XIYENGE 5

Tlhelelani Eka “Murisi Ni Mulanguteri Wa Mimoya-xiviri Ya N’wina”

Xana ku ni xiphiqo lexi ku endlekeleke lexi ku buriweke ha xona eka broxara leyi? Loko swi ri tano, a hi wena ntsena. Malandza yo tala yo tshembeka ya Xikwembu—ya le minkarhini ya Bibele ni ya manguva lawa—ma langutane ni swiphiqo leswi fanaka. Tanihi leswi Yehovha a ma pfuneke leswaku ma langutana ni swiphiqo swo tano, na wena a nga ku pfuna.

Yehovha u ta ku pfuna loko u tlhelela eka yena

TIYISEKA leswaku Yehovha u ta ku pfuna loko u tlhelela eka yena. U ta ku pfuna leswaku u langutana ni ku karhateka, ku twisiwa ku vava loku u nga na kona ni leswaku u va ni ku rhula ka mianakanyo loku munhu a vaka na kona hi ku va ni ripfalo leri baseke. Kutani u nga ha tlhela u susumeteleka ku tirhela Yehovha swin’we ni vagandzerikulobye. U nga ha fana ni Vakreste van’wana va lembexidzana ro sungula, lava muapostola Petro a va tsaleleke a ku: “A mi fana ni tinyimpfu, mi pepetseka; kambe sweswi mi vuyele eka murisi ni mulanguteri wa mimoya-xiviri ya n’wina.”—1 Petro 2:25.

Ku tlhelela eka Yehovha i nchumu lowunene lowu u nga wu endlaka. Ha yini? U ta endla leswaku Yehovha a tsaka. (Swivuriso 27:11) Hilaha u tivaka hakona, Yehovha u ni mintlhaveko, kutani swiendlo swa hina swa n’wi khumba. Yehovha a nga hi sindzisi leswaku hi n’wi rhandza ni ku n’wi tirhela. (Deteronoma 30:19, 20) Mukambisisi un’wana wa Bibele u swi veka hi ndlela leyi: “Mbilu ya munhu a yi na xikhomo. Yi fanele yi pfuriwa hi le ndzeni.” Loko hi gandzela Yehovha hi mbilu hinkwayo, hi va hi ri karhi hi pfula timbilu ta hina. Loko hi endla tano, hi n’wi nyika nyiko ya risima—ku tshembeka ka hina—naswona hi endla leswaku a tsaka swinene. Hakunene ku hava nchumu lowu hi nga wu ringanisaka ni ntsako lowu hi vaka na wona loko hi gandzela Yehovha hi ndlela leyi n’wi fanelaka.—Mintirho 20:35; Nhlavutelo 4:11.

Makwerhu loyi a holeke a ri karhi a amukeriwa hi mandla mambirhi evandlheni

Ku engetela kwalaho loko u tlhela u sungula ku gandzela Xikwembu, u ta tlhela u va ni vuxaka na xona. (Matewu 5:3) Hi ndlela yihi? Vanhu emisaveni hinkwayo va tivutisa leswi, ‘Ha yini hi ri laha?’ Va lava tinhlamulo ta swivutiso leswi va nga na swona malunghana ni xikongomelo xa vutomi. Vanhu va lava ku va ni vuxaka na Yehovha hikuva u va vumbe va ri tano. U hi vumbe leswaku hi tiphina hi ku n’wi tirhela. A hi nge eneriseki loko hi tiva leswaku hi gandzela Yehovha ku nga ri hi ku swi rhandza.—Pisalema 63:1-5.

Tiva leswaku Yehovha u lava leswaku u tlhelela eka yena. U nga tiyiseka njhani hi sweswo? Xiya: Hi rhange hi khongela swinene leswaku hi lunghiselela broxara leyi. Kumbexana u nyikiwe yona hi nkulu kumbe hi mupfumerikulobye. Kutani u susumeteleke ku yi hlaya ivi u endla leswi yi swi vulaka. Hinkwaswo leswi i vumbhoni bya leswaku Yehovha a nga ku rivalanga. Ku hambana ni sweswo u ku vuyisela eka yena.—Yohane 6:44.

Hi nga chaveleleka ku tiva leswaku Yehovha a nga ma rivali malandza yakwe lama hambukeke. Leswi hi swona leswi tsakiseke makwerhu wa xisati loyi a vuriwaka Donna. U te: “Hakatsongotsongo ndzi tshike ntiyiso, kambe hakanyingi a ndzi anakanyisisa hi Pisalema 139:23, 24 leyi nge: ‘Ndzi lavisise, Wena Xikwembu, u tiva mbilu ya mina. Ndzi kambele, u tiva miehleketo ya mina leyi karhataka. U vona loko ku ri ni ndlela leyi nga riki yinene eka mina, u ndzi kongomisa endleleni hilaha ku nga riki na makumu.’ A ndzi swi tiva leswaku a ndzi fanelanga ndzi va emisaveni—a ndzi nga faneleki nikatsongo eka yona—naswona a ndzi swi tiva leswaku a ndzi fanele ndzi va enhlengeletanweni ya Yehovha. Ndzi sungule ku swi vona leswaku Yehovha a nga ndzi fularhelanga nikan’we; a ndzi fanele ndzi kuma ndlela yo tlhelela eka yena. Kutani ndza tsaka swinene leswi ndzi tlheleleke eka yena!”

“Ndzi sungule ku swi vona leswaku Yehovha a nga ndzi fularhelanga nikan’we; a ndzi fanele ndzi kuma ndlela yo tlhelela eka yena”

Hi khongela hi mbilu hinkwayo leswaku na wena u tlhela u va ni “ntsako wa Yehovha.” (Nehemiya 8:10) A wu nge tisoli nikan’we hi ku tlhelela eka Yehovha.

Tinhlamulo Ta Swivutiso Swa Vanhu Lava Lavaka Ku Tlhelela Eka Yehovha

NDZI TA SUNGULA KWIHI?

Munhu loyi a vabyaka u fanele a sungula ku endla xiyimiso xakwe xa ntolovelo hakatsongotsongo. Hilaha ku fanaka, tanihi Mukreste u nga tiwundla hi swakudya swa moya hakatsongotsongo siku ni siku. U nga titwi onge u boheka ku endla swilo hinkwaswo hi nkarhi wun’we. Kumbexana u nga heta timinete ti nga ri tingani u hlaya kumbe u yingisela Bibele leyi rhekhodiweke, u hlaya yin’wana ya minkandziyiso ya hina, u nghena eka website ya jw.org kumbe u hlalela yin’wana ya minongonoko leyi nga eka tv.jw.org. Nakambe, ringeta ku ya eminhlanganweni ya vandlha hi ku hatlisa hilaha u nga kotaka hakona. Ku tlula kwalaho, khongela eka Yehovha u kombela leswaku a ku pfuna. ‘Lahlela ku vilela hinkwako ka wena eka yena, hikuva wa ku khathalela.’—1 Petro 5:7.

“Endzhaku ka loko ndzi tshike ku gandzela Yehovha, a ndzi khomiwa hi tingana swinene loko ndzi fanele ndzi khongela. Loko ndzi ve ni xivindzi xo khongela, nkulu wa le vandlheni leri a ndzi hlanganyela eka rona u ndzi endzerile. U ndzi pfune ku xiya leswaku Yehovha a nga ndzi fularhelanga. Nkulu yoloye u ringanyete leswaku ndzi sungula hi ku hlaya Bibele siku ni siku. Loko ndzi endle sweswo, ndzi sungule ku va ni xivindzi xo ya eminhlanganweni. Hi ku famba ka nkarhi, ndzi tlhele ndzi sungula ku ya ensin’wini. Ndza tsaka swinene leswi Yehovha a nga ndzi fularhelangiki nikan’we.”—Eeva.

XANA VANDLHA RI TA NDZI AMUKELA NJHANI?

Tiyiseka leswaku swirho swa vandlha swi ta ku amukela hi mandla mambirhi. Ematshan’weni yo ku xopaxopa kumbe ku ku avanyisa, swi ta ku kombisa ndlela leyi swi ku rhandzaka ha yona kutani swi endla hinkwaswo leswi swi nga swi kotaka leswaku swi ku khutaza.—Vaheveru 10:24, 25.

“A ndzi khomiwa hi tingana ku tlhelela eHolweni ya Mfumo. A ndzi tivutisa leswaku vanghana va mina va ta ndzi khoma njhani. Un’wana wa vamakwerhu lava kuleke loyi a a ri kwalaho eka malembe ya 30 lama hundzeke loko ndzi tshika ku hlanganyela u ndzi byele leswi, ‘Titwe u ri ekaya Jaha ra mina!’ Hakunene sweswo swi ndzi tsakisile. Hakunene a ndzi ri ekaya.”—Javier.

“Ndzi ye eHolweni ya Mfumo kutani ndzi tshama endzhaku leswaku ndzi nga voniwi hi munhu. Hambiswiritano, vo tala va ndzi vonile ivi va sungula ku ndzi fanisa loko ndza ha ya eminhlanganweni ndza ha ri ntsongo. Va ndzi amukele hi mandla mambirhi kutani va ndzi angarha hi ndlela ya rirhandzu lerova ndzi titwa ndzi ri ni ku rhula. A swi fana niloko ndzi vuye ekaya.”—Marco.

XANA VAKULU VA TA NDZI PFUNA NJHANI?

Vakulu va ta ku komba musa. Va ta ku bumabumela hileswi u lavaka ku tlhela u va ni “rirhandzu leri a wu ri na rona eku sunguleni.” (Nhlavutelo 2:4) Va ta ku pfuna “hi moya wo rhula” leswaku u lulamisa swihoxo leswi u swi endleke. (Vagalatiya 6:1; Swivuriso 28:13) Vakulu va nga ha hlela leswaku un’wana a dyondza na wena, kumbexana hi ku tirhisa buku leyi nge Tshinela Eka Yehovha kumbe leyi nge “Tihlayiseni eRirhandzwini Ra Xikwembu.” Tiyiseka leswaku vakulu va ta ku chavelela va tlhela va ku seketela eka nchumu wun’wana ni wun’wana.—Esaya 32:1, 2.

“Eka malembe ya nhungu lawa a ndzi horile, vakulu va hambete va ndzi endzela. Siku rin’wana, nkulu u ndzi kombe swin’wana swa swifaniso leswi a hi tekeke swona. Swi ndzi tsundzuxe swilo swo tala swo tsakisa lerova ndzi sungula ku tlhela ndzi lava ntsako lowu a ndzi ri na wona loko ndza ha tirhela Yehovha. Vakulu va ndzi pfunile leswaku ndzi tlhela ndzi va ni vuxaka na Yehovha.”—Victor.

“Xikwembu Xi Ta Ku Nyika Ntamu”

Buku ya hina ya tinsimu leyi nge Yimbelelela Yehovha Hi Ntsako, yi ni tinsimu to tsakisa leti nga ku chavelelaka ti tlhela ti ku khutaza loko u sungula ku tlhela u gandzela Yehovha. Hi xikombiso, xiya marito ya risimu 38. Ri sekeriwe eka marito lama nga eka 1 Petro 5:10 naswona ri ni nhlokomhaka leyi nge “Xikwembu Xi Ta Ku Nyika Ntamu.”

Xikwembu xi ku he ntiyiso makwerhu

Xi ku humesile munyameni.

Kunene xi vone leswaku u rhandza

Vunene ni tindlela ta xona.

U xi tshembise ku xi tirhela;

Xi ku pfunile, xi ta ku pfuna.
Yesu xi n’wi rhumile ku ta hi fela;

A xi rhandzi leswaku u lova.

Loko xi kote ku nyikela hi Yesu,

Kunene xi ta ku ha matimba.

Xi tiva ripfumelo ra wena;

Vanhu va xona xa va hlayisa.

(KHORASI)

Xikwembu xi ku xave hi ngati ya Yesu.

Xi ta ku tiyisa xi ku ha matimba.

Xi ta ku sirhelela ni ku ku rhangela.

Xi ta ku tiyisa xi ku ha matimba.

Leswaku u yingisela risimu leri, ni tin’wana ta Mfumo, skena khodi leyi kumbe u nghena eka www.jw.org/ts. Nghena ehansi ka nhlokomhaka leyi nge MINKANDZIYISO > VUYIMBELERI.