BOKISI RO DYONDZISA 1B
Nkatsakanyo Wa Buku Ya Ezekiyele
Buku ya Ezekiyele yi avanyisiwe hi tindzima leti landzelaka:
TINDZIMA 1 KU YA EKA 3
Hi lembe ra 613 B.C.E., loko Ezekiyele a ri evuhlongeni ni Vayuda eBabilona, Yehovha u n’wi kombe swivono a tlhela a n’wi rhuma leswaku a ya profeta eka Vayuda lava a va tshama etlhelo ka nambu wa Kebari.
TINDZIMA 4 KU YA EKA 24
Exikarhi ka lembe ra 613 na 609 B.C.E., Ezekiyele u rhumiwe ku yisa rungula ra vuprofeta ra ku avanyisiwa ka muti wa Yerusalema swin’we ni vanhu va muti wolowo lava xandzukeke, lava a va gandzela swifaniso.
TINDZIMA 25 KU YA EKA 32
Ku sukela hi lembe ra 609 B.C.E., ku nga lembe ro hetelela leri Vababilona va rhendzeleke muti wa Yerusalema, rungula ra Ezekiyele ra vuavanyisi ri byeriwe ni miti ya valala leyi nga ekusuhi na Yerusalema, ku nga muti wa Amoni, Edomu, Egipta, Mowabu, Filista, Sidoni na Tiri.
TINDZIMA 33 KU YA EKA 48
Ku sukela hi lembe ra 606 B.C.E., Ezekiyele u vulavule hi rungula leri nyikaka ntshembo, ku nga ku pfuxetiwa ka vugandzeri lebyi tengeke bya Yehovha Xikwembu laha hi nkarhi wolowo muti wa Yerusalema ni tempele ya wona se a swi ri rhumbi endhawini leyi a swi endla tikhilomitara ta madzana ku ya kona.
Buku ya Ezekiyele yi hleriwe hi ku ya hi nkarhi lowu swiendlakalo swi endlekeke ha wona ni hi ku ya hi tinhlokomhaka. Vuprofeta bya ku lovisiwa ka muti wa Yerusalema ni tempele ya wona byi fike ku nga si profetiwa ta ku pfuxetiwa ka vugandzeri lebyi tengeke. Sweswo swa twisiseka, hikuva vuprofeta bya ku pfuxetiwa a byi kombisa leswaku a ku nga ha gandzeriwi etempeleni.
Ku engetela kwalaho, vuprofeta bya Ezekiyele lebyi vulavulaka hi ku lovisiwa ka miti leyi nga ekusuhi ya valala (tindzima 25 ku ya eka 32) byi kumeka exikarhi ka rungula ra ku avanyisiwa ka muti wa Yerusalema ni vuprofeta bya ku pfuxetiwa ka vugandzeri lebyi tengeke. Xidyondzi xin’wana loko xi vulavula hi rungula ra vuavanyisi ra Ezekiyele ra ku avanyisiwa ka matiko ya valala, xi ri: “Ri kombisa ku cinca loku fanelaka ku suka eku twarisiweni ka vukarhi bya Xikwembu ku ya eku kombisiweni ka vanhu va xona tintswalo, hikuva ku xupuriwa ka valala va vona i ku kutsuriwa ka vanhu va xona.”