U Nga Nyiki Diyavulosi Nkarhi!

“Dyambu ri nga tshuki ri pela ma ha karihile, na swona mi nga nyiki Diyavulosi nkarhi.”—VAEFESA 4:26, 27.

1. Petro u hlamusele Diyavulosi njhani, kambe i xitshembiso xihi xa nsirhelelo lexi muapostola a xi nyikeke?

XIVANDZANA xa nhova lexi karihaka xi le ku rhendzelekeni. Xi ni ku navela loku nga anerisekiki ko bvanyangeta. Petro wa tsundzuxa: “Tikhomeni mi hiteka. Nala wa n’wina a nga Diyavulosi, wa rhendzeleka-rhendzeleka ku fana ni nghala leyi bongaka, yi lava loyi yi nga n’wi dyaka. N’wi aleleni, mi tiya eku pfumeleni ka n’wina . . . Kutani endzhaku ka loko mi twisiwile ku vava nkarhinyana, Xikwembu xa tintswalo hinkwato . . . xi mi aka ni ku mi tiyisa, mi nga tsekatseki.”—1 Petro 5:8-10.

2. (a) Xana i swiyimo swihi leswi nga hi endlaka leswaku hi hlaseriwa hi Sathana? (b) Hikwalaho ka yini munhu loyi a welaka eku hlaseriweni hi vugwinehi a ri hava loyi a nga solaka yena handle ka yena n’wini ke? (c) I ku tsana kwihi loku pfuleleke Diyavulosi ndlela yo nghenisa ku xenga Yesu embilwini ya Yudasi Iskariyota?

² Hi nga tiyiseka leswaku Diyavulosi ni vayimeri va yena, va mademona ni va vanhu, va tiyimisele ku ntlhontlha ku kanakana kwihi na kwihi loku hlaselaka, ku hluleka kwihi na kwihi lokukulu ka vumunhu, ku honisa kwihi na kwihi eka hina ka ku hlayisa vumoya bya hina byi tiyile eripfumelweni. Kambe Rito ra Yehova ri hi tshembisa leswaku Diyavulosi a nga ka a nga hi bvanyangeti loko hi tshama hi tiyile ku Iwisana na yena. (Yakobo 4:7) Hi xikombiso, a ku na munhu loyi a hlaseriwaka hi vugwinehi hi mhaka ya leswi byi nga papalatekiki. Ku hava loyi a nga tilunghiselelaka ku fularhela ripfumelo. Minsusumeto ya mbilu ya katseka. I ntiyiso, Yohane u vule leswaku van’wana “va sukile va hi siya, kambe a va nga ri va ka hina.” (1 Yohane 2:19) Kambe leswi swi humelele hi mhaka ya leswi kumbexana va hlawuleke vugwinehi kumbe va ngheneke enhlengeletanweni ya Yehova hi nsusumeto lowo biha eku sunguleni. Yudasi Iskariyota a a ri ni mbilu leyinene loko a vitaniwile tanihi un’wana wa vaapostola va 12 va Yesu, kambe Diyavulosi u vange ku tsana ka makwanga ya Yudasi. Ni le mahlweni ka vusiku bya ku xengiwa ka Yesu, “Diyavulosi a ku ri khale a bohile makungu ya leswaku Yudasi, n’wana Simoni Iskariyota, u ta xenga Yesu.”—Yohane 13:2.

3. I timhaka tihi leti nga kucetelaka munhu ku hlaseriwa hi vugwinehi?

³ Munhu u va lowo biha hikwalaho ka leswi a pfumelelaka ku anakanyisisa ka yena n’wini ka vutianakanyi, ku tsakela ni ku navela ka yena n’wini, vanghana vakwe lava a va hlawuleke ni matshamelo, swi vumba miehleketo ya yena ni ku tiyisa tlhelo ra ku rhandza ka yena. Pawulo u vulavula hi van’wana lava va ‘tshameke va voningeriwa, lava nantsweke nyiko ya le tilweni ya mahala, kambe va tlheleleke endzhaku.’ (Vaheveru 6:4-6) Loko hi nga tivoneli nkarhi na nkarhi, Diyavulosi a nga endla leswaku timbilu ta hina ti amukela miehleketo ya vugwinehi hi vunwa byakwe lebyi kanganyisaka. Kambe Diyavulosi, u endla leswaku munhu a khumbiwa ni ku hlaseriwa hi vugwinehi hi laha ku humelelaka hi ndlela yihi?

4. I yini lexi nga endlekaka loko hi tinyiketela ku hlundzuka, rivengo ni ku xopa-xopa swihoxo ke?

⁴ Malangutelo lama tolovelekeke lama Sathana a ma langutaka i ku hlundzuka, rivengo ni ku xopa-xopa swihoxo. Mintlhaveko yo tano yi nga kula swinene lerova ku sala ndhawu yintsanana ya rirhandzu ni ku tlangela. Kumbexana xirhalanganya xin’wana lexi nga rindzeriwangiki xa tlhekeka, xi endla leswaku munhu a titwa a hlundzukile ni ku va la faneriwaka hi ku tshama a nga ti eminhlanganweni ya nkoka ya Vukriste. Hi ku tshama a hlundzukile nkarhi wo karhi, u ‘nyika Diyavulosi nkarhi.’ (Vaefesa 4:27) Munhu loyi a kavanyetiweke u vona swihoxo swa vumunhu swa makwavo ntsena ematshan’wini ya ku n’wi rivalela “loku hlayiweke ka 77,” naswona u tsandzeka ku tirhisa swiyimo leswi ringaka tanihi minkarhi yo hetisisa timfanelo ta Vukriste. (Matewu 18:22) Loko a ri eka xiyimo lexi xa mianakanyo, loko un’wana a ta eka yena kutani a ringanyeta leswaku nhlengeletano ya Yehova ya tshikelela kumbe ya sivelasivela, kumbe yi hoxile eka tidyondzo tin’wana ta nkoka, mbilu leyi hlundzukeke ya Mukriste yi nga ha amukela swilo swo tano leswi nga hava masungulo. Kutani ke, i swa nkoka swonghasi, ku papalata ku pfumelela ku hlundzuka ni rivengo swi kula! U nga tshiki dyambu ri pela wa ha hlundzukile. Ematshan’wini ya sweswo, pfumelela rirhandzu ri va ni xikombiso xa rona lexi heleleke evuton’wini bya wena.

5. (a) Ku tikukumuxa kumbe ku andlariwa ka ndzulamiso ku nga tikomba ku ri rhengu hi ndlela yihi? (b) I xiphemu xihi lexi ku titsongahata ku nga na xona leswaku hi tshama hi tiyile eripfumelweni?

⁵ Hi swihi swiyimo swin’wana swa mbilu ni mianakanyo leswi Diyavulosi a swi lavaka? Kunene, ku ni ku tikurisa, ku titwa vukulu eka van’wana, ku hlundzukela ku nga kumi xikhundla lexi munhu a vonaka onge u fanele ku va na xona. Lawa hinkwawo i marhengu lama tirhisiwaka hi Diyavulosi. (Varhoma 12:3) Loko u tshinyiwile kumbe u soleriwe xiendlo kumbe langutelo lero biha, leswi naswona swi nga tikomba wu ri nkarhi lowunene wa Diyavulosi wo ku hlohlotela leswaku u tivutisa loko u ri eka nhlengeletano leyi faneleke. Kutani hambeta u titsongahata. Anerisekela ku hanya tanihi “lontsongo.” U nga pfumeli ku tikurisa kumbe ku titwa vukulu eka van’wana swi ku tsekatsekisa eku yimeni ka wena u tiyile eripfumelweni.—Luka 9:48; 1 Petro 5:9.

6, 7. (a) I swikombiso swihi swin’wana swa ximbilwa-mbilwana leswi Diyavulosi a hatlaka ku swi tirhisa? (b) Loko munhu a pfumala vutlhari, ku fanele ku endliwa yini ke?

⁶ Ximbilwa-mbilwana i nchumu wun’wana lowu laviwaka hi Diyavulosi. Minkarhi yin’wana hi nga ha vona leswaku ku hundzuka ku fanele ku endliwa; hi lava goza ra xihatla, tinhlamulo ta xihatla. ‘Xiphiqo lexi xi fanele ku lulamisiwa sweswi, kumbe ndzi tshika. Ndzi fanele ku kuma nhlamulo ya xivutiso lexi sweswi, kumbe a ndza ha yi emahlweni. Armagedoni ni mafambiselo lamantshwa i khale swi “ri kwala nyangweni” hi malembe sweswi. Ndzi karharisiwe hi ku rindza.’ Tiyiseka leswaku Diyavulosi u tiyimisele ku byala mbewu yo kanakana ni ku hlasela eswivandleni swo tano swa ximbilwa-mbilwana. Ku tiyisela ni ripfumelo swa laveka.—Vaheveru 10:36, 39.

⁷ Yakobo u te: “Kambe ku tiyisela ka n’wina ku fanele ku tirha ntirho lowu hetisekeke, leswaku mi va lavo hetiseka ni ku lulama hi matlhelo hinkwawo, mi nga kayeli nchumu. Loko un’wana wa n’wina a pfumala vutlhari,a a kombele eka Xikwembu, lexi nyikaka vanhu hinkwavo hi tintswalo, ku nga ri na ku vilela, kutani u ta nyikiwa byona. Ntsena,a a kombele hi ku pfumela, a nga kanakani, hikuva loyi a kanakanaka, u fana ni gandlati ra Iwandle leri biwaka ri yisiwa hala ni hala hi mheho. Munhu lowo tano a nga tshuki a ehleketa leswaku u ta nyikiwa nchumu hi Xikwembu, hikuva i munhu wa miehleketo mimbirhi, loyi a tsekatsekaka etindleleni ta yena hinkwato.” (Yakobo 1:4-8) U nga tshuki u pfumelela Diyavulosi a ku endla xichudeni xa vugwinehi hikwalaho ka leswi u sunguleke ku lava swilo hi ku hela mbilu, u kanakana hi switshembiso swa Xikwembu! Lehisa mbilu, u nkhensa. Tshemba Yehova.—Psalma 42:5.

8. Mboyamelo wo xandzukela vuhosi wu pfulela Diyavulosi ndlela yo xisa munhu leswaku a lahla minsivelo ya Matsalwa hi ndlela yihi?

⁸ I yini xin’wana lexi Diyavulosi a xi tirhisaka ku ringeta ku hi hambukisa xana? Xana a nga ringetanga ku ntlhontlha ku xandzuka minkarhi hinkwayo, ku endla leswaku malandza ya Yehova ya sola lava nga vakulu? Van’wana va nga ha ku: ‘Vakulu a va swi twisisi. Va sola ngopfu; va lava swo tala.’ Munhu a nga ya emahlweni ni ku vula leswaku Huvo leyi Fumaka ya Timbhoni ta Yehova kumbe vamakwerhu van’wana lava nga ni vutihlamuleri va kavanyeta ku tshunxeka ka ripfalo ni “mfanelo” ya munhu yo hlamusela Matsalwa. Kambe tsundzuka marito ya Yosefa ya ku titsongahata: “Ku hlamusela a ku humi ka Šikwembu šana?” (Genesa 40:8) Naswona xana Yesu a nga vhumbanga leswaku emasikwini lama ya makumu nhlengeletano ya vatotiwa, “nandza lowo tshembeka, lowa vutlhari,” a a ta byarhisiwa ku nyikela swakudya swa moya hi nkarhi wa kona? (Matewu 24:45-47) Tivonele eka lava ringetaka ku rhangisa mianakanyo ya vona vini leyi hambaneke. Nakambe tivonele eka lava va lavaka ku susa minsivelo hinkwayo kumbe lava tshembisaka ntshunxeko, va vula leswaku Timbhoni ta Yehova i mahlonga! Petro u vulavule hi vadyondzisi va mavunwa a ku: “Va tshembisa ku ntshunxeka, kambe vona hi voxe i mahlonga ya leswi bolaka; hikuva munhu i hlonga ra xilo xihi na xihi lexi xi n’wi hlulaka.”—2 Petro 2:1, 19.

9. Hakanyingi langutelo ra lava va solaka vakulu hi rihi xana?

⁹ Hakanyingi hi wihi nsusumeto wa lava solaka Sosayiti kumbe vakulu? Xana hakanyingi a hi mhaka ya leswi ku tirhisiwa ka Tsalwa ku va khumbaka hi ku kongoma? Ematshan’wini yo pfumelelana ni dyondzo ni vuleteri lebyinene, va lava leswaku nhlengeletano yi cinca. A hi kombiseni leswi hi swikombiso swi nga ri swingani:

10. Ku phikelela ku ambala loku tlulaka mpimo kumbe switayele swo tilunghisa swi hetelela swi ‘nyike Diyavulosi nkarhi’ hi ndlela yihi?

¹⁰ Makwerhu wa xinuna u sindzisa ku ambala loku tlulaka mpimo kumbe xitayele xa ku tilunghisa. Vakulu va vona leswaku a hi xikombiso lexinene kutani va n’wi tsona malunghelo man’wana, tanihi ku yima epulatifomo a dyondzisa. Wa hlundzuka, a vula leswaku van’wana va ringeta ku teka ntshunxeko wa yena wa Vukriste. Kutani xivangelo xa ku anakanyisisa ko tano i yini? Xana hi ntolovelo a hi ku tikukumuxa, langutelo ro tilawula, kumbe ku navela ka vuhlangi ka ku va ni ndlela ya munhu hi yexe? Hambi loko leswi swi vonaka wu ri nchumu wuntsanana, munhu loyi a anakanyisisaka hi ndlela yoleyo a nga ‘nyika Diyavulosi nkarhi.’ Kambe rirhandzu ni ku titsongahata swi ta endla leswaku hi ambala ni ku tilunghisa hi ndlela yo ringanisela, leyi amukelekaka. Hi fanele ku lava ku endla swilo hinkwaswo ku yisa mahungu lamanene emahlweni naswona hayi ku titsakisa.—Varhoma 15:1, 2; 1 Vakorinto 10:23, 24.

11. I yini lexi vangaka ku kanakana kwihi na kwihi ka nawu wa Yehova wo papalata ngati xana?

¹¹ A hi tekeni xikombiso xin’wana. Nkarhi na nkarhi u nga ha twa un’wana a kanakana loko nsivelo wa Matsalwa wo Iwisana ni ku dya ngati hakunene wu tirha eka mimpopelo ya ngati. Kambe i yini lexi susumetaka ku anakanyisisa loku? Xana i ku chava—ku chava ku lahlekeriwa hi vutomi bya munhu bya sweswi kumbe vutomi bya murhandziwa? Xana ntshembo wa ku pfuka ka vafi wa nyamalala? Vakriste lava tshembekaka a va wu tshovi. nawu wa Xikwembu kumbe va lava tindlela ta ku wu timula. Ku papalata ngati yo wundla miri swa ha fana ni ku papalata vuoswi ni ku gandzela swikwembu swa hava, hinkwaswo swi soriwile hi xileriso lexi kongomisiweke hi moya wa vaapostola ni vakulukumba eYerusalema.—Mintirho 15:19, 20, 28, 29.

12. Hikwalaho ka yini vutshembeki lebyi hoxeke byi nga hi endli leswaku hi tshova xilaveko xa Matsalwa xa leswaku hi papalata xinghana ni lava susiweke?

¹² Van’wana lava nga ni langutelo ro sola va vula leswaku nhlengeletano ya Yehova yi ni vuxiya-xiya ngopfu ehenhleni ko herisa timhaka ta ntirhisano ni vanhu lava susiweke. (2 Yohane 10, 11) Kambe hikwalaho ka yini vasori volavo va titwa hi ndlela yoleyo? Xana va ni xiboho lexikulu xa ndyangu kumbe vutshembeki lebyi hoxeke eka munghana loyi va n’wi rhangisaka emahlweni ka vutshembeki eka Yehova ni mimpimanyeto ni swilaveko swa yena ke? Nakambe, xiya leswaku ku hambeta u va ni xinghana ni munhu loyi a susiweke, hambi a ri loyi a nga xaka ra le kusuhi, swi nga endla mudyohi a heta hi leswaku xiendlo xa yena a xi bihanga, naswona leswi swi engetela ku vaviseka ka yena. Hambi swi ri tano, ku tsema xinghana xo tano swi nga ha n’wi endla leswaku a navela leswi a swi lahleke kutani a navela ku tlhela a swi kuma. Ndlela ya Yehova minkarhi hinkwayo ya antswa, naswona i ya ku sirheleta hina vini.—Swivuriso 3:5.

13. I langutelo rihi leri hi faneleke ku va na rona malunghana ni ku chumayela ka le rivaleni hi yindlu na yindlu?

¹³ Munhu un’wana a nga ha hoxisa hi ku vula leswaku Matsalwa a ya ku seketeli ku chumayela ka le rivaleni hi yindlu na yindlu. Kambe leswi swi endliwa hi mhaka ya leswi ana se a nga ha wu rhandziki ntirho lowu wa nkoka kutani a lavaka xivangelo xa ku wu tshika xana? Rirhandzu ra Xikwembu ni munhu-kulorhi ri fanele ku hi susumetela leswaku hi vona xihatla xa ntirho lowu wo ponisa vutomi. Nakambe, ku tiyisela ka laveka. Muapostola Pawulo u vulavule hi ku tiyisela ka yena n’wini eku ‘vekeni ka vumbhoni khwatsi eka Vayuda ni Vagriki’ tanihi leswi a dyondziseke erivaleni na hi yindlu na yindlu. (Mintirho 20:18-21) Ematshan’wini yo vilela, xana a hi fanelanga ku landzela xikombiso xa yena lexinene hi ku tshembeka ke? Vona magidi lama hlengeletiweke eka “ntlhambi wun’we” hikwalaho ka ku katekisa ka Yehova ntirho wa yindlu na yindlu! (Yohane 10:16) Kutani u nga rivali mimpfuno leyinene leyi hi yi kumaka hi ku leteriwa ni ku tshinyiwa, eku tiyiseni ka ripfumelo ra hina, hi fanele ku ya hi yindlu na yindlu leswaku hi ta fikelela vanhu hi mahungu lamanene.—Ringanisa Mintirho 5:42; 1 Timotiya 4:16.

14. Xana u ehleketa leswaku hi fanele ku endla njhani loko vasori va sola Timbhoni ta Yehva va ku i vaprofeta va mavunwa?

¹⁴ Eku heteleleni, hi nga ha xiyisisa leswi Sosayiti yi swi endleke enkarhini lowu hundzeke eka ntivo swa khale. Vakaneti van’wana va vula leswaku Timbhoni ta Yehova i vaprofeta va mavunwa. Vakaneti lava va vula leswaku masiku ya vekiwile, kambe ku hava nchumu lowu endlekeke. Nakambe ha vutisa, nsusumeto wa vasori lava hi wihi xana? Xana va khutaza ku hiteka eka vanhu va Xikwembu, kumbexana ematshan’wini ya sweswo, va ringeta ku tiyimelela hikwalaho ko tlhelela entirhweni wo khudzehela? (1 Vatesalonika 5:4-9) Xa nkoka swinene, u ta endla yini loko u twa ku sola ko tano xana? Loko munhu a kanakana loko ku ri leswaku hi hanya “emasikwini ya makumu” ya mafambiselo lawa, kumbexana i ku amukela miehleketo ya leswaku Xikwembu xi ni tintswalo ni leswaku hakunene Xi nga ka xi nga dlayi timiliyoni ta vanhu vo tarisa leswi enkarhini wa “nhlomulo lowukulu,” manuku munhu loyi ana se u lunghiselele mbilu ya yena ku yingisa ku sola ko tano.—2 Timotiya 3:1; Matewu 24:21.

15. Ematshan’wini ya ku va vaprofeta va mavunwa, i yini lexi kombaka leswaku Timbhoni ta Yehova ti na ripfumelo eRitweni ra Xikwembu ni le ka switshembiso swa rona leswi tiyisekeke?

¹⁵ Ina, vanhu va Yehova va faneriwe hi ku tlhela va pfuxeta malangutelo nkarhi na nkarhi. Hikwalaho ka ku chivirika ka hina, hi langutele mafambiselo lamantshwa emahlweni ka nkarhi lowu xiyimiso xa Yehova xi wa vekeleke wona. Kambe hi kombisa ripfumelo ra hina eRitweni ra Xikwembu ni switshembiso swa rona leswi tiyisekeke hi ku huwelela rungula ra rona eka van’wana. Ku tlula kwalaho, xilaveko xo tlhela hi pfuxeta ku twisisa ka hina hi ndlela yo karhi a xi endli leswaku hi va vaprofeta va mavunwa kumbe ku cinca mhaka ya leswaku hi hanya “emasikwini ya makumu,” laha hi nga ta vona “nhlomulo lowukulu” ku nga ri khale lowu nga ta pfula ndlela ya Paradeyisi ya laha misaveni. I vuhunguki swonghasi ku teka langutelo ra leswaku malangutelo lama lavaka ku lulamisiwa ya fanele ku kanakanisa ntiyiso hinkwawo! Vumbhoni byi le rivaleni bya leswaku Yehova u tirhisile naswona u hambeta a tirhisa nhlengeletano yakwe yin’we, ni “nandza lowo tshembeka, lowa vutlhari” loyi a yi rhangelaka. Kutani ke, hi titwa ku fana na Petro, loyi a nga te: “Hosi, hi nga ya ka mani xana? U ni marito ya vutomi lebyi nga heriki.”—Yohane 6:68

16, 17. (a) Ku tirhisiwa ka marito ya Yesu lama nga eka Matewu 7:15-20 ku pfuna ku komba nhlengeletano leyi Yehova a yi katekisaka hi ndlela yihi? (b) I mihandzu yihi yin’wana leyinene leyi humesiweke evuton’wini bya malandza ya ntiyiso ya Yehova?

¹⁶ Hi le paradeyisini ya moya ntsena, exikarhi ka Timbhoni ta Yehova, laha hi nga kumaka rirhandzu ro tinyikela leri Yesu a vuleke leswaku a ri ta kombisa vadyondzisiwa va yena va ntiyiso. (Yohane 13:34, 35) Hi mihandzu ya vona leyo biha, vaprofeta va mavunwa va paluxe leswi va nga swona hakunene. Kambe Yesu u kombe leswaku mirhi leyinene a yi ta voniwa hi mihandzu ya yona leyinene. (Matewu 7:15-20) I mihandzu muni yonghasi leyinene leyi hi nga na yona eparadeyisini ya moya! Ku andza loku hlamarisaka ka humelela etikweni rin’wana ni rin’wana. Vafumiwa lava tlulaka 3 000 000 lava tsakeke va Mfumo wa Xikwembu emisaveni hinkwayo i xikombiso lexi hanyaka xa leswaku Yehova u na vanhu emisaveni.

¹⁷ Hikwalaho ka leswi va dyondzisiwaka hi Xikwembu, hakunene Timbhoni ta Yehova ti tswala mihandzu ya Vukriste evuton’wini bya tona. (Esaya 54:13) I vanhu va Yehova ntsena lava ntshunxekeke hi laha ku heleleke eka vukholwa-hava bya Babilona. Hi vona ntsena lava nga ni nhlengeletano leyi fambisanaka hi laha ku heleleke na leswi Rito ra Xikwembu ri swi vulaka ehenhleni ka rigangugangu, ku xixa tinyimba, vudakwa, ku yiva, ku gandzela swikwembu swa hava, rivengo ra rixaka ni timhaka kun’we ni mikhuva yin’wana ya misava. Naswona hi vona ntsena vanhu lava yingisaka nawu wo chumayela mahungu lamanene ya Mfumo wa Yehova. (Matewu 24:14) Rito ra Xikwembu hi roxe handle ka ku tilumaluma ri komba Timbhoni ta Yehova tanihi vanhu van’we lava hleriweke lava xi va katekisaka!

18. Loko ya hlaseriwa hi tidyondzo ta vugwinehi, xiyimo xa malandza ya Yehova xi fanele xi va xihi?

¹⁸ Ina, eka hinkwavo lava tshembekaka ni lava tiyiselaka hi ku tshembeka endleleni ya Vukriste, ha tiyiseka leswaku ntiyiso wa Yehova wa ha xongile, wa anerisa—ku tlula loko va wu twa ro sungula. Hikwalaho ke, tiyimisele embilwini ya wena leswaku u nga tshuki u khumba chefu leyi vagwinehi va lavaka leswaku u yi nwa nikantsongo. Yingisa swileriso swa vutlhari kambe swi ri leswi tiyeke swa Yehova swo papalata lava ku kanganyisaka hi laha ku heleleke, va ku xisa, va ku hambukisela etindleleni ta rifu. Loko hi rhandza Yehova hi mbilu ya hina hinkwayo, moya, ni ku anakanya, loko hi ri karhi hi rhandza munhu-kulorhi kukota loko hi tirhandza, hi nga ka hi nga pfumeleli ku hlaseriwa hi miehleketo ya vugwinehi. (Matewu 22:37-39) Hi nga ka hi nga “nyiki Diyavulosi nkarhi” naswona hi nga ka hi nga naveli ku langutisa kun’wana. Hi nga ka hi nga ‘tsekatsekisiwi hi ku hatlisa eku anakanyisiseni ka hina’ hi dyondzo yin’wana ya vukanganyisi.—2 Vatesalonika 2:1, 2.

19. I ndlela yihi leyi nga ta tiyisa leswaku ‘munhu a nge hi tekeli hakelo ya hina’ ya vutomi lebyi nga heriki?

¹⁹ Minkarhi hinkwayo a hi tlangeleni lunghelo ra hina ra ku va eparadeyisini ya moya ya Yehova, laha hi tsakelaka mikateko yo tala leyi fuweke. Ha swi tiva leswaku i vamani lava namarhelaka hi ku tshembeka emaritweni ya vutomi lebyi nga heriki. Kutani hlayisa xinghana lexikulu na vona, u karhi u tiva leswaku i vamakwerhu va xinuna ni va xisati va ntiyiso, lava tshembekaka eripfumelweni. Onge hi nga hambeta hi va ni ntsako ni ku eneriseka loku fanaka ni loku a hi ri na kona loko hi dyondza ntiyiso ro sungula, hi xitshembiso xa hakelo leyikulu ya vutomi lebyi nga heriki emafambiselweni lamantshwa ya swilo ya Yehova. Hi laha Pawulo a vuleke ha kona hi laha ku fanelaka a ku: “Munhu a nga tshuki a mi tekela hakelo ya n’wina!”—Vakolosa 2:18.

U Nga Hlamula Xana?

◻Hikwalaho ka yini ku ri ntiyiso leswaku ku hava munhu loyi a tilunghiselelaka ku fularhela ripfumelo?

◻Rivengo, ku tikurisa, ni ximbilwa-mbilwana swi nga pfulela Diyavulosi ndhawu embilwini hi ndlela yihi?

◻Hakanyingi i yini lexi susumetelaka ku sola ndzayo leyi nyikeriwaka hi vakulu?

◻I mihandzu yihi leyi humesiweke hi Timbhoni ta Yehova leyi kombaka leswaku i nhlengeletano yin’we leyi Xikwembu xi yi tirhisaka?

[Xifaniso eka tluka 16]

Hi ku ala ndzayo, hi nga “nyika Diyavulosi nkarhi”

[Xifaniso eka tluka 17]

Ku tikurisa ku nga yisa eku weni loku munhu a nga hlulekaka ku pfuka

[Xifaniso eka tluka 18]

Malandza lama gingirikaka ni lama tsakeke ya Yehova ‘a ya n’wi nyiki Diyavulosi nkarhi kumbe miehleketo ya vugwinehi