Xiviko Xa Vahuweleri Va Mfumo

“Ntiyiso Wu Ta Mi Ntshunxa”—Ivi Wu Tisa Ntsako

EBRITAIN, ntiyiso wa Bibele wu ntshunxe vanhu lava tlulaka 113 000 naswona lava engetelekaka va amukela ntiyiso siku rin’wana ni rin’wana. Entiyisweni marito ya Yesu lama nge: “Mi ta tiva ntiyiso, kutani ntiyiso wu ta mi ntshunxa,” ma karhi ma hetiseka. (Yohane 8:32) Ku ntshunxeka loku ku tisa ntsako, hi laha mintokoto leyi landzelaka leyi humaka eBritain yi kombisaka ha kona.

◻ Loko Penny a ri evutirhelini bya yindlu na yindlu, ku hlamusela hofisi ya rhavi, mukhegula u n’wi byele hi ku kariha swinene a ku, “Ndzi khomekile.” Penny u hlamule leswaku u ta endza nakambe. Masiku ma nga ri mangani endzhakunyana, hi nkarhi lowu hi ntolovelo a a nga ta endza ha wona, a a endla maendzo ya lava nga kumiwangiki ekaya naswona handle ko swi xiya u tikume a endzele yindlu leyi fanaka. Mukhegula u pfule rivanti ivi a rhambela Penny ku nghena. “Ndzi swi tivile leswaku u ta vuya,” ku vule yena, “naswona a ndzi ku rindzerile.” Va bule hi ntshembo wa Mfumo, naswona mukhegula loyi u vule leswaku u navela leswaku swi tikomba swi ri ntiyiso. A a ri ni malembe ya 79, naswona nuna wa yena a a file malembe manharhu emahlweni. A nga kumanga nchavelelo eka kereke ya yena naswona a a nga koti ku vona xivangelo xo hanya. U lave ku fa. Endzhakunyana, endzhaku ka loko Penny a sungule dyondzo ya Bibele na yena, u byele Penny leswaku a a ringeta ku tisunga kambe a a swi tiva leswaku swi hoxile. U khongele Xikwembu leswaku xi n’wi nyika nchavelelo ni ku n’wi pfuna ku kuma ntshembo nakambe. Hakantsongo-ntsongo, loko a ri karhi a dyondza, gome ra yena ri hundzuke ntshembo, a ri ni ku tshemba lokukulu ni ku nkhensa eka Yehova. U tseme vuxaka bya vutomi bya yena hinkwabyo na kereke, a khuvuriwa a ri ni malembe ya 80 hi vukhale, naswona sweswi i muhuweleri wa nkarhi na nkarhi la gingiritekaka swinene. Entiyisweni, ntiyiso wa Rito ra Xikwembu wu n’wi ntshunxile naswona wu n’wi nyike ntsako lowukulu.

◻ Ntiyiso lowu vulavulaka hi Mfumo wa Xikwembu wu tisa ntshunxeko eka vuhlonga bya vukhongeri bya mavunwa. Wu nga tlhela wu hundzula vumunhu bya munhu, naswona ku hundzuka loku hakanyingi ku tsakisa van’wana ni ku va pfuna leswaku va vona ntiyiso, tanihi laha ntokoto lowu landzelaka wu kombisaka ha kona.

Mubvana un’wana u gongondzile erivantini ra kaya ra Mbhoni ivi a kombela dyondzo ya Bibele. I yini leswi vangeleke leswi ke? Vatswari va wansati loyi a va dyondza Bibele ni Timbhoni ta Yehova, naswona vuyelo lebyi swi veke na byona eka vatswari va yena—ngopfu-ngopfu tata wakwe—a byi hlamarisa ni ku nyanyula swinene lerova nhwanyana loyi a a hlamarile hakunene. Tata wakwe, loyi a a dzaha tisigarete ta 80 hi siku, u tshike ku dzaha hi laha ku heleleke loko a hlamuseriwe leswaku Yehova a a nga swi amukeli. Hi ku hatlisa endzhaku ka kwalaho u tlherisele xitoko hinkwaxo xa nhundzu eka vathori va yena lexi a va yiveleke xona hi nkarhi wo leha. Nhwanyana loyi u vone leswaku nchumu wun’wana ni wun’wana lowu wu nga khumbaka vatswari va yena hi ndlela yo tano entiyisweni wu fanele ku kambisisiwa. Sweswi vatswari va khuvuriwile, naswona nhwanyana loyi u va kona eminhlanganweni hinkwayo.

Ntiyiso lowu Yesu a wu twariseke wu tise ntsako eka lava va boxiweke laha henhla ni van’wana lava nga hlayekiki. Wu nga endla leswi fanaka eka hinkwavo lava amukelaka ntiyiso wa Bibele ivi va wu tirhisa evuton’wini bya vona.—Psalma 19:7, 8.