani lava mi fumaka.” Ku sukela hi Pentekosta ya 33 C.E., ku ya emahlweni, vaapostola vo tshembeka va Hosi Yesu Kreste va hetisise xiavelo lexi tanihi huvo leyi fumaka leyi rhangeleke eku nyikeleni ka nkongomiso eka vandlha ra Vukreste leri a ra ha ku simekiwa. (Mint. 6:2-4) Loko ku fika lembe ra 49 C.E., huvo leyi leyi fumaka se a yi ndlandlamuxiwile yi katsa ni van’wana lava a va nga ri vaapostola va Yesu. Loko ku endliwa xiboho emhakeni ya ku yimba, huvo leyi a yi katsa “vaapostola ni vakulukumba eYerusalema.” (Mint. 15:1, 2) A ku ri vutihlamuleri bya vona ku kambisisa timhaka leti khumbaka Vakreste hinkwako-nkwako. A va rhumela mapapila ni swiboho, leswi a swi tiyisa mavandlha ni ku endla leswaku vadyondzisiwa va tshama va ri ni vun’we emianakanyweni ni hi swiendlo. Mavandlha ma landzele nkongomiso wa huvo leyi fumaka kutani sweswo swi endle leswaku ma kuma mikateko ya Yehovha nileswaku swilo swi ma fambela kahle.—Mint. 8:1, 14, 15; 15:22-31; 16:4, 5; Hev. 13:17.

² Endzhaku ka loko vaapostola va file, ku sungule vugwinehi lebyikulu. (2 Tes. 2:3-12) Exifanisweni xakwe xa koroni ni mfava, Yesu u profete hi koroni (ku nga Vakreste lava totiweke) leyi haxiweke ni mfava (ku nga Vakreste va mavunwa). Ku ringana malembe-xidzana, mintlawa leyi a yi ta pfumeleriwa ku kula swin’we, kukondza ku fika nkarhi wo tshovela, lowu a wu ta fika “[emakumu] ya mafambiselo lawa ya swilo.” (Mat. 13:24-30, 36-43) Vakreste lava totiweke va hambete va tiphina hi ku tsakeriwa hi Yesu hi nkarhi wolowo, kambe a ku ri hava huvo leyi fumaka swin’we ni ndlela leyi Yesu a yi tirhisa laha misaveni ya ku nyikela nkongomiso eka valandzeri vakwe. (Mat. 28:20) Hambiswiritano, u profete leswaku a ku ta va ni ku cinca hi nkarhi wa ntshovelo.

³ “Kahle-kahle i mani hlonga ro tshembeka ni ro tlhariha?” Yesu Kreste u tlakuse xivutiso xexo leswaku a ta vula xifaniso, tanihi xiphemu xa “xikombiso” lexi a xi vuleke malunghana ni “makumu ya mafambiselo ya swilo.” (Mat. 24:3, 42-47) Yesu u vule leswaku hlonga leri ro tshembeka a ri ta va ri khomekile hi ku phamela vanhu va Xikwembu swakudya swa moya “hi nkarhi lowu faneleke.” Tanihi leswi Yesu a tirhiseke ntlawa wa vavanuna—ku nga ri munhu un’we—leswaku va rhangela hi lembe-xidzana ro sungula, hlonga ro tshembeka leri Yesu a ri tirhisaka emakumu ka mafambiselo lawa ya swilo a hi munhu un’we.

NDLELA YO VONA “HLONGA RO TSHEMBEKA NI RO TLHARIHA”

⁴ I mani loyi Yesu a n’wi vekeke leswaku a phamela valandzeri vakwe swakudya? Swa fanela ku va a tirhisa Vakreste lava totiweke laha misaveni. Bibele yi va vitana “vaprista va vuhosi” lava lerisiweke ku “‘byi twarisa hinkwako-nkwako vunene’ bya Loyi a [va] vitaneke [va] huma emunyameni [va] nghena eku vonakaleni kakwe loku hlamarisaka.” (1 Pet. 2:9; Mal. 2:7; Nhlav. 12:17) Xana vatotiwa hinkwavo lava nga laha misaveni va vumba hlonga ro tshembeka? Doo! Loko Yesu a phamela ntshungu wa vavanuna va kwalomu ka 5 000 hi singita, ku nga hlayiwi vavasati ni vana lavatsongo, u nyike vadyondzisiwa vakwe kutani vona va swi nyika ntshungu. (Mat. 14:19) U phamele vanhu vo tala hi ku tirhisa vanhu vatsongo. Ninamuntlha, u phamela swakudya swa moya hi ndlela leyi fanaka.

⁵ Xisweswo, “mulanguteri wo tshembeka, lowo tlhariha,” u yimela ntlawa lowutsongo wa vamakwerhu lava totiweke lava katsekaka eka ku lunghiselela ni ku phamela swakudya swa moya hi nkarhi wa vukona bya Kreste. (Luka 12:42) Emasikwini yo hetelela, vamakwerhu lava totiweke lava vumbaka “hlonga ro tshembeka ni ro tlhariha” va tirha swin’we entsindza wa Timbhoni ta Yehovha. Namuntlha, vamakwerhu lava, lava totiweke va vumba Huvo leyi Fumaka ya Timbhoni ta Yehovha.

⁶ Kreste u tirhisa huvo leyi ku kandziyisa rungula ra ku hetiseka ka vuprofeta bya Bibele ni ku nyikela nkongomiso lowu fikeke hi nkarhi eka ku tirhisa misinya ya milawu ya Bibele evuton’wini bya siku ni siku. Swakudya leswi swa moya swi yisiwa emavandlheni ya kwalaho ya Timbhoni ta Yehovha. (Esa. 43:10; Gal. 6:16) Eminkarhini ya ku tsariwa ka Bibele, hlonga kumbe mulanguteri la tshembiwaka a a langutela swilo hinkwaswo swa n’wini wa yena. Hilaha ku fanaka, hlonga ro tshembeka ni ro tlhariha ri nyikiwe vutihlamuleri byo langutela va yindlu lava nga swin’we eripfumelweni. Kutani hlonga ro tshembeka ri khathalela mali, ntirho wo chumayela, minongonoko ya tinhlengeletano, ku vekiwa ka valanguteri leswaku va tirha eka mintirho yo hambana-hambana enhlanganweni ni ku humesiwa ka minkandziyiso leyi sekeriweke eBibeleni, leyi hinkwayo ka yona yi vuyerisaka “va yindlu.”—Mat. 24:45.

⁷ Kutani, i vamani “va yindlu”? I vanhu lava phameriwaka swakudya swa moya. Eku sunguleni, va yindlu hinkwavo a ku ri vatotiwa. Endzhakunyana, va yindlu va katse ntshungu lowukulu wa “tinyimpfu tin’wana.” (Yoh. 10:16) Mintlawa hayimbirhi yi phameriwa swakudya swa moya hi hlonga ro tshembeka.

⁸ Hi nkarhi wa nhlomulo lowukulu, loko Yesu a ta leswaku a ta tivisa ni ku tisa vuavanyisi eka fambiselo leri ro biha ra swilo, u ta veka hlonga ro tshembeka “ehenhla ka hinkwaswo leswi nga swa yena.” (Mat. 24:46, 47) Lava va vumbaka hlonga ro tshembeka va ta kuma hakelo ya vona ya le tilweni. Vona swin’we ni lavan’wana hinkwavo va 144 000, va ta fuma na Kreste etilweni. Hambileswi ku nga ta va ku nga ha ri na hlonga ro tshembeka ni ro tlhariha emisaveni, Yehovha na Yesu va ta kongomisa vanhu lava fumiwaka hi Mfumo wa Mesiya laha misaveni hi ku tirhisa lava vekiweke tanihi “tihosana.”—Ps. 45:16.

HA YINI HI ‘TSUNDZUKA LAVA RHANGELAKA’?

⁹ Hi ni swivangelo swo tala swo ‘tsundzuka lava rhangelaka’ ni ku kombisa leswaku ha va tshemba. Ha yini ku endla leswi swi hi pfuna? Muapostola Pawulo u te: “Va tshama va rindze mimoya-xiviri ya n’wina hikuva hi vona va nga ta hlamusela; leswaku va endla leswi hi ntsako ku nga ri hi ku vilela, hikuva leswi swi nga mi vavisa.” (Hev. 13:17) I swa nkoka leswaku hi yingisa ni ku amukela nkongomiso wa lava rhangelaka tanihi leswi va hi langutelaka leswaku hi sirheleleka emoyeni ni leswaku hi tsaka.

¹⁰ Hilaha swi tsariweke hakona eka 1 Vakorinto 16:14, Pawulo u te: “Timhaka ta n’wina hinkwato a ti endleke hi rirhandzu.” Swiboho leswi endleriwaka vanhu va Xikwembu swi sekeriwe eka mfanelo leyi, leyi tlakukeke ya rirhandzu. Loko 1 Vakorinto 13:4-8 yi vulavula hi rirhandzu, yi ri: “Rirhandzu ri ni mbilu yo leha ni musa. Rirhandzu a ri na mavondzo, a ri tikurisi, a ri tikukumuxi, a ri tikhomi hi ndlela leyi nga tengangiki, a ri lavi leswi vuyerisaka rona ntsena, a ri hlundzuki. A ri hlayisi mhaka yo biha. A ri tsaki hi leswi nga lulamangiki, kambe ri tsaka ni ntiyiso. Ri byarha swilo hinkwaswo, ri kholwa swilo hinkwaswo, ri va ni ntshembo eka swilo hinkwaswo, ri tiyisela swilo hinkwaswo. Rirhandzu a ri heli.” Leswi swiboho hinkwaswo leswi endleriwaka ku pfuna malandza ya Yehovha swi sekeriweke erirhandzwini, hi fanele hi titwa hi sirhelelekile ehansi ka nkongomiso wolowo. Ku tlula kwalaho, leyi i ndlela leyi Yehovha a kombisaka rirhandzu rakwe ha yona.

¹¹ Hilaha a swi ri hakona eka lembe-xidzana ro sungula, Yehovha u tirhisa vanhu vakwe lava nga hetisekangiki leswaku va rhangela vanhu vakwe. Hambiswiritano, enkarhini lowu hundzeke, Yehovha u tirhise vanhu lava nga hetisekangiki leswaku va hetisisa ku rhandza kakwe. Nowa u ake ngalava ni ku chumayela hi ta ndzoviso lowu a wu ta fika enkarhini wakwe. (Gen. 6:13, 14, 22; 2 Pet. 2:5) Muxe u vekiwe leswaku a rhangela vanhu va Yehovha loko va huma aEgipta. (Eks. 3:10) Ku huhuteriwe vanhu lava nga hetisekangiki leswaku va tsala Bibele. (2 Tim. 3:16; 2 Pet. 1:21) Mhaka ya leswaku Yehovha u tirhisa vanhu lava nga hetisekangiki namuntlha leswaku va kongomisa ntirho wo chumayela ni ku endla vadyondzisiwa a yi endli leswaku hi nga wu tshembi nhlangano wa Xikwembu. Ku ri na sweswo, ha tiyiseka hileswi hi swi tivaka leswaku nhlangano a wu nga ta swi kota ku endla hinkwaswo leswi wu swi endlaka loko a wu nga seketeriwi hi Yehovha. Hi ku langutana ni swiphiqo swo tala, hlonga ro tshembeka ri kombise leswaku ri kongomisiwa hi moya wa Xikwembu. Namuntlha, xiphemu xa nhlangano wa Yehovha xa laha misaveni xi katekisiwile swinene. Kutani hi xi seketela ni ku xi tshemba hi timbilu ta hina hinkwato.

NDLELA YO KOMBISA KU TSHEMBA NHLANGANO WA YEHOVHA

¹² Lava va nyikiweke vutihlamuleri byo karhi evandlheni, va kombisa leswaku va yi tshemba nhlengeletano hi ku amukela ni ku hetisisa mintirho leyi va nyikiweke yona. (Mint. 20:28) Tanihi vahuweleri va Mfumo, hi endla ntirho wa yindlu ni yindlu hi ku hiseka, hi endla maendzo yo vuyela ni ku fambisa tidyondzo ta Bibele. (Mat. 24:14; 28:19, 20) Leswaku hi vuyeriwa hilaha ku heleleke eka swakudya swa moya leswi fuweke, leswi lunghiseleriwaka hi hlonga ro tshembeka, hi yi lunghiselela kahle minhlangano ya Vukreste hi tlhela hi va kona eka yona, ku katsa ni tinhlengeletano. Ha vuyeriwa swinene loko hi vulavurisana ni vamakwerhu eminhlanganweni leyi ya Vukreste hikuva ha khutazana.—Hev. 10:24, 25.

¹³ Loko hi seketela nhlangano hi ku nyikela hi rifuwo ra hina hi kombisa leswaku ha wu tshemba hilaha ku heleleke. (Swiv. 3:9, 10) Loko hi xiya leswaku vamakwerhu va swerile, hi teka goza ra ku va pfuna hi ku hatlisa. (Gal. 6:10; 1 Tim. 6:18) Leswi hi swi endla hileswi hi va rhandzaka hi mbilu hinkwayo vamakwerhu, hi tshama hi ri karhi hi lava tindlela to nkhensa Yehovha ni nhlengeletano yakwe hi tintswalo leti hi kombiweke tona.—Yoh. 13:35.

¹⁴ Ndlela yin’wana yo kombisa leswaku ha wu tshemba nhlangano lowu, i ku seketela swiboho swa wona. Leswi swi katsa ku yingisa nkongomiso wa lava vekiweke ku va valanguteri, vo tanihi valanguteri va miganga ni vakulu va vandlha. Vamakwerhu lava va katseka eka vanhu “lava rhangelaka,” lava hi faneleke hi va yingisa ni ku tiveka ehansi ka vona. (Hev. 13:7, 17) Hambiloko hi nga swi twisisi swiboho swin’wana malunghana ni timhaka to karhi, ha swi tiva leswaku loko hi va yingisa swi ta hi vuyerisa. Leswi swi endla leswaku Yehovha a hi katekisa hikwalaho ko yingisa Rito rakwe ni nhlangano wakwe. Hi ku endla tano hi kombisa leswaku hi tiveka ehansi ka N’wini, a nga Yesu Kreste.

¹⁵ Ina, hi ni xivangelo xo tshemba hlonga ro tshembeka ni ro tlhariha. Sathana, la nga xikwembu xa misava leyi, u lwa hi matimba leswaku a onha vito ra Yehovha ni ra nhlangano wakwe. (2 Kor. 4:4) Tivonele leswaku u nga phasiwi hi marhengu ya Sathana yo biha! (2 Kor. 2:11) Wa swi tiva leswaku u saleriwe hi “nkarhi wo koma” leswaku a hoxiwa ekheleni ro enta kutani u ringeta ku hambukisa vanhu va Yehovha vo tala hilaha a nga kotaka hakona. (Nhlav. 12:12) Kambe, leswi Sathana a tinyikeke matimba, a hi tshineleni swinene eka Yehovha. Onge hi nga tshembela eka Yehovha ni ndlela leyi a yi tirhisaka leswaku a kongomisa vanhu vakwe ha yona namuntlha. Loko hi endla tano, sweswo swi ta endla leswaku hi va ni vun’we.