‘Va Ta Tiva Leswaku Hi Mina Yehova’
“Nḍi nga ka nḍi nga pfumeri v̌ito ra mina ro kwetsima e ku onhiwa, matiko ma ta tiv̌a leŝaku hi mina Yehova.”—EZEKIEL 39:7.
1, 2. Hi swi tiva njhani leswaku Yehova a nge ku tiyiseleri makumu ku onhiwa ka vito ra yena leri kwetsimaka ke?
VITO ro kwetsima ra Yehova a ri onhiwile hi Vaisrayele va khale. Leswi buku ya Ezekiyele yi swi veka erivaleni. Kambe vanhu va Vujagana na vona va onha vito ra Xikwembu lexi va vulaka leswaku va xi gandzela.
2 Xana Mulawuri wa Vuako Hinkwabyo u ta tiyiselela ku onhiwa ka vito ra yena hi laha ku nga heriki? Doo, hikuva u te: “Nḍi nga ka nḍi nga pfumeri v̌ito ra mina ro kwetsima e ku onhiwa, matiko ma ta tiv̌a leŝaku hi mina Yehova.” (Ezekiel 39:7; nakambe vona Ezekiel 38:23.) Leswi swi ta vula yini xana? Naswona i tidyondzo tihi leti nga dyondziwaka eka tindzima ta le ndzhakunyana ebukwini ya Ezekiyele ke?
Vuprofeta Byo Avanyisa Van’wana
3. (a) Xana matiko man’wana ma endlise ku yini eku xanisekeni ka Yuda? (b) “Hosi” ya Tir yi susiwe hikwalaho ka moya wihi, naswona leswi swi fanele ku hi khumbisa ku yini xana?
3 Endzhaku ka ku lovisiwa ka Yerusalema, Amon u avanyisiwile hi ku kombisa ku nyanyuka ehenhla ka ku xaniseka ka Yuda, naswona Moab hikwalaho ko amukela xiyimo xo sandza ehenhla ka Yuda. Edom u vekiwe nandzu wa rivengo, naswona moya wa ku rihisa wa Vafilista a wu ta tisa “ku tshinya ka v̌ukari” ka Xikwembu. (Ezekiel 25:1-17; Swivuriso 24:17, 18) Hi ku tsaka ehenhleni ka khombo ra Yerusalema, muti wa Tir a wu ta wela eka Nebukadnetsar, kumbe eka Nebukadretsar (matsalelo lama yelanaka ni ya le Babilona). (Ezekiel 26:1-21) A wu fana ni xikepe lexi swi nga erivaleni leswaku xi ta mbombomela. (Ezekiel 27:1-36) “Hosi” ya Tir (kahle-kahle nxaxamelo wa rona wa vafumi) yi susiwile hikwalaho ko va ni moya wa vutikukumuxi wo fana ni lowuya wa Sathana. (Ezekiel 28:1-26) Kutani ke, entiyisweni hi fanele ku papalata xidyoho xa ku tikukumuxa lexi nga hi vangelaka ku thyakisa vito ra Yehova.—Psalma 138:6; Swivuriso 21:4.
4. I yini leswi a swi hlayiseriwe Faro na Egipta?
4 Ezekiyele u vhumbe ku onhiwa ka Egipta ka malembe ya 40. Rifuwo ra wona a ri ta va hakelo ya Nebukadretsar ya ntirho wa mavuthu lowu a wu endleke eku tiseni ka ku avanyisa ka Yehova ehenhla ka Tir. (Ezekiel 29:1-21) Loko Xikwembu xi endlile leswaku Vaegipta va hangalasiwa, ‘a va ta tiva leswaku hi yena Yehova.’ (Ezekiel 30:1-26) Ku yimela Egipta, Faro la tinyungubyisaka u fanisiwe ni murhi wa kedar lowukulu lowu a wu ta tsemiwa. (Ezekiel 31:1-18) Eku heteleleni, Ezekiyele u vule mahlomulo mayelana na Faro ni ku nghena ka Egipta eSheol.—Ezekiel 32:1-32.
Ntirho Wa Mulanguteri
5. (a) Hi le hansi ka swiyimo swihi ntsena laha Xikwembu xi amukelaka mulanguteri wa moya? (b) Swi vula yini ‘ku famba emilawini ya vutomi’?
5 Ezekiyele u tsundzuxiwe hi ntirho wa yena tanihi mulanguteri. (Ezekiel 33:1-7) Kavula, Xikwembu xi amukela mulanguteri wa moya ntsena loko a endla ntirho wa yena naswona a tsundzuxa vadyohi. (Hlaya Ezekiel 33:8, 9.) Kutani, ku fana na Ezekiyele, ntlawa wa “mulanguteri” la totiweke wu twarisa switsundzuxo swa Xikwembu hi xivindzi. Tanihi leswi Xikwembu xi nga tsakeriki rifu ra lavo biha, a xi nge yi hlayisi rhekhodo ya leswi hundzeke ku va avanyisa loko va yingisa switsundzuxo ivi ‘va famba emilawini ya vutomi.’ Esikwini ra Ezekiyele, ku famba emintileni yoleyo a swi vula ku hlayisa Nawu, kambe sweswi swi vula ku amukela nkutsulo wa Kriste ni ku va mulandzeri wa yena. (1 Petro 2:21) Ku hava lexi nga lulamisekiki mayelana ni ndlela leyi Xikwembu xi xupulaka kumbe ku hakela vanhu, naswona ku hlayisiwa eka ‘nhlomulo lowukulu’ swi titshege hi ku landzelela swileriso swa xona.—Ezekiel 33:10-20; Matewu 24:21.
6. Namuntlha, vo tala va fana ni mahlonga ya Yuda ya nkarhi wa Ezekiyele hi ndlela yihi?
6 Eku heleni ka 607 B.C.E., muluveri u vike ku lovisiwa ka Yerusalema, naswona Ezekiyele nakambe u vule rungula ra Yehova. (Ezekiel 33:21-29) Mahlonga ya titwe hi ndlela yihi xana? (Hlaya Ezekiel 33:30-33.) Namuntlha, vo tala va fana ni mahlonga ya Vayuda lava Ezekiyele a a ri muyimbeleri wa ‘risimu leri rharhanganeke ra rirhandzu’ eka vona. Loko lava totiweke ni vanghana va vona va famba hi muti na muti, vanhu lava va tiphina hi mpfumawulo wa rungula ra Mfumo kambe a va ri amukeli. Eka vona, ri fana ni risimu leri tsakisaka ra rirhandzu, kambe a va tinyikeli eka Yehova, kutani va nge poni ‘nhlomulo lowukulu.’
“Murisi Uṅwe” Wa Yehova
7. I magoza wahi ya Yehova enkarhini wa hina lama fanaka ni ku tirhisana ka yena ni tinyimpfu ta yena esikwini ra Ezekiyele?
7 Eka rungula leri yaka eka Ezekiel endzhaku ka ku wa ka Yerusalema, Yehova u avanyise vathyakisi va vito ra Yena ro kwetsima, “v̌arisi v̌a Israel” va hulumendhe. Marito wolawo ma va fanela kahle swonghasi vafumi va Vujagana! (Hlaya Ezekiel 34:1-6.) Ku hambana ni Murisi Lonene, Yesu Kriste, vafumi va Vujagana va politiki va tifumisa hi swilo leswi vonekaka swa “tinyimpfu.” (Yohane 10:9-15) Kambe tanihi leswi Xikwembu xi kutsuleke tinyimpfu ta xona hi ku susa varisi va vutianakanyi va mfumo loko Yuda wu lovisiwa, kutani xi ta tlhela xi kutsula tinyimpfu ta xona hi ku tekela vafumi va Vujagana vulawuri bya vona enkarhini wa ‘nhlomulo lowukulu.’ (Nhlavutelo 16:14-16; 19:7-21) Yehova u kombise rirhandzu eka vanhu va yena lava fanaka ni tinyimpfu loko a va kutsula eBabilona hi 537 B.C.E., tanihi laha a kombiseke mfanelo yoleyo loko a tirhisa Koreš Lonkulu, Yesu Kriste, ku ntshunxa masalela ya Israyele wa moya evuhlongeni bya Babilona Lonkulu hi 1919 C.E.—Ezekiel 34:7-14.
8. Yehova a a ta endla yini loko ‘nyimpfu leyi noneke’ a yo tshikilela ntlhambi, naswona varisi-ntsongo va Vukriste va fanele ku ti khomisa ku yini tinyimpfu?
8 Xikwembu xi nyika tinyimpfu ta xona nkhathalelo lowunene. (Hlaya Ezekiel 34:15, 16.) Loko ‘nyimpfu leyi noneke’ a yo tshikilela ntlhambi wa Xikwembu namuntlha, Yehova a a ta yi “risa” hi ku tsemiwa sweswi ni ku herisiwa ‘enhlomulweni lowukulu.’ Hi 1914 Yehova u veke “murisi uṅwe” ehenhla ka masalela lama totiweke, Yesu Kriste. Ku sukela hi 1935 u kongomise ku hlengeletiwa ka “ntshungu lowukulu” wa “tinyimpfu tin’wana,” lava sweswi va tirhaka ni ‘tinyimpfu leti totiweke leti risiwaka hi Yehova.’ Ku fana ni Xikwembu na Kriste, varisi-ntsongo va Vukriste va fanele ku khoma tinyimpfu leti hinkwato hi musa.—Ezekiel 34:17-31; Nhlavutelo 7:9; Yohane 10:16; Psalma 23:1-4; Mintirho 20:28-30.
“Ntanga Wa Edeni”!
9. Tanihi leswi Yehova a tiyiseke leswaku tiko ra Yuda ni ra Israyele ma fanele ku hlayisa savata, u endle yini?
9 Nakambe xiya tiko leri onhiweke ra Yuda na Israyele. Tanihi leswi Xikwembu xi tiyiseke leswaku ri fanele ku hlayisa savata hi ku tshama ri nga akiwi hi malembe ya 70, xi teke goza ku sivela Edom ni matiko man’wana ku aka etikweni rero. (2 Tikronika 36:19-21; Daniel 9:2) Entiyisweni, Edom ni ndhawu ya rona ya Seir ya tintshava na swona swi lovisiwile, hi laha ku vhumbiweke ha kona, hi ku hluriwa hi Vababilona hi 602-601 B.C.E.—Ezekiel 35:1–36:5; Yeremia 25:15-26.
10. Ku tlheriseriwa ka masalela eYuda hi 537 B.C.E. a ku kombetela eka swiendlakalo swihi esikwini ra hina?
10 Ku tlheriseriwa ka masalela eYuda hi 537 B.C.E. ku kombetele eka swiendlakalo leswi nyanyulaka esikwini ra hina. Hi 1919 ‘tintshava ta Israyele,’ kumbe xiyimo xa moya xa timbhoni leti totiweke ta Yehova, ti sungule ku tlhela ti akiwa hi masalela ya moya lama pfuxetiweke. (Ezekiel 36:6-15) Xikwembu xi va basisile ethyakeni ra vukhongeri kutani xi nghenisa eka vona ‘moya lowuntshwa’ lowu va pfuneke ku humesa mihandzu ya moya wa yena lowo kwetsima. (Vagalatiya 5:22, 23) Kutani leswaku vito ra Yehova ri nga tshuki ri thyakisiwa hi vanhu va misava hikwalaho ka leswi a tshinyeke vanhu va yena, u katekise masalela hi laha ku fuweke.—Ezekiel 36:16-32.
11. Ku pfumelelana na Ezekiel 36:33-36, Xikwembu xi endle yini hi xiyimo xa moya xa masalela lama totiweke?
11 Endzhaku ka loko masalela ma tlhelele eYuda, tiko rero leri lovisiweke ri cinciwile ri va “ntanga wa Edeni” lowu vekaka mihandzu. (Hlaya Ezekiel 36:33-36.) Hi ku fanana, ku sukela hi 1919 Yehova u cince khale ka xiyimo lexi onhiweke xa masalela lama totiweke xi va paradeyisi ya moya leyi vekaka mihandzu, leyi sweswi yi hlanganyeriwaka ni “ntshungu lowukulu.” Tanihi leswi paradeyisi ya moya yi vumbiweke hi vanhu vo kwetsima, Mukriste un’wana ni un’wana la tinyiketeke a a tirhele ku yi hlayisa yi basile.—Ezekiel 36:37, 38.
Vun’we Byi Kondleteriwa
12. Ku hanyisiwa ka tiko ra Yuda ra khale ku kombisiwe njhani eka Ezekiel 37:1-14, naswona i ku yelana kwihi ka manguva lawa loku leswi swi veke na kona?
12 Evuhlongeni bya le Babilona, Vayuda a va ri kusuhi ni ku va tiko leri feke, ku fana ni marhambu ensin’wini. (Ezekiel 37:1-4) Kambe i yini lexi Ezekiyele a xi voneke endzhakunyana? (Hlaya Ezekiel 37:5-10.) Marhambu wolawo ma tlhele ma ambexiwa matimba, nyama ni dzovo, ivi ma tlhela ma hanyisiwa hi moya wa vutomi. (Ezekiel 37:11-14) Xikwembu xi pfuxe tiko ra Yuda loko vanhu va 42 360 va tinxaka hinkwato ta Israyele ni van’wana va 7 500 lava nga riki Vaisrayele va kume nkarhi wa vona wo tlhela va tshama eYuda, va tlhela va aka Yerusalema ni tempele ya yona, ivi va kondletela vugandzeri bya ntiyiso etiko-xikaya ra vona. (Ezra 1:1-4; 2:64, 65) Hi ku fanana, hi 1918 masalela lama xanisiweke ya Israyele wa moya a ma fana ni marhambu wolawo lama omeke—va dlayiwile malunghana ni ntirho wa vona wo veka vumbhoni erivaleni. Kambe hi 1919 Yehova u va pfuxetile tanihi vatwarisi va Mfumo. (Nhlavutelo 11:7-12) Ku yelana loku ku fanele ku tiyisa ku tiyiseka ka hina leswaku vatotiwa lava ni vanghana va vona va vumba nhlengeletano ya le misaveni leyi Yehova a yi tirhisaka namuntlha.—Vona 1975 Yearbook of Jehovah’s Witnesses, matluka 87-125.
13. Xana ku kondleteriwa ka vun’we bya nhlengeletano exikarhi ka vanhu va khale va Yehova a ku kombisiwe njhani eka Ezekiel 37:15-20, naswona i ku yelana kwihi loku a ku ri kona eka leswi?
13 Xana ku kondleteriwa ka vun’we bya nhlengeletano exikarhi ka vanhu va Yehova va khale ku kombisiwe hi ndlela yihi? (Hlaya Ezekiel 37:15-20.) Ku ni ku yelana ka manguva lawa eku hlanganisiweni ka tinhonga timbirhi (leyi fungheriweke tinxaka timbirhi ta mfumo wa Yuda, yin’wana yi ri ya tinxaka ta khume ta Israyele). Hi nkarhi wa Nyimpi yo Sungula ya Misava, vanhu lava navelaka swa le henhla va ringetile ku onha vun’we bya malandza ya Xikwembu, kambe hi 1919 vatotiwa lava tshembekaka va hlanganisiwile ehansi ka Kriste, “hosi yi ri yiṅwe” ya vona ni “murisi uṅwe.” Ku tlula kwalaho, ku fana ni lava tlulaka 7 500 lava nga riki Vaisrayele lava tlheleleke eYuda, lava va “ntshungu lowukulu” sweswi va hlanganisiwe ni masalela lama totiweke. Mayana ntsako wonghasi wo va eparadeyisini ya moya, hi tirhela Yehova hi vun’we ehansi ka “hosi yi ri yiṅwe” ya hina!—Ezekiel 37:21-28.
Gogo Wa Hlasela!
14. I mani Gogo wa Magogo, naswona i goza rihi leri a nga ta ri teka? (Ezekiel 38:1-17)
14 Endzhakunyana, xiendlakalo lexikulu xi vhumbiwile. A tiyimisele ku onha vito ra Xikwembu ni ku herisa vanhu va Xona, Gogo wa Magogo u ta hlasela masalela ya Israyele wa moya, lama yimelaka “wansati” wa Yehova, kumbe nhlengeletano ya le tilweni. (Nhlavutelo 12:1-17) Gogo i “mufumi wa misava leyi,” Sathana Diyavulosi. U amukele vito rero ra Gogo endzhaku ka ku hlongoriwa ka yena etilweni, endzhakunyana ka ku tswariwa ka Mfumo hi 1914. (Yohane 12:31) ‘Tiko ra Magogo’ i ndhawu leyi Gogo ni mademona ya yena va vekiweke kona emisaveni. Endzhaku ka loko mavuthu lama lwisanaka ni vukhongeri ma herise Vujagana na Babilona Lonkulu hinkwaro, Yehova u ta tisa Gogo ku lwisana ni masalela ya Israyele wa moya ni vanghana va vona lava tinyiketeke lava vonakaka va nga sirhelelekangi.—Ezekiel 38:1-17; Nhlavutelo 17:12-14.
15. I yini lexi nga ta humelela loko Gogo a hlasela Timbhoni ta Yehova?
15 I yini lexi nga ta humelela loko Gogo a hlasela Timbhoni ta Yehova? (Hlaya Ezekiel 38:18-23.) Yehova u ta ponisa vanhu va yena! Matlhari ya yena ma ta va ku khuluka ka mapapa lama bulukeke, xihangu lexikulu, ndzilo lowu lovisaka, vuvabyi lebyi vavisaka. Hi ku pfilunganyeka, mavuthu ya Gogo ya ta hundzula mabanga ya wona ya hlaselana. Kambe loko Xikwembu xi nga si va herisa, ‘va ta endliwa leswaku va tiva leswaku hi yena Yehova.’
16. (a) I yini lexi nga ta humelelela ‘tiko ra Magogo’? (b) Hi fanele hi khumbeka hi ndlela yihi hi ku tiva swiendlakalo leswi vhumbiweke leswi katsaka Gogo?
16 Loko Sathana ni mademona ya yena va pfaleriwe ekheleni, ‘tiko ra Magogo,’ ndhawu ya vona leyi nyenyetsaka emisaveni, yi ta va yi helele makumu. (Nhlavutelo 20:1-3) Swingolongondzwana swa Gogo swa nyimpi swi ta va swi tele lerova swi ta teka nkarhi ku swi herisa. Tinyanyana ni swivandzana swi ta tiphina hi mintsumbu leyi nga celeriwangiki ya ntshungu wa Gogo. Xana vutivi bya leswi hinkwaswo byi fanele byi hi khumba hi ndlela yihi? Phela, ku tiva leswaku nhlaselo wa Gogo wa tshinela kambe leswaku Yehova u ta ponisa vanhu va Yena swi fanele ku engetela ripfumelo ra hina ni ku hi endla hi tsaka leswi swiendlakalo swo tano swi nga ta hetelela hi ku kwetsimisiwa ka vito ra Xikwembu leri thyakisiweke nkarhi wo leha!—Ezekiel 39:1-29.
Ku Hlalela Vuhlawuleko Bya Yehova!
17. (a) Ezekiel u nyikiwe xivono xihi hi 593 B.C.E.? (b) Vukona bya tempele ya le xivonweni byi komba yini?
17 Hi 593 B.C.E., lembe ra vu-14 endzhaku ka ku lovisiwa ka tempele eYerusalema, Ezekiyele u nyikiwe xivono xa vuhlawuleko lebyintshwa bya vugandzeri bya Yehova. Loko byi pimiwa hi ku kongomisiwa ka muprofeta hi tintsumi, a byi ri ni mimpimo leyikulu. (Ezekiel 40:1–48:35) Tempele leyi a yi fanekisela ‘ntsonga wa xiviri, lowu yimisiweke hi Yehova,’ naswona a wu ri na “swilo leswi fanisaka kunene swa le tilweni.” Yesu Kriste u nghene eVuhlawulekisisweni bya wona, “etilweni hi koxe,” hi 33 C.E. ku tisa ntikelo wa gandzelo ra yena ra nkutsulo eka Xikwembu. (Vaheveru 8:2; 9:23, 24) Xivono xa tempele xi kombisa leswaku vugandzeri lebyi tengeke byi ta pona nhlaselo wa Gogo. Mayana nchavelelo wonghasi eka varhandzi va vito ra Yehova!
18. Hi swihi swivumbeko swin’wana leswi rhekhodiweke swa tempele ya le xivonweni?
18 Tempele a yi ri na swivumbeko swo tala. Hi xikombiso, a ku ri na tinyangwa ta tsevu emakhumbini ya yona ya le ndzeni ni ya le handle. (Ezekiel 40:6-35) Makamara yo dyela ka wona ya makume-nharhu (kumbexana ya leswaku vanhu va dyela magandzelo ya mani na mani eka wona) a ya ri exivaveni xa le handle. (40:17) Altari ya magandzelo lama hisiwaka a yi ri exivaveni xa le ndzeni. (43:13-17) Altari ya timhandzi, leyi handle ko kanakana yi nga ya ku hisa mirhi ya risuna, a yi ri ekamareni ro sungula ra tempele. (41:21, 22) Vuhlawulekisiso a byi ri swikwere-khubiki swa 20, naswona khumbi leri rhendzeleke tempele a ri ri timitara ta 1 600 tlhelo rin’wana ni rin’wana. Mawaku yindlu leyinene swonghasi leyi teleke hi ku kwetsima ka Xikwembu!—Ezekiel 41:4; 42:16-20; 43:1-7.
19. Hi fanele ku khumbisiwa ku yini hi vuxokoxoko bya tempele ni mhaka ya leswaku lava tirhaka kwalaho va fanele ku fikelela mimpimanyeto ya Xikwembu ke?
19 Vuxokoxoko byo tala bya tempele, magandzelo, minyikelo ni minkhuvo swi fanele swi hi tsundzuxa xilaveko xo landzelela swiletelo swo huma enhlengeletanweni ya Xikwembu hi vukheta, hi xiya leswaku matshalatshala hinkwawo ma fanele ku endleriwa ku tlakusa Yehova ni vugandzeri bya yena. (Ezekiel 45:13-25; 46:12-20) Lava va tirhaka etempeleni a va fanele ku fikelela mimpimanyeto leyi tlakukeke ya Xikwembu, naswona a va fanele ku dyondzisa vanhu ‘ku hambana exikarhi ka swilo swo kwetsima ni leswi thyakeke.’ (Ezekiel 44:15, 16, 23) Leswi swi fanele ku hi susumetela ku hlayisa ku hlawuleka tanihi vanhu va Yehova.—Vaefesa 1:3, 4.
20. (a) I yini lexi fanekiseriwaka hi mati lama khulukaka ma huma etempeleni ya le xivonweni? (b) Mati lawa yo fanekisela ma ta va ni vuyelo byihi?
20 Etempeleni a ku khuluka nambu lowu hanyisaka, kumbe lowu tsokomberisiweke, mati lama nga ni munyu ya Lwandle leri Feke, lerova ma taleriwa hi tinhlampfi. (Ezekiel 47:1-11) Mati lawa ma fanekisela lunghiselelo ra Xikwembu ra vutomi lebyi nga heriki, ku katsa ni gandzelo ra Yesu, lama taleke ku ringana eka lava nga ta pona nhlaselo wa Gogo ni van’wana, ku katsa ni lava pfuxiweke. (Yohane 5:28, 29; 1 Yohane 2:2; Nhlavutelo 22:1, 2) Lwandle leri Feke ri yimela ndhawu leyi vanhu a va hanya eka yona—leyi avanyisiweke hi xidyoho lexi amukeriweke tanihi ndzhaka ni rifu kun’we ni ku fuma ka Sathana. Ku fana ni tinhlampfi to tala ematini lama tsokomberisiweke ya Lwandle leri Feke, vanhu lava kutsuriweke va ta hanya ehansi ka swiyimo leswi hanyisiweke swa ku fuma ka Vumesiya.
21. Ezekiel 47:12 yi komba leswaku vanhu lavanene va ta tsakela yini emisaveni leyintshwa?
21 Ku hanyisa nakambe ku yelana ni mirhi leyi kulaka etlhelo ka xinambyana xa le xivonweni. (Hlaya Ezekiel 47:12.) Emisaveni leyintshwa, vanhu lavanene va ta tsakela rihanyo leri hetisekeke ra nyama ni ra moya. Swa boha. Matluka ya mirhi ya mihandzu leyi voniweke exivonweni ma ni swiphemu leswi hanyisaka ku ya emahlweni. Mawaku minkateko yonghasi eka lava va tivaka ni ku tirhela Yehova!
Kutani Va Ta Swi Tiva!
22. I yini lexi kombaka leswaku Xikwembu xi ta veka vanhu laha xi lavaka kona eParadeyisini?
22 Hi ku tirhisana ni nhlengeletano ya Yehova sweswi, hi nga vumba timfanelo leti nga ta hi endla hi va ni ntirhisano loko Xikwembu xi veka vanhu laha xi lavaka kona eParadeyisini ya la misaveni. Leswaku ku ta va ni ku vekiwa ko tano ka vanhu swi kombisiwa hi mhaka ya leswi swiavelo swa tinxaka swi endliweke en’walungwini ni le dzongeni wa ntsindza lowu voniweke hi Ezekiyele exivonweni. “Šipanḍwa” xexo xa swiphemu swinharhu swa tiko xi katse xiphemu xa Valevhi lava nga riki vaprista ni xiphemu xa vaprista lexi nga ni tempele leyi voniwaka exivonweni. Exikarhi ka xiphemu xa le dzongeni a ku ri ni muti lowu nga ni vatirhi va tinxaka leti hlanganeke ehansi ka ntlawa wa ‘tihosi,’ vayimeri lava nga tihosana va Mesiya ‘emisaveni leyintshwa.’—Ezekiel 47:13–48:34; 2 Petro 3:13; Psalma 45:16.
23. Leswaku hi va xiphemu xa vanhu lava kutsuriweke lava hanyaka eParadeyisini, i yini lexi hi faneleke ku xi endla?
23 Loko a vekiwe evuhlawulekweni bya yena bya le tilweni, Xikwembu xi ta katekisa muti wo fanekisela lowu voniweke hi Ezekiyele. (Hlaya Ezekiel 48:35.) Xitshamo xexo xa vulawuri xa la misaveni xi ta vitaniwa Yehova-Shamma, kumbe “Yehova o kona La.” Hambeta u kombisa rirhandzu leri nga tsandzekiki eka Xikwembu, kutani u nga va xiphemu xa vanhu lava kutsuriweke lava hanyaka eParadeyisini, loko ku ri hava ni un’we emisaveni loyi a nga ta va emunyameni wa moya kambe hinkwavo va nga ta swi tiva leswaku Yehova i Xikwembu xin’we lexi hanyaka xa ntiyiso. (Habakuk 2:14) Papalata ku boheka ku xiya vito ra Xikwembu ku lwisana ni ku rhandza ka wena loko lavo biha va herisiwa. Kombisa ripfumelo, u kombisa leswaku u langutele ku va exikarhi ka lava nga ta pona loko a hetisisa marito lama nge: “Matiko ma ta ŝi tiv̌a leŝaku hi mina Yehova.”—Ezekiel 36:23.
A Wu Ta Ku Yini?
◻ Hi le hansi ka swiyimo swihi ntsena laha Yehova a amukelaka mulanguteri wa moya?
◻ Yehova u tikhomisa ku yini tinyimpfu ta yena, kutani varisi va Vukriste va fanele ku tirhisana na tona hi ndlela yihi?
◻ Ku hanyisiwa ka tiko ra Yuda ku fanisiwa hi ndlela yihi? (Ezekiel 37:1-14) Hi kwihi ku yelana ka manguva lawa ka leswi?
◻ I mani Gogo wa Magogo, naswona ku ta humelela yini loko a hlasela Timbhoni ta Yehova?
◻ I yini lexi fanekiseriwaka hi mati lama khulukaka ma huma etempeleni ya le xivonweni?
[Mepe/Xifaniso lexi nga eka tluka 25]
(Leswaku u vona rungula leri hleriweke hi ku helela, vona nkandziyiso wa kona)
Munyikelo wo kwetsima ni swiavelo swa rixaka
THE GREAT SEA
ENTERING IN TO HAMATH
DAN
ASHER
NAPHTALI
MANASSEH
EPHRAIM
REUBEN
JUDAH
THE CHIEFTAIN
Holy Contribution
En-Eglaim
BENJAMIN
SIMEON
En-gedi
ISSACHAR
ZEBULUN
Tamar
GAD
Meribath-Kadesh
Salt Sea
Jordan River
Sea of Galilee
[Xifaniso lexi nga eka tluka 23]
Yehova u nyika tinyimpfu ta yena nkhathalelo lowunene, hi laha varisi va khale va endleke ha kona. Kutani varisi va Vukriste va fanele ku khoma ntlhambi wa Xikwembu hi musa