Xana Wa Yi Avanyisa Misava Hi Ripfumelo Ra Wena?
“Hi ku pfumela, Nowa . . . [u ake] ngalava ku ta ponisa va yindlu ya yena; hi ku endla sweswo, ú avanyisile misava.”—VAHEVERU 11:7.
1, 2. Hi nga dyondza yini eka nkambisiso wa vutomi bya Nowa?
YEHOVA u nyike Nowa ni ndyangu wa yena—wa vanhu va nhungu ntsena hi nhlayo—lunghelo ro va vanhu va ri voxe vo pona Ndhambi. Vutomi bya vanhu hinkwavo lava hanyeke enkarhini wa Nowa byi herisiwile loko Xikwembu xi va kukulele esirheni ra mati. Leswi Nowa hikwalaho a nga kokwa wa hina hinkwerhu, hi fanele ku tlangela swinene ripfumelo leri a ri kombiseke.
2 Hi nga dyondza swo tala eku kambisiseni vutomi bya Nowa. Matsalwa ma hi byela mhaka leyi ha yona Xikwembu xi n’wi endleleke tintswalo hi ku n’wi ponisa loko xi herise vanhu va rixaka ra Nowa. Rhekhodo leyi yi fanaka ya Xikwembu yi swi kombisa kahle leswaku rixaka ra hina ri kongomane ni ku avanyisa loku fanaka ka Xikwembu. Malunghana ni leswi, Yesu u te: “Nhlomulo wu ta va lowukulu enkarhini wolowo; nhlomulo lowo tano a wu si va kona hi mpfhuka misava yi tumbuluka ku fikela namuntlha, na swona a wu nga ha vi kona ni siku ni rin’we.” (Matewu 24:21) Hi ku tekelela ripfumelo ra Nowa, hi nga va ni ntshembo lowu tiyeke wa ku pona ndzoviso lowu tshinelaka wa mafambiselo lawa ya namuntlha lama ya hombolokeke.—Varhoma 15:4; ringanisa Vaheveru 13:7.
3. Ha yini Yehova a tise Ndhambi?
3 Hi nkarhi wa malembe ya 1 656 ku sukela eku tumbuluxiweni ka Adamu ku ya fika eka Ndhambi, a ku ri ni vanhu lavantsongo swinene lava a va tiyimisele ku endla leswinene. Mahanyelo a ma soleka swinene. “Yehova a v̌ona leŝaku ku biha ka v̌anhu ku kurile misav̌eni, ni meehleketo hikwayo ya timbilu ta v̌ona yi kongoma ku biha ntsena hi masiku hikwawo.” (Genesa 6:5) Vukari, ku lava mintsako ni vukona bya tintsumi leti ambaleke miri ya nyama leti tekaneke ni vavasati ni ku tswala vana va swihontlovila a swi ri exikarhi ka swivangelo leswi yiseke eku tiseni ka ku avanyisa ka Xikwembu ehenhla ka misava yoleyo ya khale ya vanhu. Eka Nowa, Yehova u te: “Makumo ya nyama yiṅwana ni yiṅwana [ya] fikile e mahlweni ka mina, hikuv̌a v̌a tate misav̌a hi mona.” Ku tiyisela ka Muvumbi, ‘Muavanyisi wa misava hinkwayo,’ ku herile.—Genesa 6:13; 18:25.
Nowa U Fambe Ni Xikwembu
4. (a) Yehova u xiye Nowa hi ndlela yihi, naswona ha yini? (b) Hambi leswi vululami bya Xikwembu a byi lava ku lovisiwa ka misava yoleyo yo homboloka, rirhandzu ra yena ri kombisisiwe ku yini hikwalaho ka Nowa ni ndyangu wa yena?
4 Nowa a a hambanile swonghasi ni vanhu va siku ra yena! U “[kume] tintŝalo e mahlweni ka Yehova. . . . Noa a a ri munhu l’a lulameke ni l’a sasekeke e nkarini wa yena Noa a ṭhama a famba ni Šikwembu.” (Genesa 6:8, 9) Xana Nowa u fambise ku yini na Xikwembu ke? Hi ku endla swilo leswi lulameke swo fana ni ku chumayela tanihi muyimeri wa vululami na ku aka ngalava hi ripfumelo ni ku yingisa. Xisweswo, hambi leswi misava yoleyo ya khale yi lovisiweke hikwalaho ka leswi a yi onhakile hi laha ku heleleke, Xikwembu “xi hlayisile Nowa mutwarisi wa leswo lulama, swin’we ni vanhu van’wana va 7, enkarhini lowu xi nga nisa ndhambi emisaveni ya vanhu lava a va nga ri na mhaka na xona.” (2 Petro 2:5) Ina, Xikwembu xa hina xa rirhandzu ni ku lulama, Yehova, a xi herisanga lavo lulama ni lavo homboloka. Xi lerise Nowa ku aka ngalava leyikulu leswaku ku hlayiseka yena, ndyangu wa yena ni swiharhi leswo tala, hinkwaswo swi ta tlhela swi tata misava endzhaku ka Ndhambi. Kutani Nowa “a endlisa ŝeŝo.”—Genesa 6:22.
5. Matsalwa ma ku hlamuserisa ku yini ku lulama ni ripfumelo ra Nowa?
5 Loko ngalava yi herile, Xikwembu xi byele Nowa xi ku: “Nghena e ngalav̌eni, wena ni yindlu ya wena hikwayo, hikuv̌a nḍi ku v̌onile u ri l’a lulameke e mahlweni ka mina e šikari ka rišaka leri.” Pawulo u katsakanya timhaka hi ndlela leyi: “Hi ku pfumela, Nowa ú yingisile swinene loko Xikwembu xi n’wi tsundzuxa hi ku n’wi byela leswi a swi nga si vonaka; kutani a aka ngalava ku ta ponisa va yindlu ya yena; hi ku endla sweswo, ú avanyisile misava, a va a amukela ku lulama loku nyikiwaka hi mhaka ya ku pfumela.”—Genesa 7:1; Vaheveru 11:7.
6. Nowa u yi avanyise njhani misava ya siku ra yena hi ripfumelo ra yena?
6 Nowa a a ri ni ripfumelo leri xiyekaka. U pfumerile leswi Xikwembu xi swi vuleke ehenhleni ka ku herisa rixaka rolero. Nowa a a ri ni ku chava lokunene ko hlundzukisa Yehova kutani a aka ngalava hi ku yingisa hi ku ya hi swileriso leswi nyikiweke hi Xikwembu. Ku tlula kwalaho, tanihi mudyondzisi wa ku lulama, Nowa u byele van’wana hi ta ndzoviso lowu tshinelaka. Hambi leswi va nga hlayisangiki marito ya yena, u arile ku pfumelela misava yoleyo yo homboloka ‘yi n’wi kucetela emahanyelweni ya yona.’ (Varhoma 12:2, Phillips) Ku ri na sweswo, hi ripfumelo ra yena, Nowa u avanyise misava hikwalaho ka vuhomboloki bya yona ivi a kombisa leswaku yi lulameriwa hi ku lovisiwa. Ku yingisa ni mintirho ya yena leyo lulama swi kombise leswaku van’wana handle ka yena ni ndyangu wa yena a va ta va va ponile loko a va tiyimisele ku hundzula mahanyelo ya vona. Hakunene, Nowa u kombise leswaku, ku nga khathariseki mintshikilelo leyi humaka eka nyama ya yena leyi nga hetisekangiki, misava leyi yo homboloka leyi n’wi rhendzeleke, na Diyavulosi, a swi koteka ku hanya vutomi lebyi tsakisaka Xikwembu.
Mhaka Leyi Xikwembu Xi Nga Ta Lovisa Mafambiselo Lawa Ha Yona
7. Hi swi tivisa ku yini leswaku hi hanya emasikwini ya makumu?
7 Kume rin’wana ni rin’wana ra malembe eka lembe xidzana leri ra vu-20 ri vone misava yi mbombomela swinene evuhombolokweni. Leswi swi ve tano ngopfu-ngopfu ku sukela eku sunguleni ka Nyimpi yo Sungula ya Misava. Vanhu va sungule ku tinyiketela eka swilo swo tanihi rigangugangu, vugevenga, vukari, nyimpi, rivengo, makwanga ni ku tirhisiwa loku hoxeke ka ngati lerova lava va rhandzaka leswo lulama va tivutisa loko swiyimo swi nga ha nyanya. Hambi swi ri tano, Bibele yi vhumbe ku kula ka vuhomboloki lebyikulu erixakeni ra hina, yi nyika xikombiso xin’wana xa leswaku hi hanya “emasikwini ya makumu.”—2 Timotiya 3:1-5; Matewu 24:34.
8. Van’wana va vule yini ehenhleni ka ripfalo ra xidyoho?
8 Nhlamuselo ya xidyoho a ya ha vuli nchumu emianakanyweni ya vunyingi lebyikulu namuntlha. Ku tlula 40 wa malembe lama hundzeke, Mupapa Pius XII u xiyile a ku: “Xidyoho xa lembe xidzana leri i ku lahla mongo hinkwawo wa xidyoho.” Rixaka ra namuntlha ra ala ku amukela xidyoho ni nandzu. Ebukwini ya yena leyi nge Whatever Became of Sin? Dr. Karl Menninger u te: “Rito leri nge ‘xidyoho’ . . . se ri nyamalarile—rito, kun’we ni mianakanyo ya rona. Ha yini ke? Xana wa ha ri kona munhu loyi a dyohaka ke?” Van’wana va lahlekeriwe hi vuswikoti byo hambanisa leswinene ni leswo biha. Kambe leswi a swi hi hlamarisi, hikuva Yesu u vhumbe swivumbeko swo tano loko a hlamusela ‘xikombiso xa vukona bya yena’ “[e]nkarini wa makumu.”—Matewu 24:3; Daniel 12:4.
Xikombiso Xa Ku Avanyisa Lexi Vekiweke eSikwini Ra Nowa
9. Yesu u ri ringanise njhani siku ra Nowa ni leswi a swi ta humelela hi nkarhi wa vukona bya Yena?
9 Yesu u kombisa ku yelana exikarhi ka swiendlakalo swa siku ra Nowa ni leswi a swi ta humelela hi nkarhi wa vukona bya Yena ematimbeni ya Mfumo, ku sukela hi 1914. U te: “Ku vuya ka N’wana-wa-Munhu [Yesu] ku ta fana ni leswi humeleleke emasikwini ya Nowa. Hikuva emasikwini walawo, loko ndhambi ya mati yi nga si ta, vanhu a va ri eku dyeni, va nwa, va hlomisa ni ku hlomiselana, ku ko ku fika siku leri Nowa a ngheneke engalaveni ha rona; a va nga anakanyi nchumu ku kondza loko ndhambi leyi ya mati yi ta, kutani yi va kukula hinkwavo; swi ta va tano ni le ku vuyeni ka N’wana-wa-Munhu.”—Matewu 24:37-39.
10. Vanhu hi ntolovelo va honisa swiendlakalo swa nkoka leswi fambisanaka ni vukona bya Kriste hi ndlela yihi?
10 Ina, ku fana ni le sikwini ra Nowa, vanhu namuntlha va honisa. Hi ku va lava khomekeke swinene hi vutomi bya siku na siku ni ku hlongorisa swilo ka vutianakanyi, va ala ku xiya leswaku swiyimo swa namuntlha swi hambana ngopfu ni leswi swa nkarhi lowu hundzeke naswona swi fanela kahle leswi Yesu a vuleke leswaku a swi ta fungha nkarhi wa makumu. Hi malembe layo tala, Timbhoni ta Yehova a ti ri karhi ti byela rixaka ra manguva lawa leswaku vukona bya Yesu tanihi Hosi ya Vumesiya etilweni byi sungule hi 1914 naswona swi fambisana ni ‘makumu ya mafambiselo ya swilo.’ (Matewu 24:3) Vanhu vo tala va hlekula rungula ra Mfumo, kambe hambi ku ri leswi swi vhumbiwile loko muapostola Petro a tsarile a ku: “Xo sungula, mi fanela ku twisisa leswaku, emasikwini yo hetelela, ku ta humelela vasandzi lava fambisiwaka hi ku navela ka vona loko biha; va ta mi sandza, va ku: ‘Swi helele kwihi, swa loyi ku nga tshembisiwa leswaku ú ta ta, xana? Hi mpfhuka vatatana va nga tietlelela, swilo hinkwaswo swa ha ya emahlweni hi laha a swi famba ha kona, ku sukela loko misava yi tumbuluka.’”—2 Petro 3:3, 4.
11. Ha yini rixaka ra namuntlha ri ta pfumala marito yo tiyimelela loko nhlomulo lowukulu wu fika?
11 Hambi swi ri tano, rixaka ra namuntlha ri ta pfumala marito yo tiyimelela loko nhlomulo lowukulu wu fika. Ha yini ke? Hikuva ku na timhaka ta Bibele ta ku avanyisa ka khale ka Xikwembu leti nyikaka xikombiso xa leswi Xikwembu xi nga ta swi endla esikwini ra hina. (Yuda 5-7) Vuprofeta bya Bibele lebyi hetisekaka emahlweni ka vona byi kombisa hi laha ku kongomeke laha hi nga kona eka nxaxamelo wa nkarhi. Rixaka leri nakambe ri na ntirho wo chumayela wa Timbhoni ta Yehova ni rhekhodo ya tona ya ku hlayisa vutshembeki emahlweni ya rona ku fana ni liya ya Nowa.
12. Kahle-kahle, xana Petro u ringanisa ndzoviso wa misava ya siku ra Nowa ni lowu wu nga ta ta ehenhla ka “matilo ni misava ya sweswi” hi ndlela yihi?
12 Petro u hlamusela leswi nga ta humelela eka lava va honisaka mintiyiso leyi. Ku fana na Yesu, muapostola u endla tano hi ku kombetela eka leswi humeleleke esikwini ra Nowa, a ku: “Vanhu lava va vula ha vomu, hi ku rivala mhaka leyi: Hi leswaku matilo a ma ri kona khale ni khale, ni leswaku misava yi vumbiwile hi rito ra Xikwembu yi huma ematini, yi ri xikarhi ka mati. Hi rito rero, misava leyi a yi ri kona enkarhini wolowo, yi dyiwile hi mati ya ndhambi, yi lova. Kambe hi ro rito rero, matilo ni misava ya sweswi, swi hlayiseriwe ku tshwa hi ndzilo, swi yimele siku ra ku avanyisiwa ni ra ku lovisiwa ka vanhu lava nga riki na mhaka na Xikwembu.”—2 Petro 3:5-7.
13. Hikwalaho ka swiendlakalo swa nkoka swinene leswi swi nga emahlweni, i xitsundzuxo xihi lexi humaka eka Petro lexi xi faneleke ku hlayisiwa?
13 Leswi ku avanyisa loku ku tiyeke ka Xikwembu ku kongomaneke na hina, hi nga kanganyisiwi kumbe ku chavisiwa hi vahlekuri. A hi fanelanga hi hlanganyela eka makumu ya vona! Petro wa tsundzuxa a ku: “Leswi ku nga ta tshwa swilo leswi hinkwaswo swi hela hi ndlela leyi, xana mi fanela ku va vanhu va rixaka muni? Hi ku hanya vutomi lebyo hlawuleka, bya vukhongeri, mi fanele ku langutela siku ra Xikwembu, mi endla leswaku ri hatla ri fika, ri nga siku leri ha rona ku nga ta tshwa matilo ma hela, ni hinkwaswo swa ntumbuluko swi nga ta n’okisiwa hi ndzilo. Kambe, hi ku ya hi ku tshembisa ka Hosi, hi langutele matilo lamantshwa ni misava leyintshwa, laha ku lulama ku tshameke kona.”—2 Petro 3:11-13.
Tekelela Ripfumelo Ra Nowa Leswaku U Ta Pona
14. I swivutiso swihi leswi nga hi pfunaka ku tikambisisa?
14 Namuntlha, hi langutane ni mimphikamakaneta leyi fanaka ni leyi a yi langutane na Nowa ni ndyangu wa yena leswaku hi tshama hi ri vanhu lava nga ta tokota ku pona. Ku fana na Nowa, Timbhoni ta Yehova ti avanyisa misava hi ripfumelo ra tona leri seketeriweke hi mintirho leyinene. Kambe un’wana ni un’wana wa hina a nga ha tivutisa a ku: ‘Xana mina hi ndzexe ndzi endla yini? Loko nhlomulo lowukulu a wu fika mundzuku, xana Xikwembu a xi ta ndzi avanyisa ndzi lulameriwa hi ku pona? Ku fana na Nowa, loyi ‘a tikombiseke a ri hava xisandzu exikarhi ka vanhu lava va hanyeke hi nkarhi wa yena,’ xana ndzi ni xivindzi xa ku va la hambaneke ni misava? Kumbe, xana minkarhi yin’wana swa nonon’hwa ku kombisa ku hambana exikarhi ka mina ni munhu wa misava hikwalaho ka ndlela leyi ndzi hanyaka kumbe leyi ndzi vulavulaka kumbe leyi ndzi ambalaka ha yona?’ (Genesa 6:9) Mayelana ni vadyondzisiwa vakwe, Yesu u te: “A hi va misava, tani hi leswi na mina ndzi nga riki wa misava.”—Yohane 17:16; ringanisa 1 Yohane 4:4-6.
15. (a) Hi ku ya hi 1 Petro 4:3, 4, hi fanele ku langutisa mianakanyo ni mahanyelo ya hina ya khale ya misava hi ndlela yihi? (b) Xana hi fanele ku endla yini loko hi soriwa hi khale ka vanghana va misava?
15 Petro wa tsundzuxa a ku: “Tshikani ku endla leswi tsakeriwaka hi vamatiko, hikuva swi ringene loko mi swi endlile eminkarhini leyi hundzeke. A mi hanya hi ku endla swa manyala, hi ku navela ku titsakisa, hi ku pyopyiwa, ni makolo, ni ku va swilovekelo, ni ku gandzela swikwembu swa hava leswi nga lavekiki. Va hlamala loko va mi vona sweswi mi nga ha fambi na vona, evusopfeni lebyi bya ku tlurisa mpimo, kutani va mi sandza.” (1 Petro 4:3, 4) Khale ka vanghana va wena va misava va nga ku sandza hikwalaho ka leswi u fambaka na Xikwembu ni leswi u nga ha fambiki na vona. Kambe ke, ku fana na Nowa, u nga va avanyisa hi ripfumelo ni mintirho ya wena leyinene leswi endliwaka hi ku ringanisela.—Mikea 6:8.
16. Xikwembu a xi n’wi langutisisa ku yini Nowa, naswona i swivutiso swihi leswi swi nga hi pfunaka ku xiyisisa mianakanyo ni mahanyelo ya hina?
16 Xikwembu xi xiye Nowa a ri munhu la lulameke. Mupatriarka yoloye wo tshembeka “[u kume] tintŝalo e mahlweni ka Yehova.” (Genesa 6:8) Loko u kambisisa mianakanyo ni mahanyelo ya wena hi mpfuno wa mimpimanyeto ya Xikwembu, xana u anakanya leswaku xa swi amukela leswi u swi endlaka, tindhawu hinkwato leti u yaka eka tona? Xana minkarhi yin’wana wa ya eku tihungaseni loku solekaka, loku sweswi ku tolovelekeke ngopfu? Rito ra Xikwembu ri vula leswaku hi fanele ku anakanya hi swilo leswi tengeke, ni leswinene ni leswi akaka. (Vafilipiya 4:8) Xana wa ri dyondza Rito ra Xikwembu hi ku chivirika leswaku u ‘toloveta matimba ya wena ya ku anakanya ku hambanisa leswinene ni leswo biha haswimbirhi’? (Vaheveru 5:14) Xana wa va papalata vanghana lavo biha kutani u tsakela xinghana ni vagandzeri-kuloni va Yehova eminhlanganweni ya Vukriste ni le swiendlakalweni swin’wana?—1 Vakorinto 15:33; Vaheveru 10:24, 25; Yakobo 4:4.
17. Tanihi Timbhoni ta Yehova, hi nga fana na Nowa hi ndlela yihi?
17 Endzhaku ko vika hi ta ku hela ka ngalava, Matsalwa ma ri: “Noa a endlisa ŝeŝo; a endla hikwaŝo hi laha Šikwembu ši ṅwi leriseke ha kona.” (Genesa 6:22) Munhu yoloye loyi a chavaka Xikwembu nakambe a a gingiriteka eku chumayeleni tanihi mbhoni ya Yehova. Ku fana na Nowa, u nga va muyimeri la nga tsekatsekiki wa leswinene tanihi muchumayeri wa nkarhi na nkarhi wa vululami. Phikelela eku twariseni ka xitsundzuxo xa makumu ya misava leyi yo homboloka, hambi loko ku yingisela vanhu vantsongo. Tirha kun’we ni vapfumeri-kuloni leswaku ntirho wa ku endla vadyondzisiwa wu endliwa emahlweni ka makumu.—Matewu 28:19, 20.
18. Yehova u hlawula lava va faneleke ku pona nhlomulo lowukulu exisekelweni xihi?
18 Hi ku tirhisa mimpimanyeto leyinene ni leyo lulama hi laha xi endleke ha kona esikwini ra Nowa, Xikwembu sweswi xi hlawula lava va faneleke ku pona ni lava va faneleke ku herisiwa hi nkarhi wa nhlomulo lowukulu. Yesu u fanise ntirho wa namuntlha wo avanyisa ni ku hlawula ka murisi tinyimpfu exikarhi ka timbuti. (Matewu 25:31-46) Vanhu lava va tshegaga vutomi bya vona eka ku navela ni ku hlongorisa swilo ka vutianakanyi a va swi lavi leswaku misava ya khale yi hela kutani a va nga poni. Kambe lava va papalataka ku katseka eka thyaka ra misava leyi, lava hlayisaka ripfumelo ra matimba eka Xikwembu, ni lava yaka emahlweni va chumayela rungula ra Mfumo, va twarisa xitsundzuxo xa ku avanyisa ka Yehova loku tshinelaka, va ta tsakela tintswalo ta Xikwembu tanihi vaponi. Yesu u te: “Enkarhini wolowo, eka vanhu vambirhi lava nga ta va emasin’wini, ku ta tekiwa un’wana, un’wana a siyiwa; eka vavasati vambirhi lava nga ta va eku sileni, ku ta tekiwa un’wana, un’wana a siyiwa.”—Matewu 24:40, 41; 2 Vatesalonika 1:6-9; Nhlavutelo 22:12-15.
Dyana Ndzhaka Ya Mikateko Kun’we Na Nowa
19. I ku hlengeletana kwihi loku Esaya na Mikiya va ku vhumbeleke masiku ya makumu?
19 Eka vuprofeta lebyi yelanaka, Esaya na Mikiya, vaprofeta va Xikwembu, havambirhi va hlamusele leswi a swi ta humelela hi nkarhi wa masiku ya makumu. Va vone leswi hi swi vonaka swi hetiseka namuntlha ka ha ri emahlweni—ku khitikana ka vanhu va timbilu letinene lava humaka emisaveni ya khale kutani va ya entshaveni yo fanekisela ya vugandzeri bya ntiyiso. Va yisa xirhambo ni le ka van’wana va ku: “Tanani, hi ta tlhandlukela nṭhav̌eni ya Yehova, e ndlwini ya Šikwembu ša Yakob; ši ta hi dyonḍisa tindlela ta šona, kutani hi ta famba e mitileni ya šona.” (Esaya 2:2, 3; Mikea 4:1, 2) Xana u famba na wona ntshungu lowu wu tsakeke?
20. I mikateko yihi leyi nga ta tsakeriwa hi lava va avanyisaka misava hi ripfumelo ra vona?
20 Esaya na Mikiya va tlhele va tshaha mikateko leyi nga ta tsakeriwa hi lava va avanyisaka misava hi ripfumelo ra vona. Ku rhula ni vululami bya ntiyiso swi ta andza exikarhi ka vona, naswona a va nga ha dyondzi nyimpi. Va ta va ni ntshembo lowu tiyeke wa ku dya ndzhaka leyi humaka eka Yehova naswona va ta “ṭhama uṅwana ni uṅwana e hansi ka nkuwa, ni le hansi ka vinya ya yena.” Kambe munhu un’wana ni un’wana u fanele ku boha makungu lama tiyeke, hikuva Mikiya u kombisa leswaku tindlela timbirhi ta koteka, a ku: “V̌a-matiko hikwawo v̌a famba uṅwana ni uṅwana hi v̌ito ra šikwembu ša yena, kambe hina, hi famba hi v̌ito ra Yehova, Šikwembu ša hina, hi mikari ni mikari.”—Mikea 4:3-5; Esaya 2:4.
21. U nga hlanganyerisa ku yini eka nkateko lowu hlamarisaka wa vutomi lebyi nga heriki emisaveni?
21 Matsalwa ma kombisa hi laha ku twisisekaka leswi swi lavekaka leswaku hi pona nhlomulo lowukulu: ripfumelo lero tiya. Nowa a a ri ni ripfumelo ro tano, kambe xana u na rona ke? Loko u ri na rona, ku fana na yena, u ta va ‘mudyandzhaka wa vululami leswi swi kumiwaka hi mhaka ya ripfumelo.’ (Vaheveru 11:7) Nowa u pone ndzoviso lowu kunguhatiweke hi Xikwembu lowu teke ehenhla ka rixaka ra yena. A nga hanyanga malembe ya 350 ntsena endzhaku ka Ndhambi, kambe u ta pfuxiwa a ri ni ntshembo wo hanya emisaveni hi laha ku nga heriki. Ku ta va nkateko lowu hlamarisaka swonghasi! (Vaheveru 11:13-16) U nga hlanganyela eka nkateko wolowo na Nowa, ndyangu wa yena ni timiliyoni ta van’wana lava rhandzaka vululami. Hi ndlela yihi ke? Hi ku tiyisela ku ya fika emakumu ni ku avanyisa misava hi ripfumelo ra wena.
Wa Tsundzuka Xana?
◻ Ha yini dyondzo ya vutomi bya Nowa yi ri ya nkoka eka Vakriste?
◻ I yini lexi vanhu va rixaka leri va xi honisaka, lexi yisaka eku lovisiweni ka vona?
◻ Ku fana na Nowa, hi nga yi avanyisisa ku yini misava leyi?
◻ Hi nga fana na Nowa tanihi mudyondzisi wa ku lulama hi ndlela yihi ke?