Yehovha A Hlawula Yoxuwa

Muxe a a ri kusuhi ni ku fa endzhaku ka loko a rhangele tiko ra Israyele malembe yo tala. Yehovha u te: ‘A hi wena u nga ta nghenisa Vaisrayele eTikweni leri Tshembisiweke. Kambe ndzi ta ku komba rona.’ Kutani Muxe u kombele Yehovha ku hlawula murhangeri un’wana leswaku a ta rhangela vanhu. Yehovha u te: ‘Yana eka Yoxuwa kutani u n’wi byela leswaku hi yena loyi ndzi n’wi hlawuleke.’

Muxe u byele Vaisrayele leswaku u ta fa ku nga ri khale nileswaku Yehovha u hlawule Yoxuwa leswaku a va rhangela ku ya nghena eTikweni leri Tshembisiweke. Kutani Muxe u byele Yoxuwa a ku: ‘U nga chavi. Yehovha u ta ku pfuna.’ Endzhakunyana ka sweswo, Muxe u ye ehenhla ka Ntshava ya Nebo laha Yehovha a n’wi kombeke tiko leri A ri tshembiseke Abrahama, Isaka na Yakobo. Muxe a a ri ni malembe ya 120 loko a fa.

Yehovha u byele Yoxuwa a ku: ‘Tsemakanya Nambu wa Yordani u ya eKanana. Ndzi ta ku pfuna hilaha ndzi pfuneke Muxe hakona. Tiyiseka leswaku u hlaya Nawu wa mina siku ni siku. U nga chavi. Vana ni xivindzi. Famba u ya endla leswi ndzi ku leriseke leswaku u swi endla.’

Yoxuwa u rhume tinhlori timbirhi leswaku ti ya emutini wa Yeriko. Eka dyondzo leyi landzelaka hi ta dyondza leswi engetelekeke hileswi endlekeke kwalaho. Loko ti vuya, ti vule leswaku ti tiphinile hi ku ya eKanana. Hi siku leri landzelaka, Yoxuwa u byele tiko leswaku ri lunghekela ku famba. Kutani u rhume vaprista lava a va rhwale areka ya ntwanano leswaku va tsemakanya Nambu wa Yordani. Nambu a wu tele. Kambe loko vaprista va nghena ematini, nambu wu yime ku khuluka kutani mati ma phya! Vaprista va ye exikarhi laha nambu wu khulukelaka kona kutani va yima kwalaho loko tiko ra Israyele ri ri karhi ri tsemakanyela eka tlhelo lerin’wana. Xana u anakanya leswaku singita leri ri va tsundzuxe leswi Yehovha a swi endleke eLwandle ro Tshwuka?

Eku heteleleni, endzhaku ka malembe wolawo hinkwawo, Vaisrayele se a va ri eTikweni leri Tshembisiweke. A va ta kota ku aka tiyindlu ni miti. A va ta kota ku va ni masimu, masimu ya vhinya ni ya mihandzu. A ku ri tiko leri khulukaka ntswamba ni vulombe.