Nyimpi Yo Herisa Tinyimpi

XIKEPE lexikulu xa le moyeni xa le Jarimani xi pfumile empfhukeni wa vusiku. A xi tlhelela ekaya endzhaku ka nhlaselo wa xitshuketa eLondon, naswona loko xi ri karhi xi hundza eximutanini xa Essex, tibomo ti lahleriwile ehansi. Yin’wana ya tona yi dlaye muongori wo huma hi le nyimpini eFurwa loyi a a ri eku wiseni.

Lexi a ku ri xiendlakalo xintsongo xa Nyimpi yo Sungula ya Misava, kambe a xi ri na tinhlamuselo letikulu. A xi ri xikombiso xa ndlela leyi ha yona lembe xidzana ra vu-20, ematshan’wini yo tisa nkarhi lowu munhu a a nga ha ta ‘dyondza ku lwa,’ ri voneke ku andza lokukulu ka switlhavani ni timbala ta nyimpi. (Esaya 2:2-4) Hi magidi ya malembe, tinyimpi ti lwiwile ehenhla ka misava ni le ndzeni ka lwandle. Kambe hi Nyimpi yo Sungula ya Misava, ku lwa ku tlulele ni le moyeni ni le hansi endzeni ka lwandle. Hikwalaho, vaaki lava a va ri kule ni mindzilakana ya nyimpi hi madzana ya tikhilomitara va dlayiwile hi tibomo, naswona swikepe swo tala swi mbombomerisiwe elwandle hi swikepe swa nyimpi swa le ndzeni ka mati leswi nga vonekiki.

Hakunene, enkarhini wa nyimpi yoleyo yo sungula ya misava leyi chavisaka masocha ya 8 wa timiliyoni ya file enyimpini, naswona vaaki lava ringanyeteriwaka eka 12 wa timiliyoni va file hi swivangelo leswi katsaka ndlala ni ku weriwa hi khombo. “Khombo ra Nyimpi Leyikulu [Nyimpi yo Sungula ya Misava],” hi ku ya hi n’wamatimu H. A. L. Fisher, “a ri ri leswaku a yi lwiwa exikarhi ka vanhu lava hluvukeke swinene eYuropa eka mphikamakaneta leyi vanhu va nga ri vangani lava ehleketaka kahle a va ta va va yi tlhantlhe hi ku olova.” Ku tsetselela ku dlaya ka tihanyi, yi vuriwe “nyimpi yo herisa tinyimpi.” Kambe xiga xexo hi xihatla xi vonaka xi ri vunwa.

Nhlengeletano Ya Ku Rhula

Loko ku rhula ku twarisiwile hi 1918, rixaka leri nyanyuriweke ri tshikilele leswaku magoza ma tekiwa ku tiyisa leswaku nyimpi yo tano yi nga ha humeleli nakambe. Xisweswo, Ntwanano wa Matiko wu tswariwile hi 1919. Kambe Ntwanano wu ve ku khomisiwa lokukulu ka tingana. Hi 1939 misava nakambe yi hlaseriwe hi nyimpi ya misava—nyimpi leyi a yi ri leyi dlayaka ku tlula yo sungula

Eka Nyimpi ya Vumbirhi ya Misava, madoroba-nkulu yo tala ya mbundzumuxiwile, vutomi bya vaaki byi hundzuriwa ntokoto lowu chavisaka. Manuku hi 1945 tibomo ta athomo ti lahleriwe ehenhla ka Hiroshima na Nagasaki, ti nghenisa vanhu enguveni ya nyutliya. Mapapa lama chavisaka swinene lama tuvikeke ehenhla ka madoroba-nkulu wolawo mambirhi ya le Japani a ya ri masungulo ya nxungeto lowu tshameke ehenhla ka vanhu ku sukela kwalaho.

Hambi swi ri tano, hambi ku ri emahlweni ka ku wa ka tibomo teto, malunghiselelo a ma ri karhi ma endliwa yo yimisa nhlengeletano leyi fanaka ni Ntwanano wa Matiko lowu feke. Vuyelo ku ve Nhlengeletano ya Nhlangano wa Matiko, leyi entiyisweni a yi ri ni xikongomelo lexi fanaka ni xa leyi yi yi siveke—lexiya xa goza ro hlayisa ku rhula ka misava. Xana i yini lexi yi xi endleke? Kunene, a ku vanga na nyimpi ya misava ku sukela hi 1945, kambe ku ve ni tinyimpi to tala letintsongo leti eka tona timiliyoni ta vanhu ti feke.

Xana leswi swi vula leswaku vanhu va nga ka va nga ku voni ku hetiseka ka xitshembiso xa Xikwembu hi muprofeta Esaya xa leswaku vanhu ‘va nga ka va nga ha dyondzi ku lwa’ ke? Doo. Swi vula ntsena leswaku leswi a swi nge tisiwi hi munhu. Bibele, leyi vuriwaka ‘rivoningo endleleni ya hina,’ i buku leyi tameleke xitshembiso xexo lexi huhuteriweke. Naswona i Bibele leyi kombaka leswaku ku hava ni un’we handle ka Xikwembu hi xoxe la nga ta herisa tinyimpi hinkwato eku heteleleni.—Psalma 119:105.

Makumu Ya Tinyimpi Hinkwato

Hi laha swi boxiweke ha kona eka nhloko-mhaka leyi hundzeke, a ku ri ni ntlawa eka lembe xidzana ro sungula lowu simekeke xinakulobye xa matiko hinkwawo lexi eka xona a swi nga ta ehleketeka eka xirho xin’wana ku lwa ni makwavo wa xinuna kumbe wa xisati. Leri a ku ri bandlha ra Vukriste, leri swirho swa rona hi ndlela leyi kongomeke swinene swi ‘fuleke mabanga ya swona ya va swikomu.’ Namuntlha, loko vanhu hinkwavo va tsandzeka ku endla nhluvuko eku heriseni ka nyimpi, nakambe ku ni ntlawa wa vanhu lava va fikeleleke pakani leyi yi xiyekaka swinene leyi fanaka. I vamani?

Eka malembe ya le mahlweni ka 1914, ntlawanyana lowu wu ve ni ntshembo eBibeleni. Hikwalaho, va swi tivile leswaku matshalatshala ya vanhu yo herisa nyimpi a ma nga ta humelela. Edyondzweni ya vona ya Bibele, va dyondze leswaku lembe ra 1914 a ri ta va leri tsemaka nguva evurungurwini bya vanhu, naswona va nyikele xitsundzuxo xa leswi hi malembe ya 40. Ku pfumelelana ni vuprofeta bya Bibele, 1914 a ku ri ku sungula ka nkarhi lowu funghiweke hi tindlala, mintungu ni ku tsekatseka ka misava, kun’we ni nyimpi. (Matewu 24:3, 7, 8; Luka 21:10, 11) Malunghana ni Nyimpi yo Sungula ya Misava, n’wamatimu James Cameron u tsarile a ku: “Hi 1914 misava, hi laha a swi tiviwa ni ku amukeriwa ha kona hi nkarhi wolowo, yi fike emakumu.”

Loko nyimpi yoleyo yi nga si hela, ntungu lowu chavisaka wa chachalaza wu hlasele misava hinkwayo kutani wu dlaya vanhu va timiliyoni ta 20—ku tlula nhlayo ya masocha lama dlayiweke enyimpini hi yoxe yi andzisiwe kambirhi. Ku sukela kwalaho, vuvabyi byo tanihi khensa naswona, sweswinyana swinene, AIDS yi chavise vanhu.

Manuku xiya vuprofeta byin’wana bya Bibele: “Kutani rirhandzu ra lavo tala ri ta sungula ku titimela, hikuva ku homboloka ku ta va ku andzile.” (Matewu 24:12) Xana leswi swi karhi swa hetiseka? Hakunene! Siku rin’wana ni rin’wana, swihaxa-mahungu swi paluxa vuhomboloki bya misava hinkwayo: ku dlaya, ku tshikileriwa ni ku onha loku tolovelekeke. Nakambe, ku vhumba ka politiki malunghana ni Nyimpi ya Vumbirhi ya Misava a ku ri leswaku yi ta tisa “ntshunxeko eka chaveni.” Hi laha ku hambaneke, Bibele hi ku pakanisa yi vhumbe leswaku vanhu a va ta “titivala hi ku chava ni ku ehleketa leswi nga ta humelela la misaveni.” (Luka 21:26) Nakambe ku vhumba ka vanhu a ku hoxile, naswona marito ya Xikwembu ya vuprofeta a ma tiyisile.

Muhlohloteri Lonkulu Wa Nyimpi

Muhlohloteri wa nyimpi i munhu la kucetelaka ku lwa. Van’watipolitiki, vafundhisi na van’wamabindzu va endle ntirho lowu. Kambe muhlohloteri lonkulu swinene wa nyimpi a ku na un’wana handle ka Sathana Diyavulosi, loyi eMatsalweni a vuriwaka “Xikwembu xa misava leyi.”—2 Vakorinto 4:4.

Sathana u xandzukele Yehova Xikwembu magidi ya malembe lama hundzeke, naswona endzhakunyana a xisa ntshungu wa tintsumi leswaku wu n’wi joyina. Kambe hi 1914 nkarhi wa yena a wu herile. Bibele ya hi byela: “Kutani ku pfukeka nyimpi etilweni, ya Mikayele ni tintsumi ta yena loko va lwa ni Dragona; na yona dragona yi lwa yi ri ni tintsumi ta yona. Kambe dragona yi hluriwa, yi nga ha pfumeleriwi ku tshama etilweni, yona ni tintsumi ta yona. Hi loko dragona leyikulu leyi yi cukumetiwa yi ya wela hansi, na yona nyoka ya khale leyi vuriwaka Diyavulosi na Sathana, Mukanganyisi wa misava hinkwayo; yi cukumetiwile yi ya wela ehansi emisaveni, tintsumi ta yona na tona ti cukumetiwa kun’we na yona.”—Nhlavutelo 12:7-9.

Leswi swi hlamusela mhaka leyi ha yona misava yi veke ndhawu leyi nga ni khombo swinene ku sukela hi 1914. Bibele yi vhumbe vuyelo bya ku wa ka Sathana yi ku: “Mi ni khombo, n’wina misava . . . hikuva Diyavulosi u xikele ka n’wina a karihile ngopfu, hi ku tiva leswaku nkarhi wa yena wu komile.” (Nhlavutelo 12:12) Nkarhi wu komise ku yini? Yesu u te: “Rixaka leri [loyi a vonaka swiendlakalo leswi sungulaka hi 1914] ri nga ka ri nga hundzi, ku nga si humelela swilo leswi hinkwaswo.” (Matewu 24:34) I swilo swihi? Makhombo hinkwawo ni mpfilumpfilu leswi Yesu a swi vhumbeleke siku ra hina.

Hambi swi ri tano, Bibele yi komba leswaku ku nga khathariseki ku tsandzeka ka Ntwanano wa Matiko ni ku tsana loku nga kona ka Nhlengeletano ya Nhlangano wa Matiko, matiko a ma nge ma tshiki matshalatshala ya wona yo endla ku rhula. Hakunene, nkarhi wu ta ta lowu va nga ta ehleketa leswaku va humelerile. Ku ta va ni ku huwelela lokukulu ka ‘ku rhula ni nsirhelelo,’ kambe leswi swi ta landzeriwa hi ‘ku lovisiwa ka xitshuketa’ ka misava leyi yo homboloka. Va ri emunyameni, vanhu va ta hlamarisiwa hi ku hundzuka loku ka swiendlakalo, loku ku nga ta ta ‘tanihi khamba nivusiku.’—1 Vatesalonika 5:2, 3.

Leswi swi ta yisa kwihi xana? Eka nyimpi leyi hakunene yi nga yona “nyimpi leyi nga ta herisa tinyimpi”: nyimpi ya Armagedoni, leyi eBibeleni yi vuriwaka ‘nyimpi ya siku lerikulu ra Xikwembu xa Matimba hinkwawo.’ Leswi swi ta vula ku lovisiwa ka tinhlengeletano hinkwato to biha ni vaseketeri va tona. “La’v̌o biha v̌a ta susiwa.” (Nhlavutelo 16:14-16; Psalma 37:9) Eku heteleleni, Sathana, muhlohloteri lonkulu wa nyimpi, u ta pfaleriwa endhawini leyi a nga ta pfumala nkucetelo wun’wana eka vanhu. Eku heteleleni, na yena u ta lovisiwa.—Nhlavutelo 20:1-3, 7-10.

Hambi swi ri tano, xiya leswaku leyi a yi nge vi nyimpi ya ndzoviso lowu nga hlawuriki lowu nga ni ku dlaya ka vuphukuphuku ka lava nga riki na nadzu ni lava nga ni nandzu hi ndlela leyi fanaka. Ku ta va ni vaponi, naswona lava ku ta va lava ‘endlelaka [Xikwembu] ntirho wo hlawuleka vusiku ni nhlekanhi.’ Ina, lava va tshikaka ku dyondza nyimpi hambi ku ri sweswi ni lava va landzelaka tindlela ta ku rhula ta Mukriste wa ntiyiso va ta pona nyimpi leyi leyikulu, yo hetelela. Va ta va va tele xana? Bibele yi va vula “ntshungu lowukulu wa vanhu, lava ku nga pfumaleka ni munhu ni un’we la koteke ku va hlaya. A va huma hi le matikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.”—Nhlavutelo 7:9, 14, 15.

Endzhaku Ka Xidzedze

Mawaku ku ntshunxeka konghasi loku lava va nga ta ku twa! Ematshan’wini ya tihulumendhe to tala ta matiko, ku ta va ni hulumendhe yin’we ntsena: Mfumo wa Xikwembu. (Daniel 2:44; Matewu 6:9, 10) Ematshan’wini ya lava tikukumuxaka ni lava navelaka swa le henhla, va musa va ta dya ndzhaka ya misava naswona “v̌a tiṭakela e ku ruleni lo’kukulu ka v̌ona.” (Psalma 37:10, 11) “Xikwembu hi xoxe . . . xi ta hlangula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.” (Nhlavutelo 21:3, 4) Yehova u ta ‘herisa tinyimpi ku yisa emakun’wini ya misava.’ Mabanga ma ta endliwa swikomu, matlhari ya va masikiri, naswona ‘a va nga ha dyondzi ku lwa.’—Psalma 46:8, 9; Esaya 2:4.

Xana a wu nga ta swi tsakela ku hanya emisaveni yo tano? Kavula a wu ta swi tsakela! Phela, swa koteka. Goza ro sungula i ku dyondza Rito ra Xikwembu, ku nga Bibele, ivi u titiyisekisa leswaku ntshembo lowu i ntiyiso naswona wu sekeriwe hi ndlela leyi twalaka. Manuku, kumisisa eBibeleni leswi ku rhandza ka Xikwembu ku nga swona eka wena sweswi kutani u endla hi laha ku faneleke. I ntiyiso, ku dyondza swi vula matshalatshala, kambe swa pfuna. Yesu u vule leswaku vutivi lebyi u byi kumaka, loko u byi tirhisa hi mfanelo, byi ta vula “vutomi lebyi nga heriki.” (Yohane 17:3) Xana swi kona swin’wana swa nkoka ku tlula sweswo?