Yehovha U Nyike Samsoni Matimba

Vaisrayele vo tala va tlhele va sungula ku gandzela swikwembu swa mavunwa, kutani Yehovha u va tshike va lawuriwa hi Vafilista. Kambe a ku ri ni Vaisrayele van’wana lava a va rhandza Yehovha. Un’wana wa vona a ku ri Manowa. Manowa ni nsati wakwe a va nga ri na vana. Siku rin’wana Yehovha u rhumele ntsumi leswaku yi ya vulavula ni nsati wa Manowa. Ntsumi yi te: ‘U ta va ni n’wana wa mufana. U ta kutsula Vaisrayele eka Vafilista. U ta va Munaziri.’ Xana wa swi tiva leswaku Vanaziri a ku ri vanhu va njhani? A ku ri malandza yo hlawuleka ya Yehovha. Vanaziri a va nga pfumeleriwi ku tsemeta misisi.

Hi ku famba ka nkarhi Manowa u ve ni n’wana wa mufana naswona u n’wi thye vito ra Samsoni. Loko Samsoni a kurile, Yehovha u endle leswaku a va ni matimba lamakulu. U dlaye nghala hi mavoko. Siku rin’wana Samsoni u dlaye Vafilista va 30 a ri yexe. Vafilista a va n’wi venga naswona a va ri ku laveni ka tindlela to n’wi dlaya. Siku rin’wana nivusiku loko Samsoni a ha etlele eGaza, va ye etinyangweni ta muti va rindza kona leswaku nimixo va ta n’wi dlaya. Kambe exikarhi ka vusiku, Samsoni u pfukile kutani a ya enyangweni ya muti a fika a yi susa ekhumbini. U rhwale nyangwa hi makatla a ya fika ehenhla ka ntshava leyi a yi ri kusuhi na Hebroni!

Hi ku famba ka nkarhi, Vafilista va ye eka Delila loyi a a ri ntombhi ya Samsoni, kutani va ku eka yena: ‘Hi ta ku nyika swiphemu swa magidi swa silivhere loko wo kumisisa leswaku ha yini Samsoni a ri ni matimba lamakulu. Hi lava ku n’wi khoma hi n’wi pfalela.’ Leswi Delila a a tilavela mali, u pfumerile. Eku sunguleni, Samsoni u arile ku n’wi byela ntiyiso. Kambe a a tshamela ku n’wi rilela ku fikela laha a nga n’wi byela xihundla xakwe. U te: ‘Misisi ya mina a yi si tshama yi tsemiwa hikuva ndzi Munaziri. Loko misisi ya mina yo tsemiwa, a ndzi nge he vi na matimba.’ Samsoni u endle xihoxo lexikulu hi ku byela ntombhi yakwe mhaka yoleyo, a swi tano?

Delila u nambe a byela Vafilista a ku: ‘Ndza xi tiva xihundla xakwe!’ U endle leswaku Samsoni a etlela endzhumbyini wakwe kutani a byela un’wana leswaku a n’wi tsema misisi. Delila u huwelele a ku: ‘Samsoni, Vafilista hi lava!’ Samsoni u pfukile kambe a a nga ha ri na matimba. Vafilista va n’wi tekile, va n’wi xokola matihlo kutani va n’wi pfalela ekhotsweni.

Siku rin’wana Vafilista va magidi va hlengeletane etempeleni ya xikwembu xa vona Dagoni ivi va huwelela va ku: ‘Xikwembu xa hina xi nyikete Samsoni eka hina! Humesani Samsoni! A hi tlangeni hi yena.’ Va n’wi yimise exikarhi ka timhandzi timbirhi kutani va sungula ku endla xihlekiso hi yena. Samsoni u huwelele a ku: ‘Oho Yehovha, ndzi kombela u tlhela u ndzi nyika matimba kan’we ntsena.’ Hi nkarhi wolowo misisi ya Samsoni se a yi kurile. U susumete timhandzi ta tempele hi matimba yakwe hinkwawo. Muako hinkwawo wu wile naswona wu dlaye vanhu hinkwavo lava a va ri etempeleni ku katsa na yena Samsoni.