Tshembani Yehova, Yehova!
“N’wina vanhu, tshembani Yehova hi minkarhi ni minkarhi, hikuva Yehova, Yehova i ribye ra minkarhi leyi nga riki na ku hela.”—ESAYA 26:4, NW.
1, 2. Hi rihi risimu ra ntsako ra ku dzunisa leri hlamuseriweke eka Esaya 26:1-6, naswona ha yini?
KU TSONGAHATIWA ka ‘muti wa matiko ya matimba’ ku lava risimu ra ku hlula! (Esaya 25:3) Kutani ke, hi mfanelo vuprofeta eka Esaya ndzima 26, tindzimana 1 ku ya eka 6, byi hlamusela risimu ra ntsako ra ku dzunisa Hosi Yehova. Hambi ku ri sweswi ra karhi ra yimbeleriwa “etikweni ra Yuda,” Yuda swi vulaka ku “Twakala.” La nakambe, King James Version yi ri “HOSI YEHOVA” laha vito ra Xikwembu ri tlhandlakanisiweke. Kambe ya nyanyula swonghasi marito ya risimu rero tanihi leswi ma humelerisaka swona eka New World Translation, laha loku ni ku humelela hinkwako ka vito ra Xikwembu ku hundzuluxeriweke kahle swinene!
2 Sweswi, yingisela risimu rero ra miloti: “Hi na muti wo tiya. U [Yehova] yimisa ku hlayiseka ri va rirhangu ra le mahlweni ni ra le ndzhaku. Pfulani tinyangwa, n’wina vanhu, leswaku tiko lero lulama leri hlayisaka vutshembeki ri ta nghena. Mukhuva lowu seketeriwaka u ta wu hlayisa eku rhuleni loku yaka emahlweni, hikuva hi wena loyi munhu wo tano a n’wi tshembaka. N’wina vanhu, tshembani Yehova hi minkarhi ni minkarhi, hikuva Yehova, Yehova i Ribye ra minkarhi leyi nga riki na ku hela. Hikuva u tsongahate lava akeke etindhawini leti tlakukeke, muti lowu tlakukeke. A wu tsongahata, a wu tsongahata ku fika ehansi; a wu khumbisa ntshuri. Nenge wu ta wu kandziyela, milenge ya xisiwana, minkondzo ya lava tsongahatiweke.” I ntsako muni wonghasi ku va exikarhi ka lava tshembaka lava sweswi va hlanganyelaka eku yimbeleleni ka risimu leri—Timbhoni ta Yehova!
3. (a) “Tiko lero lulama” i yini, naswona i vamani lava ngheneke hi “tinyangwa” ta rona leti pfulekeke? (b) Xana nhlengeletano ya Yehova yi yisa ku yini emahlweni hi vun’we hambi ku ri na matshalatshala ya nala yo yi tshova?
3 Hosi Yehova—Yehova, Yehova—hakunene u ta tsongahata vatikukumuxi ivi a kutsula lava n’wi tshembaka minkarhi hinkwayo. Hambi leswi va tshameke va va “lontsongo,” Israyele wa moya u vile “tiko lera matimba,” “tiko lero lulama.” Hi ‘tinyangwa’ leti pfulekeke ta nhlengeletano ya Yehova yo fana ni muti, nakambe ku nghene ntlawa wa matimba wa vanghana lavanene lava endlaka nhlayo leyi tlulaka timiliyoni tinharhu. Va ri hinkwavo, va endla vamakwavo va misava hinkwayo, lava nhlayo ya vona yi tlulaka liya ya matiko ya 57 lama vumbaka Nhlangano wa Matiko. Kambe “tiko” ra Xikwembu ni lava tihlanganisaka na rona, va ni vun’we hi ntiyiso. Emisaveni hinkwayo, mboyamelo wa vona wu le ku yingiseni ka milawu ya xona yo lulama. ‘Makhumbi’ ya Nhlengeletano ya “tiko” ra Xikwembu ma endla xisirhelelo eka matshalatshala ya Sathana yo herisa vutshembeki bya rona eku seketeleni ka ntiyiso. Nala a nga ka a nga swi koti ku tshova ku macha ka vutshembeki ka vanhu va Xikwembu! Ntshembo wa hina, minkarhi hinkwayo, wu le ka ‘Yehova, Yehova Ribye ra minkarhi leyi nga riki na ku hela.’—Esaya 54:17; 60:22.
4, 5. (a) “Muti lowu tlakukeke” i yini, naswona vanhu va Yehova va wu kandziyela njhani hi ndlela yo fanekisela? (b) Hi rini laha vuprofeta bya Esaya 26:10 byi vaka na ku hetiseka lokukulu, naswona njhani? (c) I ku tirhisiwa kwihi kun’wana loku vuprofeta lebyi byi nga na kona?
4 Loko hi ri karhi hi twarisa xitsundzuxo xa leswaku Yehova u kusuhi no tsongahata “muti lowu tlakukeke,” “Babilona Lonkulu,” swa tsakisa ku vona swisiwana ni vapfumari va misava va amukela mahungu lamanene ya Mfumo. (Nhlavutelo 18:2, 4, 5) Hi ndlela yo fanekisela na vona, va kandziyela “muti lowu tlakukeke,” hayi leswaku va hlanganyela entirhweni lowu lovisaka, kambe hi leswi va hlanganyelaka eku twariseni ka siku ra ku tirihisela ka Yehova eka mafambiselo lawa ma thyakeke. (Esaya 61:1, 2) Hi makume-kume ya malembe sweswi, Timbhoni ta Yehova ti kombise tintswalo hambi ku ri eka lavo homboloka hi ku ya emakaya ya vona ni mahungu ya Mfumo lama hlayisaka vutomi. Kambe vuyelo byi ve hi laha ku vuriweke ha kona eka Esaya 26:10: “Loko mudyohi o riv̌aleriwa, a nga dyonḍi ŝo lulama, e tikweni le’ro lulama o ta endla ŝo biha, a nga ka a nga hlayi v̌ukulukumba bya Yehova.”
5 Vuprofeta lebyi byo kondletela byi na ku hetiseka lokukulu namuntlha. Hambi leswi va pfumeleriwaka hi nkarhi, i vanhu va nga ri vangani lava lavaka ku cinca vutomi bya vona leswaku va ta amukela tintswalo ta Yehova “etikweni lero lulama.” Lava solaka Yehova ni timbhoni ta yena leti tshembekaka “v̌a nga ka va nga hlayi v̌ukulukumba bya Yehova,” hikuva va nga ka va nga poni leswaku va tiphina hi mikateko leyi hlamarisaka leyi nga ta khulukela eka vanhu endzhaku ka ku kwetsimisiwa ka vito ra Yehova. (Esaya 11:9) Nakambe vuprofeta lebyi byi nga tirha emisaveni ya paradeyisi exikarhi ka lava pfuxiweke emasirheni. Mani na mani loyi a nga ta ala ku pfumelelana ni swilaveko swa Xikwembu, tanihi leswi swi andlariweke kahle ‘ebukwini’ ya Xikwembu ya nkarhi wolowo, mavito ya vona a ma nge tsariwi “ebukwini ya vutomi.”—Nhlavutelo 20:12, 15; ringanisa Ezekiel 33:11.
Yehova U Nyika Ku Rhula
6. I marito wahi lama vanhu lava tshembekaka va Yehova va ma huwelelaka hi ku tsaka, naswona ha yini?
6 Hambi swi ri tano, vanhu va Xikwembu lava tshembekaka, va tsakela ngopfu ku vona Yehova a tlakusiwa, a lweriwa. Va n’wi kombela ku ‘nyika vanhu va yena ku rhula,’ naswona hi ntsako va huwelela va ku: “Oho Yehova! U kurisile tiko; u ri anḍisile; u tiḍunisile, u tshinetile kule minḍilakana hikwayo ya tiko.” (Esaya 26:12, 15) Eka matiko ya 210 emisaveni, Yehova u hambeta a engetela vanhu lava fanaka ni tinyimpfu etikweni ra yena ra moya. Madzana ya magidi ya lava sungulaka ku hlanganyela ma khuvuriwa. Maphayona lama hlawulekeke, ya nkarhi hinkwawo ni ya nkarhinyana lama tlulaka hafu ya miliyoni ma tirha eka tin’hweti ta tinhlohlorhi. Tiholo to tala ta Mfumo ni Tiholo ta Tinhlengeletano ta karhi ku akiwa. Marhavi ya Watch Tower ma engetela Makaya ya wona ya Bethele ni tifektri na ku engetela switirho swo kandziyisa. Ku kula ku ya emahlweni!
7. I yini lexi vangelaka ku kula ka nhlengeletano ya Yehova yo fana ni muti?
7 Ku kula loku ku kona hikwalaho ka leswi “Hosi ya ku Rhula” yi kongomisaka ntirho wa vanhu va Xikwembu emisaveni. Hi laha Esaya a vuleke ha kona eku sunguleni ka vuprofeta bya yena: “E ku kurisa ku fuma, ni ku nyika šiluv̌elo ša Davida ni ku fuma ka yena e ku rula lo’ku nga heriki, ni ku ši tiyisa, ni ku ši seketela hi ku av̌anyisa ni ku lulama, ŝeŝi ni laha ku nga heriki; ku hiseka ka Yehova wa tinyimpi ku ta endla ŝeŝo!” (Esaya 9:6, 7) Ma hetiseke kahle swonghasi marito wolawo namuntlha! Lava tshembaka Yehova ana se va tokota ku rhula, vunene, ku lulama, ka ku fuma koloko ka vuhosi. Ku va hlanganise erirhandzwini ra vun’we leri tsakeriwaka hi Yesu ni vadyondzisiwa va yena va ntiyiso ntsena. (Yohane 13:34, 35) Ku tlula kwalaho, hi mahlongati va rindzela nkarhi lowu tshinelaka hi xihatla laha vulawuri bya Mfumo wa Yesu ni “ku tiv̌a Yehova” swi nga ta tata misava hinkwayo.—Esaya 11:9; Daniel 2:35, 44, 45.
8. I yini lexi kombisiweke hi marito ya Yehova eka Esaya 26:20, naswona ‘makamera’ ya fanisiwe na yini?
8 Loko ku kula ka Mfumo ku ya emaninginingini, xirhambo xa Yehova eka Esaya 26:20 xa twala: “Yana, tiko ra mina, u nghena e makamereni ya wena, u pfala nyangwa e nḍaku ka wena; tumbela hi nkari, vukari byi ko byi hunḍa.” Handle ko tipfinyinga ‘makamera’ ya vuprofeta lebyi ya fana swinene ni mabandlha lama tlulaka 54 000 lama fanaka ni miti lama tirhelaka Timbhoni ta Yehova emisaveni hinkwayo namuntlha. Swa ha salela ku voniwa leswi Yehova a nga na swona emianakanyweni. Kambe hi nga tiyiseka leswaku loko a lovisa lavo homboloka, u ta sirhelela vanhu vakwe lava tshembaka, tanihi laha a endleke ha kona loko a tlherisa Muasiriya wa tihanyi esikwini ra Esaya.—Esaya 10:24-26.
Nkutsulo Lowu Tshembisiweke!
9. (a) Hosi Ezekiyasi u kombise ku tshemba ka yena Yehova hi ndlela yihi? (b) Loko hi xanisiwa kumbe ku rhuketeriwa hi lava vengaka Yehova, endlelo ra hina lerinene hi rihi?
9 Malandza ya Yehova namuntlha ma n’wi tshemba hi xivangelo lexi fanaka xa leswaku Hosi Ezekiyasi a a n’wi tshemba. A a titshege hi Yehova hi ku helela tanihi Hosi ya yena. Hikwalaho, eka nxungeto lowu chavisaka wa Muasiriya, u khongele eka Yehova hi marito lawa: “Yehova, Šikwembu ša Israel, l’a ṭhameke šikari ka makerubim! Wena ntsena u Šikwembu ša matiko hikwawo ya misava; hi wena l’a endleke matilo ni misava. Oho Yehova! riya ndlev̌e, u yingisa; oho Yehova! Pfula mahlo ya wena u v̌ona; u yingisa marito ya Sankerib, lawa a ma rumeke ku sanḍa Šikwembu le’ši hanyaka.” (Esaya 37:16, 17) Loko u xanisiwa, u hlekiwa, kumbe u rhuketeriwa hi lava vengaka Yehova, xana xikhongelo lexi fanaka a xi humi embilwini ya wena ke? Hi ku tshemba Yehova hi laha ku teleke, xana a wu n’wi kombeli leswaku a susa ku soriwa ka vito ra yena? Yoleyo i ndlela leyi Yesu a titweke ha yona loko a ri ekusuhi ni ku fa emhandzini ya nxaniso. U kombele ni leswaku xinwelo lexi a a ri ekusuhi ni ku nwela eka xona onge xi nga “fambela kule” na yena hikwalaho ka ku rhukaniwa lokukulu ka Tata wakwe.—Matewu 26:39-44.
10. (a) Xikhongelo xa Ezekiyasi xi paluxe yini mayelana ni xikongomelo-nkulu xa yena? (b) Tanihi leswi hi langutaneke na miringo emahlweninyana ka Armagedoni hi nga fana na Ezekiyasi hi ndlela yihi?
10 Xikhongelo xa Ezekiyasi xi kombe leswaku a a ri hava nsusumeto wa vutianakanyi loko a lava ku kutsuriwa eka Muasiriya loyi. A a nga ringeti ntsena ku ponisa nhlonge ya yena. Kambe, a a khathalela leswaku vito ra Yehova ri kwetsimisiwa ni vuhosi bya Yena byi lweriwa. Xisweswo, xikhongelo xa yena xi hetelela hi marito lawa: “Ŝeŝi Yehova, Šikwembu ša hina, wa nga hi ponisa e v̌okweni ra Sankerib, matiko hikwawo ya misava ma ta tiv̌a leŝaku wena Yehova u Šikwembu, wena ntsena!” (Esaya 37:20) Hi ku fanana, leswi hi langutaneke ni miringo leyi rhangelaka nyimpi ya makumu ya Armagedoni, a hi tsundzukeni leswaku ku pona ka hina ku ta endzhaku ka ku kwetsimisiwa ka vito ra Yehova. Tanihi leswi Hosi ya hina yi vuleke hi minkarhi yo ringana 60 hi muprofeta wa yona Ezekiyele yi ku: “Ma ta tiv̌a leŝaku hi mina Yehova.”—Ezekiel 38:23.
11. (a) Hi xihi xihoxo lexi Sankerib a xi endleke, naswona Yehova u te yini malunghana ni leswi? (b) Hikwalaho ka vuyelo bya Sankerib, i ntshembo wihi lowu hi nga vaka na wona?
11 Endzhaku ka loko Ezekiyasi a khongerile, Esaya u tivisa hosi hi ta marito lama Yehova a ma vuleke eka Sankerib. Oho xihoxo lexi musandzi wa Muasiriya a xi endleke hi ku rhukana Xikwembu lexi hanyaka! Hi ku tirhisa Esaya, Yehova malunghana na Sankerib u te: “U rukanile mani, u sanḍile mani šana? U tlakusile rito ra wena henhla ka mani? U tlakusile mahlo ya wena henhla e ku lwa ni mukwetsimi wa Israel.” Naswona a ku ri Mukwetsimi wa Israyele loyi a tekeke goza evusikwini byebyo! Swi lave ntsumi yin’we ntsena ya Yehova ku dlaya ni ku endla “minṭumbu” ya 185 000 wa masocha ya Vaasiriya, vuthu leri tiyeke ra Sankerib. Hosi yoleyo ya vutikukumuxi yi tlhelele eNiniva yi khomisiwe tingana, malembenyana endzhaku yi dlayiwile hi vana va yona yi karhi yi phikelela evugandzerini bya yona bya swifaniso. Hi nga tshemba Yehova, hi ri karhi hi tiyiseka leswaku u ta endla leswi fanaka eka Sathana ni vanghana va yena hinkwavo lava rhukanaka ni ku xanisa Timbhoni ta Yehova.—Esaya 37:23, 36-38.
Ku Rihisela “Vadlayiwa”
12. (a) Esaya 26:21 yi ku hlamusela njhani ku tengisiwa loku nga ta va kona eArmagedoni? (b) I vamani “vadlayiwa” lava nga ta rihiseriwa hambi ku ri emahlweni ka Armagedoni, naswona njhani?
12 A ku ri xivono xa nyimpi leyi chavisaka hi nkarhi wolowo, kambe ku tengisiwa loku vavaka swinene ku ta va kona hi nkarhi wa “nhlomulo lowukulu.” (Matewu 24:21) Yehova u hi rhambela ku vona mpimo wa ndzoviso wolowo: “Hikuva, v̌onani, Yehova o huma e v̌uakweni bya yena ku ta enḍela ku dyoha ka v̌aaki v̌a misav̌a, kutani misav̌a yi ta yimbula ngati leyi yi funḍiweke hi yona, a yi nga ha fihli v̌adlayiwa v̌a yona.” (Esaya 26:21) Xo sungula, Yehova u ta vangela mimfumo ya politiki ku avanyisa vayimeri va xidyoho xa vukhongeri. Swikwembu swa vona swa mavunwa a swi nga va ponisi esikwini rero! Phophu wa Rhoma u hlengeleta vukhongeri hinkwabyo bya “Babilona Lonkulu” a byi hlengeletela swikhongelo swa vunyingi bya ripfumelo. Ku hava ni un’we wa vafundhisi lava va mpfangano wa vupfumeri la dzunisaka Yehova, Xikwembu xa ntiyiso ni lexi hanyaka. Tidyondzo ta vona ti hoxile, a ti pfumelelani na Bibele, naswona swi tano hi tindlela ta vona. Va dlayanile hi malembe xidzana yo tala. Va halatile ngati ya Vakriste lava nga hava nandzu. Eka lembe xidzana leri ra vu-20, vanyingi va vona va seketele vafumi va tihanyi lava dlayeke Timbhoni ta Yehova emakhotsweni ni le mixaxeni ya nxaniso hi swibalesa na hi xihloka. Hi laha Yehova hi ku kongoma a vulaka ha kona hi vaprofeta vakwe, ‘vadlayiwa’ vo tano va ta rihiseriwa.—Deuteronoma 32:41, 43; Esaya 1:24; 63:4; Nhlavutelo 17:15-18; 18:21, 24.
13. Esaya u vhumba yini malunghana ni “siku ra Yehova,” naswona marito lama ya tirha eka vamani?
13 Endzhaku ka loko vukhongeri byo hemba byi herisiwile, Yehova u ta kukula hinkwavo vakaneti lava saleke va Mfumo wa Kriste. Eka vakaneti vo tano hinkwavo, volavo, kun’we na “Babilona Lonkulu,” ku tirha marito ya Xikwembu eka Esaya 13:6, 9: “V̌ov̌olani, hikuv̌a siku ra Yehova ri kusuhi: Ri ta tani hi ku onha lo’ku rumiweke hi Lo’wa-matimba-hikwawo. V̌onani, siku ra Yehova ra ta, ri nonoṅhwa, ri tele ku kariha lo’ku pfuraka. Ri ta endla tiko e mananga, ri lov̌isa v̌abihi la’v̌a nga ka rona.” Swi ta va hi laha mupisalema Davhida a vhumbeke ha kona a ku: “Yehova u lonḍov̌ota hikwavo la’v̌a ṅwi ranḍaka, kambe wa lov̌isa la’v̌o biha hikwav̌o.”—Psalma 145:20; Nhlavutelo 19:11-21.
14. Hi wahi marito ya Esaya lama yaka emahlweni ni lama matiko ma endlaka swinene loko ya ma yingisa, naswona ha yini?
14 Matiko ya misava ma ta endla kahle ku hlayisa marito lama yaka emahlweni ya Esaya eka ndzima 34, tindzimana 1 ku ya ka 8: “Ṭhinelani, ṅwina matiko, mi ta yingisa! ṅwina v̌anhu yingiselani! . . . Hikuv̌a Yehova o karihele matiko hikwawo, u karihele tinyimpi ta wona hikwato; o v̌a yirisile, o v̌a nyiketile rifu. La’v̌a tlhav̌iweke v̌a v̌ona v̌a tšukumetiwa ntsena, miṭumbu ya v̌ona ya nuṅhwa, kutani ngati ya v̌ona yi khuluka e tinṭhav̌eni. . . . Hikuv̌a Yehova o v̌ekile siku ro rihisa.” Eswivandleni swa tipolitiki, hulumendhe, bindzu lerikulu ni vukhongeri byo hemba namuntlha, ku onhaka ni vunghwavava swi dumile. Kambe Yehova u kunguhata misava leyi baseke. Ku endla leswi, u hlengeleta matiko—a ma hlengeletela ku pona—vanhu lava swi rhandzaka ku cinca vutomi bya vona va n’wi tirhela hi ku lulama. Hinkwavo lava van’wana va fanele ku lova esikwini rakwe ro tirihisela.—Yeremia 25:31-33.
Paradeyisi Ya Ku Rhula
15. I yini lexi Esaya a xi hlamuselaka eka ndzima 35 malunghana ni (a) namuntlha? (b) vumundzuku?
15 Eka Esaya ndzima 35, muprofeta wa Xikwembu u ya emahlweni, hi ririmi ro saseka ro fanekisela, ku hlamusela xiyimo xa vanhu lava kondleteriweke va Yehova, lava namuntlha minkarhi hinkwayo va vekaka ntshembo wa vona eka yena. Loko va hlengeletiwe eparadeyisini ya moya, lava va “vona ku kwetsima ka Yehova, ni vukulu bya Xikwembu xa hina.” Nakambe va rindzele paradeyisi ya xiviri ni ku hetiseka ka xitshembiso lexi nge: “Hi laha mahlo ya v̌o-fe-mahlo ma nga ta hanyanya, ni tindlev̌e le’ti siv̌ekeke ti nga ta pfuleka, ŝilema ŝi ta tlula kukota tinhlangu, kutani ririmi ra mbev̌ev̌e ri ta yimbelela hi ku ṭaka; hikuv̌a mati ma ta khuluka mananga, ni ŝinambyana ŝi ta khulukela e makwanḍasini.” (Esaya 35:1, 2, 5, 6) Xana wa ku tsakela ku langutela koloko? Wa n’wi tshemba Yehova, u tiyiseka leswaku u ta hetisisa switshembiso leswi ke?
16, 17. (a) Loko a ri karhi a hlamusela paradeyisi i xikombelo xihi xa xihatla lexi Esaya a xi endlaka? (b) Vanhu va Yehova va fanele va hlamurisa ku yini eka xikombelo lexi?
16 Hi ku tshemba Yehova, u nga ha hlanganyela eku khutazeni ka lava ha riki vantshwa, kun’we ni lava ripfumelo ra vona ri nga ha lavaka ku tiyisiwa. Exikarhi ka nhlamuselo ya yena ya paradeyisi, muprofeta Esaya u nghenisa xikombelo lexi xa xihatla: “Nyikani mav̌oko la’ma ṭaneke e matimba, mi v̌a mi tiyisa maṭolo la’ma rekarekaka! Mi ku ka va timbilu le’ti ṭhukeke: Rulani timbilu, mi nga tšhav̌i! V̌onani, Šikwembu ša ṅwina ša ta hi ku rihisa, ku nga ku hakela ka Šikwembu; ši ta ta ši ri šona, ši mi hlayisa.” (Esaya 35:3, 4) Ina, hi lava ku vona hinkwavo lava timbilu ta vona ti voyameleke eku lulameni va aka ntshembo eka Yehova, leswaku va ta swi kota ku nghena emisaveni ya paradeyisi.
17 Hikwalaho a hi seketeleni voko rin’wana ni rin’wana leri waka leswaku va ta “namarhela Rito ra vutomi.” A hi tiyiseni vahi ni vahi lava nga ni matsolo lama rhekarhekaka, hi va pfuna laha swi lavekaka kona leswaku va “hanya vutomi lebyi fanekelaka emahlweni ka Hosi, [va] yi tsakisa etimhakeni hinkwato.” (Vafilipiya 2:16; Vakolosa 1:10) Ina, a hi khongoteleni mani na mani loyi a tsaneke embilwini, naswona hi khutazana, loko hi kongomane ni miringo kumbe ku xanisiwa, leswaku hi kombisa ku “kanya timbilu ku vula Rito [hi] nga chavi nchumu.” (Vafilipiya 1:14; 1 Vatesalonika 5:14; Vaefesa 5:15, 16) Kutani ke, loko siku ra Yehova ra ku tirihisela ri fika, hi ta tiyisekisiwa hi mikateko ya yena loko ‘a ta ku ta ponisa vanhu va yena.’ Hi siku rero, xana u ta va exikarhi ka lava tshembaka Yehova leswaku va pona?
18. Xana i ku langutela muni ko vangama loku yimeleke lava tshembaka Yehova, kutani hi kwihi ku tiyimisela ka vona?
18 Eka lava tshembaka Yehova hi minkarhi hinkwayo, i ku langutela muni ko vangama loku nga endzhaku ka siku rero! Vatshikileri lava nga ni xidyoho va ta va va nga ha ri kona! Emisaveni leyintshwa, varhandzi va Yehova va ta kondleteriwa hi N’wana wa yena va ya eku hetisekeni loku nga hava xidyoho! Xana a wu wu naveli nkarhi wolowo? Ku n’wi tshemba ka wena Yehova ku ta ku yisa eka siku rero ro hlamarisa. Ee, Tshembani Yehova Minkarhi Hinkwayo, N’wina Vanhu, hikuva leswi swi vula ku ponisiwa!
Swivutiso Swa Mpfuxeto
◻ Risimu ra ku hlula ra Esaya 26 ri hi khutaza ku endla yini?
◻ Hi wihi “muti lowu tlakukeke” lowu Yehova a nga ta wu tsongahata, naswona hi wu kandziyela ehansi hi ndlela yihi?
◻ Hi dyondza yini eka xikhongelo xa Ezekiyasi emahlweni ka nxungeto wa Sankerib ke?
◻ “Vadlayiwa” va le ka Esaya 26:21 va rihiseriwa hi ndlela yihi?
◻ Vuyelo byi ta va byihi loko hi tshemba Yehova, Yehova?
[Bokisi leri nga eka tluka 19]
Ku Kambisisa Xivandla Xa Mufundhisi-nkulu Ke?
Loko yi komisa xihloko xa Umberto Siniscalchi eIl Giornale ya le Milan, World Press Review yi ri: “Huvo ya le henhla-henhla ya Swikombelo ya le Italy yi le ku soriweni loku vavaka swinene, hikuva hi July [1987] yi herise swileriso swa ku khotsa varhangeri vanharhu va banki ya Vatican lava katsekeke eka nandzu wa ku onha eBanco Ambrosiano.” Xiboho, lexi seketeriweke eka ntwanano wa khale exikarhi ka hulumendhe ya Vatican ni ya le Italy, xi nyike nsirhelelo eka mutshami wa xitulu wa banki, loyi a nga mufundhisi-nkulu, a tlhela a va mukongomisi ni muhlayi-nkulu wa mali ebanki. Mpfuxeto wa engetela: “Van’wana lava solaka, hambi leswi va nga xi voniki xihoxo eka vaavanyisi hikwalaho ka xiboho lexi, va vula leswaku ntwanano wa ku xixima nawu wa le Italy wa n’oka hi ku nyika nsirhelelo eka lava tlulaka nawu etikweni ra Italy. Van’wana vaendli va nawu va lwela ntwanano wo pfumelela mafambiselo ya vululami ya Italy leswaku ya kambisisa Xivandla xa Mufundhisi-nkulu hikwalaho ka vugevenga lebyi veke kona eItaly.”