Nkambisiso Wa Mahungu

Makhatoliki Ni Nkhuvulo

Nhlayo leyi kulaka ya lavakulu ya karhi ya khuvuriwa hi Kereke ya Rhoma Khatoliki eFurwa, ku vika Le Monde, nyuziphepha ya Xifurwa. Entiyisweni, phepha ri vula leswaku “tinhlayo ti andze kambirhi eka malembe ya mune lama hundzeke.” Mintirho ya le mahlweni ka nkhuvulo ya karhi ya endliwa hi lavakulu va 4 000 eFurwa lava lavaka ku va Makhatoliki lama khuvuriweke. Mbirhi-xa-nharhu i vavasati lava nga exikarhi ka malembe ya 20 na 40. Kotara yin’we a hi Mafurwa.

Hambi swi ri tano, ku lunghiselela nkhuvulo wa lavakulu swi nga teka malembe mambirhi kumbe manharhu. Muprista Guy Cordonnier, la langutelaka mintlawa yoleyo ya ku khuvula endhawini ya Versailles, u te: “Leswaku u khuvuriwa, a swi anelanga ku vula leswaku munhu u pfumela eka Xikwembu. I swa nkoka ku dyondza ndlela yo hanyisana ni vanhu.”

Kavula, nkhuvulo wa lavakulu a hi nchumu lowuntshwa. Yesu hi yexe u khuvuriwe a ri ni malembe ya 30. Leswaku eka nkhuvulo ku laveka leswi tlulaka ku pfumela eka Xikwembu ntsena, na wona a hi nchumu lowuntshwa. Xileriso xa Yesu eka valandzeri va yena a ku ri ku endla “vadyondzisiwa . . . [va] va khuvula” ni ku “va dyondzisa” ku hlayisa milawu ya yena.—Matewu 28:19, 20.

Hambi swi ri tano, tanihi leswi Kereke ya Khatoliki hi malembe xidzana yo tala yi endleke nkhuvulo wa tincece, xiyimo xa kereke eku khuvuriweni ka lavakulu xi hambana na swona. Valawuri va kereke va vula leswaku swi teka malembe mambirhi kumbe ku tlula ku lunghiselela nkhuvulo wa lavakulu, kambe va tiyisa leswaku nkhuvulo wa tincece wu fanerile. Va vula leswaku nkhuvulo wu susa xidyoho xa ndzhaka eka tincece, kambe muapostola Yohane u tsarile a ku: “Ngati ya Yesu . . . ya hi hlantswa yi hi susa swidyoho hinkwaswo.” (1 Yohane 1:7) Tanihi leswi swihlangi swi nga swi kotiki ku kombisa ripfumelo eka Xikwembu ni le ka ngati ya Kriste leyi halatiweke, ha yini swi khuvuriwa ke?

Marito Lama Nga Si Tshamaka Ma Twiwa

Kwalomu ka hafu ya vavasati va 3 800 lava kamberiweke hi khampani ya ndzindza-khombo ya le Japani “a va si tshama va wa twa marito lama nge ‘ndza ku rhandza’ eka vavanuna va vona malembe ma nga ri mangani,” ku vika The Daily Yomiuri. Tiphesente ta vavasati lava nga wa twiki marito lawa ta andza hi ku ya hi malembe naswona lava nga eka va-50, tiphesente ta 82 leti hlamarisaka ti vula leswaku a ta ha ma twi marito yo tano ma huma eka vavanuna va vona. Hambi ku ri eka vavasati lava nga eka va-20, i 10 wa tiphesente ntsena leti twaka vavanuna va tona va vula marito lawa siku rin’wana ni rin’wana.

Eka mhaka ya rirhandzu ya Hosi Solomoni wa vutlhari leyi katsaka jaha ra murisi ni nhwanyana wo saseka wa tiko rero wo huma emutini wa khale wa Xunem, jaha ri yive mbilu ya nhwanyana loyi hi ku tirhisa ‘marito ya rirhandzu.’ (Risimu ra Tinsimu 1:2) Loko vavanuna se va ti yivile timbilu ta vasati va vona, swa ha laveka ku phofula rirhandzu ra vona? Ina! Bibele ya khutaza: “N’wina vavanuna, rhandzani vavasati va n’wina kukota leswi Kriste na yena a nga rhandza [bandlha], kutani u nyiketile vutomi bya yena hikwalaho ka [rona].”—Vaefesa 5:25.

Evusikwini lebyi a xengiweke ha byona, Yesu hi ku phindha-phindha u phofule rirhandzu ra yena eka vadyondzisiwa va yena. (Yohane 13:34; 14:19-21; 15:9, 10, 12) Wanuna u fanele ku tsundzuka ku lava ka nsati wa yena ku tiyiseka hi rirhandzu ra yena. Vavanuna va fanele va tsundzuka nakambe leswaku Kriste ‘u nyikele vutomi bya yena hikwalaho ka bandlha.’ Xisweswo, u phofule rirhandzu hi marito na hi swiendlo. Swi le rivaleni ke, vavanuna va endla kahle loko va tekelela xikombiso xa Kriste.