‘Ndzi Ta Tshama Exikarhi Ka Vanhu’—Yehovha U Pfuxete Vugandzeri Lebyi Tengeke

LESWI HI NGA TA SWI DYONDZA: Swiyenge swa tempele ya le xivonweni ni leswi swi hi dyondzisaka swona hi vugandzeri lebyi tengeke

Yehovha u kombe muprofeta Ezekiyele na muapostola Yohane swivono leswi nga ni swiyenge swa nkoka leswi fanaka. Swiyenge swa swivono sweswo swi hi dyondzisa swilo swa nkoka leswi hi pfunaka ku gandzela Yehovha hi ndlela leyi a yi amukelaka sweswi swi tlhela swi hi pfuna hi swi vona hi mahlo ya mianakanyo leswaku vutomi byi ta va njhani eParadeyisini ehansi ka Mfumo wa Xikwembu.