Swivutiso Swa Vahlayi
◼ A ku ri xihi xihoxo xa Muxe lexi koxeke lunghelo rakwe ro nghena eTikweni leri Tshembisiweke? Xana a ku ri hi leswi a beke ribye ematshan’wini yo vulavula na rona ntsena kumbe hi leswi a hlulekeke ku dzunisa Yehova Xikwembu?
Swi vonaka onge xihoxo xa Muxe a xi ri xikulu ku tlula leswi a beke ribye ematshan’wini yo vulavula na rona ntsena, hi laha Xikwembu xi leriseke ha kona.
Ekusuhi ni ku hela ka malembe ya 40 ya ku tsendzeleka, Vaisrayele va endle mixaxa eKadeš-Barnea emananga ya Tsin (kumbe, Paran). A va endle mixaxa kona makume-kume ya malembe eku sunguleni, kumbexana hi mhaka ya leswi swihlovo swinharhu endhawini yoleyo a swi humesa xivandla lexinene xa rihlaza, xo tanihi lexi voniwaka eka xifaniso lexi nga laha. Hambi swi ri tano, eka xiendlakalo lexi, mati a ma kala, leswi swi nga ha vaka swi vule leswaku vanhu a va nga ta kuma swakudya swo tala. Kutani va dzumadzumela Muxe, muyimeri wa Yehova, va ku: “Mi hi humesele yini Egipta ku hi fikisa tikweni le’ro biha, laha ku nga byalekiki, ni laha ku nga riki na nkuwa ni vinya ni grenada ni mati ya ku nwa?”—Tinhlayo 20:5.
Kutani Xikwembu xi byele Muxe na Aroni xi ku: “Teka nhonga, u v̌itana nhlengelatano, . . . mi ta v̌ulav̌ula ni ribye e mahlweni ka v̌ona, kutani ri ta humesa mati ya rona; u ta v̌a humesela mati e ribyeni, u v̌a u nwisa nhlengeletano ni ŝifuwo ŝa v̌ona.” (Tinhlayo 20:8) Ku endleke yini endzhaku?
“Kutani Moše na Arone v̌a v̌itana nhlengeletano e mahlweni ka ribye, kutani Moše a ku ka v̌ona: Yingisani, v̌akaneti? Šana hi ta mi humesela mati e ribyeni leri šana? Moše a tlakusa v̌oko, a ba ribye kambiri hi nhonga ya yena. Kutani ku huma mati ya ku tala.”—Tinhlayo 20:10, 11.
Van’wana a va xiyile leswaku Xikwembu xi lerise Muxe na Aroni ku “v̌ulav̌ula ni ribye,” kambe va ‘bile ribye.’ Xana ku hambana loku ku hlundzurile Yehova swinene laha a byeleke Muxe na Aroni leswaku A nga ka a nga va pfumeleli ku nghenisa Israyele eTikweni leri Tshembisiweke?
A swi vonaki swi ri tano. Mhaka hi leswaku tin’hwetinyana endzhaku ka ku Rhurha, vanhu va sungule ku vilela hi ku pfumala mati. Leswi a swi ri kusuhi ni Ntshava ya Sinayi (Horeb), exivandleni lexi vuriweke Meriba (exivandleni lexi vonakaka la hansi). Xiya leswi Xikwembu xi byeleke Muxe eka xiendlakalo xolexo: “Nḍi ta yima e mahlweni ka wena lahaya e ribyeni ra Horeb; u ta ba e ribye, kutani ri ta humesa mati.” (Eksoda 17:2-7; 33:6) Kutani, eKadeš, Muxe u byeriwe ku vulavula ni ribye, u fanele a endle leswi a swi endleke eku sunguleni hi ku lerisa ka Xikwembu, hambi loko Xikwembu xi vule leswaku ku vulavula ni ribye a swi ta va swinene.
Swi vonaka onge swin’wana leswi engetelekeke swi yise eku avanyisiweni ka Muxe na Aroni hi Xikwembu. Sweswo swi ta va ku ve yini? Muxe u te eka vanhu lava n’unun’utaka: “Šana hi ta mi humesela mati e ribyeni leri šana?” Psalma 106:33 ya hi pfuna eka leswi, hikuva yi komba leswaku Muxe u endle hi moya wo kariha kutani a ‘vulavula hi nomu wa yena hi ku khahla.’ Hi marito yo hlundzuka, u kokele nyingiso eka yena na Aroni ematshan’wini yo wu yisa eka Loyi hakunene hi singita a a ta humesa mati. Xisweswo, Muxe a nga si fa endzilakaneni wa Tiko leri Tshembisiweke, Xikwembu xi kombetele eka xiendlakalo xa le Kadeš-Barnea ivi xi komba leswaku xihoxo xa Muxe a ku ri leswaku u hluleke ku ‘dzunisa Xikwembu emahlweni ka vanhu.’—Tinhlayo 27:12-14.
Hi nga kuma dyondzo eka leswi. Hambi leswi hakunene swi nga swa nkoka ku tikhoma eka swiendlo swa ku hlundzuka, i swa nkoka lowu ringanaka ku lawula moya wa hina, ngopfu-ngopfu loko van’wana va endla swihoxo. Loko hi titshika hi kavanyetiwa swinene, hi nga ha sungula ku languta malandza ya Xikwembu hi xisekelo xa vanhu, ematshan’wini yo xiya leswaku va ha ri “tinyimpfu” ta Xikwembu. I ntiyiso, a va hetisekanga naswona va nga ha endla swilo leswi vavisaka, kambe “i tiko ra yena, ni ntlhambi lowu a wu risaka.” (Psalma 100:3) Xikwembu xi pfumelele N’wana wa xona ku fela vanhu vo tano, kutani xana a hi fanelanga ku lwela ku va ni musa eka vona, hi nga ri na mhaka ngopfu na hi laha hi titwaka ha kona kumbe leswi hi khumbekisaka swona naswona ngopfu-ngopfu hi xiyimo xa vona ni Xikwembu?
[Swifaniso leswi nga eka tluka 31]
Hi nkarhi wa ximun’wana exivandleni lexi noneke eka xin’wana xa swihlovo endhawini ya Kadeš-Barnea
[Xihlovo Xa Kona]
Swifaniso, matluka 10, 31: Pictorial Archive (Near Eastern History) Est.