Yoyada A A Ri Ni Xivindzi

Yezabele a a ri ni n’wana wa xisati loyi a a vuriwa Ataliya, loyi na yena a homboloke ku fana ni mana wakwe. Ataliya a a tekiwe hi hosi ya le Yuda. Loko nuna wakwe a fa, n’wana wakwe u sungule ku fuma. Kambe loko n’wana wakwe a fa, Ataliya u tiendle mufumi wa le Yuda. Kutani u ringete ku herisa rixaka hinkwaro ra vuhosi, a dlaya munhu un’wana ni un’wana loyi a a ta va hosi ematshan’weni ya yena, hambi ku ri vatukulu vakwe. A a chaviwa hi vanhu hinkwavo.

Muprista Lonkulu Yoyada ni nsati wakwe Yehoxeba, a va swi tiva leswaku leswi Ataliya a a swi endla a swi bihile swinene. Va veke vutomi bya vona ekhombyeni hi ku tumbeta un’wana wa vatukulu va Ataliya, loyi a a vuriwa Yehowaxi. Va n’wi kurisele etempeleni.

Loko Yehowaxi a ri ni malembe ya nkombo, Yoyada u hlengelete tindhuna ni Valevhi hinkwavo kutani a ku: ‘Rindzani tinyangwa ta tempele, mi nga pfumeleli munhu leswaku a nghena.’ Kutani Yoyada u endle Yehowaxi hosi ya Yuda ivi a n’wi ambarisa harhi enhlokweni. Vanhu va le Yuda va huwelele va ku: ‘Hosi a yi hanye hilaha ku nga heriki!’

Hosi ya xisati Ataliya u twe huwa ya ntshungu kutani a tsutsumela etempeleni. Loko a vona hosi leyintshwa, u huwelerile a ku: “Vaxengi! Vaxengi!” Tindhuna ti khome hosi leyi yo homboloka, ti famba na yona ivi ti ya yi dlaya. Kambe ku vuriwa yini hi nkucetelo wo biha lowu yi veke na wona etikweni?

Yoyada u pfune tiko leswaku ri endla ntwanano na Yehovha, laha eka wona ri tshembiseke ku gandzela Yena ntsena. Yoyada u endle leswaku va wisa tempele ya Bali ni ku tlhela va faya swifaniso swi va swipetlupetlu. U hlawule vaprista ni Valevhi leswaku va tirha etempeleni leswaku vanhu va ta tlhela va gandzela eka yona. U avele vatirhi va le tinyangweni ku rindza tempele leswaku ku nga ngheni ni munhu ni un’we loyi a nga basangiki. Kutani Yoyada ni tindhuna va teke Yehowaxi va n’wi yisa endlwini ya vuhosi kutani va n’wi veka exitulwini xa vuhosi. Vanhu va le Yuda a va tsakile. A va ta tirhela Yehovha va nga ha kavanyetiwi hi Ataliya lowo homboloka ni hi vugandzeri bya Bali. Xana wa yi vona ndlela leyi xivindzi xa Yoyada xi pfuneke vanhu vo tala ha yona?