Ku Katekile Lava Tirhisaka Matimba Hi Ndlela Leyinene!
“Yehova o lehe mbilu, i nkulu ngopfu, loko a lanḍulela munhu e nanḍu wa yena.”—NAHUM 1:3.
1. Hikwalaho ka yini ku va munhu a va ni muxaka wo karhi wa matimba ku nga ri xisekelo xa ku tikukumuxa?
KU NA tinxaka to tala ta matimba leti va vutlhari va nga ti tirhisaka hi ndlela leyinene. Hikwalaho ka vukosi bya ntumbuluko kumbe hikwalaho ka swiyimo, hi nga ha va hi ri ni matimba ya muxaka wo karhi. Kambe xana lexi i xisekelo xo tikukumuxa ke? Nikantsongo. Hi hlaya yini eka Yeremia 9:23? “L’a nga ni v̌utlhari a nga ṭhuki a tiḍunisa hi v̌utlhari bya yena, l’a nga ni matimba a nga tiḍunisi hi matimba ya yena; na yena mufuwi a nga tiḍunisi hi rifuwo ra yena.” Ha yini swi nga ri tano? Muapostola Pawulo u nyika nhlamuselo leyinene eka 1 Vakorinto 4:7: “Hikuva i mani la ku tlakuseke ku tlula van’wana xana? Xana u na yini lexi u nga nyikiwangiki xana? Xana loko u nyikiwile, hikwalaho ka yini u tidzunisa, wonge hi loko u nga swi kumanga hi ku nyikiwa xana?”
2. Hikwalaho ka yini hi fanele ku tivonela loko swi ta eku tirhiseni ka matimba?
2 Hikwalaho ka yini hi fanele ku tilangutela eku tirhisiweni kwihi na kwihi loko biha ka matimba loko hi nga ha vaka hi ri na kona? Hikuva “makungu ya timbilu ta v̌anhu ma bihile e ku suka v̌uhlangini bya v̌ona.” (Genesa 8:21) Tanihi leswi hinkwerhu ka hina hi nga ni ndzhaka yo voyamela eka vutitivi, minkarhi hinkwayo hi fanele ku tivonela leswaku hi ma tirhisa kahle matimba wahi na wahi lawa hi nga na wona. Hi nkarhi wun’wana muphati u phofule miehleketo leyi: “Ku hava rifuwo leri nga fambisaniki na ku vilela. Ku hava matimba lama nga riki na xirimbana xo ma tirhisa hi ndlela yo biha.” Ina, hikwalaho ka ndzhaka ya ku nga hetiseki, minkarhi hinkwayo ku na mboyamelo wo tirhisa matimba hi vutianakanyi.
Yehova—U Na Matimba Nakambe U Na Vutlhari Ni Ku Lulama
3. I tinxaka tihi ta matimba leti nga eka Yehova?
3 Ku hava un’wana handle ka Muvumbi, Yehova Xikwembu, loyi a hi vekelaka xikombiso lexinene, ina, lexi hetisekeke, eku tirhiseni ka matimba. A nga hatlisi kambe u hlwela ku kariha hambi loko ku ri na xilaveko xo kombisa matimba yakwe hi ndlela yo homboloka. (Nahum 1:3) Ku hava loyi a nga ni matimba lamakulu ku tlula Xikwembu, xi nga xona xivangelo lexi hi kombetelaka eka xona tanihi lexi xi nga ni matimba hinkwawo. Hi mfanelo u tirhisa xithopo lexi nge “Wa Matimba Hinkwawo” eka yena n’wini. (Genesa 17:1) A nga na matimba lama teleke hi leswi a nga ni ntamu lowu nga hikiwangiki ntsena, kambe u tlhela a va ni matimba lamakulu hikuva u na vuhosi hinkwabyo hi mhaka ya xiyimo xakwe tanihi Hosi leyikulu ya misava, leyi a yi vumbeke. Hi yona mhaka leyi ku nga hava loyi a nga ringetaka ku “kambela voko rakwe kumbe a ku ka yena, u endla yini xana?”—Daniel 4:35.
4. Ha yini ku ri ndlela ya vutlhari ku chava Yehova?
4 Hikwalaho ka leswi Yehova Xikwembu a nga wa matimba hinkwawo, i vutlhari eka hina ku chava ku n’wi hlundzukisa. Ina, “masungulo ya v̌utlhari i ku tšhav̌a Yehova. Ni v̌utiv̌i bya la’v̌a tengeke hi kona ku twisisa.” (Swivuriso 9:10) Pawulo u hi tsundzuxa leswaku hi nga tshohokisi Yehova Xikwembu hi ku tirhisa xivumbeko xihi na xihi xa ku gandzela swifaniso hikuva “xana ha [n’wi] tlula hi matimba ke?” Hakunene a swi tano! (1 Vakorinto 10:22) Kambe, hinkwavo lava tlulaka milawu leyinene ya Xikwembu hi vomu va endla onge hi loko va tlula Yehova hi matimba! Marito ya Pawulo lama yaka emahlweni ya tiyisa yinhla leyi: “Xikwembu xa hina i ndzilo lowu herisaka.”—Vaheveru 12:29.
5. Hikwalaho ka yini hi nga fanelanga ku chava Yehova swinene-nene hikwalaho ka ku va a ri wa matimba hinkwawo?
5 Timhaka leti a ti ta hi vangela ku chava lokukulu kumbe gome loko a ku nga ri leswaku Yehova Xikwembu u ya ringanisela hi laha ku hetisekeke matimba yakwe lama tlakukeke ni timfanelo letin’wana ta yena tinharhu: vutlhari, vululami ni rirhandzu. Ku tirhisa ka yena ka matimba hi ndlela leyi vavisaka minkarhi hinkwawo i xitatisi, kambe a ku hundzuki, eka timfanelo leti. Hi xikombiso, Ndhambi ya siku ra Nowa hakunene a xi ri xikombiso lexikulu xa matimba ya Yehova. Kambe ku tirhisa ka Xikwembu ka matimba a ku ri loku nga lulamangiki kumbe ko pfumala rirhandzu xana? Doo! Vanhu va onhe ndlela ya xona laha Xikwembu xi tweke xi vaviseka embilwini hi leswi xi swi voneke. (Genesa 6:5-11) Leswi vanhu volavo vo biha lava hanyeke emahlweni ka ndhambi a va nga yi tirhisi hi ndlela leyi faneleke mikateko ya Yehova, u teke goza hi xihatla a va kukula eku basiseni ka misava, ngopfu-ngopfu loko va honise switsundzuxo swa “mutwarisi wa leswo lulama,” Nowa.—2 Petro 2:5.
6. Ku tirhisana ka Yehova na Sodoma na Gomora ku komba yini?
6 Loko vaaki-tiko va Sodoma na Gomora va tikombe va ri vadyohi lavakulu, hi ku tirhisa mikateko leyi vona, tanihi xiphemu xa vanhu va yi tsakelaka evokweni ra Yehova hi ndlela yo biha, u lerise leswaku vaaki-tiko va fanele ku herisiwa. Hikwalaho ko khathalela nakulobye Abrahama, Yehova u byele wanuna yoloye wa ripfumelo hi xikongomelo xa Yena mayelana na Sodoma na Gomora. Abrahama u vonake a ehleketa leswaku leswi ku ta va ku tirhisiwa lokukulu ko biha ka matimba, kutani a vutisa Yehova: “Loyi a av̌anyisaka misav̌a hikwayo a nga ka a nga av̌anyisi hi ku lulama šana?” Hambi swi ri tano, Abrahama a nga swi twisisanga. Eku heteleleni, u boheke ku pfumela leswaku xileriso xa Yehova hakunene a xi lulamile, hikuva a ku nga ta kumeka hambi ku ri mimoya ya valulami va khume emitini leyi mimbirhi. Hakunene leswi swi komba vukheta lebyi Yehova Xikwembu a nga na byona byo tirhisa matimba ya yena hi vululami.—Genesa 18:17-33; Esaya 41:8.
7. Hikwalaho ka yini Faro a faneriwa hi ku twisiwa ku vava hi matimba ya Yehova?
7 Endzhaku, loko ku fike nkarhi wo ntshunxa Vaisrayele evuhlongeni lebyo biha aEgipta, Yehova u nyike Faro nkarhi wo hundzuka. Leswi a swi nga ta n’wi vavisa Faro ni vanhu va yena. Kambe mufumi yoloye hi ku tinyungubyisa ni ku tiomisa nhloko u arile ku amukela xikombelo xa Yehova. Kutani Xikwembu xi nyike Faro xikombiso xa matimba ya xona eka Makhombo ya Khume lama weleke Egipta hi ku landzelelalana ka wona. (Eksoda 9:16) Endzhaku ka loko Faro a tshike Vaisrayele va famba, hi ku tiomisa nhloko u hambetile a tlhontlha Yehova hi ku hlongorisa Vaisrayele. Kutani, Yehova u tirhise matimba ya yena lamakulu hi ku lulama a herisa Faro ni mavuthu yakwe ya matimba eLwandle ro Tshwuka. (Psalma 136:15) Eka xiendlakalo xin’wana ni xin’wana a swi xiyiwe, Yehova u tlhele a tirhisa matimba yakwe lamakulu ku hlayisa malandza yakwe lama tshembekaka: Nowa ni ndyangu wa yena, Lota ni vanhwana vakwe vambirhi, ni tiko ra Israyele.—Genesa 19:16.
8. A ku ri hikwalaho ka xivangelo xihi lexinene ku kala Yehova a tirhisana na Sankerib hi ndlela leyi a endleke ha yona?
8 Malembe xidzana endzhakunyana, enkarhini wa Hosi Ezekias, Yehova Xikwembu u kombisile matimba ya yena lamakulu hi ndlela leyi chavisaka yo lulama swinene loko hosi ya Vaasiriya Sankerib a xungete Yerusalema. Vanhu va Yehova, na Hosi Ezekias mufumi wa vona la chavaka Xikwembu ni wo tshembeka, va kombele ku pfuniwa hi Yena. A va n’wi tirhela hi vutshembeki, kutani Xikwembu xi teke goza hikwalaho ka vona. Muyimeri wa Hosi Sankerib, hi tlhelo rin’wana, u tikukumuxile: ‘Mi nga yingisi Ezekias, mi nga n’wi tshiki a mi yengetela hi ku tshembisa leswaku Yehova u ta mi kutsula. Xana ku na swikwembu exikarhi ka swikwembu hinkwaswo swa matiko lawa leswi kutsuleke matiko ya swona emavokweni ya Sankerib xana? Leswi ni xin’we xa swikwembu leswi xi nga swi kotangiki ku endla tano, hikwalaho ka yini mi anakanya leswaku Yehova u ta swi kota ku mi kutsula ke?’ (Esaya 36:13-20) Hikwalaho ka ku tikukumuxa ko tano, Xikwembu a xi fanele ku tirhisa matimba lamakulu ya xona ntsena, xi endla leswaku masocha ya 185 000 ma fa hi vusiku byin’we, ku kombisa leswaku hakunene a ku ri ni ku hambana exikarhi ka swikwembu swa matiko na Yehova.
9. I swikombiso swihi swin’wana leswi kombaka leswaku Yehova u na vukheta eka mhaka leyi a tirhisaka matimba ya yena ha yona?
9 Xiya swikombiso swi nga ri swingani ntsena swa swo tala leswi nga nyikeriwaka. Loko Yehova a be Meriyamu hi nhlokonho, swoleswo a ku ri xikombiso lexinene ni xa vutlhari xa matimba ya yena. Meriyamu a a faneriwa hi nkhavi wo tano hi mhaka ya ku vulavula hi ku tikukumuxa eka makwavo Muxe, muhlawuriwa wa Xikwembu. (Tinhlayo 12:1-15) A swi fana na loko Hosi Oziyasi hi vurhena a nghene evukwetsimelweni bya tempele yo hlawuleka kutani a endla gandzelo ealtarini ra nsuku, hi ku tikukumuxa a ala ku tsundzuxiwa hi vaprista va Valevhi. Yehova u kombe matimba yakwe hi ku lulama hi ku tota hosi yoleyo hi nhlokonho. (2 Tikronika 26:16-21) Tanihi leswi swidyoho swa vona a swi hambanile, a swi ri tano ni nkhavi wa Yehova eka vona: Nhlokonho wa Meriyamu a wu ri wa xinkarhana, kambe Oziyasi u fe a ri wa nhlokonho. Xisweswo hi nga vona leswaku minkarhi hinkwayo Yehova u na vukheta hi ku tirhisa matimba ya yena hi ndlela ya vutlhari ni yo lulama, a ri la kotaka ku hlayisa vatshembeki lava va n’wi rhandzaka ni ku herisa lavo biha.—Psalma 145:20.
Xikombiso Xa Yesu Kriste
10, 11. I swiendlakalo swihi swi kombaka leswaku Yehova a a khathalela ku tirhisa matimba hi ndlela leyinene?
10 N’wana wa Xikwembu hakunene a a ri mutekeleri lonene wa Tata wakwe eku tirhiseni ka matimba. Exikarhi ka swiendlakalo swo sungula a ku ri nkarhi lowu Sathana a lweke na yena ehenhla ka ntsumbu wa Muxe. Rito ingi ri swi kotile ku avanyisa Sathana hi matimba. Ku ri na sweswo, kavula Rito ri ti miyelerile, ri endla leswaku ku tshinya Yehova Xikwembu hi yexe.—Yuda 8, 9.
11 Ndzingo wo sungula lowu Sathana a wu endleke eka Yesu emananga a wu fambelana ni mhaka leyi ya ku tirhisa matimba hi ndlela leyo biha. Sathana u ringe Yesu leswaku a tirhisa matimba yakwe layo hlamarisa hi xikongomelo xa vuciva, ku hundzula maribye a endla vuswa. Lowu a ku ri ndzingo lowukulu hikuva Yesu a a nga dyanga hi masiku ya 40, naswona a a “twa ndlala.” Sathana u yisile ndzingo lowu hi ndlela leyi a yi ta phasa Yesu leswaku a teka ndlela ya vutianakanyi, hikuva u sungule hi ku, “LOKO u ri n’wana wa Xikwembu, lerisa maribye lawa leswaku ma hundzuka vuswa.” Handle ko kanakana a a tshemba leswaku Yesu a a ta ku, ‘Kunene ndzi n’wana wa Xikwembu, naswona ku tikombisa leswaku ndzi yena ndzi ta hundzula maribye wolawo ya va vuswa.’ Yesu, ku ri na ku va a ringiwa kumbe ku phasiwa leswaku a endla hi vutianakanyi kumbe hi vuphukuphuku, u hlamurile: “Ku tsariwile va te: ‘Munhu a nga ka a nga hanyi hi vuswa ntsena, kambe ú ta hanya hi marito hinkwawo lama humaka enon’wini wa [Yehova].’” (Matewu 4:1-4) U honise ku kanakana loku simekiweke ka loko a ri n’wana wa Xikwembu, naswona u arile ku tirhisa matimba lawa Xikwembu xi n’wi nyikeke wona hi ndlela yo biha.
12. Xana Yesu u tlhele a kombisa ku yini leswaku a a nga ri na makwanga ya matimba ke?
12 Endzhaku, loko Yesu Kriste a phamele vavanuna va 5 000 handle ka vunyingi bya vavasati ni vana, Vayuda va lavile ku n’wi endla hosi. Loko a a amukele nyiko ya vona, swoleswo ingi ku vile ku tirhisa matimba lawa a a ri na wona yo kucetela vanhu hi masingita hi ndlela yo biha. A a swi tiva leswaku u fanele ku hlayisa vukala-tlhelo eka tipolitiki ta misava kutani a rindzela Yehova Xikwembu leswaku a n’wi nyika vuhosi. (Yohane 6:1-15) Kutani endzhaku, loko ntshungu wu tile ku n’wi tekeni ku n’wi yisa ekhotsweni, ingi a kombele mavandla ya 12 ya tintsumi kutani ti n’wi sirheleta leswaku a nga khomiwi. Hambi swi ri tano, swoleswo a ku ta va ku tirhisiwa ka matimba hi ndlela yo biha, hikuva a ku ri ku rhandza ka Tata wa yena leswaku a titsongahata.—Matewu 26:39, 53.
Van’wana Lava Nga Tirhisangiki Matimba Hi Ndlela Yo Biha
13, 14. (a) I xikombiso xihi lexinene lexi Gidiyoni a xi vekeke, ku komba leswaku a a nga ri na makwanga ya matimba? (b) Xana Sawulo u veke xikombiso lexinene loko a sungule ku va Hosi hi ndlela yihi?
13 Exikarhi ka vanhu lava nga hetisekangiki lava hluleke ndzingo wo tirhisa matimba hi ndlela yo biha, Muavanyisi Gidiyoni u fanele ku boxiwa. Endzhaku ka loko a ntshunxe Vaisrayele emavokweni ya Vamidiyani, vanhu a va lava ku n’wi endla hosi ya vona. Gidiyoni a ala, kutani a vula kahle a ku: “Loko nḍi ri mina nḍi nga ka nḍi nga mi fumi, na yena ṅwana wa mina a nga ka a nga mi fumi. Yehova, hi yena l’a nga ta mi fuma.” Ina, ku titsongahata loku a ku kombiseke eku sunguleni ka ntirho wakwe tanihi muavanyisi a ka ha ri kona. Kutani nhlamulo ya Gidiyoni yi kombe ndlela leyi Yehova Xikwembu hi yexe a titweke ha yona hi ta ku va Israyele a va ni hosi ya munhu. Hi nga xiya sweswo endleleni leyi Xikwembu xi endleke ha yona loko Israyele a lave hosi enkarhini wa muprofeta Samuel.—Vaavanyisi 8:23; 6:12-16; 1 Samuel 8:7.
14 Loko, hambi swi ri tano, hosi yi hlawuriwile, eku sunguleni Sawulo u veke xikombiso lexinene xa ku tikhoma eku tirhiseni ka matimba. Vavanuna van’wana lava nga vuriki nchumu va te: “Šana loyi a nga hi ponisa ku yini ke? Kutani v̌a ṅwi sanḍa, . . . kambe Saul a nga v̌ulanga ntšhumu ha ŝona.” Ingi a swi kotile ku kariha a tirhisa matimba yakwe ya vuhosi, kambe a nga swi endlanga. Hi laha ku fananaka, endzhaku ka loko Sawulo a hlurile Vaamoni, van’wana va vanhu va yena va ehlekete leswaku lowu a wu ri nkarhi lowunene wo rihisela eka lava sandzeke Sawulo. Kutani va ku eka yena: “I mani l’a nga ku: Šana Saul o ta hi fuma šana? Hi nyikeni v̌anhu lav̌a hi v̌a dlaya.” Hambi swi ri tano, a a nga ri na miehleketo yo tano nikantsongo. U hlamuserile: “Ku nga ka ku nga dlayiwi munhu siku leri, hikuv̌a namuntlha Yehova o tirile ku hlayiseka a Israeleni.” Hi nga swi vona leswaku Sawulo hakunene u sungule kahle swinene naswona hi ku titsongahata. (1 Samuel 9:21; 10:20-23, 27; 11:12, 13) Swi vavisa swonghasi leswi a sunguleke ku tirhisa matimba yakwe ya vuhosi hi ndlela yo biha kutani a hetelela hi ndlela yo biha!—1 Samuel 28:6; 31:3-6.
15, 16. (a) Muavanyisi Samuyele u swi kotile ku nyika vumbhoni byihi bya ku tirhisa ka yena ka matimba ya vuavanyisi? (b) I xikombiso xihi lexi fanaka na xona lexi Hosi Davhida a xi nyikeleke?
15 Samuyele, muprofeta loyi nakambe a avanyiseke Israyele, u veke xikombiso lexinene. Xikwembu xi n’wi tirhise hi matimba ku sukela evuhlangini byakwe. Samuyele u avanyise vanhu va yena hi ku lulama naswona u va ntshunxile. Xana u tshama a tirhisa xiyimo xakwe hi vutianakanyi? A swi tano! Eku vulavuleni kakwe ko lela u byele vanhu a ku: “Maŝiv̌o nḍi yingisile marito ya ṅwina e timhakeni hikwato leti mi nḍi byeleke tona, Nḍi vekile hosi e henhla ka ṅwina; . . . Hi mina loyi, Nḍi lanḍuleni e mahlweni ka Yehova, e mahlweni ka muhlawuriwa wa yena: Nḍi tekile homu ya mani šana? Nḍi tekile mbongolo ya mani šana? Nḍi dyelele mani? Nḍi šanisile mani? Nḍi khandlile mani šana? Nḍi amukerile tinyiko e mav̌okweni ya mani leŝaku nḍi pfala mahlo e henhla ka yena, Nḍi ta mi tlherisela ŝona?” Vanhu vakwe a va fanele ku pfumela leswaku ndlela ya Samuyele a yi pfumala xivati etimhakeni leti hinkwato. A nga ma tirhisanga hi ndlela leyo biha matimba yakwe ya ntirho wa vuavanyisi.—1 Samuel 12:1-5.
16 Naswona a hi fanelanga ku honisa xikombiso lexinene lexi Davhida a xi vekeke. U kumile Hosi Sawulo kambirhi naswona ingi a n’wi dlayile. Davhida ingi a te: ‘Sawulo u lava vutomi bya mina, kutani ku fa yena kumbe mina.’ Kumbexana hi vutianakanyi ingi a te: ‘Tanihi leswi Samuyele a ndzi hlawuleke ku va hosi ya Israyele, leyi hi yona ndlela leyi byi nga fikaka ha yona hi ku anghwetla. Ha yini byi nga fiki sweswi?’ E-e, Davhida u rindzile hi ku lehisa mbilu ku fikela loko ku va nkarhi wa Yehova wa ku n’wi nyika mfumo. (1 Samuel 24:1-22; 26:1-25) Hambi swi ri tano, swa vavisa ku vula leswaku, endzhaku ka ku va Davhida a ve hosi, hi makhamba mambirhi u tirhise matimba yakwe hi ndlela yo biha: hi ku dlaya Uriya ni le ku hlayeni ka vuthu ra Israyele.—2 Samuel 11:15; 24:2-4, 12-14.
17. Xana Pawulo u kombise ku yini leswaku a a nga ri na makwanga ni leswaku a nga tirhisanga matimba yakwe hi ndlela yo biha?
17 Exikarhi ka valandzeri va Yesu Kriste, muapostola Pawulo u veke xikombiso lexinene emhakeni leyi. Ingi a lave ku seketeriwa hi mabandlha lawa a a ya tirhela. Kambe, a nga tirhisanga nkarhi lowu. U byele vakulu va le Efesa: “A ndzi lavanga mali ya silivere kumbe nsuku, hambi yi ri nguvu, eka munhu ni un’we. Ma swi tiva na n’wina leswaku mavoko lawa ya mina ma tirhile ku kuma leswi mina ni lava a va ri na mina a hi nga ri na swona.” (Mintirho 20:33, 34) Loko a tsalela bandlha ra le Korinto, muapostola u vulavule hi ku tiyisa swinene emhakeni leyi. (1 Vakorinto 9:1-18) A a ri na matimba yo tshika ntirho wo tihanyisa, hikuva i mani la tirhaka tanihi socha a ri la tihanyisaka hi yexe? Xana Muxe a nga vulanga leswaku u nga sivi nomu wa homu loko yi hula? “Kambe,” Pawulo u hlamuserile, “Mina a ndzi tirhisanga ni yin’we ya timfanelo leti.” Hakelo ya yena yi ve yihi? “I ku vula Mahungu Lamanene eka vanhu, ndzi nga lavi hakelo; ku tshika hi ndzexe mfanelo ya mina yo hakeriwa entirhweni lowu wo twarisa Mahungu Lamanene.”
18. (a) Xana hi fanele ku titwa njhani hi ku tirhisa ka Yehova lokunene ka matimba? (b) Hikwalaho ka yini lava n’wi yingisaka emhakeni leyi va nga vuriwaka lava katekeke?
18 Kunene ku nga vuriwa leswaku, ‘Ku katekile hinkwavo lava nga tirhisiki matimba ya vona hi ndlela yo biha.’ Mawaku vito lerinene leri Yehova Xikwembu a nga na rona hi leswi a vekeke xikombiso xo tano lexinene, a endla leswaku matimba yakwe lamakulu minkarhi hinkwayo ma timuriwa hi timfanelo ta yena ni tin’wana ta vutlhari, ku lulama ni rirhandzu! Xisweswo, hi nga vula kun’we ni mupisalema Davhida hi ku: “Moya wanga, nkhensa Yehova! Na ŝona hikwaŝo leŝi nga ka mina a ŝi nkhensi vito ra ku kwetsima ka yena!” (Psalma 103:1) Hinkwavo lava landzeleke xikombiso xa Yehova eku tirhiseni lokunene ka matimba hakunene va katekile. Swikombiso leswi hi vulavuleke ha swona hi ku tirhisa Matsalwa swi tiyisa leswaku hambi leswi hi nga vanhu lava nga hetisekangiki, na hina, hi nga ma tirhisa kahle matimba lama hi nga na wona. Loko hi endla tano, a hi nge vi na ripfalo leri baseke ntsena kambe hi ta tlhela hi amukeriwa hi Xikwembu ni ku xiximiwa hi vanhu-kulorhi.
Wa Tsundzuka Xana?
◻ Hikwalaho ka yini ndzayo mayelana ni ku tirhisa loko biha ka matimba yi laveka?
◻ I swikombiso swihi leswi kombaka leswaku Yehova Xikwembu u tirhisa matimba yakwe hi ndlela leyinene?
◻ Hikwalaho ka yini ku nga vuriwaka leswaku Yesu a a ri na vukheta leswaku a nga tirhisi matimba hi ndlela yo biha?
◻ I vanhu va hi eMatsalweni ya Xiheveru va kombiseke leswaku a va tirhisanga matimba hi ndlela yo biha?
◻ Xana muapostola Pawulou tikombe a ri xikombiso eku tirhiseni ka matimba hi ndlela yihi?
[Xifaniso eka tluka 9]
Timfanelo letikulu ta Yehova ti ringanela hi ku hetiseka
Rirhandzu Matimba Vululami Vutlhari
[Xifaniso eka tluka 10]
Xikwembu xikombise matimba ya xona hi ku lulama:
hi Ndhambi
eSodoma na Gomora
eLwandie ro Tshwuka