Engetela Ku Rhula Ka Wena Hi Vutivi Lebyinene

“Ingi tintswalo ni ku rhula swi nga mi talela swi andza, eku tiveni ka Xikwembu ni ka Yesu Hosi ya hina.”—2 PETRO 1:2.

1, 2. (a) Hikokwalaho ka yini vuxaka byo rhula ni Xikwembu byi ringanisiwa ni vukati? (b) Xana hi nga tiyisa ku rhula ka hina ni Xikwembu hi ndlela yihi?

VUXAKA byo rhula lebyi simekiweke na Yehova Xikwembu eku khuvuriweni ka wena, hi tindlela tin’wana, byi fana ni vukati. Hambi leswi siku ra mucato ri tsakisaka, i masungulo ya vuxaka byo vangama ntsena. Hi matshalatshala, nkarhi ni ntokoto, vuxaka bya vukati byi ta kula ngopfu, byi va xisirhelelo eminkarhini ya nhlomulo. Kutani, hi ku chivirika na hi mpfuno wa Yehova, u nga engetela ku rhula ka wena na yena.

² Muapostola Petro u hlamusele ndlela leyi lava va “nyikiweke ku pfumela” va nga tiyisaka ku rhula ka vona ni Xikwembu ha yona. U tsarile a ku: “Ingi tintswalo ni ku rhula swi nga mi talela swi andza eku tiveni ka Xikwembu ni ka Yesu Hosi ya hina.”—2 Petro 1:1, 2.

‘Vutivi Lebyinene Bya Xikwembu’

3. Ku va ni vutivi lebyinene ha Yehova na Yesu swi vula yini?

³ Rito ra Xigriki ra ‘vutivi lebyinene’ (e·piʹgno·sis) leri tirhisiweke emhakeni leyi ri vula vutivi lebyi enteke, lebyikulu ngopfu. Xivumbeko xa riendli xi nga kombetela eka vutivi lebyi kumiweke hi ntokonto wa munhu hi xiyexe naswona ri hundzuluxeriwe va ku ‘ku tiva swinene’ eka Luka 1:4. Mudyondzi wa Mugriki Culverwel u hlamusela leswaku eka yena rito leri ri vula ku va la “tolovelaneke ngopfu ni nchumu lowu a ndzi wu tiva ni khale; langutelo leri kongomeke swinene ra nchumu lowu ndzi wu voneke khale wa ha ri emahlweni.” Ku kuma ‘vutivi lebyinene’ byo tano swi katsa ku tiva Yehova na Yesu swinene ngopfu tanihi vanhu, u tolovelana ku antswa ni timfanelo ta vona.

4. Xana hi nga engetela vutivi bya hina bya Xikwembu hi ndlela yihi, naswona ha yini leswi swi engetela ku rhula ka hina na xona?

⁴ Tindlela timbirhi to kuma vutivi lebyi i ku tirhisa mikhuva leyinene ya dyondzo ya munhu hi xiyexe ni ku va kona eminhlanganweni ya vanhu va Xikwembu nkarhi na nkarhi. Hi tindlela leti u ta yi dyondza khwatsi swinene ndlela leyi Xikwembu xi hanyaka ha yona ni leswi xi swi ehleketaka. U ta vumba xivumbeko lexi xiyekaka swinene xa mianakanyo ya vumunhu bya xona. Kambe ku tiva Xikwembu swinene swi vula ku tekelela ni ku kombisa xivumbeko lexi. Hi xikombiso, Yehova u hlamusele munhu loyi a kombiseke ku pfumala vutianakanyi loku fanaka ni ka Xikwembu, naswona endzhaku u te: “Šana ŝeŝo a hi ku nḍi tiv̌a šana?” (Yeremia 22:15, 16; Vaefesa 5:1) Ku tekelela Xikwembu swinene ngopfu swi engetela ku rhula ka wena na xona hikuva wa antswisa eku ambaleni ka munhu lontshwa, “loyi a pfuxetiwaka kambe na kambe, leswaku mi kota ku tiva swinene Loyi a n’wi tumbuluxeke hi xifaniso xa yena.” U va la tsakisaka ngopfu eka Xikwembu.—Vakolosa 3:10.

5. (a) Xana vutivi lebyinene byi pfune wansati un’wana wa Mukriste hi ndlela yihi? (b) I tindlela tihi leti hi nga tekelelaka Yehova swinene ngopfu ha tona?

⁵ Wansati un’wana wa Mukriste la vuriwaka Lynn u swi kume swi nonon’hwa ku va la rivalelaka hikwalaho ka ku nga twisisani ni Mukriste-kulobye. Kambe dyondzo ya Lynn ya vukheta ya munhu hi xiyexe yi n’wi vangele ku kambela langutelo ra yena. U pfumerile a ku: “Ndzi tsundzuke muxaka lowu Xikwembu Yehova a nga wona, ndlela leyi a nga veketeriki xikhunguvanyiso ha yona. Ndzi ehlekete hi swilo hinkwaswo leswintsongo leswi hi swi endlaka eka Yehova masiku hinkwawo, kambe a nga swi endli mhaka leyikulu. Mhaka leyi ni makwerhu wa xisati wa Mukriste a yi ri yintsongo ngopfu loko yi ringanisiwa. Kutani loko ndzi n’wi vona ndzi tibyerile, ‘Yehova wa n’wi rhandza ku fana ni leswi a ndzi rhandzaka.’ Leswi swi ndzi pfune ku huma eka xiphiqo lexi.” Xana u vona swivandla leswi na wena u faneleke ku tekelela Yehova swinene ngopfu eka swona?—Psalma 18:35; 103:8, 9; Luka 6:36; Mintirho 10:34, 35; 1 Petro 1:15, 16.

Vutivi Lebyinene Bya Kriste

6. Xana Yesu Kriste u swi kombisise ku yini leswaku ntirho wo chumayela a wu ri wa nkoka ngopfu eka yena?

⁶ Ku va ni vutivi lebyinene bya Kriste swi lava ku va ni “mianakanyo ya Kriste” ni ku n’wi tekelela. (1 Vakorinto 2:16) Yesu a a ri muhuweleri la hisekaka wa ntiyiso. (Yohane 18:37) Moya wa yena lowukulu wa ku vula rito a wu nga yimisiwi hi rivengo ra vaaka-tiko. Hambi leswi Vayuda van’wana a va venga Vasamariya, u veke vumbhoni eka wansati wa Musamariya exihlobyeni. Ina, hambi ku ri ku vulavula nkarhi wo leha erivaleni ni wansati un’wana ni unw’ana swi nga ha va swi soriwile!a Kambe Yesu a nga yi pfumelelanga mintlhaveko ya vanhu leswaku yi n’wi sivela ku nyikela vumbhoni. Ntirho wa Xikwembu a wu phyuphyisa. U te: “Swakudya swa mina, i ku endla ku rhandza ka Loyi a ndzi rhumeke, ni ku heta ntirho wa yena swinene.” Ntsako wa ku vona ku amukela ka vanhu, ku fana ni wansati wa Musamariya ni vanhu vo tala va le dorobeni, ku tiyise Yesu ku fana ni swakudya.—Yohane 4:4-42; 8:48.

7. (a) Vutivi bya Yesu byi fanele ku hi susumetela leswaku hi endla yini? (b) Xana Xikwembu xi rindzela malandza ya xona hinkwawo leswaku ya endla ntsengo lowu fanaka wa ku chumayela? Hlamusela.

⁷ Xana u titwa hi laha Yesu a titweke ha kona? Entiyisweni, ku sungula bulo hi Bibele ni munhu la nga tivekiki swa nonon’hwa eka vo tala naswona hakanyingi a swi endliwi hi van’wana eka vaaka-tiko. Kambe, leswaku hi va ni langutelo leri fanaka ni leri Yesu a a ri na rona, hi nge wu balekeli ntiyiso lowu: Hi fanele ku veka vumbhoni. Kavula, a hi hinkwavo va nga endlaka ntsengo lowu fanaka wa ku chumayela. Leswi swi hambana hi ku ya hi vuswikoti ni swiyimo swa hina. Kutani u nga ehleketi leswaku Xikwembu a xi aneriseki hi ntirho wa wena lowo hlawuleka. Hambi swi ri tano, vutivi bya hina bya Yesu, byi fanele ku hi susumetela ku endla hi matimba ya hina. Yesu u bumabumele ntirho wa moya hinkwawo.—Matewu 13:18-23; 22:37.

Xilaveko Xo Venga Vubihi

8, 9. I swilo swihi swin’wana leswi Xikwembu xi swi vengaka, naswona xana hi nga kombisa rivengo leri fanaka hi ndlela yihi?

⁸ Vutivi lebyinene byi tlhela byi hi pfuna ku twisisa leswaku i swilo swihi leswi vengiwaka hi Yesu na Yehova. (Vaheveru 1:9; Esaya 61:8) “Ku ni ŝilo ŝa ntlhanu na šiṅwe le’ŝi v̌engiwaka i Yehova, Nḍi ri ntlhanu na ŝimbiri la’ma nga manyala e ka yena: I mahlo yo tikukumuša, ni ririmi ra v̌unwa, ni mav̌oko lama halataka ngati le’yi nga riki na nanḍu; i mbilu le’yi kanelaka ŝo biha, ni milenge ya maṭambu leyi ṭuṭumelaka ku biheni. I mboni ya v̌unwa leyi v̌ulaka mav̌unwa, ni l’a pfušaka timholov̌o e šikari ka v̌amakwav̌o.” (Swivuriso 6:16-19) Malangutelo ni swivumbeko leswi swa mahanyelo i “manyala e ka yena.” Rito ra Xiheveru leri hundzuluxeriweke laha va ku “manyala” ri huma eka rito leri vulaka “ku nyenyetsa, ku hlambisa timbilu,” “ku xi venga, tanihi lexi xi onhaka eka timhaka hinkwato; ku nyenya, ku venga hi rivengo lerikulu.” Kutani leswaku hi va na ku rhula ni Xikwembu hi fanele ku kurisa rivengo leri fanaka.

⁹ Hi xikombiso, papalata “mahlo yo tikukumuša” ni xikombiso xin’wana ni xin’wana xo tikurisa. Endzhaku ka nkhuvulo van’wana va vone onge a va nga ha lavi mpfuno wa nkarhi na nkarhi wa lava va va dyondziseke. Kambe Vakriste lavantshwa va fanele ku amukela mpfuno hi ku titsongahata loko va ri karhi va dzima timitsu khwatsi entiyisweni. (Vagalatiya 6:6) Nakambe, papalata ku hleva, loku nga vangaka “timholov̌o e šikari ka v̌amakwav̌o.” Hi ku hangalasa mahungu-ndlela lama nga riki na musa, ku xopaxopa swihoxo loku nga lulamisekiki, kumbe vunwa, hi nga ha va hi nga ‘halati ngati ya xiviri,’ kambe entiyisweni hi nga onha vito lerinene ra munhu un’wana. Hi nga ka hi nga vi eku rhuleni ni Xikwembu loko hi nga ri na ku rhula ni vamakwerhu. (Swivuriso 17:9; Matewu 5:23, 24) Nakambe eritweni ra xona Xikwembu xi vula leswaku ‘xi vengile ku dlaya vukati.’ (Malakia 2:14, 16) Hikwalaho ke, loko u tekile, xana u tirhela ku hlayisa vukati bya wena byi tiyile? Xana rigangugangu ni ku tirhisa mintshunxeko leyi nga fanelangiki ni munghana wa un’wana swa nyenyetsa eka wena? Xana wena, ku fana na Yehova, u venga vunghwavava? (Deuteronoma 23:17, 18) Ku venga swiendlo swo tano a swi olovi, tanihi leswi leswi swi nga tsakisaka eka nyama ya hina leyi dyoheke, naswona swi tsakeriwa hi misava.

10. Xana hi nga ri hlakulela njhani rivengo ra leswo biha?

¹⁰ Tanihi mpfuno wo hlakulela rivengo ra vubihi, papalata ku tsakisiwa hi tibayisikopo, minongonoko ya TV, kumbe tibuku leti kombisaka vungoma, vunghwavava, kumbe vukari. (Deuteronoma 18:10-12; Psalma 11:5) Hi ku endla xihoxo xi vonaka xi nga ‘bihanga ngopfu’ kumbe hambi ku ri ku xi tsongahata, ku titsakisa ko tano ku tsongahata matshalatshala yo kurisa rivengo ra Xikwembu ha swona. Hi tlhelo rin’wana, xikhongelo xa xiviri xi ta pfuna, hikuva Yesu u te: “Mi khongela, leswaku mi nga ngheni emiringweni, hikuva moya wa swi lava, kambe nyama yi tsanile.” (Matewu 26:41) Mayelana ni ku va la langutaneke ni ku navela lokukulu ka nyama, Mukriste un’wana u te: “Ndzi tiendla leswaku ndzi khongela. Minkarhi yin’wana ndzi titwa ndzi nga faneleki ku tshinelela Yehova, kambe hi ku tisusumetela ku swi endla, hi ku rila eka yena, ndzi kuma matimba lama ndzi ma lavaka.” U ta twisisa ku antswa leswaku ha yini Yehova a nyenya vubihi loko u pfuxeta mimbuyelo ya kona leyi vavisaka emiehleketweni ya wena.—2 Petro 2:12, 13.

11. I swilo swihi leswi nga ha hi karhataka minkarhi yin’wana?

¹¹ Hambi loko u ri ni ku rhula ni Xikwembu, minkarhi yin’wana u ta karhatiwa hi mintshikilelo ni miringo ya siku rin’wana ni rin’wana naswona hambi ku ri hi ku tsana ka wena n’wini. Tsundzuka, u tiendle muhlaseriwa la hlawulekeke wa Sathana. U lwa ni lava va hlayisaka milawu ya Xikwembu naswona va ri Timbhoni ta Yehova! (Nhlavutelo 12:17) Kutani, xana ku rhula ka wena ka le ndzeni ku nga hlayisiwa hi ndlela yihi?

Ku Hlangavetana Ni Makhombo Lama Kavanyetaka Ku Rhula

12. (a) Xana xisekelo xa Psalma 34 hi xihi ke? (b) Xana Matsalwa ya hlamusela mintlhaveko ya Davhida enkarhini wa ntokoto lowu hi ndlela yihi?

¹² “Makhombo ya la lulameke ma tele ngopfu,” ku tsale Davhida eka Psalma 34:19. Hi ku ya hi marito lama tsariweke ehenhla eka psalma leyi, Davhida u ma tsale endzhaku ka loko a pone ri ahlamile. Loko a balekela Hosi Sawulo, Davhida u lave xichavelo eka Akiš, hosi ya Mufilista ya Gat. Malandza ya hosi yoleyo ma xiye Davhida naswona, hi ku tsundzuka swiendlo swa yena swa nyimpi swa nkarhi lowu hundzeke eka Israyele, ya vilerile eka Akiš. Loko Davhida a twa bulo leri, a “nghenisa marito lawa e mbilwini ya yena kutani a tšhav̌a ngopfu Akiš, hosi ya Gat.” (1 Samuel 21:10-12) Kahle-kahle, leri a ku ri tiko-xikaya ra Goliyati, naswona Davhida a a dlele nhenha ya vona—naswona a a rhwale hambi ri ri banga ra xihontlovila lexi! Manuku xana a va ta tirhisa banga leri lerikulu leswaku va tsema nhloko ya yena? Xana Davhida u endle yini?—1 Samuel 17:4; 21:9.

13. Davhida u endle yini hi nkarhi wa khombo leri, naswona hi nga landzela xikombiso xa yena hi ndlela yihi?

¹³ Davhida u khongelele mpfuno wa Xikwembu hi swirilo leswikulu ngopfu. Davhida u te: “Munhu loyi wa nhlomulo u khongerile, kutani Yehova u ṅwi yingisile, a v̌a a ṅwi ponisa e nhlomulweni wa yena hikwawo.” U tlhele a ku: “U nḍi kuṭula e ku tšhav̌eni hikwako ka mina.” (Psalma 34:4, 6, 15, 17) Xana na wena u dyondzile ku khongela Yehova, u pfula mbilu ya wena hi minkarhi ya ku vilela? (Vaefesa 6:18; Psalma 62:8) Hambi leswi nhlomulo wa wena lowu hambaneke wu nga ha vaka wu nga ri wukulu ku fana ni wa Davhida, nakambe u ta kuma leswaku Xikwembu xi ta ku nyika mpfuno hi nkarhi lowu faneleke. (Vaheveru 4:16) Kambe Davhida u endle swo tala ku tlula ku khongela.

14. Davhida u tirhise “ku anakanya” hi ndlela yihi, naswona xana Xikwembu xi lunghiselele yini leswaku xi hi pfuna ku endla leswi fanaka?

¹⁴ “[Davhida] a endla ŝa ngi a hlanya e mahlweni ka v̌ona, a ṭala marimba ya tinyangwa . . . Akiš a ku ka malanḍa ya yena: ‘Ma v̌ona kunene leŝaku munhu loyi u ni rihuhe; mi ṅwi tisele yini ka mina?’” (1 Samuel 21:13-15) Davhida u lunghiselele rhengu leri a poneke ha rona. Yehova u katekise matshalatshala ya yena. Hi ku fanana, loko hi hlangavetana ni swiphiqo swo nonon’hwa, Yehova u langutela leswaku hi tirhisa mianakanyo ya hina naswona hayi ku rindzela leswaku yena a hi susela swona. U hi nyike Rito rakwe leri huhuteriweke, leri nga ta ‘tlharihisa varivali, . . . ri nyika eku tiva ni ku anakanya.’ (Swivuriso 1:4; 2 Timotiya 3:16, 17) Xikwembu xi tlhele xi lunghiselela vakulu va mabandlha, lava va nga hi pfunaka leswaku hi tiva ndlela leyi hi nga hlayisaka mimpimanyeto ya Xikwembu ha yona. (1 Vatesalonika 4:1, 2) Nkarhi na nkarhi, vavanuna lava va nga ku pfuna ku kambisisa tibuku ta Sosayiti ya Watch Tower leswaku u kuma mpfuno wa ku endla makumu lamanene kumbe ku langutana ni xiphiqo.

15. Ha yini Psalma 34:18 yi chavelela?

¹⁵ Hambi loko mbilu ya hina yi vava hikwalaho ka ku tsana kumbe ku tsandzeka ka hina vini, loko hi ri na langutelo lerinene, hi nga hlayisa ku rhula ka hina ni Xikwembu. Davhida u tsarile eka Psalma 34:18 a ku: “Yehova o kusuhi ni la’v̌a nga ni timbilu le’ti ṭhov̌ekeke, wa ponisa v̌a mimoya le’yi khinyekeke.” Loko hi kombela ku rivaleriwa naswona hi teka magoza wahi ni wahi lama lavekaka leswaku hi lunghisa timhaka (ngopfu-ngopfu emhakeni ya xidyoho lexikulu), Yehova u ta tshama ekusuhi na hina, a hi seketela emintlhavekweni.—Swivuriso 28:13; Esaya 55:7; 2 Vakorinto 7:9-11.

Vutivi Bya Munhu Hi Xiyexe Byi Nyika Ku Rhula

16. (a) I ndlela yihi yin’wana leyi hi kumaka vutivi lebyinene bya Xikwembu ha yona? (b) Hlamusela xivulwa xa Davhida lexi nge: “Nantŝani, mi v̌a mi v̌ona leŝaku Yehova i lo’nene ŝonghasi!”

¹⁶ Ndlela yin’wana leyi hi kumaka vutivi lebyinene bya Xikwembu ha yona, handle ko amukela rungula ra moya, i ku tokota ka hina ka munhu hi xiyexe mpfuno wa xona wa rirhandzu. (Psalma 41:10, 11) Ku va la ntshunxiweke enhlomulweni a swi vuli ku hela ka xihatla kumbe loku heleleke ka xiphiqo minkarhi hinkwayo; u nga ha fanela ku hambeta u xi tiyisela. (1 Vakorinto 10:13) Hambi leswi vutomi bya Davhida byi tsetseleriweke eGat, u tshame a ri mubaleki hi maleme yo tala, a langutana ni khombo rin’wana endzhaku ka rin’wana. Eka hinkwaswo Davhida u tokote vuhlayisi ni vuseketeri bya Yehova. U lavile kutani a kuma ku rhula ni Xikwembu, naswona u dyondze leswaku lava va endlaka tano “a v̌a pfumari ntšhumu.” Hi ku xiya hi ntokoto wa munhu hi xiyexe ndlela leyi Yehova a n’wi seketeleke ha yona enkarhini wa nhlomulo Davhida u swi kotile ku vula a ku: “Nantŝani mi v̌a mi v̌ona leŝaku Yehova i lo’nene ŝonghasi! Ku katekile munhu l’a tšhav̌elaka ka yena.”—Psalma 34:8-10, 14, 15.

17. Enkarhini wa khombo i vuyelo byihi lebyi ku tshembela eka Yehova swi veke na byona eka ndyangu wun’wana?

¹⁷ Ku tshembela eka Yehova enkarhini wa swihinga nakambe swi ta ku pfuna leswaku ‘u nantswa ni ku vona leswaku Yehova hi lonene swonghasi.’ Hikwalaho ka mhangu, Mukriste evupela-dyambu-xikarhi bya United States u lahlekeriwe hi ntirho wa yena lowu holelaka swinene lowu a a ri na wona hi malembe ya 14. Tanihi leswi a va ri hava mali, yena ni ndyangu wakwe va kombele Xikwembu. Hambi swi ri tano, hi nkarhi lowu fanaka, va hungute leswi va swi xavaka, va khwaja emasin’wini ya le kusuhi, ni ku phasa tinhlampfi leswaku va kuma swakudya. Hi mpfuno lowu humaka eka van’wana ebandlheni ni ku teka ntirho wa nkarhinyana loko wu kumeka, ndyangu lowu wa mune wu humelerile. Lembe rin’we endzhaku ka khombo, manana wa kona u tsundzukile: “Hi nga tiendla swihunguki hi ku ehleketa leswaku hi tshembela eka Yehova, kasi loko kahle-kahle hi tshembela eka vuswikoti bya hina vini, munghana wa hina, kumbe ntirho wa hina. Hambi swi ri tano, hi dyondze ku tshembela eka Yena hi xiviri. Swilo leswi swin’wana swi nga tekiwa, kambe Yehova a nga hi tshikanga—hambi wu ri nkarhinyana. Hambi leswi hi nga ni swilaveko leswi nga nyawuriki, vuxaka bya hina na Yehova tanihi ndyangu i byikulu swinene.”

18. I yini leswi nga ta ku pfuna ku tiyisela hambi swi ri swiphiqo leswi hambetaka?

¹⁸ Ina, ku nonon’hwa ka swa timali ku nga ha hambeta. Kumbe munhu a nga ha xaniseka hi vuvabyi bya miri lebyi nga horiki; dzolonga ra ku hambana ka vumunhu; mpfilumpfilu wa mintlhaveko, tanihi gome kumbe xin’wana xa vunyingi bya swiphiqo swin’wana. Kambe, hi ku tiva Xikwembu hi xiviri, u ta va ni ripfumelo eka vuseketeri bya xona. (Esaya 43:10) Ku tshemba loku ku nga tsemekiki ku ta ku pfuna leswaku u tiyisela ni ku va ni ku “rhula ka Xikwembu loku tlulaka ku twisisa hinkwako.”—Vafilipiya 4:7.

19. Hi swi tivisa ku yini leswaku Yehova a nga ku languteli ehansi ku xaniseka ka hina?

¹⁹ Loko u ri karhi u hundza hi le ka ntokoto lowu karhataka, u nga rivali leswaku Yehova wa swi tiva leswi u xanisekaka ha swona. Eka psalma leyi yi tlheleke yi tsariweke loko a tsundzuke ntokoto wa yena eGat, Davhida u kombele Yehova hi matimba a ku: “Hlengeleta mihloti ya mina e khuwaneni ra wena; a yi ṭariwanga e bukwini ya wena šana?” (Psalma 56:8) Entiyisweni, Xikwembu xi yingise xikombelo xa Davhida. Kavula, swi chavelela swonghasi ku tiva leswaku Xikwembu a xi ta hlengeleta mihloti yo tano leyi vangiwaka hi ku xaniseka ni ku vilela kutani xi yi veka ekhuwaneneni ra xona, tanihi laha munhu a nga chelaka vinyo kumbe mati yo nwa lama vangamaka eka xibye xo tano! Mihloti yo tano yi ta tsundzukiwa nkarhi na nkarhi, ina, yi tsariwa ebukwini ya Xikwembu. Ku khathalela ka Yehova ku ni musa swonghasi!

20. Xana hi nga engetela ku rhula ka hina ni Xikwembu hi ndlela yihi?

²⁰ Kutani nkhuvulo wa wena i masungulo ntsena ya vuxaka bya ku rhula ni Xikwembu. Hi ku va la tolovelaneke swinene ni timfanelo ta munhu hi xiyexe ta Xikwembu na Yesu, ni ku tokota vuseketeri bya Yehova hi nkarhi wa miringo hi wexe, u ta engetela ku rhula ka wena ni Xikwembu. U nge vi na vuxaka lebyi vaka xisirhelelo xa vuhlayiseki na Yehova ntsena kambe u ta tlhela u va ni ntshembo lowu vangamaka wa ku hanya hi laha ku nga heriki eParadeyisini, laha u nga ta kuma “ku tiṭakela e ku ruleni lo’kukulu.”—Psalma 37:11, 29.

[Nhlamuselo ya le hansi]

Wa Tsundzuka Xana?

◻ Hi nga kuma vutivi lebyinene bya Xikwembu na Yesu hi tindlela tihi?

◻ Ku tekelela Xikwembu na Yesu ku ta hi vangela leswaku hi endla yini?

◻ Xana hi tekelela ku venga ka Xikwembu ka leswo biha hi ndlela yihi?

◻ Xana hi nga hlayisa ku rhula ku nga khathariseki swihinga hi ndlela yihi?

[Xifaniso lexi nga eka tluka 17]

Yesu u ale ku pfumelela rivengo ra vaaka-tiko leswaku ri sivela ku nyikela ka yena vumbhoni. Xana u tekelela ku chivirika ka yena ko chumayela?

[Swifaniso leswi nga eka tluka 18]

Loko a langutane ni xiphiqo lexikulu, Davhida u khongele Yehova . . . . . . ivi a hundzula mianakanyo ya yena leswaku a kunguhatela ku pona. Yehova u yingise xikhongelo xa Davhida