Korneliyo A Amukela Moya Lowo Kwetsima

EKhezariya, a ku ri ni wanuna wa Murhoma loyi a a xiximiwa loyi a vuriwaka Korneliyo naswona a a ri murhangeri wa masocha. Hambileswi a a nga ri Muyuda, Vayuda a va n’wi xixima. A a pfuna swisiwana ni lava pfumalaka. Korneliyo a a tshemba Yehovha naswona a a khongela eka yena nkarhi ni nkarhi. Siku rin’wana ntsumi yi humelele eka Korneliyo yi ku: ‘Xikwembu xi swi twile swikhongelo swa wena. Sweswi rhumela vavanuna leswaku va ya emutini wa Yopa va ya vitana Petro.’ Hi ku hatlisa Korneliyo u rhumele vavanuna vanharhu eYopa, ku nga mpfhuka wa kwalomu ka 48 wa tikhilomitara ku ya edzongeni.

Hi nkarhi wolowo, Petro na yena loko a ri eYopa u vone xivono. U vone swiharhi leswi Vayuda a va nga pfumeleriwi ku swi dya, ivi a twa rito ri n’wi byela leswaku a swi dya. Petro u arile, a ku: ‘A ndzi si tshama ndzi dya nyama ya swiharhi leswi nga basangiki.’ Hiloko rito ri ku: ‘U nga vuli leswaku nyama leyi a yi basanga. Xikwembu xi yi basisile.’ Petro u tlhele a byeriwa leswi: ‘Ku ni vavanuna vanharhu enyangweni wa yindlu ya wena. Famba na vona.’ Petro u yile enyangweni ivi a vutisa vavanuna volavo leswaku va lava yini. Va te: ‘Hi rhumiwe hi Korneliyo ndhuna ya masocha ya Rhoma. U fanele u ya endlwini yakwe eKhezariya.’ Petro u kombele vavanuna volavo leswaku va etlela endlwini yakwe vusiku byebyo. Hi xa mundzuku xa kona u fambe na vona eKhezariya swin’we ni vamakwerhu van’wana va le Yopa.

Loko Korneliyo a vona Petro, u khinsamile. Kambe Petro u te: ‘Suka u yima! Ndzi munhu ku fana na wena. Xikwembu xi ndzi rhume endlwini ya wena, hambileswi Vayuda va nga ngheniki emakaya ya vanhu va tinxaka tin’wana. Ndzi kombela u ndzi byela leswaku ha yini u ndzi vitanile.’

Korneliyo u byele Petro a ku: ‘Eka masiku ya mune lama hundzeke, loko ndzi ri karhi ndzi khongela eka Xikwembu, ntsumi yi ndzi byele leswaku ndzi ku vitana. Ndzi kombela u hi dyondzisa hi Yehovha.’ Petro u te: ‘Ndzi dyondze leswaku Xikwembu a xi na xihlawuhlawu. Xi amukela hinkwavo lava lavaka ku xi gandzela.’ Petro u va dyondzise swo tala hi Yesu. Hiloko Korneliyo swin’we ni lava a va ri na yena va amukela moya lowo kwetsima kutani hinkwavo va khuvuriwa.