Xikwembu Xi Endle Tilo Ni Misava

Yehovha Xikwembu i Muvumbi wa hina. U endle swilo hinkwaswo, leswi hi swi vonaka ni leswi hi nga swi voniki. Loko a nga si endla swilo leswi hi kotaka ku swi vona, u endle tintsumi to tala. Xana wa swi tiva leswaku tintsumi i yini? Tintsumi i swivumbiwa leswi Yehovha a swi endleke swi fana na yena. Leswi hi nga kotiki ku vona Xikwembu na tona a hi nge swi koti ku ti vona. Ntsumi yo sungula leyi Yehovha a yi endleke yi ve mupfuni wakwe. Ntsumi yoleyo yi pfune Yehovha loko a endla tinyeleti, tipulanete ni swilo leswin’wana hinkwaswo. Misava leyi nga kaya ra hina ro saseka i yin’wana ya tipulanete teto.

Endzhaku ka sweswo, Yehovha u lunghiselele misava leswaku hina ni swiharhi hi ta kota ku hanya. U endle dyambu leswaku ri voninga misava. U endle tintshava, malwandle ni milambu.

U endle yini endzhaku ka sweswo? Yehovha u te: ‘Ndzi ta mirisa byanyi, swimilana ni mirhi.’ Ku mile mixakaxaka ya mihandzu, matsavu ni swiluva. Endzhaku ka sweswo Yehovha u endle swiharhi leswi kotaka ku haha, leswi tshamaka ematini ni swiharhi hinkwaswo leswi nga kona. U endle swiharhi leswitsongo swo tanihi mimpfundla ni leswikulu swo tanihi tindlopfu. Hi xihi xiharhi lexi ku tsakisaka ngopfu?

Endzhaku ka sweswo, Yehovha u byele ntsumi yo sungula a ku: “A hi endle munhu.” Vanhu a va ta hambana ni swiharhi. A va ta kota ku endla swilo. Va kota ku vulavula, ku hleka ni ku khongela. A va ta tlhela va khathalela misava ni swiharhi. Xana wa n’wi tiva munhu wo sungula loyi Xikwembu xi n’wi vumbeke? Hi ta dyondza swo tala eka ndzima leyi landzelaka.