Yehovha A Rhuma Yeremiya Ku Chumayela

Yehovha u hlawule Yeremiya leswaku a va muprofeta eka vanhu va le Yuda. U n’wi byele leswaku u fanele a chumayela vanhu ni ku va tsundzuxa leswaku va fanele va tshika ku endla swilo swo biha. Yeremiya u te: ‘Kambe Yehovha, ndza ha ri mufana. A ndzi swi koti ku vulavula ni vanhu.’ Yehovha u te: ‘U nga chavi. Ndzi ta ku byela leswi u nga ta swi vula. Ndzi ta ku pfuna.’

Yehovha u byele Yeremiya leswaku a hlengeleta varhangeri, kutani a faya khuwana emahlweni ka vona, a ku: ‘Muti wa Yerusalema wu ta lovisiwa ku fana ni khuwana leri.’ Loko Yeremiya a endla leswi Yehovha a n’wi rhumeke swona vakulukumba va hlundzukile swinene. Muprista loyi a vuriwaka Paxahuru u be Yeremiya kutani a n’wi hoxa etingoleni. Yeremiya u tshame etingoleni vusiku hinkwabyo a nga koti ku tshukatshuka. Paxahuru u n’wi tshunxe mixo lowu landzelaka. Yeremiya u te: ‘A ndzi nge he swi koti. Ndza tshika ku chumayela.’ Kambe xana u tshikile hakunene? Doo! Loko Yeremiya a anakanyisisa ha swona u te: ‘Rungula leri humaka eka Yehovha ri fana ni ndzilo endzeni ka mina. A ndzi nge tshiki ku chumayela.’ Yeremiya u ye emahlweni a tsundzuxa vanhu hi leswi Yehovha a nga ta swi endla.

Endzhaku ka malembe, ku ve ni hosi leyintshwa eYuda. Vaprista ni vaprofeta va mavunwa a va nga ri tsakeli rungula ra Yeremiya. Va byele tihosana va ku: ‘Wanuna loyi u fanele a dlayiwa.’ Yeremiya u te: ‘Loko mo ndzi dlaya, mi ta va mi dlaye munhu la nga riki na nandzu. Ndzi vulavula marito lama humaka eka Yehovha ku nga ri ya mina.’ Loko tihosana ti twa sweswo ti te: ‘Wanuna loyi a nga faneli hi ku dlayiwa.’

Yeremiya u ye emahlweni a chumayela naswona tihosana ti hlundzuke swinene. Ti kombele hosi leswaku yi dlaya Yeremiya. Hosi yi byele tihosana leswaku ti endla xin’wana ni xin’wana lexi ti xi lavaka hi Yeremiya. Ti teke Yeremiya ti n’wi hoxa emugodini wo enta lowu a wu ri ni ndzhope ti tshemba leswaku u ta fela kwalaho. Yeremiya u sungule ku ndzondzovela endzhopeni.

Kutani mutirhi wa le hubyeni loyi a vuriwaka Ebedi-meleke u byele hosi a ku: ‘Tihosana ti hoxe Yeremiya emugodini lowu nga ni ndzhope. Loko ho n’wi tshika u ta fa.’ Hosi yi lerise Ebedi-meleke leswaku a teka vavanuna va 30 va ya n’wi humesa. Xana a hi fanelanga hi fana na Yeremiya, loyi a nga pfumelelangiki nchumu wu n’wi sivela ku chumayela?