Vutomi Ni Vutirheli Bya Yesu

A Hlawula Vaapostola Vakwe

INKARHI lowu nga vaka lembe ni hafu ku sukela loko Yohane Mukhuvuri a vule leswaku Yesu i Xinyimpfana xa Xikwembu kutani Yesu u sungule vutirheli byakwe bya le rivaleni. Hi nkarhi wolowo, Andriya, Simoni Petro, Yohane kumbexana na Yakobo (makwa Yohane), kun’we na Filipi na Nathaniyele (loyi nakambe a vuriwaka Bartolomi), va vile vadyondzisiwa vakwe vo sungula. Hi ku famba ka nkarhi, van’wana vo tala va va joyinile eku landzeleni ka Kriste.

Kutani Yesu u tiyimisele ku hlawula vaapostola va yena. Lava va ta va vanghana vakwe lavakulu lava nga ta nyikiwa vuleteri lebyi hlawulekeke. Kambe a nga si va hlawula, Yesu u ya entshaveni a ya heta vusiku hinkwabyo a ri karhi a khongela, a kombela vutlhari ni ku katekisiwa hi Xikwembu. Loko ri xa, u vitana vadyondzisiwa vakwe ivi eka vona a hlawula lava va 12. Hambi swi ri tano, leswi va yaka emahlweni va dyondzisiwa hi Yesu, va tama va vitaniwa vadyondzisiwa.

Lava tsevu lava Yesu a va hlawulaka, lava vuriweke laha henhla, hi lava va veke vadyondzisiwa vakwe vo sungula. Matewu, loyi Yesu a n’wi vitaneke a sukela hofisi yakwe ya ndzuvo, na yena u hlawuriwile. Van’wana va ntlhanu lava hlawuriweke i Yudasi (loyi nakambe a vitaniwaka Tadiya), Yudasi Iskariyota, Simoni wa Kanana, Tomasi na Yakobo n’wana Alfiya. Yakobo loyi nakambe u vuriwa Yakobo Lontsongo, kumbexana ku n’wi hambanisa na muapostola Yakobo lon’wana.

Hi nkarhi lowu lava va 12 a va ri na Yesu hi nkarhi wo leha, naswona u va tiva kahle. Entiyisweni, vo tala va vona i maxaka yakwe. Yakobo ni makwavo Yohane kahle-kahle i vamakwavo vo sungula va Yesu. Naswona swi le rivaleni leswaku Alfiya a a ri makwavo wa Yosefa, tata wa Yesu wa muundli. Kutani n’wana Alfiya wa mufana, muapostola Yakobo, na yena a a ta va makwavo wa Yesu.

Kavula, Yesu a nga na xiphiqo eku tsundzukeni ka mavito ya vaapostola va yena. Kambe wa va tsundzuka xana? Tsundzuka ntsena leswaku ku na vambirhi lava nga na vito ra Simoni, vambirhi lava nga ni vito ra Yakobo, vambirhi lava nga ni vito ra Yudasi, ni leswaku Simoni a a ri ni makwavo loyi va nge i Andriya, ni leswaku Yakobo u ni makwavo loyi va nge i Yohane. Xexo hi xona xilotlelo xo tsundzuka vaapostola va nhungu. Lavan’wana va mune va katsa muluvisi (Matewu), loyi endzhaku a rholeke (Tomasi), un’wana u vitaniwe ehansi ka murhi (Nathaniyele), ni nakulobye Filipi.

Khume n’we wa vaapostola va huma eGaleliya, etiko-xikaya ra ka va Yesu. Nathaniyele u huma eKana. Filipi, Petro na Andriya va huma eBetsayida. Hambi swi ri tano, Petro na Andriya endzhakunyana va rhurhele eKapernawume, laha Matewu a vonakaka a tshama kona. Yakobo na Yohane a va ri ebindzwini ro kukuta tinhlampfi naswona va vonaka va ri lava tshamaka eKapernawume kumbe ekusuhi na kona. Swi vonaka onge Yudasi Iskariyota, loyi endzhakunyana a xengeke Yesu, hi yena ntsena muapostola loyi a humaka eYudiya. Marka 3:13-19; Luka 6:12-16.

◆ I vaapostola vahi lava nga ha vaka va ri maxaka ya Yesu ke?

◆ I vamani vaapostola va Yesu, naswona u nga ma tsundzukisa ku yini mavito ya vona?

◆ Vaapostola va kona a va huma ematikweni wahi xana?

[Xifaniso eka tluka 9]

Loko a nga si hlawula vaapostola vakwe va 12, Yesu u hete vusiku hinkwabyo a ri karhi a khongela eka Yehova