‘Kambe A Ndzi N’wi Rhandzi Yehova!’

BOB a a ri xifanyetana loko mana wakwe a va un’wana wa Timbhoni ta Yehova. Eka malembe yo hlayanyana, u ye na yena eHolweni ya Mfumo naswona hambi ku ri entirhweni wo chumayela, hambi leswi a nga kalangiki a khuvuriwa. Hambi swi ri tano, hi nkarhi lowu a fikeke eku heleni ka kondlo-a-ndzi-dyi, u tshike ku hlanganyela ni Timbhoni. Hi ku tsanisiwa hi swiyimo leswi landzelelanaka swo biha, u onhe vutomi bya yena. Hambi leswi a ha vulaka leswaku wa swi pfumela swilo swo tala leswi a swi dyondzeke eBibeleni, leswi a swi anelanga leswaku swi n’wi endla leswaku a tlhelela enhlengeletanweni ya Yehova. Ha yini Bob a titwa hi ndlela leyi?

Xiya xikombiso xin’wana. David u ve mutirheli wa nkarhi hinkwawo malembe yo hlayanyana. Minkarhi yin’wana, swivutiso a swi ta emiehleketweni ya yena malunghana ni tidyondzo tin’wana ta Bibele. Kambe minkarhi hinkwayo u tlhantlhe swiphiqo hi ku anakanya leswaku tanihi le ka xitekatekisana xa nhlolotwana, munhu a nga tshiki hikwalaho ka leswi xiphemu xin’we kumbe swimbirhi swi vonakaka swi nga ngheni eku sunguleni. A a aneriseka ku yimela Yehova leswaku a tlhantlha. Kambe hi ku famba ka nkarhi, David u vule leswaku a a nga ha swi koti ku tianerisa hi ndlela yoleyo. Hi ku tlhentlha eka malunghelo ya yena ya ntirho, u hatlise a tshika ntiyiso. Xana i yini lexi vangeleke ku cinca eku anakanyeni ka yena?

Entiyisweni, swa vava ku vona lava hi va rhandzaka va tshika emphikizanweni wa vutomi. Handle ka ku kanakana, hi lava ku endla hinkwaswo leswi hi nga swi kotaka leswaku hi va pfuna. (2 Vakorinto 12:15; Vagalatiya 5:7) Kambe entiyisweni i yini lexi vangelaka munhu ku sukela ntiyiso? Xana ku nga endliwa yini ku pfuna munhu wo tano leswaku a tlhelela emphikizanweni? Naswona i yini lexi munhu a faneleke ku xi endla loko mimboyamelo yo tano yi sungula ku kula eka yena?

Mbilu, Ripfalo Ni Ripfumelo

Ku na xilo xin’we lexi xiyekaka ehenhleni ka lava va tshikeke ntiyiso. Vo tala va vona a va endli tano hikwalaho ka leswi va nga ha pfumeriki leswaku i ntiyiso. Hi laha ku hambaneke swinene, vo tala va vona va ri, “Ndza swi tiva leswaku lowu i ntiyiso, kambe . . . ” kumbe, “Loko ku ri na ntiyiso wihi na wihi, ndza swi tiva leswaku lowu hi wona.” Endzeni-ndzeni etimbilwini ta vona, vo tala va vona va ha pfumela leswaku leswi va swi dyondzeke eBibeleni i ntiyiso. Kambe hi ndlela yo karhi va tsanise voko ra vona ivi va lahlekeriwa hi ku chivirika ka vona. Yakobo u te: “Ku pfumela na kona loku nga hava mintirho ku file.”—Yakobo 2:26.

Ripfumelo ra ntiyiso ri katsa leswi tlulaka ku va ni vutivi kumbe ku pfumela leswaku nchumu i ntiyiso ntsena. Ematshan’wini ya ku va fambiselo ra mianakanyo ntsena, ripfumelo ri katsa mbilu yo fanekisela, hikuva Bibele ya hi byela: “Hikuva munhu ú pfumela hi mbilu, kutani sweswo swi n’wi endla a va la lulameke.” (Varhoma 10:10) Manuku ke, hi laha ku twalaka Bibele yi kombetela mbilu tanihi xihlovo xa xiphiqo loko munhu a sungula ku hambuka. Tanihi laha Pawulo a tsundzuxeke ha kona u te: “Vamakwerhu, tivoneleni leswaku ku nga vi na un’we exikarhi ka n’wina la nga ni mbilu yo biha, leyi nga riki na ku pfumela, kutani a hambukela kule ni Xikwembu lexi hanyaka.”—Vaheveru 3:12.

Tanihi vumbhoni bya leswaku mbilu yi katseka ngopfu, hi nga ha yingisela Diane, la hambukeke. Loko Vakriste-kulobye va ringete ku n’wi pfuna, u hlamule hi ku tiyisa a ku, “ndzi nge vuyeli eka Yehova. A ndzi n’wi rhandzi!” A a swi tiva leswaku nchumu wun’we lowu a wu ta n’wi pfuna ku tshama ekusuhi na Yehova Xikwembu i ku n’wi rhandza tanihi Munhu naswona tanihi Munhu la faneriwaka hi ku tinyiketela ka yena. Entiyisweni, a ku ri muxaka lowu wa rirhandzu leri n’wi susumeteleke ku nyiketela vutomi bya yena eka Yehova eku sunguleni. Kambe hi ndlela yo karhi u titwe a nga ha ri na rirhandzu ro tano. Handle ka rona, a a swi tiva leswaku a a ta va a ri eminsusumetweni loko o vuya. Kambe xana munhu u lahlekeriwa njhani hi rirhandzu leri ri nga tshama ri vonaka ri entile?

Phela, Pawulo u boxe “mbilu yo biha, leyi nga riki na ku pfumela.” Etimhakeni tin’wana, ku pfumala ko tano ka ripfumelo ku vangiwa hi ku pfumelela mbilu yi navela leswi Yehova Xikwembu a swi sivelaka kumbe ku ala leswi a swi lerisaka. Xisweswo mbilu ya avana kutani a ya ha helelanga eka Yehova. Manuku ke, hi ku vona leswaku goza ra munhu a ri amukeriwi hi Xikwembu, ndlela yo olova yo papalata nkwetlembetano wun’wana i ku ya ‘ekule ni Xikwembu lexi hanyaka.’ (Ringanisa Genesa 3:8-10.) Ematshan’wini yo hundzuka, “mbilu yo biha” yi susumetela munhu ku humesa Yehova ni xikongomelo xa yena evuton’wini bya munhu. Xisweswo munhu la pfumalaka ripfumelo u tshika ntiyiso.

Etimhakeni tin’wana, ematshan’wini yo karhatiwa hi switlhavi swa ripfalo hikwalaho ka ndlela yo karhi, munhu u pfumelela mbilu ya yena hi vukanganyisi yi n’wi susumetela ku lava ku baleka hi vutlhari hi ku kanakana, hi ku kuma swihoxo, kumbe hambi ku ri hi vugwinehi. Loko a tikhorwisa leswaku xivumbeko hinkwaxo xa ripfumelo ra yena xi hoxile, a nga ha yi voni mfanelo yo hanya emindzilakaneni ya rona. Vanhu vo tano va bakanyela ripfalo lerinene etlhelo kutani va ‘tokota ku onhaka ka ripfumelo ra vona.’—1 Timotiya 1:19.

Kavula, munhu a nga ha tshika ntiyiso hikwalaho ka xivangelo xin’wana. Kambe ku nga khathariseki leswaku i yini, hakanyingi swi katsa mbilu hi laha ku nga hundzukiki. Hikwalaho ka xivangelo lexi, yi le nkarhini hakunene ndzayo leyi nge: “Hlayisa mbilu ya wena ku tlurisa le’ŝi hlayisiwaka, hikuv̌a i šihlov̌o ša v̌utomi.”—Swivuriso 4:23.

Ku Hlakarhela Ka Koteka

Ku pfumela leswaku mimboyamelo ya hina vini leyi hoxeke a yi ri xivangelo xa ku lahla ka hina ripfumelo swa khutaza. Kambe ku endla tano i goza ro sungula ehenhleni ko lunghisa ndlela ya hina yo tlhelela evuxakeni lebyi tiyeke na Yehova. Ntokoto wa Steve, phayona eNghilandi, wu yi kombisa kahle mhaka leyi.

Hambi leswi Steve a nga wangiki entiyisweni, emhakeni yin’wana u sungule ku vona ku pfumala ni ku kayivela ku khorwiseka. Loko a chumayela van’wana, marito ya yena u ya twe ya phyama etindleveni ta yena. Loko Steve a ri exikarhi ka vamakwavo va xinuna ni va xisati, a a titwa a ri endhawini leyi nga fanelekangiki, onge hi loko a nga ri un’wana wa vona.

Lexi tsakisaka hi Steve, u swi xiyile leswaku xiphiqo a xi ri na yena. “A ndzi xi endlanga xihoxo xo tihlawula leswaku ndzi anakanya hi swilo, onge hi loko a ko va ni swihlovo swin’wana swa mianakanyo enyameni leyi nga hetisekangiki leswi a swi ta nyika tinhlamulo letinene,” ku tsundzuka Steve. (Ringanisa Varhoma 7:18.) Ematshan’wini ya sweswo, u xiye leswaku u fanele a kambisisa mbilu ya yena ni ku tsuvula ku navela loku kanganyisaka loku n’wi hambukisaka entiyisweni. Hi ku sungula emasungulweni wolawo, u tirhile leswaku a hlayisa rirhandzu ra yena eka Xikwembu ni ripfumelo eRitweni ra Xona. Namuntlha, Steve u tirha a tsakile tanihi murhumiwa.

Ndlela Leyi Van’wana Va Nga Pfunaka Ha Yona

A hi mani na mani la lahleke kumbe la lahlekeriwaka hi ku namarhela ka yena ntiyiso la vonaka swilo swi ri erivaleni tanihi laha Steve a endleke ha kona. Entiyisweni, hakanyingi i ku lahlekeriwa loku ka xivono xa moya lexi nga erivaleni loku yisaka eku weni ko hetelela. Laha hi laha Vakriste-kulorhi va nga nyikaka mpfuno kona. (Varhoma 15:1; Vagalatiya 6:1) Kambe leswi swi nga endliwa njhani ku antswa ke?

Handle ko tiluma-luma, a swi anelanga ku rhamba kumbe ku khutaza munhu wo tano leswaku a vuya. Swihinga swi fanele ku voniwa kutani swi susiwa. Matshalatshala ya fanele ku endliwa leswaku ya tsakisa mbilu ya munhu la tsanisiweke kumbe la holeke. Mabulo lama kongomeke, kambe ya musa, hi ku ntshunxeka ya nga ha pfuna munhu. Ku tirhisa matsalwa yo tanihi 1 Timotiya 1:19, Vaheveru 3:12, na Yeremia 17:9, 10 swi nga ha n’wi pfuna ku lavisisa endzeni-ndzeni embilwini ya yena kutani a vona lexi n’wi vangelaka leswaku a ‘hambuka eka Xikwembu lexi hanyaka.’

Loko swivangelo swi kala swi voniwa, matshalatshala ma fanele ma kongomisiwa eka swona. Mbilu ya miri leyi nga ni vuvabyi yi lava ku khathaleriwa naswona kumbexana ku va ni vuhandzuri lebyi vavaka loko muvabyi a ta pona. Swa fana ni mbilu yo fanekisela leyi vabyaka. Ku navela loku hoxeke, mimboyamelo ya ku tshunxeka, kumbe timhaka tin’wana leti vangelaka mbilu leswaku yi sihalala swi fanele ku susiwa loko yi ta tlhela yi hanya. Vakriste lava gingiritekaka va nga ha khongela kahle ni munhu la tsaneke, hambi ku ri ku dyondza na yena Bibele loku vakulu va swi vona swi fanela. I tindlela to tano ntsena leti ha tona mbilu yi nga pfuxiwaka kutani munhu a tlhela a rhandza Yehova.—Swivuriso 2:1-5.

Leswi swi ve ntiyiso emhakeni ya Diane. Ku bula ni Vakriste lava vupfeke swi n’wi pfune ku tiva leswi a a fanele ku swi endla leswaku a pfuxeta rirhandzu ra yena eka Yehova. Hi ku xiya leswaku a a boheka ku tiva Yehova hi ku enta nakambe, Diane u amukele mpfuno lowu nyikeriweke. Endzhaku ka ku dyondza Bibele kwalomu ka lembe, yena ni nuna wa yena nakambe va ve vadzunisi va Yehova lava gingiritekaka.

Leswi rirhandzu ri katsaka xiendlo, hakanyingi i ku endla leswi Yehova a swi vulaka ni ku tokota mpfuno wa yena wa rirhandzu leswi tirhaka swinene. Ina, ku gingiriteka swi pfuna munhu ku tlhela a kuma rirhandzu leri ri nga tshama ri susumeta mbilu ya yena. (Psalma 34:8) Leswi swi nga ha sungula hi ku teka magoza lama tirhaka leswaku u lwa ni ku navela loku hoxeke kumbe ku lulamisa mimboyamelo yo biha ya mbilu. Ku hlula kun’wana ni kun’wana enyimpini leyi i goza leri nga ekusuhi ni ku tlherisela mbilu eka Yehova. (Swivuriso 23:26; 1 Petro 2:1-3) Loko mbilu yi kokiwa, ku navela ku avelana ni van’wana leswi nga eka yona ka kula. Hikwalaho, hi ku hatlisa loko khale ka vahuweleri va Mfumo lava a va tsanile va faneleka, va fanele ku pfuniwa ku hlanganyela entirhweni wo chumayela, hikuva “munhu ú pfumela hi mbilu, kutani sweswo swi n’wi endla a va la lulameke; ú vula hi nomu, kutani sweswo swi n’wi endla a va la ponisiwaka.”—Varhoma 10:10.

Eka vahi na vahi lava vonaka leswaku a va ha n’wi rhandzi Yehova, gondzo ro vuyela evuton’wini byo chava Xikwembu ri nga ha va ro leha naswona ri va ro nonon’hwa. Kambe, ku hlakarhela ka moya ka Steve na Diane i vumbhoni bya leswaku ku cinca ka mbilu ku nga endleka. Ina, ku kondletela ka koteka hi ku tirha ka moya wa Yehova, ku tirhisiwa ka Rito ra yena, ni ku tirhisana loku pfuxetiweke ni nhlengeletano ya yena. I ntshembo wa hina lowunene ni xikhongelo leswaku vanhu vo tano va nga pfuniwa ku tlhela va tiphina evugandzerini bya Yehova ni ntirho wo hlawuleka tanihi lava rhandzaka Yehova hi timbilu hinkwato.—Marka 12:30; 1 Vakorinto 13:8; 3 Yohane 1-4.