Malangutelo Ya Paradeyisi Ma Tiyile Ku Nga Khathariseki Ku Xandzuka Ka Vanhu
1. Hi ku famba ka nkarhi, wanuna ni wansati vo sungula va voniwa va ri kwihi naswona va ri eka swiyimo swihi ke?
NKARHI wu hundzile. Wanuna ni wansati vo sungula a va ha ri lava nga ambalangiki va nga voni nchumu. Va ambarile—tinguvu to leha ta madzovo ya swiharhi. Va le handle ka nyangwa wo nghena entangeni lowu hetisekeke wa Edeni. Minhlana yi langute entangeni. Va languta exivonweni lexi nga emahlweni ka vona. Va vona ntsena misava leyi nga rimiwangiki. Swi le rivaleni leswaku a yi na nkateko wa Xikwembu ehenhla ka yona. Emahlweni ka vona ku nga voniwa mitwa ni mahlwehlwe. Xana leyi a hi misava leyi va lerisiweke ku yi fuma? Ina, kambe wanuna ni wansati vo sungula sweswi a va humanga va ya kwalaho hi xikongomelo xo ndlandlamuxa ntanga wa Edeni ku ya fika emisaveni yo tano leyi nga endliwangiki nchumu.
2. Ha yini wanuna ni wansati va nga ringeti ku nghena nakambe entangeni wa Paradeyisi?
2 Loko va vona swilo swo tano leswi hambaneke, ha yini va nga tlheleli endzhaku va tlhela va nghena entangeni wa Paradeyisi? Swi nga ringanyetiwa hi ku olova, kambe vona leswi swi nga endzhaku ka vona enyangweni wo nghena entangeni. Swivumbiwa leswi a va nga si kala va swi vona, hambi ku ri endzeni ka ntanga, tikerubim, ni banga leri vangamaka ra fumu leri ri rhendzelekaka hi roxe nkarhi na nkarhi. Wanuna ni wansati a va nga ta kala va swi hundza va nghena entangeni va ri karhi va hanya!—Genesa 3:24.
3. Ku humelele yini lexi nga hundzula swiyimo swa mpatswa wo sungula swi va leswi khomisaka gome hi ndlela leyi?
3 Xana ku humelele yini ke? A hi xihundla lexi rharhanganeke ngopfu loko ku tiwa eka sayense leyi rharhanganeke hi magidi ya malembe. Swi hlamuseriwe kahle. Wanuna ni wansati vo sungula a va fanele va xiya mintshembo ya vumundzuku leyi nga ya nkoka leyi xileriso xa Xikwembu xi yi vekeke emahlweni ka vona esikwini ra ku tekana ka vona kambe exiyin’weni xa leswaku va yingisa Tata wa vona wa le tilweni emhakeni leyintsongo swinene. Ku yingisa ka vona loku hetisekeke a ku fanele ku ringiwa hi ku yirisiwa ka xakudya xin’we: A va fanelanga va dya muhandzu wa “muri wo tiv̌isa ŝo saseka ni ŝo biha.” (Genesa 2:16, 17) Loko va endle tano va lwisana ni swileriso swa Xikwembu, a va ta fa hakunene. Sweswo hi leswi Adamu, tanihi muprofeta wa Xikwembu a byeleke nsati wa yena, xivumbiwa xa munhu lexintsongo. Kambe lexi hlamarisaka, na·chashʹ liya, nyoka liya, yi ale ntiyiso wa leswi Xikwembu a xi byele Adamu eka xitsundzuxo xa Xona xa ku nga dyi “muri wo tiv̌isa ŝo saseka ni ŝo biha” lowu yirisiweke. Nyoka yi hambukisele wansati eku pfumeleni leswaku ku tlula nawu wa Xikwembu ni ku dya muhandzu lowu yirisiweke a ku ta endla leswaku a fana ni Xikwembu ni ku n’wi endla leswaku a ntshunxeka eka Xikwembu eku voneni ka leswinene na leswo biha.—Genesa 3:1-5.
A Hi Mhaka Ya Nthyeketo
4, 5. Muapostola Pawulo u swi kombisa hi ndlela yihi leswaku mhaka ya ku kanganyisa ka nyoka ka wansati wo sungula a ku nga ri nthyeketo?
4 Xana a swi khorwisi ke? Xana swi twala swi fana swinene na nthyeketo, garingeto lowu nga seketeriwangiki eka mintiyiso ivi xisweswo wu nga amukeleki emianakanyweni leyi vupfeke ya manguva lawa leyi voningeriweke? E-e, hayi eka mutsari loyi timhaka ta yena ta ha hlayiwaka hinkwako, mutsari loyi a tshembekaka, muapostola loyi a hlawuriweke hi ndlela yo hlawuleka, loyi a tiveke ku pakanisa ka leswi a swi tsaleke. Eka bandlha ra Vakriste lava vupfeke emutini wa vanhu lavo tlhariha emisaveni wa Korinto, muapostola loyi Pawulo u tsarile a ku: “Kambe, kukota leswi nyoka yi kanganyiseke Evha hi mano ya yona, ndza chava leswaku hi tindlela tin’wana mianakanyo ya n’wina yi nga onhiwa, kutani mi nga ha swi koti ku landzela Kriste hi ku tinyiketa ni ku tenga.”—2 Vakorinto 11:3.
5 Pawulo a a nga ta kombetela eka nthyeketo, garingeto, ivi a tirhisa nchumu wo tano wo ehleketelela ku endla yinhla ya yena ni Vakorinto volavo, lava a va tolovelane swinene ni minthyeketo ya vukhongeri bya vuhedeni bya Magriki. Loko a tshaha eka Matsalwa ya Xiheveru lama huhuteriweke, lama a ma vuleke “rito ra Xikwembu,” muapostola Pawulo u tiyise leswaku ‘nyoka yi hambukise Evha hi mano ya yona.’ (1 Vatesalonika 2:13) Ku ya emahlweni, loko a tsalela mulanguteri wa Vukriste loyi a nyikiweke vutihlamuleri bya ntirho wo dyondzisa “ntila wa marito lama tiyeke ya xiviri,” muapostola Pawulo u te: “Ku rhangile Adamu a vumbiwa, ku landza Evha. Na swona a hi Adamu loyi a kanganyisiweke, kambe i wansati la kanganyisiweke, kutani a wela eku dyoheni.”—2 Timotiya 1:13; 1 Timotiya 2:13, 14.
6. (a) Ku tlula ka Adamu nawu wa Xikwembu ku hambanisa ku yini ni lokuya ka wansati? (b) Ha yini hi nga tiyisekaka leswaku wansati a a nga tisunguleli xitori ehenhleni ka nyoka?
6 Ku kanganyisiwa ka wansati hi nyoka i ntiyiso, hayi nthyeketo, tanihi leswi entiyisweni mimbuyelo ya ku nga yingisi ka yena a dya muhandzu lowu yirisiweke ku nga mintiyiso leyi tiyeke ya matimu. Xisweswo endzhaku ka loko a tlule nawu wa Xikwembu, u kucetele nuna wa yena ku hlanganyela na yena eku dyeni, kambe ku dya ka yena a ku nga ri hikwalaho ka leswi na yena a kanganyisiweke hi laha ku heleleke. (Genesa 3:6) Mhaka ya ku tihlamulela ka vona eka Xikwembu ya le ndzhakunyana yi ri: “Kutani wanuna a ku: Hi yena wansati loyi u nga nḍi nyika yena a v̌a na mina, l’a nga nḍi ha muri, nḍi dya. Yehova Šikwembu a ku ka wansati: U ŝi endlele yini šana? Wansati a ku: I nyoka le’yi nga nḍi kanganyisa, kutani nḍi dya.” (Genesa 3:12, 13) Wansati a a nga tisunguleli xitori ehehleni ka na·chashʹ yoleyo, nyoka liya, naswona Yehova Xikwembu a nga tekanga nhlamuselo ya yena tanihi garingeto, nthyeketo. U kombetele eka nyoka yoleyo tanihi leyi a yi ri xitirho eku kanganyiseni ka wansati leswaku a tlula nawu wa Xona, Xikwembu ni Muvumbi wa yena. A swi ta tsongahata ntikelo wa Xikwembu ku vulavula hi nyoka ya nthyeketo ntsena.
7. (a) Mhaka ya Bibele yi hlamusela xiendlo xa ku avanyisa ka Xikwembu ehenhla ka nyoka hi ndlela yihi? (b) Xana nyoka leyi kanganyiseke wansati wo sungula a yi ta kota ku kanganyisa na hina hi ndlela yihi? (Katsa ni marito ya nhlamuselo.)
7 Loko yi hlamusela xiendlo xa Xikwembu xa ku avanyisa eka nyoka yoleyo entangeni wa Edeni, mhaka yi ri: “Yehova Šikwembu a ku ka nyoka: Leŝi u nga endlisa ŝeŝo, u ta ruketeriwa e šikari ka ŝifuwo hikwaŝo, ni šikari ka ŝihari hikwaŝo ŝa tiko; u ta famba hi khuri, u dya nṭhuri hi masiku hikwawo ya ku hanya ka wena. Nḍi ta v̌eka ku v̌engana e šikari ka wena ni wansati, ni šikari ka rišaka ra wena ni rišaka ra wansati; ri ta ku faya nhloko, wena u ri luma širenḍe.” (Genesa 3:14, 15) Huvo yin’wana ni yin’wana leyinene yi tirhana ni mintiyiso ivi yi hlela vumbhoni bya xiviri, hayi migaringeto. Yehova Xikwembu a a nga tiendli xiphukuphuku, ntlunya, hi ku kongomisa xigwevo xa yena xa ku avanyisa eka nyoka ya nthyeketo, kambe a a hundzisela ku avanyisa ehenhla ka xivumbiwa xa xiviri, lexi nga kona, lexi a xi ri na vutihlamuleri. A swi nga ta hlekisa, kambe a swi ta va swa nkoka loko nyoka yoleyo leyi fanaka a yi lo hi kanganyisela eku anakanyeni leswaku a yi kalanga yi va kona, leswaku a yi ri nthyeketo ntsena, leswaku a yi nga ri na vutihlamuleri eka nchumu wun’wana ni wun’wana lowu hoxeke emisaveni.a
8. I ku avanyisa kwihi loku Xikwembu xi ku hundziseleke eka wansati, naswona hi vuyelo byihi eka vana va yena va xisati ni vatukulu va yena va xisati?
8 Loko yi nyikela nhlamuselo ya wansati leyi katseke nyoka tanihi leyi nga ya xiviri, rhekhodo malunghana ni nsati wa wanuna yi ri: “E ka wansati, a ku: Nḍi ta ku engetelela ngopfu e ku v̌av̌iseka ka ku tika ka wena; u ta v̌eleka v̌ana hi ku v̌av̌iseka; ku nav̌ela ka wena ku ta ya ka nuna wa wena, kambe yena o ta ku fuma.” (Genesa 3:16) Ku hava nchumu lowu fanaka na lowu lowu a wu katsiwile eka nkateko wa Xikwembu eku tekaneni ka yena na Adamu loko Xikwembu xi te eka vona: “Tŝalanani, mi anḍa, mi tata misav̌a.” (Genesa 1:28) Xileriso xolexo lexi katekisiweke lexi yaka eka mpatswa lowu hetisekeke wa vanhu xi kombise ku tika ka xiviri ka wansati kambe hayi nhlomulo lowu nga tiyiselekiki ni swivavi leswikulu swa ku veleka ni ntshikilelo wa wanuna eka yena. Ku avanyisa loku tivisiweke ehenhla ka wansati loyi a tluleke nawu a ku fanele ku khumba vana va yena va xisati ni vatukulu va yena va xisati ku suka eka rixaka rin’wana ku ya eka rin’wana.
Nawu Wa Xikwembu Lowu Kombisiweke Hi Xigwevo eHenhla Ka Adamu
9, 10. (a) I xitsundzuxo xihi lexi Xikwembu hi ku kongoma xi xi nyikeke Adamu, naswona a ku ta va vuyelo byihi loko Xikwembu a xi lo khomelela eka xigwevo xo tano? (b) I ku avanyisa kwihi loku Xikwembu xi ku hundziseleke eka Adamu?
9 Kambe ke, i swiyimo swihi leswi hundzukeke leswi wansati a a fanele ku avelana swona ni nuna loyi a n’wi kuceteleke ku n’wi joyina eku tluleni ka nawu? Eka wanuna loyi, hi ku kongoma Xikwembu xi te: “Loko wu ri muri wo tiv̌isa ŝo saseka ni ŝo biha, u nga ṭhuki u dya; hikuv̌a siku u dyaka, u ta fa.” (Genesa 2:17) Xana Xikwembu, Muavanyisi, a xi ta khomelela eka xigwevo xa makumu yo tano hi leswi Adamu a dyeke xiphemu xa muhandzu ntsena? Ehleketa hi leswi ku tisiwa ka xigwevo xo tano a ku ta vula swona! Hi xoxe a xi ta herisa ntshembo lowuya wa vumundzuku lowu nyanyulaka lowu Adamu na Evha va wu tsakeleke hi siku ra ku tekana ka vona, ntshembo wa vumundzuku wo tata misava hinkwayo hi vana va vona, hi rixaka leri hetisekeke ra vanhu lava tshamaka hi ku rhula emisaveni ya paradeyisi hi laha ku nga heriki evuntshweni lebyi nga heriki, va ri ni vuxaka bya ku rhula ni Xikwembu ni Tata wa vona wa le tilweni! Hakunene, Xikwembu a xi nga ta xi tshika xikongomelo xa xona n’wini lexi hlamarisaka eka vanhu ni kaya ra vanhu ra laha misaveni hi ku simeka xigwevo xa rifu ehenhla ka vatswari vo sungula va vanhu hinkwavo hi matimba! Kambe yingisela ku avanyisa ka Xikwembu hi laha ku rhekhodiweke ha kona emhakeni ya Bibele hi laha ku twisisekaka:
10 “Ni ka wanuna, a ku: Leŝi u yingiseke rito ra nsati wa wena, u dya muri lowu nḍi nga ku lerisa, nḍi ku: U nga ṭhuki u dya; misav̌a yi ruketeriwa hikwalaho ka wena. U ta dya ŝa yona hi ku v̌av̌iseka hi masiku hikwawo ya ku hanya ka wena; yi ta ku mirisela mitwa ni mahlohlwe u ta dya byanyi bya nhov̌a. U ta dya v̌uŝa hi nyuku wa mombo wa wena, u ko u tlhelela misav̌eni, hikuv̌a u humesiwile ka yona. Hikuv̌a u nṭhuri, u ta tlhelela e nṭhurini.”—Genesa 3:17-19.
11. I mintiyiso yihi malunghana ni ku yingisa leyi kombisaka ku faneleka ka ku avanyisa ka Xikwembu ehenhla ka Adamu?
11 Ku avanyisa koloko a ku vula ku tisiwa ka xigwevo xa rifu ehenhla ka munhu ku nga khathariseki vuyelo eka xikongomelo xa Xikwembu xo tata misava ya paradeyisi hi vavanuna ni vavasati lava hetisekeke lava tshamaka swin’we na hi laha ku nga heriki hi rirhandzu ni ku rhula va ri karhi va hlakulela ni ku langutela ntanga wa Paradeyisi wa misava hinkwayo. Wanuna u yingisile rito ra nsati wa yena ematshan’wini yo yingisela rito ra Xikwembu leri n’wi byeleke leswaku a nga dyi “muri wo tiv̌isa ŝo saseka ni ŝo biha” lowu yirisiweke. Naswona loko yena hi yexe a nga yingisanga rito ra Xikwembu ni Muvumbi wa yena, xana handle ko hundzuka a a ta dyondzisa vana va yena ku endla tano? Xana xikombiso xa yena n’wini a xi ta va yinhla yo vulavula ha yona eku va dyondziseni ka ku yingisa Yehova Xikwembu?—Ringanisa 1 Samuel 15:22.
12, 13. (a) Xana xidyoho xa Adamu a xi ta khumba vana va yena hi ndlela yihi? (b) Ha yini Adamu a nga faneriwi hi ku hanya hi laha ku nga heriki eParadeyisini kumbe hambi ku ri emisaveni nikantsongo?
12 Xana vana va Adamu a va ta swi kota ku hlayisa nawu wa Xikwembu hi laha ku hetisekeke, tanihi leswi yena hi yexe eka vumunhu bya yena lebyi hetisekeke a kaleke a kota ku endla tano? Hi ku tirha ka milawu yo tekelela, xana a a nga ta hundzisela eka vana va yena ku tsana ni mboyamelo wa yena wa ku nga yingisi rito ra Xikwembu ivi va yingisela rito rin’wana? Matimu ya xiviri ma nyikela tinhlamulo eka swivutiso leswi.—Varhoma 5:12.
13 Xana munhu wo tano, loyi, hikwalaho ka ntumbuluko wa vanhu, a hundzukeke eku yingiseni loku hetisekeke ka Xikwembu hi ku phofula ka rirhandzu leri hetisekeke eka Xikwembu u lulameriwa hi ku hanya hi laha ku nga heriki eParadeyisini kumbe hambi ku ri emisaveni hi yoxe ke? Xana a swi ta va swi hlayisekile ku n’wi pfumelela ku hanya emisaveni hi laha ku nga heriki? Xana ku pfumeleriwa ka yena ku hanya hi laha ku nga heriki emisaveni eku tluleni ka yena nawu a ku ta seketela nawu wa Xikwembu ni ku kombisa vululami bya Xona lebyi hetisekeke, kumbe a ku ta dyondzisa ku nga xiximi nawu wa Xikwembu ni ku vula leswaku rito ra Xikwembu a ri nga tshembeki?
Va Hlongoriwa eNtangeni Wa Edeni
14. Xana rhekhodo ya Bibele yi hlamusela ku teka ka Xikwembu goza ro lwisana na Adamu ni nsati wa yena hi ndlela yihi?
14 Rhekhodo ya Bibele yi hi byela ndlela leyi Xikwembu xi boheke makungu ya timhaka leti ha yona yi ku: “Kutani Yehova Šikwembu a endlela Adam ni nsati wa yena e tinguv̌u ta maḍov̌o, a v̌a ambeša tona. Kutani Yehova Šikwembu a ku: Maŝiv̌o, munhu o hunḍukile, a kotisa uṅwana wa hina loko ku ri ku tiv̌a le’ŝo saseka ni le’ŝo biha; kambe ŝeŝi, a nga fanekeli ku ṭhambuluta v̌oko a teka na wona muri wa v̌utomi, a dya, a hanya hi laha ku nga heriki. Kav̌a loko Yehova Šikwembu a ṅwi humesa e ntangeni wa Eden ku ya rima misav̌a leyi a nga humesiwa ka yona. A hlongola munhu, a v̌eka e tlhelo ra v̌uša ka ntanga wa Eden, e tikerubim le’ti tamelaka fumu le’ri v̌angamaka hi matlhelo hikwawo, a ta siv̌ela ndlela ya muri wa v̌utomi.”—Genesa 3:21-24.
15. (a) Xikwembu xi kombise ku ehleketelela ka ntlhaveko wa tingana lowu Adamu ni nsati wa yena va wu tweke hi leswi a va nga ambalanga hi ndlela yihi? (b) Mpatswa wo sungula wu hlongoriwe entangeni wa Edeni hi ndlela yihi? (c) I yini leswi hundzuleke swiyimo leswi kongomaneke na Adamu ni nsati wakwe ehandle ka ntanga wa Edeni?
15 Muavanyisi la tlakukeke u kombise ku ehleketelela ka ntlhaveko wa tingana lowu vadyohi Adamu ni nsati wa yena manuku a va wu twa hi leswi a va nga ambalanga. Hi ndlela yin’wana leyi nga hlamuseriwangiki, u va nyike tinguvu leto leha ta madzovo leswaku va tirhisa tona ematshan’wini ya tinjhovo ta matluka ya nkuwa leti rhungeleriweke swin’we leti va tiendleleke tona. (Genesa 3:7) Tinguvu ta madzovo a ti ta heta nkarhi wo leha ivi ti va sirhelela swinene eka mitwa ni mahlwehlwe ni swilo swin’wana leswi vavisaka leswi nga ehandle ka ntanga wa Edeni. Hikwalaho ka ku va ni ripfalo lero biha endzhaku ka ku dyoha, va ringete ku tumbela emahlweni ka Xikwembu exikarhi ka mirhi ya ntanga wa Edeni. (Genesa 3:8) Manuku ke, endzhaku ka ku gweviwa, va tokote xivumbeko xin’wana xa ntshikilelo wa Xikwembu hi ku hlongoriwa entangeni hi Xikwembu. Va hlongoleriwe evuxeni, naswona endzhakunyana va tikume va ri ehandle ka ntanga, va yiriseriwe makumu eka wona. A va nga ha ta tirha ku ndlandlamuxa ntanga ni ku hangalasa swiyimo swa wona swa Paradeyisi ku ya fika emakun’wini ya misava. Ku sukela sweswi ku ya emahlweni, a va ta dya vuswa lebyi endliweke hi byanyi bya nhova, kambe a byi nga ta va tiyisa hi laha ku nga heriki evuton’wini bya vumunhu. A va siveriwa “muri wa v̌utomi.” Endzhaku ka nkarhi wo karhi—wo tanihi kwihi ke?—va fanele ku fa!
Xikongomelo Xa Yehova Xo Sungula A Xi Hluriwanga
16. I yini lexi Xikwembu a xi nga kunguhatanga ku xi endla, naswona hikwalaho ka yini?
16 Xana Xikwembu manuku xi bohe makungu yo herisa misava, kun’we ni n’weti ni dyambu ni tinyeleti, hi ndzilo wa vuako hinkwabyo hikwalaho ka leswi swivumbiwa leswi swimbirhi swa ntshuri swi xi dyoheleke ke? Loko a xi fanele ku endla nchumu wo tano, xana leswi a swi nga ta vula swona leswaku a xi hluriwile exikongomelweni xa xona lexi vangamaka, hinkwaswo hikwalaho ka leswi na·chashʹ yi swi sunguleke? Xana nyoka ntsena a yi kota ku onha swikongomelo swa Xikwembu hinkwaswo? Xi andlale xikongomelo xa xona eka Adamu na Evha hi siku ra ku tekana ka vona loko xi va katekisa ni ku va byela leswi ku rhandza ka xona ha vona a ku ri swona: ku tata misava hinkwayo hi rixaka leri hetisekeke ra vanhu, misava hinkwayo yi fumiwa ku ya eku hetisekeni ka ntanga wa Edeni, naswona vanhu hinkwavo hi ku rhula va fuma vutomi bya swivumbiwa hinkwaswo leswi nga ehansi emisaveni ni le matini ya yona. Xivono lexi hlamarisaka xa xikongomelo xa Xikwembu xi hetisekile, ku lunghiselela loku xi ku endleke hi masiku ya tsevu ya ku tumbuluxa ya ntirho wa nkarhi wa magidi ya malembe! Xana xikongomelo lexi xi faneriwaka hi ku dzunisiwa manuku xi rivariwile hikwalaho ka nyoka ni ku hambuka ka mpatswa wo sungula wa vanhu ntsena? Nikantsongo!—Ringanisa Esaya 46:9-11.
17. I yini lexi Xikwembu a xi kunguhate ku xi endla malunghana ni siku ra vunkombo, naswona siku leri ri ta hetelela hi ndlela yihi?
17 A ka ha ri siku ra ku wisa, siku ra vunkombo, ra Yehova Xikwembu. U tiyimisele ku katekisa siku rero ivi a ri kwetsimisa. A a nga ta pfumelela nchumu wu ri endla siku leri rhukaniweke, naswona ndzhukano wun’wana ni wun’wana lowu a wu ta kunguhatiwa hi mani kumbe mani leswaku wu wela ehenhla ka siku rero ra ku wisa ka yena a a ta lwisana na wona ivi a wu hundzula nkateko, a endla siku rero ri hetelela ri katekisiwile. A ri ta tshika misava hinkwayo tanihi xivandla lexi kwetsimaka, ku rhandza ka Xikwembu ku ri karhi ku endliwa laha misaveni ku fana ni leswi ku endlisiwaka xiswona etilweni, naswona leswi a swi ta endliwa hi rixaka ra vanhu lava hetisekeke.—Ringanisa Matewu 6:10.
18, 19. (a) Ha yini vana lava xanisekaka va mpatswa wo sungula wa vanhu lava dyoheke va nga tsakaka? (b) Xana swihloko swin’wana swa Xihondzo xo Rindza swi ta hlamusela yini?
18 Xikwembu a xi twanga xi hele matimba. A xi tshikanga xikongomelo xa xona. Xi tiyimisele ku tilwela tanihi Munhu loyi a tshembekaka hi laha ku hetisisa loyi a kunguhataka ni ku hetisisa hi laha ku taleke leswi a swi kunguhataka, loyi a faneriwaka hi ku dzunisiwa hinkwako. (Esaya 45:18) Vana lava nga hetisekangiki lava xanisekaka va mpatswa wo sungula wa vanhu lava dyoheke va nga tsaka ivi va languta emahlweni eku hetisekeni loku tshembekaka ka Xikwembu ka xikongomelo xa xona xo sungula ni vuyelo lebyi nga heriki eka vona. Ana se magidi ya malembe ya siku ra yena ra ku wisa ma hundzile, naswona xiphemu xo hetelela xa siku leri ri nga ta va ni nkateko wa xona lowu hlawulekeke xi fanele xi tshinele. “Madyambu” ma siku ra yena ro wisa ma hundza, naswona ku fana ni masiku hinkwawo ya tsevu yo sungula ya ku tumbuluxa, “mišo” wu fanele ku ta. Loko “mišo” lowu wu fikelela ku hetiseka ka wona ivi wu voningela vahlaleri hinkwavo ku hetiseka loku vangamaka ka xikongomelo xa Xikwembu lexi nga hundzukiki, swi ta koteka ku nghenisa erhekhodweni marito lama nge: ‘Kutani ku va madyambu, ku va nimixo, ri va siku ra ntlhanu na mambirhi.’ I ntshembo wa vumundzuku lowu hlamarisaka hakunene!
19 Hinkwaswo ka swona leswi swi tsema nhlana ku ehleketa ha swona! Naswona eswihlokweni swin’wana swa Xihondzo xo Rindza, ku ta vuriwa swo tala ehenhleni ka mintshembo leyi tshinelaka ya vumundzuku ya Paradeyisi leyi nga emahlweni ka vanhu lava yingisaka, varhandzi va nawu wa Xikwembu.
[Nhlamuselo ya le hansi]
a Eka Nhlavutelo 12:9, Sathana Diyavulosi u hlamuseriwa tanihi “nyoka ya khale”; naswona eka Yohane 8:44, Yesu Kriste u vulavula hi yena tanihi “tata wa mavunwa.”
A Wu Ta Ku Yini Ke?
◻ Ha yini mpatswa wo sungula wa vanhu wu lahlekeriwe hi kaya ra wona ra Paradeyisi?
◻ Ha yini hi tiva leswaku ku hambukisiwa ka Evha hi ku tirhisiwa ka nyoka a ku nga ri nthyeketo ke?
◻ I xigwevo xihi lexi Xikwembu xi xi tiviseke ehenhla ka wansati?
◻ I xigwevo xihi lexi Xikwembu xi xi tiviseke ehenhla ka Adamu, naswona ha yini leswi swi tlakuse nawu wa Xikwembu?
◻ Ha yini Xikwembu xi nga twanga xi hele matimba malunghana ni xikongomelo xa xona xa leswaku misava yi tatiwa hi vanhu lava hetisekeke eParadeyisini?