Yesu A Hlawula Sawulo

Sawulo a a ri muaki wa le Rhoma loyi a velekeriweke eTarso. A a ri Mufarisi loyi a a wu tiva kahle Nawu wa Vayuda naswona a a va venga swinene Vakreste. A a khoma vavanuna ni vavasati lava nga Vakreste emakaya ya vona a va yisa ekhotsweni. A a ri kona loko ntshungu lowu a wu hlundzukile wu khandla mudyondzisiwa Stefano hi maribye a kala a fa.

Kambe Sawulo a a nga enerisekanga hi ku khoma Vakreste va le Yerusalema ntsena. U kombele muprista lonkulu leswaku a n’wi rhuma emutini wa Damaska leswaku a ta khoma Vakreste van’wana kwale. Loko Sawulo a ri kusuhi ni ku fika emutini wolowo, hi xitshuketa u tlhaviwe hi ku vonakala lokukulu kutani a wela ehansi. U twe rito ri ku eka yena: ‘Sawulo, u ndzi xanisela yini?’ Sawulo u vutisile a ku: ‘Hi wena mani?’ Hiloko rito ri ku: ‘Hi mina Yesu. Yana eDamaska, u ta byeriwa leswi u faneleke u swi endla.’ Hi ku hatlisa, Sawulo se a a nga ha voni, naswona u boheke ku khomiwa hi voko a yisiwa emutini.

EDamaska a ku ri ni Mukreste wo tshembeka loyi a a vuriwa Ananiya. Yesu u vulavule na yena exivonweni a ku: ‘Yana exitarateni lexi vuriwaka Lulama endlwini ya Yudasi, u fika u lava Sawulo.’ Ananiya u te: ‘Hosi, ndzi n’wi tiva kahle wanuna yoloye! U yisa vadyondzisiwa va wena ekhotsweni!’ Kambe Yesu a ku: ‘Yana eka yena. Ndzi hlawule Sawulo leswaku a chumayela mahungu lamanene eka matiko yo tala.’

Hiloko Ananiya a kuma Sawulo ivi a ku eka yena: ‘Sawulo makwerhu, Yesu u ndzi rhume leswaku ndzi ta ku pfula mahlo.’ Hi ku hatlisa Sawulo se a a vona nakambe. U dyondze hi Yesu ivi a va mulandzeri wakwe. Loko a khuvuriwile a va Mukreste, Sawulo u sungule ku chumayela emasinagogeni swin’we ni Vakreste van’wana. Anakanya ndlela leyi Vayuda a va hlamale ha yona ku vona Sawulo a chumayela vanhu hi Yesu. A va ku: ‘Xana loyi a hi yena wanuna loyi a a khoma vadyondzisiwa va Yesu?’

Sawulo u hete malembe manharhu a ri karhi a chumayela vanhu va le Damaska. Vayuda a va venga Sawulo kutani va lave tindlela to n’wi dlaya. Kambe vamakwerhu va yi twile mhaka leyi kutani va n’wi pfuna ku baleka. Va n’wi hoxe endzeni ka basikiti va n’wi rhelerisa hi mbhovo lowu a wu ri ekhumbini ra muti.

Loko Sawulo a fika eYerusalema u ringete ku tihlanganisa ni vamakwerhu va kwalaho. Kambe a va n’wi chava. Hiloko mudyondzisiwa la nga ni musa la vuriwaka Barnaba a famba na Sawulo eka vaapostola ivi a va khorwisa leswaku Sawulo u hundzukile hakunene. Sawulo u sungule ku chumayela mahungu lamanene hi ku hiseka swin’we ni vandlha ra le Yerusalema. Hi ku famba ka nkarhi u tiviwe tanihi Pawulo.