Ku Kutsuriwa Ku Le Kusuhi Eka Vanhu Lava Chavaka Xikwembu!

“[Yehova u] tiv̌a ku kuṭula e miringweni la’v̌a nga ni šitšhav̌o, ni ku hlayisela la’v̌o homboloko e ku biwa hi siku ra ku av̌anyisa.”—2 PETRO 2:9, “BX.”

1. (a) Hi swihi swiyimo leswi vavisaka leswi langutaneke ni vanhu esikwini ra hina? (b) Hikwalaho ka leswi, i swivutiso swihi leswi hi nga ta swi kambisisa?

SWIPHIQO swa vutomi swa andza eka vanhu hinkwavo. Leswi swi tano hambi loko munhu a tshama laha swilo leswi vonekaka swi taleke kona kumbe laha swi kayivelaka kona. Ku pfumala ku hlayiseka ku kumeka hinkwako. Onge hi loko swiyimo swa ikhonomi leswi cinca-cincaka a swi nga anelanga ku karhateka ha swona, swiphiqo leswikulu swa mbango swi hlasela planete ya Misava, swi xungeta vutomi hinkwabyo lebyi nga eka yona. Vuvabyi a byi lawuleki. Vuvabyi lebyi tlulelaka, vuvabyi bya mbilu ni ntungu wa khexe swi koxa vutomi lebyo tala. Ku tikhoma loko biha ku vange mpfilumpfilu eka mintlhaveko ya vanhu ni vutomi bya ndyangu. Handle ka leswi hinkwaswo, misava yi tale vukari. Hikwalaho ka leswi vanhu va kongomaneke na swona, hi laha ku faneleke ha vutisa: Xana ku ni xivangelo lexi twalaka xo langutela ku kutsuriwa ka xihatla? Loko swi ri tano, ku ta tisa ku yini, naswona i ka vamani?—Ringanisa Habakuk 1:2; 2:1-3.

2, 3. (a) Ha yini hina namuntlha hi kuma leswi vuriweke eka 2 Petro 2:9 swi ri leswi tiyisaka nhlana? (b) Xana Bibele yi kombetela eka mintirho yihi leyi kongomeke ya nkutsulo tanihi xisekelo xa xikhutazo?

² Leswi endlekaka esikwini ra hina swi hi tsundzuxa hi minkarhi yin’wana leyi xiyekaka swinene ematin’wini ya munhu. Muapostola Petro u kokela nyingiso eka mintirho ya ku kutsula leyi Xikwembu xi yi endleke eka swiendlakalo swoleswo ivi a fikelela makumu lawa lama tiyisaka nhlana: “[Yehova u] tiv̌a ku kuṭula e miringweni la’v̌a nga ni šitšhav̌o.” (2 Petro 2:9, BX) Xiya mongo wa nhlamuselo yoleyo, eka 2 Petro 2:4-10:

³ “Xikwembu a xi tsetselelanga tintsumi loko ti dyohile, kambe xi ti cukumetile [eTartarus], ni ku ti nghenisa emakorhweni ya xivandla xa vafi, laha ti pfaleriwaka kona ku fikela siku ra ku avanyisa; a xi tsetselelanga misava ya khale, kambe xi hlayisile Nowa mutwarisi wa leswo lulama, swin’we ni vanhu van’wana va 7, enkarhini lowu xi nga nisa ndhambi emisaveni ya vanhu lava a va nga ri na mhaka na xona; xi endlile leswaku miti ya Sodoma na Gomora, yi hundzuka nkuma yi avanyiseriwa ku lova, xi yi endla xitsundzuxo eka lava va nga ta ka va nga ri na mhaka na xona. Naswona xi ponisile Lota munhu wo lulama, loko yena a twile ku vava hi mhaka ya swilo swa manyala leswi a swi endliwa hi vanhu lavo biha; hikuva swilo leswi munhu loyi wo lulama a swi voneke ni ku swi twa loko a ri karhi a hanya exikarhi ka vona, swi n’wi karhatile ngopfu emoyeni wa yena lowo lulama masiku hinkwawo, a karhateka hi mhaka ya mahanyelo ya vona layo homboloka. Leswi swi vula leswaku [Yehova u tiva ku kutsula emiringweni lava nga ni xichavo, ni ku hlayisela lavo homboloka eku biwa hi siku ra ku avanyisa], ngopfu-ngopfu lava landzaka swa ntumbuluko wa vona wa laha misaveni, va navela ku titsakisa hi swilo swa thyaka, va sandza ni vuhosi bya Xikwembu.” Hi laha matsalwa lawa ma kombisaka ha kona, leswi humeleleke esikwini ra Nowa ni le nkarhini wa Lota swi vula swo tala eka hina.

Moya Lowu A Wu Hangalakile eSikwini Ra Nowa

4. Hi siku ra Nowa, ha yini Yehova a langute misava tanihi leyi onhakeke? (Psalma 11:5)

⁴ Mhaka ya matimu eka Genesa ndzima 6 yi hi byela leswaku esikwini ra Nowa misava a yi onhakile emahlweni ya Xikwembu xa ntiyiso. Ha yini? Hikwalaho ka vukari. Leyi a ku nga ri mhaka ya milandzu leyi hlawulekeke ya vukari bya vugevenga ntsena. Genesa 6:11 yi vika leswaku “misav̌a . . . a yi tele mona.”

5. (a) I langutelo rihi ra vanhu leri engeteleke vukari esikwini ra Nowa? (b) Xana Enoko u tsundzuxe yini mayelana ni ku pfumala xichavo eka Xikwembu?

⁵ Xana a swi vangiwa hi yini? Tsalwa leri tshahiweke eka 2 Petro ri kombetela eka vanhu lava nga chaviki Xikwembu. Ina, moya wa ku nga chavi Xikwembu a wu nghenelele etimhakeni ta vanhu. Leswi a swi nga katsi ku honisa nawu wa Xikwembu loku tolovelekeke ntsena, kambe ni xiyimo xa ku xandzukela Xikwembu hi xoxe.a Naswona loko vanhu va xandzukela Xikwembu, xana swi nga languteriwa leswaku va tirhisana kahle ni vanhu-kulobye? Hambi loko Nowa a nga si tswariwa, ku pfumala loku ka ku chava Xikwembu ana se a ku tele lerova Yehova a vangela Enoko ku profeta malunghana ni vuyelo. (Yuda 14, 15) Ku xandzukela ka vona Xikwembu entiyisweni a ku ta tisa ku avanyisa ka Xikwembu.

6, 7. I xiyimo xihi lexi katsaka tintsumi lexi a xi ri xivangelo-nkulu eka swiyimo swo biha leswi humeleleke emahlweni ka Ndhambi?

⁶ Nakambe a ku ri na nkucetelo wun’wana lowu engeteleke vukari bya masiku wolawo. Genesa 6:1, 2 yi yisa nyingiso eka wona loko yi ku: “Kute loko v̌anhu va sungule ku tala e henhla ka misav̌a, ni loko v̌anhwanyana v̌a v̌elekeriwe v̌ona, v̌ana v̌a Šikwembu v̌a v̌ona leŝaku v̌anhwanyana v̌a v̌anhu v̌a sasekile, kutani v̌a titekela ka v̌ona e v̌asati e šikari ka hikwav̌o lav̌a v̌a nga v̌a hlawula.” A va ri vamani vana lava va Xikwembu xa ntiyiso? A ku nga ri vanhu lava tolovelekeke. Vanhu a va ri karhi va vona vavasati vo saseka hi malembe xidzana yo tala naswona a va tekana na vona. Vana lava va Xikwembu a ku ri tintsumi leti ti tiambexeke miri wa nyama. Eka Yuda 6, va hlamuseriwa tanihi “tintsumi leti ti nga hlayisangiki xiyimo xa tona, kambe ti sukile laha a ku ri kaya ka tona ka xiviri.”—Ringanisa 1 Petro 3:19, 20.

⁷ Loko swivumbiwa leswi swi tlulaka vanhu leswi tiambexeke miri wa nyama tanihi vanhu swi va ni vuxaka ni vanhwanyana va vanhu, vuyelo byi ve byihi? “E mikarini leyo a ku ri kona misav̌eni e v̌anhu v̌a ŝihontlovila, loko v̌ana v̌a Šikwembu a v̌a yile ka v̌anhwana v̌a v̌anhu, v̌a kuma v̌ana ha v̌ona. Hi tona tinhenha le’ti nga twakala ngopfu e khale.” Ina, vana va ku hlangana koloko loku nga riki ka ntumbuluko a va ri Tinefelimi, tinhenha leti a ti tirhisa matimba ya tona lamakulu ku karhata van’wana.—Genesa 6:4.

8. Xana Yehova u titwise ku yini hi swiyimo swo biha emisaveni?

⁸ Xana xiyimo xi bihe ku fikela kwihi? Xi fikele laha “Yehova a [vonaka] leŝaku ku biha ka v̌anhu ku kurile misav̌eni, ni meehleketo hikwayo ya timbilu ta v̌ona yi kongoma ku biha ntsena hi masiku hikwawo.” Xana Xikwembu xi titwise ku yini hi leswi? “Kutani Yehova a v̌ilela hi leŝi a nga v̌umba v̌anhu e misav̌eni, a v̌av̌iseka ngopfu e mbilwini.” Leswi a swi vuli swona leswaku Xikwembu xi vone onge xi endle xihoxo hi ku vumba vanhu. Ematshan’weni ya sweswo, xi tisorile hi leswi endzhaku ka loko xi vumbe vanhu, ku tikhoma ka vona ku veke loko biha lerova xi boheka ku va herisa.—Genesa 6:5-7.

Ndlela Leyi Yiseke Eku Kutsuriweni

9. (a) Ha yini Yehova a endlele Nowa tintswalo? (b) Hi rihi rungula ra le mahlweni leri Xikwembu xi ri nyikeke Nowa?

⁹ Loko a ri Nowa, “a kuma tintŝalo e mahlweni ka Yehova. . . . Noa a a ri munhu l’a lulameke ni l’a sasekeke e nkarini wa yena; Noa a ṭhama a famba ni Šikwembu [xa ntiyiso].” (Genesa 6:8, 9) Kutani Yehova u nyike Nowa xitsundzuxo ka ha ri emahlweni leswaku A a ta tisa ndhambi ya misava hinkwayo ivi a n’wi lerisa leswaku a aka ngalava. Vanhu hinkwavo, handle ka Nowa ni ndyangu wa yena, a va ta kukuriwa evuandlalweni bya misava. Hambi ku ri swivumbiwa swa swiharhi a swi ta herisiwa, handle ka leswi nga riki swingani leswi yimeleke muxaka wun’wana ni wun’wana, leswi Nowa a a ta nghena na swona engalaveni.—Genesa 6:13, 14, 17.

10. (a) Hi wahi malunghiselelo lawa a ma fanele ma endliwa hi ku langutela ku ponisiwa naswona a wu kurise ku yini ntirho lowu? (b) I yini lexi xiyekaka mayelana ni mukhuva lowu Nowa a hetisiseke xiavelo xa yena ha wona?

¹⁰ Vutivi lebyi bya le mahlweni byi veke vutihlamuleri byo tika eka Nowa. Ngalava a yi fanele yi akiwa. A yi fanele yi languteka ku fana ni bokisi lerikulu, ri ri ni vundzeni bya kwalomu ka tikhubiki mitara ta 40 000. Nowa a a fanele a yi tata hi swakudya ivi a hlengeleta swiharhi ni tinyenyana, “nyama hikwayo le’yi nga ni ku hefemula,” leswaku swi hlayiseka. A ku ri ntirho lowu a wu ta heta malembe yo tala ya ntirho. Xana Nowa u hlamurise ku yini? “A endlisa ŝeŝo; a endla hikwaŝo hi laha Šikwembu ši ṅwi leriseke ha kona.”—Genesa 6:14-16, 19-22; Vaheveru 11:7.

11. Malunghana ni ndyangu wa yena, i vutihlamuleri byihi bya nkoka lebyi Nowa a a ri na byona?

¹¹ Loko a ri karhi a endla ntirho wolowo, Nowa a a fanele a tirhisa nkarhi wun’wana ku aka vumoya bya ndyangu wa yena. A va fanele ku sirheleriwa leswaku va nga amukeli tindlela ta vukari ni moya wa ku xandzuka wa vanhu lava va rhendzeleke. A swi ri swa nkoka leswaku va nga katseki swinene eka timhaka ta siku na siku ta vutomi. Xikwembu a xi va nyike ntirho naswona a swi ri swa nkoka leswaku va titoloveta wona. Ha swi tiva leswaku ndyangu wa Nowa wu amukerile ndzetelo wa yena ni ku avelana ripfumelo na yena hi mhaka ya leswi Nowa, nsati wakwe, majaha ya vona ha manharhu ni vasati va majaha lawa—nhungu wa vanhu loko va hlanganile—ku vulavuriwaka hi vona tanihi lava amukeriweke eMatsalweni.—Genesa 6:18; 1 Petro 3:20.

12. Hi laha swi kombisiweke ha kona eka 2 Petro 2:5, i vutihlamuleri byihi lebyi Nowa a byi hetisiseke hi ku tshembeka?

¹² Nowa nakambe a a ri na vutihlamuleri byin’wana—ku tsundzuxa hi Ndhambi leyi taka ni ku tivisa leswaku ha yini yi ta. Swi le rivaleni leswaku u hetisise vutihlamuleri byebyo hi ku tshembeka, hikuva eRitweni ra Xikwembu ku vulavuriwa hi yena tanihi “mutwarisi wa leswo lulama.”—2 Petro 2:5.

13. I swiyimo swihi leswi a swi langutane na Nowa loko a ri karhi a hetisisa xiavelo xa yena xo huma eka Xikwembu?

¹³ Kutani anakanya hi swiyimo leswi Nowa a hetisiseke xiavelo xa yena ehansi ka swona. Tiveke exiyin’weni xa yena. Loko a wu ri Nowa kumbe xirho xa ndyangu wa yena, a wu ta va u rhendzeriwe hi vukari lebyi a byi hlohleteriwa hi Tinefelimi ni vanhu lava nga chaviki Xikwembu. A wu ta va u langutane ni nkucetelo wa tintsumi leti xandzukeke hi ku kongoma. Loko u ri karhi u tirha engalaveni, a wu ta va xihlekiso. Naswona lembe na lembe loko u ri karhi u tsundzuxa hi Ndhambi leyi taka, a wu ta kuma leswaku vanhu a va khomeke swinene hi timhaka ta vona ta siku na siku ta vutomi lerova “va nga anakanyi nchumu”—hi leswaku, “ku kondza loko ndhambi leyi ya mati yi ta, kutani yi va kukula hinkwavo.”—Matewu 24:39; Luka 17:26, 27.

Xana Ntokoto Wa Nowa Wu Vula Yini Eka Wena?

14. Ha yini hina namuntlha hi nga swi kumi swi nonon’hwa ku twisisa xiyimo lexi Nowa ni ndyangu wa yena va langutaneke na xona?

¹⁴ Xiyimo xo tano a xi nonon’hwi eka vahlayi va hina vo tala ku xi anakanya. Ha yini? Hikuva swiyimo swa siku ra hina swi fana swinene ni leswiya a swi ri kona emasikwini ya Nowa. Yesu Kriste u vule leswaku leswi a swi fanele ku languteriwa. Eka vuprofeta bya yena lebyikulu mayelana ni nkarhi wa vukona bya yena emakun’wini ya mafambiselo ya swilo, Yesu u vhumbile: “Ku vuya ka N’wana-wa-Munhu ku ta fana ni leswi humeleleke emasikwini ya Nowa.”—Matewu 24:37.

15, 16. (a) Xana i ntiyiso ku fikela kwihi leswaku tanihi le sikwini ra Nowa misava namuntlha yi tale hi vukari? (b) Malandza ya Yehova hi ku hlawuleka ma ve ehansi ka vukari byihi?

¹⁵ Xana swi humelerise xisweswo ke? Xana misava namuntlha yi tale hi vukari? Ina! Vanhu vo tlula dzana ra timiliyoni va file etinyimpimi eka lembe xidzana leri. Van’wana va vahlayi va hina va byi tokotile vuyelo bya leswi. Hambi vo tala swinene va xungetiwe hi tinsulavoya leti laveke ku va tekela mali ya vona kumbe tinhundzu tin’wana. Naswona vantshwa va ve exikarhi ka vukari exikolweni.

¹⁶ Hambi swi ri tano, malandza ya Yehova ma tokota leswi tlulaka makhombo ya nyimpi ni vukari bya vugevenga lebyi tolovelekeke. Nakambe va le hansi ka vukari hi mhaka ya leswi va nga riki xiphemu xa misava kambe va tiyimiseleke ku va vanhu va ku chava Xikwembu. (2 Timotiya 3:10-12) Minkarhi yin’wana vukari byebyo byi teka xivumbeko xa ku susumetiwa kumbe ku makariwa; minkarhi yin’wana byi katsa ku onhiwa ka nhundzu, ku biwa ka tihanyi hambi ku ri ku dlawa.—Matewu 24:9.

17. Xana ku pfumala xichavo eka Xikwembu ku tele namuntlha? Hlamusela.

¹⁷ Loko va ri karhi va nghenela vukari byo tano, vanhu lava nga chaviki Xikwembu, minkarhi yin’wana va vule ku nga xiximi ka vona Xikwembu hi matimba. Endhawini yin’wana eAfrika, maphorisa ma te: “Hulumendhe i ya hina. Fambani eka Xikwembu, loko xi ri kona ivi mi xi kombela leswaku xi ta xi ta mi pfuna.” Emakhotsweni ni le minxaxeni ya nxaniso, Timbhoni ta Yehova ti langutane ni vanhu vo tanihi Baranowsky, eSachsenhausen, Jarimani, loyi a rhukaneke a ku: “Ndzi lwa na Yehova. Hi ta vona leswaku i mani la nga ni matimba, mina kumbe Yehova.” Endzhakunyana, Baranowsky u vabyile ivi a fa; kambe van’wana va ya emahlweni va kombisa langutelo leri fanaka. Vachaviseki lava nghenelaka tinyimpi ta nxaniso a hi vona ntsena lava kombisaka ku xandzuka eka Xikwembu. Emisaveni hinkwayo, malandza ya Xikwembu ma twa ni ku vona swilo leswi kombisaka leswaku lava va nghenelaka eka swona a va xi chavi Xikwembu etimbilwini ta vona.

18. Mimoya leyo biha yi engetela eka xiyimo lexo biha xa vanhu hi ndlela yihi?

¹⁸ Emasikwini lawa lama fanaka swinene ni lawaya ya nkarhi wa Nowa, na hina hi tokota ku kavanyetiwa hi mimoya leyo biha. (Nhlavutelo 12:7-9) Mademona lawa i tintsumi leti fanaka leti tiambexeke miri ya nyama ivi ti tekana ni vavasati emasikwini ya Nowa. Loko Ndhambi yi tile, vasati ni vana va tona va herisiwile, kambe tintsumi leti to homboloka ti boheke ku tlhelela exivandleni xa moya. A ti nga ha ri na ndhawu enhlengeletanweni leyi tengeke ya Yehova kambe ti pfaleriwe eTartarus, xiyimo xa munyama lowukulu, lexi susiweke eku voningeni ka Xikwembu. (2 Petro 2:4, 5) Hi ku tirha ehansi ka nkongomiso wa Sathana, ti hambete ti hlayisa ku tirhisana lokukulu na vanhu, naswona hambi leswi ti nga ha swi kotiki ku tiambexa miri wa nyama, ti endle matshalatshala yo lawula vavanuna, vavasati hambi ku ri vana. Swin’wana swa leswi swi endliwa hi mikhuva ya vungoma. Ti tlhela ti susumetela vanhu leswaku va dlayana hi tindlela leti tlulaka ku twisisa ka vanhu. Kambe a hi sweswo ntsena.

19. (a) Mademona hi ku hlawuleka ma kongomisa rivengo ra wona eka vamani? (b) Xana mademona ma ringeta ku hi susumetela ku endla yini?

¹⁹ Bibele yi paluxa leswaku mademona ma lwa ni lava “hlayisaka milawu ya Xikwembu ni ku humesa vumbhoni bya Yesu.” (Nhlavutelo 12:12, 17) Mimoya leyi yo biha i vahlohloteri lavakulu va ku xanisiwa ka malandza ya Yehova. (Vaefesa 6:10-13) Yi tirhisa ndlela yihi na yihi leyi kotekaka ku tshikilela kumbe ku xisa vanhu vo tshembeka leswaku va tshova ku tshembeka ka vona eka Yehova ni leswaku va tshika ku twarisa Mfumo wa Yehova na Yesu tanihi Hosi ya Vumesiya.

20. Mademona ma ringetisa ku yini ku sivela vanhu ku ntshunxeka eka vulawuri bya wona? (Yakobo 4:7)

²⁰ Mademona ma ringeta ku kavanyeta vanhu lava languteleke ntshunxeko eka nkucetelo wa wona lowu tshikilelaka. Khale ka mungoma wa le Brazil u vika leswaku loko Timbhoni ti fika ekaya ra yena, marito ya mademona ma n’wi byele leswaku a nga pfuli nyangwa; kambe u pfurile ivi a dyondza ntiyiso. Etindhawini to tala mademona ma tirhisa valoyi hi ku kongoma leswaku va ringeta ku yimisa ntirho wa Timbhoni ta Yehova. Hi xikombiso, emutini wa le Suriname, vakaneti va Timbhoni ta Yehova va ye eka mungoma loyi a a tiveka swinene hi vuswikoti byo vangela rifu ra xihatla eka vanhu hi ku va kombetela hi nhonga ya masingita ntsena. A ri na varhendzeri va yena lava cinaka ni vachayi va tingoma, mungoma la nga ni demona, u kongome Timbhoni ta Yehova. U vule marito ya yena ya masingita ivi a kombetela nhonga ya yena eka vona. Vaaki va muti a va langutele ku vona Timbhoni ti wa, ti fa, kambe a ku ri mungoma la titivaleke kutani u boheke ku beriwa moya hi vaseketeri va yena lava khomiweke hi tingana.

21. Tanihi le sikwini ra Nowa, xana vanhu vo tala va titwisa ku yini hi ku chumayela ka hina naswona ha yini?

²¹ Hambi ku ri etindhawini leti vuloyi ni vungoma swi nga tirhisiwiki erivaleni, Mbhoni yin’wana ni yin’wana ya Yehova yi swi tokotile leswaku swi njhani ku ringeta ku chumayela vanhu lava va khomekeke swinene hi timhaka ta siku na siku ta vutomi lerova va nga lavi ku karhatiwa. Hi laha a swi ri ha kona esikwini ra Nowa, vo tala ‘a va na mhaka.’ (Matewu 24:37-39) Van’wana va nga navela vun’we ni mintirho ya hina. Kambe ntirho wa hina wa moya wa ku aka—lowu katsaka tiawara ta dyondzo ya munhu hi xiyexe, ku hlanganyela minhlangano nkarhi na nkarhi ni ntirho wa nsimu—i vuhunguki eka vona. Va hlekula ntshembo wa hina eka switshembiso swa Rito ra Xikwembu hi mhaka ya leswi va hlongorisaka swilo leswi vonekaka ni ku titsakisa ku tlula mpimo loku va nga ku kumaka sweswi.

22, 23. Swiendlakalo swa siku ra Nowa swi nyikela xitiyisekiso lexi twalaka xa leswaku Yehova u ta kutsula vanhu lava chavaka Xikwembu endzingweni hi ndlela yini?

²² Xana malandza ya Yehova lama tshembekeke ma ta xanisiwa hi laha ku nga heriki hi lava va nga xi rhandziki Xikwembu? Doo! Xana ku humelele yini esikwini ra Nowa? Hi nkongomiso wa Xikwembu, Nowa ni ndyangu wa yena va nghene engalaveni leyi heleke. Kutani, hi nkarhi lowu vekiweke wa Xikwembu, “ŝihlov̌o hikwaŝo ŝa mpfhuka lo’wukulu ŝi pfelela, ni tinyangwa ta mati ya tilo ti pfuleka.” Ndhambi yi ye emahlweni ku kondza tintshava ti pfaleka. (Genesa 7:11, 17-20) Tintsumi leti siyeke ndhawu ya tona leyi faneleke ti boheke ku siya miri ya tona ya nyama ivi ti tlhelela exivandleni xa moya. Tinefelimi ni misava hinkwayo ya vanhu lava nga chaviki Xikwembu, ku katsa ni lava a va kaneta swinene ku amukela xitsundzuxo xa Nowa, va herisiwile. Hi tlhelo rin’wana, Nowa ni nsati wa yena ni majaha ya vona manharhu ni vasati va majaha ya vona va ponisiwile. Xisweswo, Yehova u kutsule Nowa ni ndyangu wa yena endzingweni lowu va wu tiyiseleke hi ku tshembeka hi malembe yo tala.

²³ Xana Yehova u ta endla leswi fanaka eka vanhu lava chavaka Xikwembu namuntlha? A swi kanakanisi nikantsongo. U tshembisile, naswona a nge hembi.—Tito 1:2; 2 Petro 3:5-7.

[Nhlamuselo ya le hansi]

Wa Tsundzuka Xana?

◻ Petro u swi kombise njhani leswaku Yehova wa swi tiva ku kutsula vanhu lava chavaka Xikwembu endzingweni?

◻ I yini leswi engeteleke vukari esikwini ra Nowa?

◻ Hikwalaho ka Ndhambi ya misava hinkwayo leyi a yi tshinela, hi byihi vutihlamuleri lebyi Nowa a a ri na byona?

◻ Hi kwihi ku yelana ni siku ra Nowa loku hi ku vonaka enkarhini wa hina?

[Xifaniso lexi nga eka tluka 12]

Ku aka ngalava ku katse malembe yo tala ya ku tirha hi matimba

[Xifaniso lexi nga eka tluka 13]

Nowa u tirhise nkarhi wun’wana ku kurisa vumoya bya ndyangu wa yena