DYONDZO 12
I Yini Lexi Nga Ku Pfunaka Leswaku U Ya eMahlweni U Dyondza Bibele?
Ku dyondza Bibele swi fana ni ku teka riendzo ro tsakisa. Kambe a hi mikarhi hinkwayo swi olovaka. Mikarhi yin’wana, u nga ha tivutisa loko u ta swi kota ku ya emahlweni u dyondza Bibele. Hikwalaho ka yini u fanele u tikarhatela ku ya emahlweni u dyondza Bibele? I yini lexi nga ku pfunaka leswaku u nga tshiki hambiloko u ri na swiphiqo?
1. Hikwalaho ka yini swi ri swa nkoka ku dyondza Bibele?
“Rito ra Xikwembu ra hanya naswona ri ni matimba.” (Vaheveru 4:12) Bibele i ya risima hikuva yi ni mahungu lama humaka eka Xikwembu naswona yi hlamusela ndlela leyi xi titwaka ha yona hi wena. Yi ku pfuna leswaku u va ni vutivi, vutlhari ni ntshembo. Kambe xa nkoka swinene, Bibele yi ku pfuna leswaku u va munghana wa Yehovha. Loko u dyondza Bibele, u pfumelela matimba ya Rito ra Xikwembu leswaku ma ku cinca u va munhu lonene.
2. Hikwalaho ka yini hi fanele hi wu teka wu ri wa nkoka ntiyiso lowu nga eBibeleni?
Ntiyiso lowu nga eBibeleni wu fana ni xuma xa nkoka. Hi yona mhaka Bibele yi hi khutazaka ku ‘xava ntiyiso hi nga wu xavisi.’ (Swivuriso 23:23) Loko hi teka ntiyiso lowu nga eBibeleni wu ri wa nkoka, a hi nge tshiki ku dyondza hambiloko hi ri na swiphiqo.—Hlaya Swivuriso 2:4, 5.
3. Yehovha a nga ku pfuna njhani leswaku u ya emahlweni u dyondza?
Leswi Yehovha a nga Muvumbi wa matimba hinkwawo ni Munghana wa wena, u lava ku ku pfuna leswaku u n’wi tiva ku antswa. U ta ku nyika “matimba yo navela ni ku endla swilo hinkwaswo leswi [a] swi lavaka.” (Hlaya Vafilipiya 2:13.) Loko mikarhi yin’wana u lava ku khutaziwa leswaku u ya emahlweni u dyondza kumbe u tirhisa leswi u swi dyondzaka, u ta ku pfuna. Loko u lava matimba lama engetelekeke leswaku u kota ku hlula swihinga kumbe ku kanetiwa, u ta ku nyika wona. Nkarhi ni nkarhi khongela eka Yehovha leswaku a ku pfuna u ya emahlweni u dyondza Bibele.—1 Vatesalonika 5:17.
ANAKANYISISA
Dyondza leswi u nga swi endlaka leswaku u ya emahlweni u dyondza Bibele hambiloko u ri bizi kumbe u kanetiwa. Ivi u vona ndlela leyi Yehovha a nga ku pfunaka ha yona leswaku u ya emahlweni u dyondza.
4. Teka dyondzo ya wena ya Bibele yi ri ya nkoka swinene
Nkarhi wun’wana hi tikuma hi ri bizi lerova hi nga wu kumi ni nkarhi wo dyondza Bibele. Hi nga endla yini? Hlaya Vafilipiya 1:10, ivi mi bula hi swivutiso leswi:
U ehleketa leswaku hi swihi “swilo leswi nga swa nkoka swinene” evuton’wini?
U nga endla yini leswaku u rhangisa ku dyondza Bibele evuton’wini bya wena?
Loko wo sungula u chela sava ebakitini ivi u hoxa maribye, maribye a ma nge ngheni hinkwawo
Loko wo sungula u hoxa maribye, u ta kota ku chela misava yo tala. Hilaha ku fanaka, loko wo rhangisa “swilo leswi nga swa nkoka swinene” evuton’wini, u ta tlhela u kuma ni nkarhi wo endla swilo leswin’wana
Ku dyondza Bibele swi endla leswaku hi va vanghana va Xikwembu, hi xi tiva ni ku xi gandzela. Hlaya Matewu 5:3, ivi mi bula hi xivutiso lexi:
Hi vuyeriwa njhani loko hi rhangisa ku dyondza Bibele?
5. Tiyisela loko u xanisiwa
Mikarhi yin’wana van’wana va nga ha ringeta ku ku tshikisa ku dyondza Bibele. Vona leswi endlekeleke Francesco. Tlanga VHIDIYO, ivi mi bula hi swivutiso leswi landzelaka.
Eka vhidiyo leyi, vanghana va Francesco ni va ka vona, va titwe njhani loko a va byela leswi a a swi dyondza?
U kume mikateko yihi hi leswi a tiyiseleke?
Hlaya 2 Timotiya 2:24, 25, ivi mi bula hi swivutiso leswi:
Vanghana va wena ni vaka n’wina va ri yini hi leswi u swi dyondzaka?
Hi ku ya hi tindzimana leti, u fanele u n’wi hlamula njhani munhu loyi a nga swi laviki leswaku u dyondza Bibele? Hikwalaho ka yini u fanele u n’wi hlamula tano?
6. Yehovha u ta ku pfuna loko u titshega hi yena
Loko hi va vanghana va Yehovha hi ta ya hi lava ku n’wi tsakisa. Kambe swi nga hi tikela ku cinca mahanyelo leswaku hi hanya hi milawu ya Yehovha. Loko u titwa hi ndlela yoleyo u nga heli matimba. Yehovha u ta ku pfuna. Tlanga VHIDIYO, ivi mi bula hi swivutiso leswi landzelaka.
Eka vhidiyo leyi, i yini leswi Jim a bohekeke ku swi tshika leswaku a tsakisa Yehovha?
U tsakisa hi yini eka mhaka ya Jim?
Hlaya Vaheveru 11:6, ivi mi bula hi swivutiso leswi:
Yehovha u ta va endlela yini ‘lava n’wi lavaka hi mbilu hinkwayo,’ ku nga lava tikarhatelaka ku n’wi tiva ni ku n’wi tsakisa?
Leswi swi ku byela yini hi ndlela leyi Yehovha a titwaka ha yona loko a ku vona u wa u pfuka leswaku u dyondza Bibele?
UN’WANA A NGA HA KU VUTISA A KU: “U tihluphela yini hi ku dyondza Bibele?”
A wu ta n’wi hlamula njhani?
NKATSAKANYO
Hambileswi mikarhi yin’wana swi nga oloviki, ku dyondza Bibele swi ta ku pfuna leswaku u tiphina hi vutomi hilaha ku nga heriki. Yana emahlweni u titshega hi Yehovha, u ta ku katekisa.
Mpfuxeto
Hikwalaho ka yini ntiyiso lowu nga Bibeleni wu ri wa nkoka eka wena?
U nga swi rhangisa njhani “swilo leswi nga swa nkoka swinene”?
Hikwalaho ka yini u fanele u kombela Yehovha a ku pfuna leswaku u ya emahlweni u dyondza Bibele?
KUMA LESWI ENGETELEKEKE
Twana swiringanyeto swa mune leswi pfuneke vo tala leswaku va tirhisa nkarhi wa vona hi vutlhari.
“Tirhisa Nkarhi Wa Wena Hi Vutlhari” (Xalamuka!, February 2014)
Xiya leswaku Yehovha u n’wi pfune njhani wansati loyi nuna wakwe a a nga lavi leswaku a gandzela Xikwembu.
Yehovha Wa Hi Tiyisa Ku Langutana Ni Swiyimo Swo Tika (5:05)
Vona ndlela leyi ku tiyisela ka wansati un’wana ku pfuneke nuna wakwe ha yona.
Mikarhi yin’wana Timbhoni ta Yehovha ti hehliwa hi leswaku ti hahlula mindyangu. Kambe, xana sweswo i ntiyiso?