Ntsombano Lowu Kuriseke Ntshembo Wa Hina Eka Yehova

TATA wa hina wa le matilweni, Yehova Xikwembu, u tiva swinene leswi hi swi pfumalaka. Kutani u swi nghenisa emianakanyweni ya malandza ya yena lama tinyiketeke lama kongomisaka ntirho wa yena emisaveni ku anerisa xilaveko xexo. Leswi entiyisweni swi nga vuriwa hi Mintsombano ya Muganga ya “Tshemba Yehova,” leyi khomiweke emisaveni hinkwayo ku sukela hi June 1987, ku ya emahlweni. Entiyisweni yi pfune ku tiyisa Vakriste leswaku va lwisana ni tidyondzo to kumbetela, ku kanakana ni ku pfumala ntshembo loku teleke swinene emisaveni.

Xihloko lexi nge “Tshemba Yehova” xi vekiwe tanihi lexi hlawulekeke enongonokweni. A xi hlawulekile hi marito lama tiyeke ni lama xiyekaka, lama a ma twisiseka naswona a ma ri lama kongomeke. Hinkwaswo leswi swi tiyise ntshembo wa vayingiseri eka Yehova. Va ye ekaya ni xihloko xi mirile etimbilwini na le mianakanyweni ya vona, va tiyimisele leswaku hi swiendlo swa vona ni marito ya vona va ta huwelela eka hinkwavo leswaku va tshemba Yehova hi ku helela.

“N’wina Vanhu, Tshembani Yehova”

Marito wolawo lama kumekaka eka Esaya 26:4 ya vule xihloko xa siku ro sungula. Hi ku fanela swinene, nongonoko wu sungule hi nkulumo leyi nge “Rhiyela eMarito Ya Xikwembu Ndleve Ya Wena.” Xivulavuri xi kombisile leswaku xiga lexi, lexi humelelaka hi minkarhi yo tala eRitweni ra Xikwembu, xi vula ku nyikela nyingiso lowu teleke hi mianakanyo ni mbilu eka leswi swi vuriwaka, hi xikongomelo xo tirhisa leswi swi twiweke. Sweswo swi vula ku titoloveta ku tikhoma ni ku yingisela swinene leswi swi vuriwaka, hayi ku pfumelela miehleketo yi tsendzeleka. Ntshembo wa hina eka Yehova wu ta tiyisiwa hi leswi hi swi twaka ntsena loko hi rhiya ndleve ya hina kutani hi ta susumeteriwa ku teka goza hi leswi vuriweke. Naswona xana leri a ri fanelanga ku va langutelo ra hina loko hi twa Rito ra Xikwembu ri hlamuseriwa, tanihi le minhlanganweni ya hina ya bandlha ke?

Mutshami wa xitulu wa ntsombano u nyikele nkulumo leyi landzelaka, “Lava Tshembaka Yehova Va Tsakela Ku Va Laha.” U vule leswaku loko ntshembo wa hina eka Yehova wu ri karhi wu kula, ntsako wa hina i wukulu. Ku tshemba Yehova swi vula ku titshega hi yena hi ku helela na hi ku tiyiseka. Loko vutivi bya hina hi Yehova byi ri lebyikulu ni rirhandzu ra hina, ku n’wi tshemba ka hina ku ta va loku tiyeke. Xihloko xa ntsombano a ku nga ri marito ntsena. Hi kombisa ntshembo wa hina eka Yehova hi tindlela to tala, ku nga ri ntsena hi ku ehleketelela van’wana. Leswaku a tsakisa hinkwavo, eku heteleleni ka switsundzuxo swa yena, mutshami wa xitulu u nyikele xilo xo sungula lexi humesiweke—xa mivala-vala, xitirho lexi lulameleke ku nyikela vumbhoni. A ku ri xiphephana lexi nge Mhaka Leyi U Nga Tshembaka Bibele Ha Yona.

Endzhaku ka ku hlamusela xikombiso lexi xiyekaka xa Davhida loko a langutane ni xihontlovila Goliat, xivulavuri lexi landzeleke xi kombise “Ndlela Leyi Van’wana Va Tshembeke Yehova Ha Yona” eminkarhini ya manguva lawa. Hi xikombiso, a ku ri na makwerhu wa xisati loyi nuna wa yena la nga pfumeriki, a a ri na xibamu evokweni, a xungeteke ku n’wi dlaya loko a hambeta a ya eminhlanganweni. Van’wana va kombise ntshembo wa vona eka Yehova loko va byeriwe leswaku vutomi bya vona byi tiseketele hi ku amukela mpompelo wa ngati. Vantshwa va nyike xikombiso xa ntshembo wa vona eka Yehova hi ku ala minsusumeto ya ku ya emintlangweni kumbe ku ya hlawula dyondzo ya le henhla endzhaku ko heta ekholichi.

Nongonoko wa nimixo wa Ravuntlhanu wu hetelele hi nkulumo leyi nge “Vanhu Lava Hambanaka Ni Misava.” Hi kombisa leswaku hi tshemba Yehova hi ku hlayisa mahanyelo ya hina ni va rimbewu leri hambaneke ma ri ekule ni ku soriwa, hi ku pfumelela milawu ya Vukriste yi fuma mintlangu ya hina, na hi ku papalata ku ambala ni ku tilunghisa hinkwako loku nga dlayaka ku hambana exikarhi ka va rimbewu leri hambaneke. Xisweswo hi ku hambana ka hina ni misava, nkarhi na nkarhi vumbhoni bya matimba bya nyikeriwa, hambi ku ri ku vangela van’wana ku nghena entiyisweni.

Hi ndzhenga wa Ravuntlhanu, nongonoko wu sungule hi nkulumo leyi nge “Vuphayona Byi Hatlisisa Ku Kula Ka Moya.” Naswona ma tiyisile swonghasi marito lawa! Hi Rito ra Yehova, moya wa yena lowo kwetsima ni nhlengeletano ya yena, Xikwembu xi nyikela leswi hi swi lavaka leswaku hi kula hi va “vavanuna lava vupfeke,” kambe vuphayona byi hi veka eka xiyimo xo antswisa ni ku ma tirhisa hi laha ku teleke malunghiselelo lawa ya moya. (Vaefesa 4:13) Hi ku tirhisa swivutiso, maphayona ya vule ndlela leyi vutirheli bya nkarhi hinkwawo byi va pfuneke ha yona ku hlakulela mihandzu ya moya wa Xikwembu hi laha ku teleke, ku kombisa rirhandzu leri engetelekeke eka vanhu, ku gingiriteka evutirhelini, ku tshemba Yehova hi mpimo lowukulu, xisweswo va kombisa vuxaka bya le kusuhi na yena. Hinkwaswo leswi swi hatlisisa ku kula ka vona ka moya.

Ku landzele nkulumo-nkulu leyi nge, “Vanhu Lava Tshembaka Yehova Minkarhi Hinkwayo.” Nkulumo leyi yo nyanyula yi kombise leswaku hi hambanile ni misava hikuva hi tshemba Yehova hi ku helela. Yi seketeriwe hi matsalwa yo hambana-hambana lama humaka ebukwini ya Esaya, xivulavuri xi kombise ndlela leyi hi voneke ha yona vuprofeta lebyi fanaka lebyi khutazaka byi hetiseka eka Timbhoni ta Yehova hikuva hi tshemba Xikwembu. Hi ku tiyiseka, hi rindzele nkarhi lowu nga kusuhi loko Yehova a ta humesela matiko hinkwawo evukari bya yena kutani hi nghena eparadeyisini.

Lava veke kona entsombanweni va khutaziwe leswaku va “Hangalasa Mahungu Lamanene Nkarhi Wun’wana Ni Wun’wana.” Endzhaku ka loko nkoka wa ku endla sweswo wu kandziyisiwile, swikombiso swo hlayanyana swi kombise ndlela leyi xiphephana lexintshwa lexi nge Mhaka Leyi U Nga Tshembaka Bibele Ha Yona xi nga tirhisiwaka ha yona hi laha ku vuyerisaka eku nyikeleni ka vumbhoni byo tiyimisela ni bya xitshuketa. Entiyisweni, hi minkarhi hinkwayo hi lava ku tshama hi ri na swiphephana leswi, hikuva ku hangalasa mahungu lamanene nkarhi wun’wana ni wun’wana swi fanele swi va xiphemu xa mbhoni yin’wana ni yin’wana ya Yehova naswona i ndlela ya ku kombisa leswaku ha n’wi tshemba.

Nkulumo leyi tlangeriweke swinene hi leyi nge “Vatswari—Fikelelani Mbilu Ya N’wana Wa N’wina Ku Sukela eVuhlangini.” Leswaku n’wana a ta kula a tshemba Yehova, ndzetelo wa yena wu fanele wu sungula evuhlangini naswona wu fanele wu rhangisiwa. Hi le nkarhini wolowo ntsena laha swi nga kotekaka ku herisa minsusumeto hinkwayo leyo biha ya thelevhixini, xikolo ni ya le xitarateni. ‘Endla leswaku n’wana wa wena a vona leswi u lavaka leswaku a va xiswona eka wena,’ a ku byeriwa vatswari. Ee, ku veka xikombiso lexinene i ndlela yo antswa yo fikelela mbilu ya n’wana. Timhaka hinkwato ta ntirho lowu hlawulekeke ti fanele ti ta hi ntumbuluko naswona ti va leti tsakisaka loko xiyimo xa kaya xi ta va xa moya hakunene. A hi swi lavi ku honisa nkarhi ni matshalatshala lama katsekaka. Hambeta u fikelela mbilu ya n’wana na hi ku vulavurisana lokunene. Tirhisa ku tiya loku nga ni rirhandzu, humesa xivangelo loko u nyikela ndzayo. Dzunisa ni ku hakela loko swi fanerile, kambe u nga tshuki u ba mati eka n’wana wa wena.

Nkulumo leyi nge “Vantshwa—Tivoneleni Ku Hanya Vutomi Byimbirhi,” yi lwe swinene ni xiphiqo lexikulu exikarhi ka vantshwa van’wana va Timbhoni. Ha yini van’wana va ringeta ku hanya vutomi byimbirhi? Hikuva va lava ku amukeriwa hi vatswari va vona ni bandlha kutani nakambe va chava ku hlekiwa hi tintangha ta vona ta misava. Kumbe va vona onge va hundziwa hi ntsako loko va nga dzahi, va nga tirhisi swidzidzirisi kumbe ku hlanganyela evunghwavaveni. Kambe kwalaho a yi nge balekeriwi yinhla ya leswaku hinkwako ku hanya ko tano ka vutomi byimbirhi ku tisa ndzhukano eka Yehova, ku dyisa vatswari va munhu yoloye mbitsi ni ku tisa maxangu eka yena n’wini. Loyi a byalaka swa nyama u ta tshovela ku bola, kasi ku hlayisa vuxaka lebyinene na Yehova, u n’wi tshemba hi laha ku teleke, swi sivela munhu ku hanya vutomi byimbirhi.—Vagalatiya 6:8.

Drama leyi landzeleke endzhakunyana yi tshikilele hi matimba swinene milawu leyi hinkwayo. A yi ku Ku Titsongahata Hi Ku Tshembeka Eka Yehova Ni Nhlengeletano Ya Yena, a yi tamele swakudya swo tala swa mianakanyo loko yi kombisa ndlela leyi nkulu a titweke a boheka ha yona ku tshika xikhundla xa vukulu hikuva n’wana wa yena wa nhwanyana a paluxiwe tanihi loyi a hanyaka vutomi byimbirhi. Drama yi humese marito yo tala lama nyanyulaka ya ku tlangela.

“Tshemba Yehova U Endla Leswo Lulama”

Leyi a ku ri nhloko-mhaka ya siku ra vumbirhi ra ntsombano, leyi seketeriweke eka Psalma 37:3. Endzhaku ko hlanganyela ndzimana ya siku, leyi khutazeke ku endla leswi siku na siku, nongonoko wu vulavule hi nxaxamelo wa swiphemu swinharhu lowu nge “Ku Kombisa Ntshembo Wa Hina Eka Yehova.” Xivulavuri xo sungula xi kombise xilaveko xa ku endla leswi “Hi ku Dyondza Rito Ra Xikwembu Hi Ku Chivirika.” Leswi hi fanele ku swi endla ku papalata ntlhamu wa ku vilela ni mintlhamu ya rifuwo, vunghwavava ni vugwinehi. Sosayiti yi nyikele swipfuneto swo hlaya Bibele hi xitalo, swo tanihi Watch Tower Publications Index 1930-1985 leyintshwa. Hi nga va ni vuxaka lebyinene byo tshembeka ni Tata wa hina wa le matilweni, naswona hi chivirika tanihi timbhoni ta yena ntsena loko hi teka malunghiselelo lawa ya ri ya nkoka.

Xivulavuri lexi landzeleke xi kandziyise yinhla ya leswaku ku tshemba Yehova swi kombisiwa hi “Ku Tirhisa Swilo Leswi Dyondziweke.” Ee, hi lava ku va vaendli va Rito, hi minkarhi hinkwayo hi tikarhatela ku endla nhluvuko. Etindhawini tihi? Evuxakeni bya hina ni van’wana, eka swiambalo swa hina ni ku tilunghisa, eku laveni ka Mfumo wa Xikwembu ku sungula ni le ku kondleteleni ka ku rhula ni vun’we exikarhi ka vamakwerhu! Ku papalata xidyoho xa ku titlakusa, hi fanele hi tivonela leswaku hi hlayisa xivandla xa hina endyangwini na le bandlheni. Loko xisweswo hi tirhisa swilo leswi hi swi dyondzeke, swi ta vonaka eka hinkwavo leswaku hi tshemba Yehova.

Nxaxamelo wu hetelele hi ku hlamusela ehansi ka xihloko lexi nge “Ku Kombisa Ku Tshemba Ka Hina Yehova—Hi Ku Tikarhata eNsin’wini.” Hi ku endla leswi, hi kombisa rirhandzu ra hina hi Xikwembu ni vaakelani va hina naswona ha tisirheleta. Hi nga ha anerisiwa hi ntirho lowu nga nyawuriki, wa nomu, kambe xana Yehova wa aneriseka ke? Xana N’wana wa yena a nga hi khutazi ku endla hi matimba ke? (Luka 13:24) Ku engeteleka loku hi hambetaka hi ku vona eka vahuweleri, maphayona ni avhareji ya tiawara leti tirhisiweke evutirhelini bya nsimu swi fanele swi hi susumetela ku ringeta ku endla leswi engetelekeke hi hexe. A swi tano xana? Hi ku gingiriteka ko tano, hi ta veka xikombiso lexinene, hi kombisa ntshembo wa hina eka Yehova, kutani hi kuma ku amukeriwa hi yena.

Ku landzele xikombelo emapfalweni ya hina enkulumeni leyi a yi ku “Nyikani Hi Mpimo Lowu Teleke.” Yehova u hi fuwisa hi laha ku teleke swonghasi emoyeni ni le nyameni! Hi kombisa ku tlangela ka hina hi ku n’wi ringisa hi ku nyikela vumbhoni na hi ku nyikela mali ku seketela ntirho wa ku chumayela. Xana hi nga hunguta ku titsakisa loko durha leswaku hi nyika hi mpimo lowu teleke?

Nkulumo ya nkhuvulo, “Ku Tinyiketa Ni Ku Khuvuriwa Ka Wena Swi Kombisa Ku Tshemba Yehova,” yi kombise leswaku ha yini hi tshemba Yehova hayi munhu. Nkhuvulo wa mati wu vula ku fa emahanyelweni ya hina ya khale naswona u pfuxeriwa evuton’wini lebyi pfumelelanaka ni ku rhandza ka Xikwembu. Endzhaku ka sweswo, hi fanele hi hambeta hi ‘endla leswi lulameke, hi rhandza tintswalo ni ku famba hi ku titsongahata emahlweni ka Xikwembu xa hina.’ (Mikea 6:8) Exikarhi ka lava khuvuriweke a ku ri na nhwanyana wa 8 wa malembe hi vukhale loyi a fambisaka tidyondzo ta Bibele timbirhi ni vanghana va xikolo, wanuna wa 79 wa malembe hi vukhale na xilema xa 44 wa malembe hi vukhale.

Nongonoko wa ndzhenga wa Mugqivela wu sungule hi nkulumo leyi nge “Ku Endla ‘Leswi Lavekaka’ Leswaku Hi Tsakisa Xikwembu.” Leyi seketeriweke eka Mintirho 15:28, 29, yi kombise xilaveko xa ku tivisa tin’anga ta hina xiyimo xa hina hi ngati ku nga si va na xiphiqo xa vutshunguri ni ku nyikela mianakanyo leyinene ya leswaku hi nga swi endlisa ku yini leswi.

Nkulumo leyi nyikeleke mhaka leyi tsakeriweke swinene hi leyi nge “Ku Tswala Vana Loku Nga Ni Vutihlamuleri eNkarhini Lowu Wa Makumu.” Yi nyikele langutelo leri ringaneleke, yi kombisa leswaku hambi leswi ku tswala vana swi nga tisaka ku tsaka lokukulu, nakambe ku tisa vutihlamuleri byo tala naswona hakanyingi swi vangela ku pandza ka tinhloko, tanihi loko vana va hambuka. Ngopfu-ngopfu i vamanana va talaka ku vaviseka emoyeni hikwalaho ka ndzhwalo wa ku tswala vana.

Kutani ku te nkulumo leyi nge “Vakulu—Hlayisani Ku Tshemba Ka N’wina.” Ku tshemba loku i ku risa ntlhambi wa Xikwembu—ku wu rhangela, ku wu phamela ni ku wu sirheleta, hi ku pfumelelana na Esaya 32:1, 2. Ku endla leswi faneleke eka vutihlamuleri bya le ndyangwini u ri karhi u hlayisa mintirho ya bandlha swi tisa mphikamakaneta ya xiviri. Leswaku vakulu va hlayisa ku tshemba ka vona nakambe swi vula ku papalata mintlhamu ya rifuwo, mintlangu yo tlula mpimo ni ku titsakisa loku nga fanelangiki. Exikarhi ka lava ku vulavurisaniweke na vona entsombanweni wa muganga wa le Dortmund eFederal Riphabliki ra Jarimani a ku ri na nkulu loyi a a ri karhi a hlayisa ku tshemba ka yena hi malembe ya 60.

Nkulumo leyi nge “Yingisani Varisi” yi landzerile. Rirhandzu ri ta hi pfuna leswaku hi titsongahata ni ku yingisela valanguteri va bandlha naswona ri ta hi sivela ku hela mbilu hikuva a va hetisekanga, hikuva na hina a hi hetisekanga. (Vaheveru 13:17) Hi ku xixima vakulu etimhakeni letintsongo ni letikulu, ha va pfuna leswaku va rhwala mindzhwalo ya vona ematshan’wini yo engetela.

Nongonoko wa Mugqivela wu hetelele hi nxaxamelo wa swiphemu swinharhu lowu nge “Rito Ra Xikwembu Ra Hanya,” leyi seketeriweke eka Vaheveru 4:12. Xivulavuri xo sungula xi kombise leswaku ra hanya hikuva “Ri Nyika Matimba Lama Hundzulaka.” Namuntlha, hambi loko ku ri eminkarhini ya Bibele, hi na swikombiso swo tala leswi kombisaka ndlela leyi ku tshemba Rito ra Yehova swi vangeleke vanhu ha kona ku endla ku cinca lokukulu evuton’wini bya vona naswona ku va nyike matimba yo chumayela handle ko chava.

Xiphemu xa vumbirhi xa nxaxamelo ehenhleni ka Rito ra Xikwembu xi kombise leswaku “Ri Kariha Ku Tlula Tlhari Rihi Na Rihi Ra Matlhelo Mambirhi.” Ri hi pfuna ku hlanhlelela tidyondzo ta mavunwa ta le Babilona. Ri tlhela ri hi pfuna ku ‘hambanisa moya (soul) ni moya (spirit)’ hi leswi ri hi pfunaka ku vona ku hambana exikarhi ka swiendlo swa hina ni minsusumeto ya hina ya xiviri. Hi ku tirhisa “tlhari” hi ndlela leyi, hi ta va lava tsakisaka swinene eka Yehova Xikwembu kutani hi va na ku rhula ni van’wana ni le ka hina hi hexe.

Xiphemu xo hetelela xi kombise leswaku Rito ra Xikwembu ra hanya hikuva “Ri Tiyisa Ni Ku Susumeta Timbilu Terhu.” EBibeleni, rito “mbilu” hakanyingi ri tirhisiwa hi ku fanekisela naswona ri vula munhu wa le ndzeni la kombisiwaka emianakanyweni ni le ka timfanelo ta minsusumeto ya hina. Rito ra Xikwembu ri tiyisa timbilu ta hina hi ku paluxa timfanelo ta xona to hlamarisa hi swiendlo swa xona eka vanhu. Rirhandzu ra Xikwembu ro pfumala vutianakanyi ri hi susumetela ku xi ringisa. Eka switsundzuxo swa xona swo hetelela, xivulavuri xi endle mpfuxeto wa rhekhodo yo humesa Tibibele ta Sosayiti ya Watch Tower ivi xi nyanyula vayingiseri hi ku tivisa ku humesiwa ka New World Translation yo saseka yo olova ya mpimo wo nghena exikhwameni.

“Tshemba Yehova Hi Mbilu Ya Wena Hinkwayo”

Xihloko lexi xa Sonto lexi tekiweke eka Swivuriso 3:5, xi kambisisiwe hi nkulu la pfuleke nongonoko ivi a hlamusela ndzimana ya siku rero. Kutani ku ta nkulumo leyi kambisisaka munhu leyi nge “Xana U Honisa Swilo Swo Hlawuleka?” Misava yi tivona yi nga xi koloti nchumu Xikwembu, kambe tanihi Timbhoni ta Yehova, ha swi tiva leswaku ku kuma ku amukeriwa hi yena, hi fanele ku ringisa vanhu va yena vo tshembeka va khale hi ku kombisa ku tlangela eka swilo swo hlawuleka. Xivulavuri xi hlamusele 13 wa swona, laha exikarhi ka swona a ku ri na vito ra Yehova, Rito ra yena, moya wa yena lowo kwetsima, nawu wa yena, nhlengeletano yakwe leyi vonakalaka, vuxaka bya hina na Xikwembu, minhlangano ya hina ni lunghelo ra hina ra ntirho. Loko hakunene hi tlangela swilo leswi swo hlawuleka, hi ta swi rhangisa evuton’wini bya hina, hi tshemba Yehova hi laha ku teleke, naswona hi hakeriwa hi yena.

Ku landzele nkulumo leyi himetelaka kunene leyi nge “Venga Mahanyelo Lama Nyenyetsaka Ya Misava Hi Laha Ku Heleleke.” Hikwalaho ka ku kongoma ka yona, yi hlamusele switsundzuxo swo tanihi ku, “Leswi a hi swi pfumala!” Tanihi leswi vubihi byi tolovelekeke, Vakriste va fanele va tilangutela ku sasekisa ku tikhoma loko biha ni vukari. (2 Timotiya 3:1-5) Hikwalaho, a hi fanelanga hi hlalela kumbe hi yingisa ku haxiwa ko tano eka TV kumbe eka xiya-ni-moya, naswona a hi fanelanga, ku hlaya ha swona eka timagazini. Hakunene, a hi lavi hambi ku ri ku va lava ehleketaka ha swona. ‘Vakriste va ntiyiso lava navelaka ku hlayisa vuxaka lebyinene na Yehova hi ku olova va nga ka va nga khumbi swifaniso leswi nga ambalangiki,’ hambi ku ri kantsongo!

Nongonoko wa Sonto nimixo wu hetelele hi drama ya Bibele yo tsakisa leyi nge Yehova U Kutsula Lava Vitanaka Vito Ra Yena. Yi vulavule hi swiendlakalo swo hlayanyana evuton’wini bya Yoxuwa. Hi xiviri, yi kombise ndlela leyi vaaki va le Yeriko a va fanele va ku langute ha yona ku macha ka vavanuna va nyimpi va Israyele va rhendzela muti siku na siku. Nakambe lexi tlakusiweke a ku ri ripfumelo lerikulu ra Rahava, leri endleke leswaku a ponisiwa yena ni vandyangu wa yena. Eku heteleleni, hinkwavo va vutisiwile: ‘Xana u na ripfumelo leri tiyeke ni ku tiyiseka loku Yoxuwa ni vanghana vakwe va vurhena a va ri na kona? Loko swi ri tano, hi nga tiyiseka leswaku hi ta hlanganyela eku hluleni ko hetelela ka Yehova eka valala va yena.’

Xivono xa le rivaleni xa Ntsombano wa Muganga wa “Tshemba Yehova” xi te ni nkulumo leyi nge “Eminkarhini Ya Hina Yo Chavisa, I Mani Loyi U Nga N’wi Tshembaka Hakunene?” Yi hlamusele kahle yinhla ya leswaku vanhu hakunene va lava xihlovo xa ku xi tshemba! Hi laha ku twisisekaka, yi kombise vuphukuphuku bya ku tshemba vanhu. Hikwalaho, Rito ra Xikwembu ri hi tsundzuxa leswaku hi tshemba Yehova naswona ri hi nyika swivangelo swo tiya swo endla tano. Hi fanele ku n’wi tshemba hikwalaho ka timfanelo takwe ni hikwalaho ka rhekhodo ya yena ya loko a kutsula lava n’wi tshembeke, Hosi Ezekiyasi i xikombiso lexikulu. Ku nga ri khale nkutsulo lowu fanaka wu ta tokotiwa hi lava swiendlo swa vona swi kombisaka ku tshemba Yehova.

“Hambetani Mi ‘Hanya Hi Ku Rhula’” lexi a ku ri xihloko xa nkulumo leyi landzeleke endzhakunyana. Ku hanya hi ku rhula swi vula ku gingiriteka u kondletela ku rhula. Nakambe swi vula ku va ni ku rhula hi hexe hi ku hlayisa ripfalo lerinene. Hi ku kombisa mihandzu ya moya wa Xikwembu, ngopfu-ngopfu rirhandzu ni ku tikhoma, hi ta swi kota ku hanya hi ku rhula ni mindyangu ya hina vini ni vamakwerhu va xinuna ni va xisati ebandlheni.

A ku na ku kanakana hi yinhla ya leswaku ntsombano lowu wu hi fuwise hinkwerhu leswaku hi “Kongomana Ni Vumundzuku Hi Ku Tshemba Loku Teleke Eka Yehova,” xihloko xa nkulumo yo pfala. Mawaku ndlela leyinene leyi yi komiseke nongonoko ha yona! Xivulavuri xi kandziyise leswaku siku na siku hi fanele ku tshemba Yehova hi timbilu ta hina hinkwato, hi n’wi tsundzuka etindleleni ta hina hinkwato, hi n’wi pfumelela a lulamisa tindlela ta hina. (Swivuriso 3:5, 6) Lava a va ri kona entsombanweni va tlangerile ku twa tinkulumo letintshwa ta le rivaleni ta 16, ni ku kandziyisiwa nakambe ka xihloko lexi vulavulaka hi ngati lexi humeleleke eka Awake! ni lexi nga ta kumeka leswaku hi ta xi nyika tin’anga ta hina. Ina, naswona hi tsakile ku tiva hi ta ku humesiwa ka drama yin’wana ya Bibele eka khasete ni ku humesiwa ka swiphephana swin’wana swinharhu!

Hinkwavo lava a va ri kona eNtsombanweni wa Muganga wa “Tshemba Yehova” va akiwile swinene emoyeni. Sweswi va lulamele ku kongomana ni vumundzuku hi ku tiyiseka loku teleke eka Tata wa vona wa le matilweni. Kutani hinkwavo hi mfanelo va khutaziwe hi xikhongotelo xo pfala: “Leswi hi langutaneke ni vumundzuku, onge hinkwerhu hi vun’we hi nga kombisa hi ndlela ya hina ya vutomi leswaku hi ‘tshemba Yehova.’”

[Chati leyi nga eka tluka 26]

Mintsombano Ya Muganga Yo Hambana-hambana Ya “Tshemba Yehova”

Lava veke kona Lava Khuvuriweke

Austria 24 686 360

Brazil 442 731 7 626

British Isles 156 417 1 225

Colombia 82 321 1 852

Denmark 23 029 200

Finland 26 144 284

France 138 683 2 705

Hong Kong 2 661 49

Ireland 4 326 61

Italy 221 227 5 496

Jamaica 18 540 184

Japan 232 904 3 416

Korea 82 296 2 013

Malaysia 1 154 15

Norway 12 703 218

Portugal 55 057 1 074

Puerto Rico 49 953 377

Spain 105 591 2 394

Sweden 30 099 312

Switzerland 19 459 261

Trinidad 10 649 132

United States 1 288 313 13 562

Venezuela 100 777 1 664

Zimbabwe 45 544 580

[Swifaniso leswi nga eka tluka 25]

Tidrama leti tlhontlhaka miehleketo ti kandziyise xilaveko xo tshemba Yehova

F. W. Franz, xirho xa Huvo leyi Fumaka ya Timbhoni ta Yehova, a vulavula ni vayingiseri lava rhiyeke ndleve va ntsombano

[Xifaniso lexi nga eka tluka 26]

Vo tala va kombise ku tshemba Yehova hi ku khuvuriwa ku kombisa ku tinyiketa ka vona eka yena