Xiviko Xa Vahuweleri Va Mfumo

◻ MUAPOSTOLA Yohane u te: “Hi nga rhandzaneni hi marito kumbe hi ku vulavula ntsena, kambe a ku ve hi mintirho ni ntiyiso.” (1 Yohane 3:18) Yesu u vule leswaku ‘hi fanele ku rhandza munhu-kulorhi, kukota loko hi tirhandza.’ (Matewu 22:39) Ku komba rirhandzu hi xiendlo swi bumabumela ntiyiso, tanihi laha ntokoto lowu landzelaka wa le Britain wu kombaka ha kona.

Loko Pauline a endzele mana wa yena, loyi a a lamarile, a ku nga ri na munhu un’wana kwalaho. Kambe enkarhini lowu, loko a ri karhi a nghena endlwini, u twe muchini wo hlantswa wu ri karhi wu tirha naswona un’wana endlwini ya le henhla a ri karhi a tirhisa muchini wo kukula. “Ku humelela yini, i mani la nga laha?” a vutisa mana wakwe. Mana wakwe u n’wi hlamusele leswaku Timbhoni ta Yehova ti tile endlwini ya yena, ti vone khombo ra yena, kutani ti yima ti n’wi pfuna. Endzhaku ka loko va hetile ntirho wa yindlu ni loko va lunghisile swakudya, va tshame ehansi va ku: “U lunghekile ke?” “Ndzi lunghekela yini?” ku vutisa Pauline. Mana wa yena u hlamusele leswaku u pfumele dyondzo ya Bibele. Pauline a a kanakana ku tshama, kambe leswi a humaka ekule, u vutise loko a swi ta va swi lulamile eka yena ku joyina dyondzo. U yi tsakele ngopfu lerova a lunghiselela ku ta hi siku leri fanaka vhiki rin’wana ni rin’wana leswaku a ta va kona nkarhi hinkwawo. Eku heteleleni, munghana u tihlanganise na yena, naswona sweswi va khuvuriwile hinkwavo. Hikwalaho ka dyondzo leyi yo sungula, swirho swa khume swa ndyangu lowu fanaka sweswi i Timbhoni ta Yehova! Ina, pfuna “hi mintirho”!

Mufundhisi eNew Guinea U Amukela Ntiyiso

◻ Esikwini ra Yesu vaprista van’wana va amukele dyondzo ya Yesu. Vafundhisi va timbilu letinene namuntlha na vona va endla tano, tanihi laha ntokoto lowu humaka etimbaleni ta le henhla ta New Guinea, lowu vikiweke hi mulanguteri wa xifundza wu kombeke ha kona. Wa hlamusela: “Jaha leri dyondzekeke kahle, mufundhisi wa Pentekosta, a a aka kereke leyintsongo ekusuhi swinene na Holo ya Mfumo. Makwerhu wa bandlha rero u veke vumbhoni eka yena, naswona u vonake a ri ni vunghana. Endzhakunyana ka leswi, ndzi endzele bandlha kutani ndzi tshama ni makwerhu egondzweni leri nga kusuhi na yindlu ya mufundhisi. Vusiku byo sungula endzhaku ka loko ndzi fikile, jaha leri ri tile endlwini ya hina ni Bibele, kun’we ni ntlawa lowukulu wa bandlha ra ka vona. Hinkwavo a va lava ku twa rungula ra Mfumo. U vutise swivutiso swo tala, naswona bulo ri fambe kahle kukondza ku va vusiku. Madyambu man’wana ni man’wana ya ku endza ka mina, yena ni vanhu van’wana lava tsakelaka va tile leswaku swivutiso swa vona leswi engetelekeke swi ta hlamuriwa. Ndzi n’wi rhambele enhlengeletanweni ya xifundza vhiki leri landzeleke, naswona u ve kona kun’we ni makwerhu loyi a vekeke vumbhoni eka yena ro sungula. Wanuna loyi u hambetile ni dyondzo ya yena ya Bibele, a tshika Kereke ya Pentekosta, naswona sweswi i muhuweleri wa mahungu lamanene wa nkarhi hinkwawo.”

Hakunene, i ku rhandza ka Xikwembu “leswaku vanhu hinkwavo va ponisiwa, va fika laha va kotaka ku tiva leswi nga ntiyiso.”—1 Timotiya 2:4.