Wa Tsundzuka Xana?

Xana u tiphinile hi ku hlaya minkandziyiso ya sweswinyana ya Xihondzo xo Rindza ke? Manuku ke, vona loko u nga hlamula swivutiso leswi landzelaka:

◻ Xana hi xihi xisekelo xa vukati lebyi humelelaka?

Vanghana va vukati va fanele ku kombisana rirhandzu, xichavo ni ku tshembeka lokukulu, va ri karhi va tlangela mahanyelo lamanene ya un’wana ni ku dyondza ku honisa ni ku rivalelana ku tsana ka vona.—5/15, tluka 15.

◻ Hi le timhakeni tihi laha milawu ya Xikwembu leyi nyikiweke Vaisrayele yi va pfuneke ku tshama va kwetsimile?

Milawu ya Yehova yi pfune Vaisrayele ku tshama va tengile emoyeni, emahanyelweni, emianakanyweni, emirini ni le ku hlanganeni, loku ko hetelela ku nga mayelana ni ku gandzela ka vona.—6/1, tluka 11.

◻ Xana xiga lexi nge “nsivela-mavabyi wa mianakanyo” xi vula yini?

“Nsivela-mavabyi wa mianakanyo” wu vula matshalatshala lamakulu eka hina yo tenga emianakanyweni hi ku tshama eka swilo leswi nga ‘ntiyiso, leswi lulameke ni leswi tengeke’ ni ‘ku tshama hi ri karhi hi swi anakanya.’ (Vafilipiya 4:8)—6/1, tluka 16.

◻ Ha yini Yesu a vule leswaku vukona bya yena byi ta ‘kotisa rihati’? (Luka 17:24)

Laha Yesu a a kombisa leswaku xikombiso xa ku va kona ka yena ematimbeni ya Mfumo a xi ta voniwa endhawini leyikulu, xi pfuna hinkwavo lava navelaka ku xi xiya leswaku va xi tiva.—6/15, tluka 8.

◻ Ha yini mahanyelo ya Vukriste hi ku kongoma ma yelana ni rirhandzu ra Vukriste?

Mahanyelo ya Vukriste—ndlela leyi hi hanyisanaka ni van’wana ha yona, vumunhu, mahanyelo ya hina, ni mikhuva ya hina—i xikombiso xa ndlela leyi hi khathalelaka vanhu van’wana ha yona. Mahanyelo ya hina ma kombisa ku enta ka rirhandzu ra hina eka vona. (Yohane 13:35; 1 Vakorinto 10:24; 13:4-7)—6/15, tluka 14.

◻ Xana vukati bya Yesu ni ‘mutekiwa wa yena’ wa valandzeri vo tshembeka lava totiweke va 144-000 byi endleka rini? (Nhlavutelo 19:7, 8)

Vukati lebyi byi ta endleka endzhaku ka nyimpi ya Armagedoni ni ku hoxiwa ka Sathana ekheleni. Manuku Yehova u ta va a lwele vuhosi bya yena hi ku susa emisaveni lava tlhontlhaka vuhosi bya yena na hi ku herisa nkucetelo lowo biha wa Sathana ni mademona ya yena.—7/1, tluka 24.

◻ Xana joko ra vudyondzisiwa ri nga ku tisa njhani ku wisa, hi laha swi kombisiweke ha kona emaritweni ya Yesu eka Matewu 11:29, 30?

Tanihi leswi Yesu a twisisaka, swa phyuphyisa ku tirha na yena ehansi ka joko rin’we. U anakanyela mindzilakano ni ku tsana ka hina. Naswona swi phyuphyisa swonghasi ku byela van’wana leswaku va nga hanya hi laha ku nga heriki eParadeyisini!—7/15, tluka 20.

◻ Xana i yini ‘ku vuyeteriwa’ loku Yesu a vulavulaka ha kona eka Matewu 19:28?

Laha Yesu u kombise leswaku ku ta va ni ku ‘vuyeteriwa’ ka swiyimo emisaveni leswaku swilo swi va tanihi leswi a swi ri xiswona entangeni wa Edeni.—8/1, tluka 9.