“Yehova I Murisi Wa Mina”
“Yehova i murisi wa mina; nḍi nga ka nḍi nga pfumari ntšhumu.”—PSALMA 23:1.
1, 2. A yi ri yihi yin’wana ya mintirho ya Davhida, naswona u endle tipisalema tingani ke?
ANAKANYA xivono lexi: Mavuthu ya Vafilista ya kongomane ni vuthu ra Israyele. Goliyati, xihontlovila xa Mufilista, a nga chavi nchumu. Jaha, leri hlomeke hi xipelupelu ni maribye ntsena, ri tsutsumela ku ya hlangana na yena. Ribye leri pakanisiweke kahle ri tlhava mombo wa xihontlovila lexi ivi ri xi dlaya. Xana jaha leri a ku ri mani ke? A ku ri Davhida, murisi loyi a kumeke ku hlula loku ku hlamarisaka hi mpfuno wa Yehova Xikwembu.—1 Samuel, ndzima 17.
2 Hi nkarhi lowu faneleke, jaha leri ri ve hosi ya Israyele, ri fuma malembe ya 40. A a ri muchayi la nga ni vutshila wa haripa naswona u qambe swiphato swo tala ehansi ka ku huhuteriwa hi Xikwembu. Davhida u tlhele a tsala tipisalema leto xonga leti tlulaka 70 leti ku nga xihlovo xa xikhutazo ni vuleteri lebyikulu eka vanhu va Yehova namuntlha. Leyi tivekaka ngopfu eka leti i Psalma 23. Ha yini u nga pfuli Bibele ya wena ivi u landzelela loko hi teka dyondzo ya ndzimana hi ndzimana ya pisalema leyi?
Yehova, Murisi Wa Rirhandzu
3. (a) Hi le ka makhamba wahi laha Davhida a nga nghenisa vutomi bya yena ekhombyeni leswaku a sirhelela tinyimpfu ta yena? (b) Yehova i Murisi wa hina hi ku twisiseka kwihi ke?
3 “Yehova i murisi wa mina.” (Psalma 23:1) Tanihi murisi la nga ni ntokoto, Davhida a a tiva ku rhangela, ku dyisa ni ku sirhelela tinyimpfu. Hi xikombiso, u sirhelete tinyimpfu takwe hi xivindzi eka nghala hi khamba rin’wana ni le ka bere hi khamba rin’wanyana. (1 Samuel 17:34-36) Tinyimpfu ta Davhida ti tshembe murisi wa tona hi laha ku heleleke. Kambe loko a ringanisiwa na Yehova, yena hi byakwe a a ri nyimpfu. Leswi Davhida a tweke a sirheletekile eku khathaleleni ka rirhandzu ka Xikwembu, u swi kotile ku: “Yehova i murisi wa mina.” Xana wa wu tsakela ntlhaveko lowu wa nsirhelelo ehansi ka Yehova Xikwembu, Murisi Lonkulu? Hakunene wa fambisa, a phamela ni ku sirhelela vagandzeri vakwe lava fanaka ni tinyimpfu namuntlha. Ku tlula kwalaho, tanihi vakulu lava vekiweke emabandlheni ya Timbhoni ta Yehova, varisi-ntsongo lava tshembekaka, va rirhandzu va hlayisa tinyimpfu hi ku chivirika.—1 Petro 5:1-4.
4. Xana xiyimo xa hina namuntlha xi fana ni lexiya xa Vaisrayele emananga hi ndlela yihi?
4 “Nḍi nga ka nḍi nga pfumari ntšhumu.” Ehleketa khwatsi hi nhlamuselo leyi. Hikwalaho ka ku khathalela ka Yehova ka rirhandzu, xana a wu na ntlhaveko lowunene wa ku rhula ni ku tiyiseka? Xana wa swi tsundzuka leswi humeleleke eka Vaisrayele loko va tsendzeleke malembe ya 40 emananga? Phela, Xikwembu xi lunghiselele swilaveko swa vona hinkwaswo swa xisekelo! Swa fana ni namuntlha. Malandza ya Yehova lama tshembekaka a ma pfumari nchumu. Vo tala va nga phindha marito lawa ya Davhida lama huhuteriweke: “A nḍi ri lo’ntŝha, kutani nḍi dyuharile, kambe a nḍi v̌onanga l’a lulameke a ṭhikiwa; ni v̌ana v̌a yena v̌a kombele v̌uŝa bya v̌ona.” (Psalma 37:25) Namuntlha, ndzalo ya swakudya swa moya yi lunghiseleriwa hi ku tirhisa “nandza lowo tshembeka, lowa vutlhari.” (Matewu 4:4; 24:45-47) Ku tlhandlekela eka minhlangano yi nga ri yingani hi vhiki, hi na Bibele, timagazini ta Xihondzo xo Rindza ni Awake! na tibuku tin’wana leto tala. Hambi ku ri ematikweni lawa ntirho wo chumayela wa Timbhoni ta Yehova wu yirisiweke, mphamelo wa swakudya swa moya wu amukeriwa nkarhi na nkarhi. Tinyimpfu ta Yehova a ti pfumali nchumu!
5. Ha yini tinyimpfu ta Yehova namuntlha ti rhulile ni ku ntshunxeka, naswona hi vuyelo byihi ke?
5 “O nḍi wisisa e madyelweni ya rihlaza.” (Psalma 23:2) A ku ri ni madyelo lamakulu ya rihlaza emitini yo tala eIsrayele wa khale. Tanihi murisi wa rirhandzu manuku u yise tinyimpfu takwe emadyelweni lamanene, lama hlayisekeke, kutani Yehova u khathalela tinyimpfu takwe hi ndlela yoleyo namuntlha. Mupisalema u ri: “Kutani hina hi tiko leri risiwaka hi yena.” (Psalma 79:13; 95:7) Tinyimpfu ta xiviri ta tsaka loko ti xurhile naswona ti kota ku wisa emasaneni ya dyambu. Tinyimpfu ta Yehova namuntlha ti rhulile ni ku ntshunxeka hikuva ti tshemba varisi lava vupfeke—valanguteri lava dyondzisiweke emabandlheni ni le swifundzeni. Hikwalaho, mintlhambi ya moya ya andza. Vanhu vo tala lava eku sunguleni va xanisiweke hi varisi va mavunwa va Babilona Lonkulu sweswi va tsake ngopfu naswona va enerisekile tanihi tinyimpfu ta Yehova.
6. Yehova u hi ‘fambisa kusuhi ni mati layo rhula’ hi ndlela yihi ke?
6 “O nḍi fambisa kusuhi ni mati la’yo rula.” Le Israyele murisi a a fanele ku kongomisa ntlhambi wakwe exidziveni kumbe exinambyanini xa mati. Kambe hakanyingi a swi nonon’hwa ku kuma mati hi nguva leyo kala mpfula. Namuntlha, Yehova ‘u hi fambisa kusuhi ni mati layo rhula’ hi ku hi nyika mati ya ntiyiso hi ndzalo leyikulu. (Ringanisa Ezekiel 34:13, 14.) Kutani muprofeta Esaya u nyika xirhambo lexi xo nyanyula a ku: “Ṅwina hikwenu la’v̌a nga ni tora, tanani matini.” (Esaya 55:1) Hi ku nwa mati lawa ya moya, tinyimpfu ti kuma ku sirheletiwa eku avanyiseni lokukulu loku nga ta ta ehenhla “ka lava nga tiviki Xikwembu, ni ka lava nga yingisiki Evangeli.”—2 Vatesalonika 1:8; Nhlavutelo 7:16, 17.
7. Hi rini laha ku phyuphyisa ka moya loku humaka eka Yehova ngopfu-ngopfu ku pfunaka kona, naswona hi le hansi ka swiyimo swihi laha tindzimana ta Bibele leti nhlokohatiweke ti nga tikombaka ti ri mpfuno lowukulu?
7 “O hanyisa moya wa mina.” (Psalma 23:3) Loko hi karhele, hi ri ekhombyeni, hi hetiwe matimba kumbe hi langutane ni ku kanetiwa lokukulu, Yehova wa hi phyuphyisa hi ku tirhisa Rito ra yena. Hikwalaho, i swinene eka Vakriste ku titoloveta ku hlaya xiphemu xa Bibele siku na siku. Wa swi endla leswi ke? Van’wana va kuma swi pfuna ku nhlokohata tindzimana tin’wana, to tanihi Eksoda 34:6, 7 kumbe Swivuriso 3:5, 6. Ha yini leswi swi pfuna ke? Phela, loko nxaniso wo humelela naswona u ri hava Bibele ekusuhi, mianakanyo ya Matsalwa leyi chavelelaka yi nga ku tiyisa hi ku hatlisa. Vamakwerhu vo tala lava avanyiseriweke ku ya ejele kumbe tikampa ta khotso hikwalaho ka ku yimela milawu leyi lulameke va tiyile va phyuphyisiwe ni ku tiyisiwa swinene hi ku tsundzuka matsalwa lama nhlokohatiweke. Ina, Rito ra Xikwembu ri nga “ṭakisa mbilu” ni ku “hanyanyisa mahlo.”—Psalma 19:7-10.
8. Xana swa olova ku landzelela ‘tindlela leto lulama,’ kambe ku endla tano swi yisa eka yini?
8 “O nḍi fambisa e tindleleni le’to lulama.” Tindlela leto lulama ta nonon’hwa ku ti landzelela, kambe ti yisa evuton’wini. Hi laha Yesu a vuleke ha kona: “Nyangwa leyi yisaka evuton’wini yi khumile swinene, ni ndlela leyi yaka kona yi larile.” (Matewu 7:14) Muapostola Pawulo u phofule mianakanyo leyi yelanaka hi ku byela vadyondzisiwa va le Listra, Ikoniya na Antiyoka a ku: “Emfun’weni wa Xikwembu, hi fanele ku nghena hi maxangu layo tala.” Naswona entiyisweni Pawulo a a swi tiva leswi a a vulavula ha swona. Emahlweninyana ka sweswo, a a khandliwe hi maribye eListra ivi a siyiwa leswaku a fa!—Mintirho 14:19-22.
9. (a) Yehova u hi ‘fambisa etindleleni leto lulama’ hi ndlela yihi? (b) Xana Psalma 19:14 yi nga va mpfuno hi ndlela yihi ke? (c) I matsalwa wahi lama nga hi pfunaka ku papalata mintlhamu ya rimbewu lero biha?
9 Yehova ‘u hi fambisa etindleleni leto lulama’ hi ku hi kongomisa ni ku hi dyondzisa hi Rito ni nhlengeletano yakwe. Kambe vanhu vo tala va landzelela gondzo leri ahlameke ni leri anameke leri “yisaka eku loveni.” (Matewu 7:13) Rigangugangu leri nga lawulekiki ni ku hangalaka ka xihatla ka ntungu wa AIDS swi tiyisa xilaveko xa leswaku Vakriste va papalata vanghana lavo biha. (1 Vakorinto 15:33) Hi fanele ku tlhela hi khathalela ku sivela mianakanyo ya hina ku tsendzeleka etindleleni leto biha. (Psalma 19:14) Emhakeni yoleyo, minkarhi hinkwayo a hi tirhiseni ndzayo leyinene leyi Rito ra Xikwembu ri yi nyikaka malunghana ni rimbewu ni ndlela leyi hi nga papalataka mintlhamu yo tala ya vunghwavava ha yona.—1 Vakorinto 7:2-5; Vaefesa 5:5; 1 Vatesalonika 4:3-8.
10. (a) I vutihlamuleri byihi lebyi Timbhoni ta Yehova ti nga na byona malunghana ni vito ra Xikwembu? (b) Ha yini vanhu va misava hakanyingi va hi sola? (c) Hi le hansi ka swiyimo swihi leswi Yehova a nga ta hi pfuna eka swona?
10 “Hikwalaho ka v̌ito ra yena.” Timbhoni ta Yehova ti na vutihlamuleri lebyikulu bya ku twarisa vito ra Xikwembu ni ku ka ti nga tisi ndzhukano ehenhla ka rona. (Matewu 6:9; Eksoda 6:3; Ezekiel 38:23) Vanhu vo tala va misava va hatlisela ku hehla vanhu va Yehova. Loko leswi swi endliwa hikwalaho ka xiyimo xa hina xa milawu ya Bibele yo tanihi vukala-tlhelo kumbe ku hlawuleka ka ngati, ripfalo ra hina ri basile. Kambe loko leswi swi humelela hikwalaho ka ku dyoha ka hina, a hi ta va hi xumbadza Yehova. (Esaya 2:4; Mintirho 15:28, 29; 1 Petro 4:15, 16) Kutani onge hi nga venga leswo biha. (Psalma 97:10) Loko hi fanela ku xanisiwa, Yehova minkarhi hinkwayo u ta hi pfuna ni ku hi sirhelela hikwalaho ka vito ra yena.
Yehova U Sirhelela Tinyimpfu Takwe
11. Xana ‘nkova wa xinyami lexikulu’ ku vuriwa yini, naswona leswi swi nga hi tsundzuxa yini malunghana na Yesu?
11 “Ni loko ndzi famba enkoveni va xinyami lexikulu, a ndzi chavi nchumu xo biha.” (Psalma 23:4, NW) Ku hundzuluxela ka Isaac Leeser ku ri: “Ni loko ndzi famba enkoveni wa ndzhuti wa rifu, a ndzi nga chavi nchumu xo biha.” Leswi swi nga ha hi tsundzuxa magova lama enteke kumbe minkova leyi khulukaka yi suka etintshaveni ta Yudiya etlhelweni ra vupela-dyambu bya Lwandle leri Feke. Nkova kumbe riwa laha swiharhi leswi hanyaka hi nyama swi tumbelelaka emindzhutini i ndhawu leyi nga ni khombo eka tinyimpfu. Davhida u hundze hi le minkoveni yo tala leyi nga ni khombo evuton’wini bya yena, a kongomane na rifu. Kambe leswi Xikwembu a xi n’wi fambisa, a a tiyile naswona a nga pfumelelanga ku chava loku nga lawulekiki. Hi fanele ku va ni ntshembo lowu fanaka eka Yehova. Nhlamuselo leyi ya ‘xinyami lexikulu’ yi nga tlhela yi hi tsundzuxa vuprofeta bya Esaya lebyi nge: “La’v̌a akeke tikweni ra nḍuti wa rifu v̌a v̌oningiwa hi ku v̌onakala.” Matewu u kombetele eka vuprofeta lebyi ivi a byi tirhisa eka Yesu Kriste, a ku: “Vanhu lava a va ri emunyameni, va vonile ku vonakala lokukulu; lava a va tshama etikweni ra ndzhuti wa rifu, va humeleriwe hi ku vonakala.” Hi ndlela yihi ke? Hi tsima lerikulu ro chumayela leri Yesu a ri kongomiseke.—Esaya 9:2; Matewu 4:13-16.
12. (a) Xana malandza ya Yehova ya tiyisela ku xanisiwa hi ndlela yihi ematikweni yo tala, naswona hi vuyelo byihi? (b) Petro u khutaze Vakriste vo sungula lava xanisiweke hi ndlela yihi?
12 Davhida ‘a nga chavanga nchumu xo biha.’ Nchumu lowu fanaka i ntiyiso hi malandza ya Yehova namuntlha, hambi leswi ma nga tolovelekangiki emisaveni leyi yo biha leyi fumiwaka hi Sathana. (1 Yohane 5:19) Vanhu vo tala entiyisweni va va venga, naswona va xanisiwa hi tihanyi ematikweni yan’wana. Kambe ematikweni lawa va hambeta va chumayela mahungu lamanene ya Mfumo, hambi leswi va nga ntshunxekangiki hi ndlela leyi va toloveleke ku endla ha yona. Va swi tiva leswaku Yehova u na vona naswona u ta va sirhelela. (Psalma 27:1) Nhluvuko lowunene wa karhi wa endliwa ematikweni yo tala laha ntirho wa Mfumo wu faneleke ku endliwa hi ku tumbela. Ematikweni yo tano, Timbhoni ta Yehova ti phindha marito ya pisalema lama nge: “Yehova o nḍi yimele, a nḍi nga tšhav̌i ntšhumu. Munhu a nga nḍi endla yini?” (Psalma 118:6) Timbhoni leti ti le xiyin’weni lexi fanaka ni lexiya xa Vakriste vo sungula lava muapostola Petro a va tsaleleke marito lawa ya khutazaka lama nge: “Ni loko mi twisiwa ku vava hikwalaho ka leswo lulama, mi katekile; mi nga chavi vanhu, na swona mi nga karhateki.”—1 Petro 3:14.
13. (a) I ku cinca kwihi loku tsakisaka loku humelelaka eka Psalma 23:4, naswona hikwalaho ka yini? (b) Vakriste va nga hlula ku chava ka vona hi ndlela yihi ke?
13 “Hikuv̌a u na mina.” Wa nga xiya mhaka leyi tsakisaka exivulweni lexi. Mupisalema la huhuteriweke u cince a suka eka munhu wa vunharhu a ya eka wa vumbirhi. Ematshan’wini yo vulavula hi Yehova tanihi ku “o” Davhida sweswi u tirhisa risivi “u.” Ha yini ke? Hikuva i swa nkoka swinene. Khombo ri hi tshineta kusuhi na Yehova, Tata wa hina wa rirhandzu. Manuku hi tiphina hi vuxaka lebyi enteke swinene na yena. Hi ku tirhisa xikhongelo ni ku kombela, hi nga n’wi kombela ku hi sirhelela, naswona xisweswo swi hlula ku chava ka hina.—Ringanisa Sofonia 3:12.
14. (a) Xana i switirho swihi leswi varisi a va ri na swona enkarhini wa Davhida, naswona va swi tirhise njhani? (b) Varisi va Vukriste namuntlha va sirhelela ntlhambi hi ndlela yihi ke?
14 “Nhonga ya wena ni šongotelo ra wena, hi ŝona le’ŝi nḍi tiyisaka.” Rito ra Xiheveru leri nge sheʹvet, leri hundzuluxeriweke va ku “nhonga,” ri nga vula xigiya xa murisi. Nhonga kun’we ni xongotelo swi nga tirhisiwa ku sirhelela ni ku yimela kumbe ku kombisa ku laya. Entiyisweni, switirho leswi a swi ta tirha ngopfu eku beni ka swiharhi leswi bvanyangetaka swo tanihi timhisi ni tinyoka. Xigiya xa murisi na xona a xi ta tirhisiwa ku tlherisela nyimpfu etlhelweni leri lulameke kumbe hambi ku ri ku tlherisa nyimpfu leyi hambukelaka kusuhi swinene ni ndhawu leyi nga welaka ka yona ivi yi vaviseka. Namuntlha, Yehova u tirhisa varisi lava tshembekaka, vakulu emabandlheni, lava sirhelelaka ntlhambi eka vabvanyangeti va moya vo tanihi vagwinehi. Kumbe vakulu va nga ha fanela ku tshinya lava sungulaka ku kayivela ku va kona eminhlanganweni kumbe ku hambuka emahanyelweni ya Vukriste.
Nkhuvo Lowu Fuweke eXikarhi Ka Valala
15. (a) I ku hundzuka kwihi ka nkoka ka xikombiso loku humelelaka eka Psalma 23:5? (b) I timhaka tihi leti kombaka leswaku vanhu va Yehova va phameriwa kahle emoyeni, ku hambana na vamani?
15 “U nḍi lungisela tafula e mahlweni ka v̌alala v̌a mina.” (Psalma 23:5) Laha hi ni ku hundzuka ka nkoka ka xikombiso, ku suka eka murisi ku ya eka n’wini wa muti. Tanihi n’wini wa muti wa malwandla swinene, Yehova u lunghiselela ndzalo ya swakudya swa moya hi ku tirhisa ntlawa wa “nandza” la totiweke. (Matewu 24:45) Hambi leswi hi hanyaka emisaveni leyi nga ni dzolonga, hi wundliwa kahle. Xihondzo xo Rindza xi humesiwa hi tindzimi leti tlulaka dzana leswaku vanhu lava tshamaka etindhawini to hambana-hambana to tanihi Afrika Dzonga, Greenland, Swihlala swa Solomon na le India va ta wundliwa emoyeni. Handle ka sweswo, kwalomu ka mabandlha ya 55 000 emisaveni hinkwayo ma ni swivulavuri ni valeteri va le rivaleni lava dyondzisiweke kahle ni tindhawu letinene ta minhlangano, ku katsa madzana ya Tiholo ta Mfumo letintshwa. Tidyondzo ta le makaya ta Bibele leti tlulaka 3 000 000 ta karhi ta fambisiwa ku pfuna vanhu lava fanaka na tinyimpfu. Hi laha ku hambaneke, lava nga eBabilona Lonkulu, mfumo wa misava wa vukhongeri bya mavunwa, va ni ndlala.—Esaya 65:13.
16. (a) Ku hambana ni wansati wa mudyohi, Mufarisi un’wana u tsandzeke ku endlela Yesu yini? (b) I mafurha ya njhani lama Yehova a ma nyikaka malandza yakwe lama tshembekaka namuntlha?
16 “U totile nhloko ya mina hi mafura.” Le Israyele wa khale n’wini wa muti wa malwandla a a lunghiselela mafurha yo tota tinhloko ta vaendzi va yena. Lexi tsakisaka, eka khamba rin’wana Yesu a a ri muendzi wa Mufarisi la nga totangiki nhloko ya Yesu hi mafurha kumbe ku n’wi nyika mati yo hlantswe milenge ya yena. Hi nkarhi wolowo, wansati wa mudyohi u hlantswa milenge ya yena hi mihloti yakwe ivi a yi tota hi mafurha layo nun’hwela, lama hlawulekeke. (Luka 7:36-38, 44-46) Kambe Yehova i n’wini wa muti wa malwandla swinene! U nyika malandza yakwe lama tshembekaka “e mafura ya ku ṭaka” ya moya. (Esaya 61:1-3) Ina, vanhu va Yehova entiyisweni va tsakile namuntlha.
17. (a) ‘Ndzheko lowu tatiweke kahle’ wu vula yini ke? (b) Xana Yehova namuntlha u lunghiselela malandza ya yena ‘ndzheko lowu tatiweke kahle’ hi ndlela yihi ke?
17 “Kutani nḍeko wa mina wu khapa.” Nhlamuselo yin’wana yi ri: “Kutani ndzheko wa mina wu halaka.” (Moffatt) Leswi swi vula ndzalo ya swa moya. Hambi leswi ma nga vuliki ku nwa ku tlula mpimo, marito lawa ma pimanyeta ndzheko wa vhinyo leyinene. Xakunwa lexi xi ni timfanelo ta vutshunguri, tanihi laha swi kombisiwaka ha kona hi xitsundzuxo xa Pawulo eka Timotiya lexi nge: “U nga ha nwi mati ntsena, kambe nwana vhinyonyana, hi leswi u karhatekaka endzeni ka wena ni ku tala ku va ni switlhavatlhava emirini.” (1 Timotiya 5:23) Hi ku twisisa ka moya, vhinyo yi tlhela yi tsakisa timbilu ta hina. (Psalma 104:15) Yehova, Tata wa hina wa rirhandzu, u nyika malandza yakwe lama tshembekaka ndzalo ya swilo leswinene swa moya hi malwandla, ku katsa ni ‘ndzheko lowu tatiweke kahle’ wa ntsako.
18. (a) I vamani lava tiphinaka hi vunene ni tintswalo ta Yehova, naswona xana Psalma 103:17, 18 yi swi kombisa njhani leswi? (b) Xana i ku langutela kwihi loku vangamaka loku nga emahlweni eka lava tshembekaka eka Yehova?
18 “Kunene, vunene ni tintswalo swi ta ndzi landzela hi masiku hinkwawo ya ku hanya ka mina.” (Psalma 23:6, NW) Vunene i xiphemu xa mihandzu ya moya lowo kwetsima wa Yehova. (Vagalatiya 5:22, 23) Vunene ni tintswalo ta Xikwembu swi tsakeriwa hi lava va fambaka endleleni yakwe. (Psalma 103:17, 18) Hi ripfumelo leri tiyeke eka Yehova, vanhu va yena va nga langutana ni ndzingo wun’wana ni wun’wana lowu va kongomanaka na wona. Minkarhi hinkwayo va ni nkateko ni ku khathalela ka yena ka rirhandzu. Naswona ku tshembeka ku fika emakumu ku ta vula vutomi lebyi nga heriki emisaveni leyintshwa. Mawaku langutelo leri hlamarisaka swonghasi!
19. (a) Swi vula yini ku “ṭhama e ndlwini ya Yehova”? (b) Xana nhlengeletano ya Yehova yi endle yini ku kurisa vugandzeri bya ntiyiso namuntlha, naswona ha yini magidi ya vanhu lava tinyiketeleke ya swi teka ku ri lunghelo ku tirha kona ke? (c) I vamani van’wana lava tiyimiseleke ku tirhela Xikwembu hi laha ku nga heriki?
19 “Kutani nḍi ta ṭhama e ndlwini ya Yehova hi masiku hikwawo.” Esikwini ra Davhida xikwetsimisiso xa Yehova a ku ri tabernakela, hikuva tempele a yi nga si akiwa. Leswi mupisalema a a ri ni n’wini wa muti wa musa emianakanyweni, ‘ku tshama endlwini ya Yehova’ a swi vula ku va ni vuxaka lebyinene na Xikwembu tanihi muendzi wa Xona. (Psalma 15:1-5) Namuntlha yindlu yoleyo yi nga fanisiwa ni tempele leyo kwetsima ya Yehova, lunghiselelo ra yena ra vugandzeri lebyi tengeke. Hosi Solomoni u ve ni lunghelo ra ku aka tempele yo sungula ya xiviri, leyi khavisiweke swinene hi nsuku naswona yi akeriwe ku dzunisa Yehova. A ku ri lunghelo lerikulu swonghasi ku tirha kona! Hambi leswi tempele yo tano yi nga ha riki kona, Xikwembu xi na nhlengeletano leyo kwetsima leswaku yi xi dzunisa ni ku kurisa vugandzeri lebyi tengeke. Tanihi ndlela yin’wana yo endla leswi, nhlengeletano ya Yehova yi simeke Makaya ya Bethele ematikweni yo tala. “Bethele” swi vula “Yindlu ya Xikwembu,” naswona magidi ya vanhu lava tinyiketeleke va tirha emiakweni leyi ya le tilweni. Van’wana va vavanuna ni vavasati lava va tirhe hi ndlela leyi “masiku hinkwawo,” va heta vutomi bya vona lebyo tala entirhweni wa Bethele. Timiliyoni ta van’wana, lava nga riki swirho swa ndyangu wa Bethele, va tiyimisele hi laha ku fanaka ku tirhela Yehova hi masiku.
20. (a) Ha yini Psalma 23 ku ri xiphemu xa nkoka xa Matsalwa, naswona xana yi hi pfuna ku hlakulela yini ke? (b) I malunghelo wahi lama yimeleke malandza lama tshembekaka ya Yehova?
20 Psalma ya vu-23 yi fana ni ribye lero vangama leri nga ni swinyeletana swo tala leswi voningaka. Yi kurisa vito leri dzunekaka ra Yehova, Tata wa hina wa rirhandzu wa le tilweni, naswona yi hlavutela ndlela leyi a kongomisaka, a sirheletaka ni ku phamela tinyimpfu ta yena ha yona. Hikwalaho, vanhu vakwe va tsakile, va phameriwa kahle emoyeni, naswona va andza hi xihatla hi nhlayo, hambi ku ri ematikweni lawa ku nga ni ku kanetiwa lokukulu. Psalma 23 yi tlhela yi hi pfuna ku hlakulela rirhandzu leri kufumelaka, leri enteke ni Muvumbi wa hina. Naswona loko hi langutisa ematilweni lama taleke hi tinyeleti, tanihi laha Davhida hakanyingi a a endla ha kona loko a ri karhi a risa ntlhambi wakwe, ha nkhensa leswi Muvumbi wa vuako lebyi byo chavisa a hi khathalelaka tanihi Murisi wa rirhandzu. Hi rirhandzu, u tlhela a hi nyika vutomi lebyi nga heriki emisaveni leyintshwa loko hi hlayisa vutshembeki bya hina eka yena. Swi ta va swinene swonghasi ku hlangana ni malandza lama tshembekaka lama pfuxiweke ya Xikwembu ku fana na Davhida! Naswona mayana lunghelo leronghasi ra ku tirhela Yehova, Murisi Lonkulu, hi laha ku nga heriki!
A Wu Ta Hlamurisa Ku Yini Ke?
◻ Xana Yehova u tikombisa a ri Murisi wa hina wa rirhandzu hi ndlela yihi?
◻ Hi swihi switirho leswi Xikwembu ‘xi hi fambisaka etindleleni leto lulama’ ha swona?
◻ Xana Yehova u ti sirhelerisa ku yini tinyimpfu ta yena?
◻ Xana Xikwembu xi hi lunghiselele tafula exikarhi ka valala va hina hi ndlela yihi ke?