Mintsombano Ya Muganga Ya “Vululami Bya Xikwembu”

OHO ku xaniseka lokukulu loku nga kona emisaveni hikwalaho ka ku pfumaleka ka vululami! Ku tirhisiwa ka matimba hi ndlela yo biha loku hangalakeke eka vafumi van’wana va tipolitiki ku vange maxangu yo tala lama nga fanelangiki. Ku xaviselana ka makwanga ku tshikilela vanhu, leswi vangeke maxangu yo tala. Kutani ku na ntshikilelo wa varhangeri va vukhongeri namuntlha lava fanaka ni vanghana va vona esikwini ra Yesu, ni lava ha vona a nga te: “Va boha mindzhwalo leyo tika, va yi rhwexa emakatleni ya vanhu, kasi vona a va lavi ni ku yi ninginisa hi ritiho.” (Matewu 23:4) Nakambe ku na ku tirhisiwa ko tala ka matimba hi ndlela yo biha ni vuhomboloki lebyi vangiwaka hi swona emindyangwini.

Vurunguri byi komba leswaku a swi ta va leswi nga twaliki ku languta eka vanhu lava nga hetisekangiki, hambi loko vona va tiyimisele ku endla leswinene, ku lunghisa timhaka to tano. Kambe ematilweni ku na Munhu la Tlakukeke ni Muavanyisi, Yehova. I Xikwembu xa vululami. Muxe u yimbelele hi mfanelo a ku: “Yehova i Ribye le’ro tiya; mitiro ya yena yi hetisekile; Hikuv̌a tindlela hikwato ta yena ti lulamile; I Šikwembu šo ṭhembeka, ši nga ri na nanḍu; Ši ni v̌unene, ši lulamile.”—Deuteronoma 32:4.

Yehova i khale a byi lehisele mbilu vuhomboloki hinkwabyo bya misava leyi, kambe a nga ka a nga endli tano hi laha ku nga heriki. Ku na nkarhi lowu hlawuriweke wa yena wo teka goza kutani vuprofeta lebyi kumekaka eka Esaya 14:4-7 byi ta hetiseka, lebyi tshembisaka leswaku tinxaka hinkwato ta mimfumo ya ntshikilelo ti ta hela kutani ‘misava hinkwayo yi ta wisa.’

Hikwalaho ka ripfumelo ra tona leri tiyeke eka switshembiso leswi swa vuprofeta, Timbhoni ta Yehova ti tsakela ku chumayela ekule ni le kusuhana leswaku hi ku anghwetla Yehova u ta tisa makumu eka mintshikilelo hinkwayo, vuhomboloki ni ku pfumaleka ka vululami hi ku tisa vulawuri bya Mfumo lebyi heleleke. Kutani ku hava loyi a nga ta tisa ku karhateka kwihi na kwihi kumbe ku herisa, hikuva ‘ku tiva Yehova ku ta eneta misava, tanihi leswi mati ma funengetaka vuento bya lwandle.’—Esaya 11:9.

Ku tiyisa ripfumelo ra hina eku avanyiseni lokunene ka Yehova, mintsombano ya muganga ya 1988 yi ta va ni xihloko lexi nge “Vululami Bya Xikwembu.” Ku kandziyisa xihloko lexi a swi nga hi susumeteli ku tivisa ntshembo wa ku lulama ka Xikwembu ntsena kambe swi ta hi khutazela ku endla hi ku twanana ni vululami bya Xikwembu eka mintirho ya hina hinkwayo.

Tanihi malandza ya Yehova, hinkwerhu ka hina ha swi tiva leswaku hikwalaho ka xidyoho xa vatswari va hina vo sungula, ku voyamela ka hina ku le ka vutianakanyi, eku pfumaleni ka vululami. Kutani hi ta tlangela rungula lerinene leri hi nga ta ri kuma hi tidyondzo, swikombiso, ku vulavurisana ni tidrama ta Bibele leti nga ta kandziyisa xilaveko xo seketela vululami bya Xikwembu. Leswi swi fambelana ni ku hlayisa xileriso eka Mikea 6:8, xo ‘va ni vululami, ku rhandza tintswalo ni ku famba hi ku titsongahata ni Xikwembu xa hina.’ Leswi swi tisa ku twanana, ku aneriseka ni ntsako; nakambe swi pfuna ku yisa ku chumayeriwa ka mahungu lamanene emahlweni emisaveni hinkwayo.

Mhaka leyi xiyekaka ya mintsombano leyi ku ta va leswaku nhlayo ya madoroba-nkulu yi ta hlanganisiwa hi riqingho eka tinkulumo to hlawuleka ta swirho swa Huvo leyi Fumaka ya Timbhoni ta Yehova. Nakambe, eka mintsombano leyi varhumiwa emisaveni hinkwayo va ta lunghiseleriwa swo famba hi swona; nakambe leswi swi ta endla leswaku va kota ku endzela maxaka ya vona nakambe.

Hi ku rhandza ka Yehova, Mintsombano ya Muganga ya “Vululami Bya Xikwembu” yi ta sungula hi Ravumune hi 1:30 p.m. naswona yi ta hela hi 4:00 p.m. hi Sonto. A hi lunghiseni timhaka ta hina leswaku hi ta va kona loko nongonoko wu sungula ivi hi pulana ku tshama ku kondza ku fika risimu ni xikhongelo xo pfala siku na siku. Tanani ni ku navela lokunene ka swakudya swa moya naswona mi tiyimisele ku tsala tinotsi. Tiyisekani leswaku Yehova u hi hlayisele “swakudya” swa swilo leswinene leswi nga ta hi tiyisa ni ku hi nyanyulela ntirho lowu nga emahlweni.—Esaya 25:6; Risimu ra Tinsimu 2:4.

Ina, un’wana ni un’wana a a te a tiyimisele ku kuma minkateko leyikulu swinene ya moya eNtsombanweni wa Muganga wa “Vululami Bya Xikwembu.”