Yingisani Lava Rhangelaka
“Yingisani vafambisi va n’wina, mi titsongahata eka vona, hikuva va hitekela mimoya ya n’wina, tani hi vanhu lava nga ta vutisiwa ehenhla ka yona.”—VAHEVERU 13:17
1. Xana hi pfunekisa ku yini eka ntirho wa valanguteri va Vukriste?
YEHOVA u lunghiselele valanguteri enhlengeletanweni yakwe ‘enkarhini lowu wa makumu.’ (Daniel 12:4) Va rhangela eku khathaleleni ka vanhu lava fanaka ni tinyimpfu naswona vulanguteri bya vona bya phyuphyisa. (Esaya 32:1, 2) Ku tlula kwalaho, vulanguteri bya rirhandzu bya vakulu lava khomaka ntlhambi wa Xikwembu hi musa byi tirha tanihi nsirhelelo eka Sathana ni le ka mafambiselo lawa ya swilo layo biha.—Mintirho 20:28-30; 1 Petro 5:8; 1 Yohane 5:19.
2. Xana van’wana va n’wi tekise ku yini muapostola Pawulo, kambe i langutelo rihi leri faneleke eka vakulu?
2 Kambe xana u va langutisisa ku yini vakulu? Embilwini ya wena, xana u ri: ‘A ndzi nge yi eka nkulu un’wana ebandlheni leri loko ndzi ri na xiphiqo, hikuva a nga kona loyi ndzi n’wi tshembaka eka vona’? Loko yoleyo yi ri ndlela leyi u titwaka ha yona, xana u nga va u xopaxopa ngopfu ku nga hetiseki ka vona ke? Le Korinto wa khale, van’wana va vule leswi hi muapostola Pawulo: “Mapapila ya Pawulo ma tika, ma ni matimba, kambe loko a ri exikarhi ka hina hi n’wi vona, ho kuma a ri la solekaka, na swona a swi tikombi leswaku a nga va xivulavuri.” Hambi swi ri tano, Xikwembu xi avele Pawulo evutirhelini naswona xi n’wi tirhisa tanihi “muapostola wa vamatiko.” (2 Vakorinto 10:10; Varhoma 11:13; 1 Timotiya 1:12) Kutani ke, ha tshemba leswaku u titwa ku fana ni makwerhu wa xisati la nga te: “Hi ni huvo ya vakulu yo antswa emisaveni. A va kumeka ku pfuna loko va laveka.”
Ha Yini U Va Yingisa?
3. Loko Hosi yi ta va ni moya lowu hi wu kombisaka, hi fanele hi va langutisa ku yini varisi-ntsongo va Vukriste?
3 Tanihi leswi varisi-ntsongo va Vukriste va lunghiseleriweke hi Murisi Lonkulu, Yehova Xikwembu, xana u ehleketa leswaku u lava leswaku hi va langutisisa ku yini? Entiyisweni, Xikwembu xi hi langutele ku landzelela nkongomiso lowu sekeriweke eBibeleni lowu amukeriweke hi ku tirhisa valanguteri va rirhandzu ehansi ka vulanguteri bya Huvo leyi Fumaka ya Timbhoni ta Yehova. Kutani ‘hosi yi ta va ni moya lowu hi wu kombisaka,’ hi ta tsakela ku rhula naswona hi ta va lava akaka hi tlhelo ra moya.—2 Timotiya 4:22; ringanisa Mintirho 9:31; 15:23-32.
4. Xana Vaheveru 13:7 hi nga yi tirhisisa ku yini hi munhu hi xiyexe?
4 Pawulo u khongoterile: “Anakanyani vafambisi va n’wina, lava nga mi dyondzisa rito ra Xikwembu; ehleketani vutomi bya vona ni mahelele ya byona, mi landza ntila wa ku pfumela ka vona.” (Vaheveru 13:7) Exikarhi ka Vakriste vo sungula, vaapostola hi voxe a va veka xikombiso. Namuntlha, hi nga xiya lava vumbaka Huvo leyi Fumaka ya Timbhoni ta Yehova, valanguteri van’wana lava totiweke ni vavanuna va “ntshungu lowukulu” lava hi rhangelaka. (Nhlavutelo 7:9) Hambi loko hi nga khutaziwi ku tekelela mfanelo ya vona ya rito, mayimele kumbe mahanyelo man’wana ya vumunhu, hi fanele hi swi kota ku ololoxa mahanyelo ya hina hi ku tekelela ripfumelo ra vona.
5. Emisaveni namuntlha, xana vutihlamuleri lebyikulu bya ku khathalela bandlha ra Vukriste byi byarhisiwe vamani naswona va faneriwa hi yini?
5 Emisaveni namuntlha, vutihlamuleri lebyikulu byo khathalela swilaveko swa hina swa moya byi byarhisiwe “nandza lowo tshembeka, lowa vutlhari.” Huvo leyi Fumaka leyi n’wi yimelaka ya rhangela ni ku kongomisa ntirho wo chumayela hi Mfumo emisaveni hinkwayo. (Matewu 24:14, 45-47) Ngopfu-ngopfu vakulu lava totiweke hi moya va nga tekiwa tanihi vafumi va moya, hikuva Vaheveru 13:7 yi nga ha hundzuluxeriwa hi ndlela leyi: “Anakanyani vafumi . . . va n’wina.” (Kingdom Interlinear) Eka mabandlha lama tlulaka 60 000 ni vahuweleri va Mfumo lava tlulaka 3 500 000, vakulu va 12 lava vumbaka Huvo leyi Fumaka va ni ‘swo tala swo swi endla entirhweni wa Hosi.’ (1 Vakorinto 15:58) Hikwalaho ka xiavelo xa vona lexi va xi nyikiweke hi Xikwembu, va faneriwa hi ntirhisano wa hina lowu taleke, hi laha huvo leyi fumaka ya lembe xidzana ro sungula yi kumeke ntirhisano wa Vakriste vo sungula ha kona.—Mintirho 15:1, 2.
6. Hi swihi swilo swin’wana leswi endliwaka hi vakulu ku pfuna vanhu va Yehova?
6 Valanguteri va hlawuriwe hi moya ku khathalela swilaveko swa moya swa bandlha. (Mintirho 20:28) Va vona leswaku mahungu ya Mfumo ya chumayeriwa ensin’wini ya bandlha rero. Vavanuna volavo lava nga ni timfanelo ta Matsalwa nakambe va nyikela nkongomiso wa moya hi ndlela ya rirhandzu. Va khongotela, va khutaza ni ku nyikela vumbhoni eka vamakwavo va moya, leswaku na vona va ta ya emahlweni va famba hi ku rhandza ka Xikwembu. (1 Vatesalonika 2:7, 8, 11, 12) Hambi loko un’wana a endla xihoxo a nga swi xiyanga, vavanuna lava va lava ku n’wi pfuna “hi moya wa musa.”—Vagalatiya 6:1.
7. I xitsundzuxo xihi lexi Pawulo a xi nyikeke eka Vaheveru 13:17?
7 Timbilu ta hina ti susumeteriwa ku tirhisana ni valanguteri vo tano va rirhandzu. Leswi swa fanela, hi laha Pawulo a tsaleke ha kona loko a ku: “Yingisani vafambisi va n’wina, mi titsongahata eka vona, hikuva va hitekela mimoya ya n’wina, tani hi vanhu lava nga ta vutisiwa ehenhla ka yona. Mi vona leswaku va tirha ntirho wa vona hi ku tsaka, va nga wu endli hi ku vilela, hikuva loko swi ri tano a swi nga mi pfuni nchumu n’wina.” (Vaheveru 13:17) Xana hi fanele hi xi twisisisa ku yini xitsundzuxo lexi ke?
8, 9. (a) Hi ku ya hi Vaheveru 13:17, ha yini hi fanele hi yingisa lava rhangelaka? (b) Ku yingisa ni ku titsongahata ka hina ku nga va ni vuyelo byihi lebyinene?
8 Pawulo u hi khutaza ku yingisa lava hi fumaka hi tlhelo ra moya. Hi fanele hi “titsongahata,” hi yingisa varisi-ntsongo lava. Ha yini? Hikuva ‘va langutela mimoya ya hina,’ kumbe vutomi lebyi nyikeriweke eka Xikwembu. Naswona ‘va hiteka’ hi ndlela yihi? Laha matirhiselo lawa ya riendli ra Xigriki a·gru·pneʹo hi ku kongoma ma vula leswaku vakulu “va tshika ku etlela.” Leswi swi hi tsundzuxa hi murisi la nga yexe la tshikaka ku etlela leswaku a sirhelela ntlhambi wakwe eka makhombo ya ni vusiku. Vakulu minkarhi yin’wana va tshama vusiku hinkwabyo va nga etleli hi ku khathalela ntlhambi wa Xikwembu hi xikhongelo kumbe hi ku nyikela mpfuno wa moya eka vapfumeri-kulobye. Vona ndlela leyi hi faneleke ku tlangela ntirho wa vona wa ku tshembeka ha yona! Entiyisweni, a hi lavi ku fana ni “vanhu lava nga riki na mhaka ni vukhongeri” va siku ra Yuda lava ‘va honiseke vuhosi ni ku sandza vanhu vo kwetsima,’ vakulu lava totiweke va Vukriste lava nga ni ku kwetsima loku nyikiweke hi Xikwembu, kumbe ku xiximeka, loku vekiweke ehenhla ka vona.—Yuda 3, 4, 8.
9 Yehova a nge tsaki loko hi tsandzeka ku yingisa ni ku titsongahata eka valanguteri va Vukriste. Leswi swi nga va ndzhwalo eka vona naswona swi nga hi vavisa emoyeni. Loko hi pfumala ntirhisano, vakulu va nga hetisisa mintirho ya vona hi ku vilela, kumbexana hi moya wa ku hela matimba leswi nga ha vangaka ku lahlekeriwa hi ntsako emintirhweni ya hina ya Vukriste. Kambe ku yingisa ni ku titsongahata ka hina ku khutaza hanyelo ro chava Xikwembu ni ku tiyisa ripfumelo ra hina. ‘Hosi yi ni moya lowu hi wu kombisaka,’ naswona ntsako wa tala eka xiyimo xo tano xa ntirhisano, ku rhula ni vun’we.—2 Timotiya 4:22; Psalma 133:1.
10. Hi ku ya hi 1 Timotiya 5:17, ha yini lava ungamelaka hi ndlela leyinene va faneriwa hi ku xiximiwa?
10 Ku yingisa ni ku titsongahata ka hina eka vakulu va bandlha a swi vuli leswaku hi rhandza ku tsakisa vanhu. Sweswo a hi swa matsalwa, hikuva mahlonga ya Vakriste va lembe xidzana ro sungula a ma byeriwa ku yingisa vini va wona, “ku nga ri ntsena loko va mi langutile, wonge hi loko mi lava ku tsakisa vanhu, kambe hi timbilu letinene, mi ri karhi mi chava [Yehova].” (Vakolosa 3:22; Vaefesa 6:5, 6) Valanguteri ‘lava ungamelaka hi ndlela leyinene naswona va tirha hi matimba eku vulavuleni ni le ku dyondziseni’ va faneriwa hi ku xiximiwa ngopfu-ngopfu hikuva ku dyondzisa ka vona ku sekeriwe eRitweni ra Xikwembu. Hi laha Pawulo a tsaleke ha kona: “Endla leswaku vakulukumba lava tirhaka swinene ntirho wa vurisi va kombisiwa xichavo lexikulu, ngopfu-ngopfu lava tirhaka hi ku twarisa Rito ni ku dyondzisa, hikuva Matsalwa ma ri: ‘U nga bohi nomu wa homu loko yi ri karhi yi hula,’ ni leswaku ‘Mutirhi ú lulameriwile hi hakelo ya yena.’”—1 Timotiya 5:17, 18.
11. “Xichavo lexikulu” xi nga tisa ku yini eka nkulu, kambe i yini lexi a faneleke ku xi papalata?
11 Marito ya Pawulo lama ha ku tshahiwaka ma kombisa leswaku mpfuno wa leswi vonekaka hi laha ku faneleke wu nga nyikiwa lava khathalelaka swilaveko swa moya swa van’wana. Hambi swi ri tano, leswi a swi vuli swona leswaku vakulu va fanele ku hakeriwa naswona “xichavo lexikulu” entiyisweni a hi lexi nga komberiwaka hi nkulu. Swi nga ha ta hi le ka swirho swa bandlha hi ku tirhandzela, kambe a nga fanelanga ku tirhisa xiavelo xa yena ku kuma matimba kumbe rifuwo ra leswi vonekaka. A nga fanelanga a tilavela ku dzuneka kumbe ku tolovelana ni lava fuweke leswaku a kuma swilo leswi vonekaka ivi a honisa van’wana. (Swivuriso 25:27; 29:23; Yuda 16) Ematshan’wini ya sweswo, mulanguteri u fanele a risa ntlhambi wa Xikwembu ‘hi ku tirhandzela, hayi hi ku rhandza rifuwo ro pfumala ku tshembeka, kambe hi ku hiseka.’—1 Petro 5:2.
12. Xana hi nga pfuniwa ku yingisa lava rhangelaka exikarhi ka hina hi ku tsundzuka yini?
12 Hi ta pfuneka ku yingisa ni ku xixima lava rhangelaka loko hi tsundzuka leswaku Xikwembu hi xoxe xi lunghiselele vakulu. (Vaefesa 4:7-13) Tanihi leswi vavanuna lava va hlawuriweke hi moya naswona nhlengeletano ya Xikwembu yi tekaka xiphemu xa nkoka evuton’wini bya Timbhoni ta Yehova, entiyisweni hi lava ku kombisa ku tlangela ni ku xixima ka hina malunghiselelo ya le tilweni. Ku tlula kwalaho, hi nga pfuna lavantshwa ku kurisa langutelo leri loko hi veka xikombiso lexinene xa ku yingisa ni ku titsongahata eka lava hi rhangelaka.
Ha Yini Hi Tlangela Ntirho Wa Vona?
13. (a) I malangutelo wahi lama hambanaka ya vurhangeri lama nga kona emisaveni ni le nhlengeletanweni ya Xikwembu? (b) Hi ni swivangelo swihi leswi twalaka swa ku tshemba vavanuna lava rhangelaka exikarhi ka hina? (c) Ematshan’wini yo hundzeleta ku nga hetiseki ka vakulu lava tirhaka hi matimba, hi fanele hi endla yini xana?
13 Emisaveni, ku ni mboyamelo wo ala vurhangeri. Hi laha muleteri un’wana a vuleke ha kona: “Mpimo lowu tlakukaka wa dyondzo wu andzise nhlayo ya vanhu lava dyondzekeke lerova valandzeri va ve ni vuxopaxopi swinene lerova a va ha rhangeleki.” Kambe moya wa vutilawuri a wu kona enhlengeletanweni ya Xikwembu naswona hi ni swivangelo leswi twalaka swo tshemba vavanuna lava hi rhangelaka. Hi xikombiso, hi lava va fikelelaka swilaveko swa Matsalwa ntsena va hlawuriwaka tanihi vakulu. (1 Timotiya 3:1-7) Va dyondzisiwa ku va ni musa, rirhandzu ni ku pfuna, kambe va tiya eku namarheleni ka mimpimanyeto yo lulama ya Yehova. Vakulu va khomelela ntiyiso wa Matsalwa, ‘va namarhela rito leri tshembekaka, leswaku va ta swi kota ku khongotela hi dyondzo leyi nga ni rihanyo.’ (Tito 1:5-9) Kavula, a hi fanelanga ku hundzeleta ku nga hetiseki ka vona ka vumunhu, hikuva hinkwerhu ka hina a hi hetisekangi. (1 Tihosi 8:46; Varhoma 5:12) Ematshan’wini yo karhatiwa hi mindzilakano ya vona ivi hi tekela ndzayo ya vona ehansi, a hi tlangeleni ni ku amukela nkongomiso wa vakulu lowu sekeriweke eBibeleni tanihi lowu humaka eka Xikwembu.
14. Hi ku ya hi 1 Timotiya 1:12, nkulu u fanele a byi langutisisa ku yini vutirheli lebyi a averiweke byona?
14 Pawulo, munhu loyi a nga ni ku tlangela, u te: “Ndzi nkhensa loyi a ndzi nyikeke matimba yo tirha ntirho lowu, yena Kriste Yesu Hosi ya hina; hikuva ú ndzi vonile ndzi ri loyi a tshembekeke, hi ku ndzi veka entirhweni wa yena.” (1 Timotiya 1:12) Vutirheli byebyo kumbe ntirho, a wu katsa ntirho wo chumayela ni ku tirhela vamakwavo. Hambi loko mulanguteri a averiwa hi moya lowo kwetsima ku tirha tanihi murisi, leswi a swi fanelanga swi n’wi endla a titwa a tlakukile eka van’wana, hikuva yena hi yexe i xirho xa ntlhambi wa Xikwembu wa vanhu vo fana ni tinyimpfu. (1 Petro 5:4) Ematshan’wini ya sweswo, u fanele a tlangela leswi Nhloko ya bandlha, Yesu Kriste, a n’wi voneke a faneleka ku tirhela swirho swa ntlhambi ni leswi Xikwembu xi n’wi endleke a faneleka ku n’wi nyika mpimo wa vutivi, vutlhari ni ku twisisa. (2 Vakorinto 3:5) Tanihi leswi nkulu a nga ni xivangelo xo tlangela malunghelo yakwe lawa a ma nyikiweke hi Xikwembu, swirho swin’wana swa bandlha swi fanele ku tlangela vutirheli lebyi, kumbe ntirho.
15. Hi wihi mongo wa xitsundzuxo xa Pawulo eka 1 Vatesalonika 5:12, 13?
15 Timbhoni ta Yehova ta yi tlangela nhlengeletano leyi Xikwembu xi yi vumbeke emasikwini lawa ya makumu naswona ku tlangela koloko ku hi susumetela ku xixima vakulu. Hi fanele hi tsakela ku tirhisana swinene ni malunghiselelo lawa va ma endlaka ku hi pfuna. Pawulo u te: “Ha mi kombela hi matimba, vamakwerhu, leswaku mi va ni xichavo eka lava tirhaka exikarhi ka n’wina, lava va mi rhangelaka emahlweni endleleni ya Hosi, ni ku mi tsundzuxa; mi va xixima swinene hi rirhandzu, hikwalaho ka ntirho wa vona.” (1 Vatesalonika 5:12, 13) Ku tirhisa xitsundzuxo lexi swi tisa ntsako ni mikateko ya Yehova.
Hatlisa Eku Tirhiseni Ka Xitsundzuxo
16, 17. I xitsundzuxo xihi lexi vakulu va nga ha xi nyikelaka malunghana ni vukati naswona ku ta humelela yini loko xi landzeleriwa?
16 Pawulo u khutaze Tito ku ‘hambeta a khongotela ni ku laya hi matimba hinkwawo.’ (Tito 2:15) Hi ku fanana, vayimeri va Xikwembu namuntlha va hi yisa eka misinya ya milawu ni milawu ya Bibele. Leswi i swivangelo leswi twalaka swo amukela xitsundzuxo lexi phindha-phindiweke xa ku tirhisa ndzayo ni nkongomiso wa nhlengeletano ya Yehova ni vakulu lava hlawuriweke.
17 Hi xikombiso: Vakulu va nga ha khutaza Mukriste ku landzelela xitsundzuxo xa Bibele xo teka kumbe ku tekiwa ‘eHosini ntsena.’ (1 Vakorinto 7:39; Deuteronoma 7:3, 4) Va nga ha vula leswaku ku tekana ni munhu loyi a nga khuvuriwangiki swi nga ha yisa eka swiphiqo leswikulu tanihi leswi Hosi Solomoni a dyoheke swinene hi ku teka vavasati vambe, lava va voyamiseleke mbilu yakwe eka swikwembu swa mavunwa ni le kule na Yehova. (1 Tihosi 11:1-6) Vakulu va nga ha hlamusela ni leswaku Ezra u endle leswaku vavanuna va Vayuda va tshika vavasati va vona va vahedeni, naswona Nehemiya u vule leswaku lava tekanaka ni lava nga riki vapfumeri a va ‘endla vubihi lebyikulu hi ku endla hi vukanganyisi eka Xikwembu.’ (Nehemia 13:23-27; Ezra 10:10-14; vona Xihondzo xo Rindza xa Xinghezi xa March 15, 1982, tluka 31; November 15, 1986, matluka 26-30, xa Xitsonga.) Mikateko ni ku aneriseka hi ku tsakisa Yehova swi tisiwa hi ku tirhisa xitsundzuxo xo tano xa Matsalwa lexi nyikeriwaka hi vakulu lava nga ni rirhandzu.
18. Hi ku anakanya leswi Pawulo a swi tsaleke eka 1 Vakorinto 5:9-13, hi fanele ku endlisa ku yini loko xirho xa ndyangu xi susiwile?
18 Nakambe swi fanerile ku xixima swiboho swa vuavanyisi swa vakulu. Pawulo u byele Vakriste eKorinto leswaku va nga “tolovelani ni loyi a vuriwaka ‘makwerhu’ kasi i muoswi, kumbe i munhu wa makwanga, kumbe i muphahli wa swikwembu swa hava, kumbe i murhukani, kumbe i xidakwa, kumbe i muxisi; munhu lowo tano, hambi ku ri ku dya mi nga dyi na yena.” A va fanele ‘ku hlongola munhu lowo biha exikarhi ka vona.’ (1 Vakorinto 5:9-13) Kambe xana a wu ta endlisa ku yini loko un’wana wa maxaka ya wena a a susiwile? Hambi loko ku nga ha va ni xilaveko xa ku hlangananyana leswaku mi khathalela timhaka ta ndyangu, vuxaka hinkwabyo bya moya ni xaka leri susiweke byi ta fanela ku tsemiwa. (Vona Xihondzo xo Rindza xa April 15, 1988, matluka 26-31.) Entiyisweni, ku tshembeka eka Xikwembu ni nhlengeletano ya xona ku fanele ku hi susumetela ku xixima swiboho swa vuavanyisi swa valanguteri.
19. Hi fanele hi endla yini loko vakulu va hi komba leswaku ha hambuka hi ntlhelo ra moya?
19 A swi olovi ku tshama endleleni yo khuma ya vutomi. Ku endla tano, hi fanele hi landzelela nkongomiso lowu nyikiwaka hi Rito ra Xikwembu ni lava va byarhisiweke vutihlamuleri bya ku risa enhlengeletanweni ya xona. (Matewu 7:13, 14) Loko a hi suka eka doroba rin’wana hi ya eka rin’wana hi movha ivi hi jikela endhawini leyi hoxeke, goza a ri ta laveka leswaku hi lulamisa ndlela ya hina. Loko swi nga ri tano, a hi nge fiki laha hi yaka kona. Hi ku fanana, loko vakulu va hi kombisa leswaku ha hambuka hi tlhelo ra moya, kumbexana hi ku gangisana ni la nga riki mupfumeri, hi fanele hi tirhisa xitsundzuxo xa vona xa Matsalwa hi xihatla. Leyi yi ta va ndlela yin’wana yo kombisa leswaku ha n’wi “ṭhemba Yehova.”—Swivuriso 3:5, 6.
Ku Xixima Hambi Ku Ri Eka Swilo Leswintsongo
20. I ku tivutisa swivutiso swihi leswi nga hi pfunaka ku kombisa xichavo eka nkongomiso wa vakulu hambi ku ri eka swilo leswintsongo?
20 Hi fanele ku kombisa ku xixima nkongomiso wa vakulu hambi ku ri eka swilo leswintsongo. Kutani hi nga ha tivutisa: ‘Xana ndzi ni ntirhisano loko vakulu va hi kombela ku endzela lava vabyaka kumbe ku letela lavantshwa evutirhelini bya nsimu ke? Xana ndzi amukela swiavelo swa minhlangano hi ku tsaka ni ku swi lunghiselela kahle? Xana ndza yingisa loko vakulu va nyikela nkongomiso emhakeni ya malawulelo ya vutshamo emintsombanweni, mikhuva ya hina ya ku ambala ni swin’wana ke? Xana ndzi na ntirhisano loko va hi kombela ku pfuna eku basiseni ka Holo ya Mfumo, hi vika ntirho wa hina wa nsimu hi xihatla kumbe ku fika eminhlanganweni hi nkarhi ke?’
21. Ku kombisa ka hina xichavo eka vakulu ku nga ha hi tsundzuxa marito wahi ya Yesu?
21 Valanguteri va bandlha va tlangela ntirhisano wa hina naswona swi na vuyelo lebyinene. Entiyisweni, ku xixima ka hina ni ku tirhisana ka hina hambi ku ri eka swilo leswintsongo swi nga ha hi tsundzuxa marito ya Yesu lama nge: “Loyi a tshembekeke eka leswintsongo, ni ka leswikulu u ta tshembeka.” (Luka 16:10) Hakunene, hi lava ku vitaniwa lava tshembekaka.
Hambeta U Amukela Vulanguteri Bya Rirhandzu
22. Hi yihi mimpfuno yin’wana leyi tisiwaka hi vulanguteri bya rirhandzu bya nandza lowo tshembeka ni vakulu va bandlha?
22 Mimpfuno leyi humaka eka vulanguteri bya rirhandzu bya nandza lowo tshembeka ni vakulu va bandlha yi kombisa leswaku mikateko ya Yehova leyi fuweke yi le henhla ka nhlengeletano yakwe ya le misaveni. Ku tlula kwalaho, vukongomisi bya vutlhari bya vakulu byi engetela vuswikoti bya vona ni ku kondletela vun’we exikarhi ka hina. Nakambe byi vanga matshalatshala lama hlanganeke ni lama humelelaka yo ndlandlamuxa swilaveko swa Mfumo. Hakunene, vuyelo byin’wana lebyi tiyeke bya ku tlangela ka hina vulanguteri bya lava rhangelaka hi leswaku Yehova u katekisa ntirho wa hina wa ku chumayela ni wa ku endla vadyondzisiwa. (Matewu 28:19, 20) Ku tirhisana ka hina ni vakulu nakambe ku hi lunghiselela vutomi lebyi nga heriki emafambiselweni lamantshwa ya swilo.
23. Hi ku ya hi 1 Yohane 5:3, hi fanele hi susumeteriwa ku endla yini?
23 Tanihi leswi hi rhandzaka Yehova, ku n’wi yingisa a hi ntirho lowu nga tsakisiki. Muapostola Yohane u tsarile: “Hikuva ku rhandza Xikwembu swi vula leswi: Hi leswaku hi fanele ku hlayisa milawu ya xona; na swona, milawu ya xona a yi tiki.” (1 Yohane 5:3) Vakriste lava tshembekaka hi ku tsaka va yingisa milawu ya Yehova naswona va susumeteriwa ku tirhisana ni lava a va byarhiseke vulanguteri ebandlheni. Mawaku ndlela leyi hi tlangelaka ha yona ku va enhlengeletanweni ya Xikwembu ni ku va ni ‘tinyiko to tano eka vavanuna’! (Vaefesa 4:8) Kutani ke, hi ku tiyiseka loku taleke leswaku Xikwembu xi kongomisa vanhu va xona, hi minkarhi hinkwayo a hi yingiseni lava nga ni lunghelo ro rhangela exikarhi ka Timbhoni ta Yehova.
Tinhlamulo Ta Wena Hi Tihi Ke?
◻ Ha yini u yingisa lava rhangelaka exikarhi ka hina?
◻ I langutelo rihi leri hi faneleke hi va na rona malunghana ni ntirho lowu nyikeriwaka hi vakulu lava tirhaka hi matimba?
◻ Ha yini u hatlisa ku tirhisa xitsundzuxo lexi nyikeriwaka hi vakulu?
◻ I mimpfuno yihi leyi vaka kona hi ku kombisa ka hina ku tlangela vulanguteri bya rirhandzu?
[Marito lama tshahiweke exihlokweni lama nga eka tluka 24]
Xana u tirhisana na vona vakulu hi ku amukela swiavelo swa minhlangano, hi ku pfuna ku basisa Holo ya Mfumo, hi ku vika ntirho wa wena wa nsimu hi ku hatlisa na hi tindlela tin’wana ke?
[Xifaniso lexi nga eka tluka 23]
Pawulo a a tsakela ku chumayela mahungu lamanene ni ku tirhela vapfumeri-kulobye. Tanihi nkulu, xana wa ma tlangela malunghelo ya wena ya ntirho lama humaka eka Xikwembu ke?