‘Nyimpi I Ya Yehova’

“Nḍi ta ka wena hi v̌ito ra Yehova wa mav̌andla, ni ra Šikwembu ša tinyimpi ta Israel leti u ti sanḍeke.”—1 SAMUEL 17:45.

1, 2. (a) I ntlhontlho wihi lowu kongomanaka na vuthu ra Israyele leri nga ehansi ka vurhangeri bya Hosi Sawulo? (b) Xana vavanuna va nyimpi ya Israyele va endlisa ku yini eka ntlhontlho wa Goliat, naswona i mani loyi manuku a humelelaka exivonweni?

MAVUTHU mambirhi lamakulu ya jamelanile enambyeni wa Elah, edzonga-vupela-dyambu bya Yerusalema. Eka tlhelo rin’wana ku na vuthu ra Israyele, leri rhangeriweke hi Hosi Sawulo la chavaka. Eka tlhelo lerin’wanyana ku na vuthu ra Vafilista leri ri nga na Goliat, nghwazi ya rona ya xihontlhovila. Kavula, vito ra Goliat ri vula ku “Loyi a xiyekaka.” U lehe kwalomu ka 2,7 wa timitara naswona u hlome hi laha ku heleleke. Goliat u huwelela ku tsan’wa ka tinhlamba eka Israyele.—1 Samuel 17:1-11.

² I mani loyi a nga ta hlangavetana na ntlhontlho wa Goliat? “Vav̌anuna hikwav̌o v̌a Israel, kute loko v̌a v̌onile wanuna loyi, v̌a baleka e mahlweni ka yena, v̌a tšhav̌a ngopfu.” Kambe vonani—mufana lontsongo u humelela exivonweni! Vito ra yena i Davhida, leswi vulaka ku ‘la rhandzekaka.’ U tikombe a ‘rhandzeka’ ni le ka Yehova hikwalaho ka ku tinyiketela kakwe ka xivindzi eka vululami. Samuyele ana se u tote Davhida hi mafurha leswaku a ta va hosi leyi landzelaka ya Israyele, naswona moya wa Yehova wu tirha hi matimba ehenhla ka yena.—1 Samuel 16:12, 13, 18-21; 17:24; Psalma 11:7; 108:6.

3. Xana Davhida u tihlomisela nyimpi hi ndlela yihi, kambe Goliat yena u hlome njhani?

³ Loko a twa Goliat “a [sandza] mav̌andla ya Šikwembu le’ši hanyaka,” Davhida u tinyiketela ku lwa na xihontlovila lexi. Loko Sawulo a pfumela, Davhida wa ya kambe a nga hlomanga hi xintu ni matlhari leswi a nyikiweke hi Sawulo. U hlome ntsena hi nhonga, xipelupelu ni maribye ya ntlhanu lama rhetelaka—ku hambana na Goliat, loyi a khomeke tlhari a ambele xihuku xa tikhilogiramu ta 7 enhlokweni a tlhela a ambala nkhancu wa koporo wa tihakatimba wa tikhilogiramu ta 57! Loko Goliat wa matimba ni murhwali wa xitlhangu xa yena va tshinela emahlweni, ‘Mufilista a rhuketela Davhida hi swikwembu swa yena.’—1 Samuel 17:12-44.

4. Xana Davhida u hlamula hi ndlela yihi eka ntlhontlho wa xihontlovila?

⁴ Xana Davhida u hlamule hi ndlela yihi ke? U tlherisela ntlhontlho wa xihontlovila endzhaku, a huwelela a ku: “U tile ka mina hi banga, ni tlhari, ni ntlhuv̌ana, kambe mina nḍi ta ka wena hi v̌ito ra Yehova wa mav̌andla, ni ra Šikwembu ša tinyimpi ta Israel leti u ti sanḍeke. Namuntlha Yehova o ta ku nyiketa mav̌okweni ya mina; nḍi ta ku tlhav̌a, nḍi ku ṭema nhloko; namuntlha nḍi ta nyika tinyanyana ta tilo ni ŝiv̌anḍana ŝa misav̌a e miṭumbu ya nyimpi ya v̌a-Filista: misav̌a hikwayo yi ta tiv̌a leŝaku Šikwembu ŝa Israel ši kona. Nhlengeletano hikwayo leyi yi ta tiv̌a leŝaku Yehova wa ponisa, kambe ku nga ri hi banga ni matlhari; hikuv̌a [NYIMPI I YA YEHOVA], kutani o mi nyiketile mav̌okweni ya hina.”—1 Samuel 17:45-47.

5. Hi byihi vuyelo bya nyimpi, naswona ku dzuneka ku ya eka mani?

⁵ Davhida u tshinelela enyimpini hi xivindzi. Ribye rakwe ra xipelupelu ri haha ri kongoma laha ri pakanisiweke kona, kutani Goliat u wela ehansi hi ku copeta ka tihlo. Ina, Yehova u hakele ripfumelo ni xivindzi xa Davhida hi ku kongomisa ku copa koloko kuntsongo handle ko hupha ku ya emombyeni wa xihontlovila! Davhida u tsutsumela emahlweni, a hlomula banga ra Goliat, ivi a pulukanyisa nhloko ya murhukani loyi. Vafilista va baleka hi ku pfilunganyeka. Entiyisweni, a ku ta vuriwa ku: ‘NYIMPI I YA YEHOVA!’—1 Samuel 17:47-51.

6. (a) Ha yini Yehova a hlayise vuxokoxoko bya nyimpi leyi ya khale? (b) I xitiyisekiso xihi lexi malandza ya Xikwembu ma xi lavaka loko ma ri karhi ma tiyisela ku xanisiwa loku humaka eka valala lava nga ha ringanisiwaka na Goliat?

⁶ Ha yini Yehova a hlayise mhaka leyi yi nga ni vuxokoxoko ya nyimpi eRitweni rakwe, hambi leswi nyimpi yi lwiweke kwalomu ka 3 000 wa malembe lama hundzeke? Muapostola Pawulo wa hi byela a ku: “Hinkwaswo leswi tsariweke hi va khale, swi tsariwile leswaku hi dyondza ha swona, ni leswaku hi va ni ku langutela, hikwalaho ka ku tiyisela ni ku chaveleriwa loku hi ku kumaka eMatsalweni.” (Varhoma 15:4) Namuntlha, malandza yo tala ya Xikwembu lama tshembekaka ma tiyisela ndzhukano ni ku xanisiwa loku kongomeke loku humaka eka valala lava nga ha ringanisiwaka na Goliat. Loko mintshikilelo ya nala, yi ri karhi yi kula, hinkwerhu ka hina hi lava xitiyisekiso lexi chavelelaka xa leswaku ‘NYIMPI I YA YEHOVA.’

Mphikamakaneta Ya Vuhosi

7. I mphikamakaneta yihi leyi nga ya nkoka eka vanhu hinkwavo va Xikwembu ematikweni hinkwawo, naswona ha yini?

⁷ Hi ku tikukumuxa Goliat u nchanchele Xikwembu xa Israyele marhonga. Hi ku fanana, eka lembe xidzana leri ra vu-20 fambiselo ra hulumendhe yo lerisa ya politiki ri humelerile, ri ntlhontlha vuhosi bya Yehova ni ku ringeta ku kucetela malandza ya yena ku titsongahata hi ndlela ya vugandzeri eka Tiko. Mphikamakaneta leyi i ya nkoka eka vanhu va Xikwembu ematikweni hinkwawo. Ha yini swi ri tano? Hikuva Minkarhi leyi profetiweke ya Vamatiko, kumbe “minkarhi leyi vekiweke ya matiko,” yi hele hi 1914, yi nghenisa “gome ra matiko, ni mpfilumpfilu” eka nkarhi wa namuntlha. (Luka 21:24-26; NW, King James Version) Minkarhi ya Vamatiko yi sungule loko matiko ma sungule ku kandziyela Yerusalema wa laha misaveni hi 607 B.C.E. ivi yi hlanganisa malembe lama landzeleke ya 2 520 ku ya fika eka 1914, loko Yehova a veke Yesu exiluvelweni tanihi Hosi yakwe ya Vumesiya eYerusalema wa le tilweni.—Vaheveru 12:22, 28; Nhlavutelo 11:15, 17.a

8. (a) Xana tihosi ta misava ti xi amukele njhani xileriso xa vuprofeta xo “[tirhela] Yehova hi šitšhav̌o”? (b) I tinghwazi tihi ta misava namuntlha leti rhukanaka Yehova ni ku xungeta timbhoni ta yena?

⁸ Ku hundzuka lokukulu ku endlekile hi 1914. Matiko ya Vamatiko a ma nga ha ta fuma handle ka ku nghenelela ka Xikwembu. Kambe xana “tihosi” leti a ti fuma hi nkarhi wolowo ti xi yingisile xileriso xa vuprofeta xo “[tirhela] Yehova hi šitšhav̌o,” ti amukela Hosi ya yena leyintshwa leyi vekiweke? E-e! Ematshan’wini ya sweswo, va ‘hlengeletane tanihi munhu un’we leswaku va lwisana na Yehova ni mutotiwa wakwe,’ Yesu. Hi ku hlongorisa ku navela ka vona vini, va ‘dzumadzumile’ eka Nyimpi Leyikulu ya 1914-18. (Psalma 2:1-6, 10-12) Ku fika namuntlha, vulawuri bya misava i ntlhontlho lowu hisaka emahlweni ka vanhu. Misava ya Sathana yi hambeta yi tswala tinghwazi ta politiki, leti yelanaka ni maxaka ya Goliat, Varafa. Vuhosi lebyi byo lerisa byi rhukana Yehova ni ku ringeta ku xungeta timbhoni ta yena leswaku ti titsongahatela byona, kambe ku fana na minkarhi hinkwayo, nyimpi ni ku hlula i swa Yehova.—2 Samuel 21:15-22.

“Saul” Wa Manguva Lawa

9. I vamani lava namuntlha va faneke na goza ra Hosi Sawulo, naswona hi tindlela tihi ke?

⁹ Xana Hosi Sawulo u nghenisa ku yini emhakeni leyi? Eku sunguleni, hikwalaho ka vuxandzuki bya yena, Yehova a a kunguhate ku ‘susa vulawuri bya vuhosi bya Israyele ehenhla ka yena.’ (1 Samuel 15:22, 28) Manuku ke, Sawulo a a hlulekile ku seketela vuhosi bya Yehova ehansi ka ntlhontlho wa Goliat. Nakambe, u ye emahlweni a xanisa Davhida, muhluri wa Goliat ni loyi a totiweke hi Yehova ku siva nxaxamelo wa Sawulo wa vuhosi. Vafundhisi va Vujagana va ri fanelekele swinene swonghasi goza ra muxaka lowu! Va lwisane na ntiyiso wa Bibele, va ri xiphemu xa vugwinehi lebyikulu lebyi nga ‘yingisiki mahungu lamanene’ ehenhleni ka Hosi ya hina Yesu ni Mfumo wakwe lowu taka. Va hluleke hi laha ku heleleke ku twarisa vuhosi bya Yehova bya hinkwako-nkwako naswona va xanise timbhoni leti totiweke ta Yehova ni vanghana va tona, ntshungu lowukulu hi tihanyi. Yehova u ta cukumeta vagwinehi volavo ekule ‘eku kariheni ka yena.’—2 Vatesalonika 1:6-9; 2:3; Hosea 13:11.

10. (a) Hi 1918, i xitiviso xihi xa makungu lexi hangalasiweke eLondon hi ntlawa lowu dumeke wa vafundhisi? (b) Ematshan’wini yo landzela xitiviso xa makungu xa 1918, i ndlela yihi leyi vafundhisi va yi landzeleke?

¹⁰ Hi nkarhi wa nyimpi yo sungula ya misava, tindlela to landzula ta vafundhisi va Vujagana ti sungule ku humela erivaleni. Entiyisweni, vuprofeta bya Yesu lebyi nga eka Matewu tindzima 24 na 25, na Luka ndzima 21 byi hetisekile. Entiyisweni, hi 1918 ntlawa wa vafundhisi lava dumeke eLondon, Nghilandi, lava yimelaka Tikereke ta Baptist, Congregational, Presbyterian, Episcopal na Methodist, va hangalase xitiviso xa makungu. Xona xi te: “Nkitsinkitsi wa namuntlha wu kongome eku heleni ka minkarhi ya Vamatiko.” Kambe a va xi landzelelanga xitiviso xexo. Vafundhisi va Vujagana ana se va katseke swinene eku seketeleni ka matlhelo hinkwawo ya nyimpi yo sungula ya misava. Ematshan’wini yo xiya vukona bya Yesu ematimbeni ya Mfumo, va titsongahatele mianakanyo ya matiko ya misava—ya leswaku vanhu va fanele ku hambeta va lawuriwa hi mimfumo ya Vamatiko ya politiki leyi avaneke, hambi ku ri hi varhangeri va tihanyi ku fana na Goliat, ematshan’wini yo hlangana ehansi ka Mfumo wa Xikwembu.—Matewu 25:31-33.

Ku Hava Ku Landzula!

11. I vamani lava nga landzulangiki eka mphikamakaneta ya vuhosi, naswona va landzelela xikombiso xa mani?

¹¹ Xana malandza lama tinyiketeleke ya Xikwembu ma landzula eka mphikamakaneta leyi ya vuhosi? Nikantsongo, hi laha rhekhodo ya Bibele yi swi kombisaka ha kona erivaleni! (Daniel 3:28; 6:25-27; Vaheveru 11:32-38; Nhlavutelo 2:2, 3, 13, 19) Vakriste lava tshembekaka namuntlha va seketela vuhosi ni Mfumo wa Yehova ku nga khathariseki mindzhukano ni minxaniso hinkwayo ya tihanyi leyi Goliat la xungetaka wa manguva lawa a yi vekaka ehenhla ka vona. Xisweswo, va landzelela minkondzo ya Yesu, “N’wana Davhida,” loyi hi xivindzi a pfuxeke nyimpi ya moya hikwalaho ka vuhosi bya Yehova, loko hi nkarhi lowu fanaka a hlayisa vukala-tlhelo lebyikulu eka ku himpfilitana ni tipolitiki ta misava. Loko a khongela eka Tata wakwe, Yesu u hlamusele leswaku valandzeri va yena, Vakriste va ntiyiso, na vona “a hi va misava.”—Matewu 4:8-10, 17; 21:9; Yohane 6:15; 17:14, 16; 18:36, 37; 1 Petro 2:21.

12. (a) I vamani lava wiseleke Goliat wa manguva lawa ehansi, naswona hi ndlela yihi? (b) Ku xiya ka vona “Goliat” tanihi loyi a feke ku ve na vuyelo byihi eka vanhu va Yehova?

¹² Masalela lama fanaka na Davhida ya Vakriste lava totiweke namuntlha ya wisele Goliat wa manguva lawa ehansi. Hi ndlela yihi ke? Hi mhaka ya leswi va nga titwarisa handle ko kanakana va ri etlhelweni ra Yehova ra ku lwela vulawuri bya misava. “XIBOHO (Lexi Amukeriweke Hi Nhlangano Wa Swichudeni Swa Bibele Swa Matiko Hinkwawo eNtsombanweni eCedar Point, Ohio, Hi Sonto, September 10, 1922)” xi veke xikombiso. Xi katse leswi landzelaka:

“10. Nakambe hi twisisa ni ku tiyisa leswaku leri i siku ra ku tirihisela ka Xikwembu eka mfumo wa sathana lowu vonekaka ni lowu nga vonekiki;

“11. Leswaku ku tlhomiwa nakambe ka misava kumbe mafambiselo ya khale hi leswi nga endlekiki; leswaku nkarhi wa ku tlhomiwa ka mfumo wa Xikwembu ha Kriste Yesu wu fikile; ni leswaku mimfumo ni tinhlengeletano hinkwato leti nga titsongahatiki hi ku swi rhandza eka mfumo lowu lulameke wa Hosi ti ta herisiwa.”

“N’wana Davhida,” tanihi Nhloko ya bandlha ra Vukriste, handle ko kanakana u kongomise ku hoxiwa ka “ribye” rero ra ntiyiso wa Mfumo. (Matewu 12:23; Yohane 16:33; Vakolosa 1:18) Swiboho leswi amukeriweke eka mintsombano ya lembe na lembe ku sukela hi 1922 ku fika hi 1928 swi funghe xiyimo lexi. Elangutelweni ra vanhu va Yehova, “Goliat” u file, u tsemiwe nhloko. Vuhosi bya vanhu lebyi lerisaka byi pfumale matimba yo susumetela vatwarisi lava nga na xivindzi va vuhosi bya Yehova eku landzuleni.—Ringanisa Nhlavutelo 20:4.

13. (a) Xana vafundhisi va Vujagana va landzule hi ndlela yihi hi nkarhi wa ntshikilelo eJarimani ra Hitler? (b) Buku leyi nge Mothers in the Fatherland yi vike yini ehenhleni ka Timbhoni leti nga landzuriki?

¹³ Xikombiso lexi xiyekaka xa manguva lawa xo xungetiwa xa mimfumo leyi fanaka na Goliat ya politiki xi endlekile eJarimani ra Hitler. Vukhongeri lebyikulu, bya Khatoliki ni bya Protestente byi landzule hi laha ku khomisaka gome eku luveni ka Vunazi, byi ri karhi byi gandzela murhangeri wa Nazi, byi losa mujeko wa yena wa swastika ni ku katekisa mavuthu ya yena ya nyimpi loko ma ri karhi ma ya eku dlayeteleni ka vapfumeri-kulobye ematikweni lawa va vandzamaneke na wona. Lava vuriwaka Vakriste va ku pfumela hinkwako—kambe hayi Timbhoni ta Yehova—a va khomekile eku hisekeleni ka ku sirhelela tiko. Buku leyi nge Mothers in the Fatherland yi vikile yi ku: “[Timbhoni ta Yehova] ti rhumeriwe etikampeni ta nxaniso, gidi ra vona ri dlayiwile, naswona gidi rin’wana ri file exikarhi ka 1933 na 1945. . . . Makhatoliki ni Maprotestente ma twe vafundhisi va vona va va khutaza ku tirhisana na Hitler. Loko va arile, va endle tano ku lwisana ni swileriso leswi humaka ekerekeni ni le mfun’weni.” Vona nandzu lowonghasi wa ngati lowu Kereke na Mfumo swi veke na wona!—Yeremia 2:34.b

14. Ha yini Timbhoni ta Yehova hakanyingi ti xanisiwa?

¹⁴ Ku ta fika namuntlha, ntshikilelo wa tihanyi wa Timbhoni ta Yehova wa hambeta ematikweni yo tala, hi laha Yesu a vhumbeke ha kona. Kambe ehansi ka swiyimo hinkwaswo, Vakriste lava hi ku chivirika va hambeta va chumayela “Evangeli leyi ya Mfumo.” (Matewu 24:9, 13, 14) Lexi hambaneke na xiyimo lexi hi leswaku Timbhoni ematikweni yo tala ti xiyiwa tanihi vaaka-tiko lava tshembekaka, lava hanyaka kahle, lava vekaka xikombiso eku hlayiseni ka nawu ni ku rhula. (Varhoma 13:1-7) Kambe hakanyingi va xanisiwa. Ha yini ke? Tanihi leswi vugandzeri byi nga bya Yehova ntsena, va papalata ku nkhinsamela swifaniso swa Tiko kumbe ku swi dzunisa. (Deuteronoma 4:23, 24; 5:8-10; 6:13-15) Handle ko landzula, va gandzela Yehova, ‘yena ntsena,’ va endla Yehova Hosi Leyikulu ya vutomi bya vona. (Matewu 4:8-10; Psalma 71:5; 73:28) Hi ku va ‘va nga ri xiphemu xa misava,’ va hlayisa vukala-tlhelo bya Vukriste eka tipolitiki ni tinyimpi ta misava.—Yohane 15:18-21; 16:33.

15, 16. (a) I xikombiso xa mani lexi Timbhoni ta malembe hinkwawo ti nga xi landzelaka loko Goliat wa manguva lawa a ti xungeta, naswona leswi swi kombisisiwe ku yini hi nhwanyana wa Vukriste wa malembe ya tsevu hi vukhale? (b) Vatswari va Vukriste va lava ku dyondzisa vana va vona leswaku va fana na mani?

¹⁵ Goliat wa manguva lawa hakanyingi u xungeta vahlayisi lava va vutshembeki, lava va rhangisaka vugandzeri bya Yehova emahlweni ka mikhuva ya swifaniso. (Ringanisa Nhlavutelo 13:16, 17.) Kambe Timbhoni, letintsongo ni letikulu, ti nga landzela xikombiso xa Davhida hi ku hlamula mphikamakaneta leyi handle ko chava. Etikweni ra Latin-Amerika, xinhwanyatana xa Vukriste xa malembe ya tsevu hi vukhale xi amukele dyondzo leyinene ya le kaya ku sukela evuhlangini. (Ringanisa Vaefesa 6:4; 2 Timotiya 3:14, 15.) Leswi swi pfune ku xi endla xichudeni lexi tlhariheke swinene etlilasini ya xona exikolweni. Kambe ripfalo ra xona leri leteriweke hi Bibele ri xi susumetele ku papalata ku hlanganyela eminkhubyeni ya swifaniso ya tlilasi. Loko xi hlamusele xiyimo xa xona, mudyondzisi u vule leswaku nhwanyana wa malembe ya xona a a ri ntsongo swinene lerova a nga va ni ripfalo! Xinhwanyatana lexi xa malembe ya tsevu hi vukhale xi kombise mudyondzisi leswaku u hoxile hi ku nyikela vumbhoni lebyi nyanyulaka.

¹⁶ Ku tshembiwa leswaku vatswari hinkwavo va Vukriste va ta dyondzisa vana va vona leswaku va ta landzela xikombiso xa muntshwa Davhida hi ku teka xiyimo xa vona loko mfumo wa misava lowu fanaka na Goliat wu va xungeta. Onge va nga fana na vana vanharhu va Vaheveru lava tshembekaka, ku fana na Daniyele ni van’wana vo tala va rhekhodo ya Bibele eku ‘hlayiseni ka ripfalo lerinene’ hi xivindzi ku pfumelelana ni misinya ya milawu ya Bibele.—1 Petro 2:19; 3:16; Daniel 3:16-18.

Hi Laha Van’wamatimu Va Swi Vonaka Ha Kona

17. (a) N’wamatimu wa Munghezi Toynbee u tsundzuxe hi ku humelela ka yini? (b) Xana ntlawa wa Goliat wa manguva lawa wu ringa vutshembeki bya vanhu va Xikwembu hi ndlela yihi?

¹⁷ N’wamatimu la dumeke swinene wa Munghezi Arnold Toynbee u tsundzuxe hi ku humelela ka “xivumbeko xa tihanyi ta vugandzeri bya vuhedeni bya mimfumo leyikulu ya matiko” enkarhini wa hina a tlhela a hlamusela leswi tanihi “comela xo dzunga xa vhinya leyintshwa ya xidemokrati leyi nga emabodlheleni ya khale ya swivongo.” Lava va vulaka leswaku tiko ra vona ri tlakukile eka laman’wana hinkwawo, hambi ku ri ku ya fika eka yinhla yo gandzela Mfumo, va lawuriwe hi vafumi ni ku lerisiwa leswaku va tamela mafambiselo ya hulumendhe, hambi ma sasekile kumbe ma bihile. Hikwalaho, ntlawa wa Goliat wu pfukele ku ringa vutshembeki bya vanhu va Xikwembu, lava rhandzaka tiko leri va velekiweke eka rona kambe va ala ku gandzela Mfumo ni swifaniso swa wona.

18. I swivutiso swihi leswi lavisisaka leswi Mukriste la nga ni ripfalo a faneleke ku swi hlamula?

¹⁸ Tanihi leswi a swi ri tano eJarimani ra Vunazi, namuntlha ku na swivutiso leswi lavisisaka leswaku Mukriste la nga na ripfalo a swi hlamula: Xana ndzi fanele ku kholwa leswaku tiko leri ndzi tshamaka eka rona ri tsakeriwa hi Xikwembu ku tlula rihi na rihi rin’wana? Ngopfu-ngopfu sweswi, eka nguva leyi nga ni khombo ngopfu ya matimu ya vanhu, xana swa twala ni ku va ni mongo ku languta xiphemu xin’wana lexintsongo xa misava tanihi lexi tlakukeke ku tlula swiphemu leswin’wana hinkwaswo? Kumbe ku languta ntlawa wun’we wa ndyangu wa vanhu tanihi lowu tlakukeke eka leyin’wana hinkwayo?

19. Xana N’wamatimu lonkulu eka hinkwavo, Yehova, u hi byela yini malunghana ni ku anakanya ni ku endla onge rixaka rin’wana ra vanhu hi loko ri tlakukile eka rixaka rihi na rihi rin’wana?

¹⁹ A hi xiyeni langutelo ra N’wamatimu la tlakukeke ngopfu eka hinkwavo—Yehova Xikwembu, Mutsari wa Bibele. Muapostola Petro wa hi byela a ku: “Ndza twisisa swinene sweswi leswaku Xikwembu a xi yi hi nghohe ya vanhu; kambe, ematikweni hinkwawo, loyi a xi chavaka a vuya a endla leswi lulameke, xa n’wi tsakela.” Naswona xana minkarhi hinkwayo a hi fanelanga ku endla hi ku twanana na nhlamuselo leyi huhuteriweke ya muapostola Pawulo ya leswaku Xikwembu “hi munhu un’we, xi endlile tinxaka hinkwato ta vanhu leswaku ti eneta misava hinkwayo”? Ha yini rixaka rin’wana ra vanhu ri fanele ku anakanya ni ku endla onge hi loko rona ri tlakukile eka tinxaka letin’wana hinkwato? Loko a vulavula hi vanhu hinkwavo, Pawulo u te: “[Hi va] rixaka ra Xikwembu.”—Mintirho 10:34, 35; 17:26, 29.

20. Xana vanhu va Xikwembu va nge he ntlhontlhiwi hi yini emafambiselweni lamantshwa ya Yehova, naswona dyondzo ya hina leyi landzelaka yi ta hlamusela yini ke?

²⁰ Emafambiselweni lamantshwa ya Yehova, varhandzi va vululami a va nga ha ntlhontlhiwi hi mafambiselo yo lerisa ya politiki lama fanaka na Goliat, hikuva manyunyu na rivengo ra rixaka ku ta va swilo swa nkarhi lowu hundzeke. (Psalma 11:5-7) Hinkwako laha va hanyaka kona emisaveni, vanhu va Xikwembu ana se va siye vutiko byo tano endzhaku ka vona, eku yingiseni ka xileriso xa Yesu xo ‘rhandzana tanihi leswi na yena a va rhandzeke.’ (Yohane 13:34, 35; Esaya 2:4) Dyondzo ya hina leyi landzelaka yi kombisa muxaka wa rirhandzu lowu sweswo swi nga wona!

[Tinhlamuselo ta le hansi]

Swivutiso Swa Mpfuxeto

◻ I yini lexi faniseriwaka hi Goliat xihontlovila lexi xungetaka?

◻ I tindlela tihi leti ha tona malandza ya Xikwembu ma nga kombisiki ku landzula eka mphikamakaneta ya vuhosi?

◻ Ha yini vanhu va Xikwembu va nga vulaka leswaku Goliat wa manguva lawa u wiseriwe ehansi?

◻ I vamani lava landzelaka goza ra Hosi Sawulo, naswona hi ndlela yihi?

◻ Xana vanhu va Yehova va endle ku fana na Davhida ehansi ka ntshikilelo wa Goliat wa manguva lawa hi ndlela yihi?