Ku Pone Vanhu Va Nhungu

Nowa ni ndyangu wakwe, swin’we ni swiharhi va nghene engalaveni. Yehovha u pfale rivanti ivi mpfula yi sungula ku na. Yi ne swinene lerova ngalava yi sungula ku phaphamala. Hi ku famba ka nkarhi, misava hinkwayo a yi funengete hi mati. Vanhu hinkwavo vo biha va file. Kambe Nowa ni ndyangu wakwe va ponile. Anakanya ndlela leyi a va tsake ha yona hileswi va yingiseke Yehovha.

Mpfula yi ne masiku ya 40 ni vusiku bya 40, kutani yi yima. Mati ma phyile hakatsongotsongo. Eku heteleleni, ngalava yi fike yi tshama ehenhla ka tintshava. Kambe a ka ha ri ni mati yo tala, kutani Nowa ni ndyangu wakwe a va nga ta swi kota ku huma engalaveni.

Mati ma phyile hakatsongotsongo. Nowa ni ndyangu wakwe va tshame engalaveni nkarhi wo tlula lembe. Kutani Yehovha u va byele leswaku va huma engalaveni va humela endhawini leyi a yi fana ni misava leyintshwa. A va tsake ngopfu hileswi Yehovha a va poniseke naswona sweswo va swi kombise hi ku n’wi endlela gandzelo.

Yehovha u ri amukerile gandzelo rolero. U tshembise leswaku a nge he pfuki a herise swivumbiwa swa laha misaveni hi ndhambi. U endle leswaku ku humelela nkwangulatilo exibakabakeni leswaku wu va xitiyisekiso xa xitshembiso lexi. Xana u tshama u vona nkwangulatilo?

Endzhaku ka sweswo, Yehovha u byele Nowa ni ndyangu wakwe leswaku va va ni vana va tata misava.