Dyondzisa Hi Ndlela Yo Olova

Leswi Yesu A Swi Endleke

VHIDIYO: Yesu U Kombisa Ndlela Leyi Tata Wa Hina A Hi Khathalelaka Hayona

1. Hlalelani VHIDIYO, kumbe mi hlaya Matewu 6:25-27. Kutani mi hlamula swivutiso leswi landzelaka:

1. Yesu u swi kombise njhani leswaku Yehovha wa hi khathalela?

2. Hambileswi Yesu a a tiva swilo swo tala hi swinyenyana, hi rihi rungula ro olova leri a vulavuleke ha rona? Hikwalahokayini yoleyo ku ri ndlela leyinene yo dyondzisa?

Hi Dyondza Yini Eka Yesu?

2. Loko hi dyondzisa hi ndlela yo olova, vanhu va ta tsundzuka leswi hi va dyondziseke swona naswona swi ta khumba timbilu ta vona.

Tekelela Yesu

3. U nga vulavuli ngopfu. Ku ri ni ku hlamusela swilo hinkwaswo leswi u swi tivaka hi mhaka yo karhi, namarhela rungula leri nga ebukwini leyi mi dyondzaka hi yona. Loko u vutise xichudeni xivutiso, handle ko hela mbilu xi yimele xi hlamula. Loko xi nga yi tivi nhlamulo kumbe xi nyikela nhlamulo leyi hoxeke leyi nga fambisaniki ni tidyondzo ta le Bibeleni, tirhisa swivutiso leswi engetelekeke ku xi pfuna leswaku mhaka yoleyo xi yi dyela marhamba ya nhloko. Loko xichudeni xa wena xi kala xi twisisa yinhlankulu, yanani emahlweni.

4. Pfuna xichudeni xa wena ku tirhisa leswi se xi swi tivaka leswaku xi twisisa swilo leswintshwa. Hi xikombiso, loko mi nga se sungula dyondzo leyi vulavulaka hi ku pfuxiwa ka lava feke, hi ku komisa mi nga pfuxeta leswi xichudeni se xi swi dyondzeke hi xiyimo xa vafi.

5. Tirhisa swifaniso hi ndlela leyinene. Loko u nga si tirhisa xifaniso tivutise:

1. ‘Xana xifaniso xa kona xi olovile?’

2. ‘Xana xichudeni xa mina xi ta xi twisisa hi ku olova?’

3. ‘Xana xi ta pfuna xichudeni xa mina ku tsundzuka yinhlankulu—ku nga ri xifaniso ntsena?’